به‌ڕێز كه‌ریم په‌رویزی‌ بۆ سیڤل:

كورد بەتەنیا هیچی پێناكرێت

 

 

سڤیل: كاوە گەرمیانی

كەریم پەرویزیی ئەندامی مەكتەبی سیاسیی حیزبی دیموكراتی كوردستانی ئێران، لەدیمانەیەكی تایبەتدا دەڵێ، كورد بەتەنیا هیچی پێناكرێت، لەئێرانێك كە بەبڕوای ئەو لەسەر شێوازی تۆتالیتالیزمی ستالینی بەڕەنگێكی ئایینی دروست كراوە.

كەریم پەرویزیی ئەندامی مەكتەبی سیاسیی حیزبی دیموكراتی كوردستانی ئێران، كاتێك باس لەبوونی ئۆپۆزسیۆن دەكات، باس لەدەسەڵاتی بەرامبەریش دەكات، ئەو پێیوایە كۆمەڵێك وڵات هەن، رێگای ئۆپۆزسیۆنی جددی نادەن، لەوانە نموونەی ئێران دەهێنێتەوە، دەڵێ "ئەگەر سەیری ئێران بكەین، لەسەر شێوازی تۆتالیتاری ستالینی دانراوە، بەڵام بەڕەنگێكی ئایینی، بۆیە ئەگەر لەبەرپرسانی رژێمی ئێران بپرسی بۆچی مافی كورد نادەن، ئەوا دەڵێن كورد‌و فارس هیچ جیاوازییەكیان نییە، ئەوە ئەوان راست دەكەن، چونكە ئەو نەتەوانەی لەئێران دەژین بەیەكەوە دەچەوسێنەوە".

بەبڕوای كەریم پەرویزی ئۆپۆزسیۆنی جددی لایەنگرانی كەروبی‌و موسەوی نین، كەریم دەڵێ "كاتێك ئەوان باسی چاكسازی‌و ریفۆرم دەكەن، دەبێت وریا بین، ئەوان چۆن ئەو وشەیە بەكاردەهێنن". كەریم پەرویزی بۆ لێكدانەوەی وشەی چاكسازی دەڵێ، "كەروبی‌و موسەوی دوو كەسی ناو سیستەم‌و رژێمی ئێرانن، ئەوان كە دەڵێن ریفۆرم دەكەین، بەمانای دەیانەوێت رژێمی ئێران وەك سەرەتاكانی چاك بكەنەوە، كە ئەو كاتیش بەهەزارەها خەڵك دەكوژرا".

لەگەڵ ئەوەی پەروێزی بڕوای بەریفۆرمخوازەكان نییە، بەڵام لەهەمان كاتدا ئەو خۆپیشاندان‌و كێشانەی ئێران بەئیجابی وەسف دەكات، چونكە "رژێم لاواز دەكات"، كەریم پەرویزی لەبارەی كوردەوە دەڵێ، "كورد بەتەنیا ناتوانێت هیچ شتێك لەئێران بەدەستبهێنێ، بۆیە پێویستی بەنەتەوەكانی تر هەیە لەناو ئێران". كورد لە نێوان شەڕ‌و ئاشتیخوازیدا چی چنگ كەوتووە، ئەوە پرسیارێكە لەو كاتە دەكرێ، كە باسی رۆژهەڵاتی كوردستان بكرێت، كەریم پەرویزی گوتی "كورد لەئێراندا هەوڵی داوە بەرێگای ئاشتیخوازانە داواكانی بێنێتە ئاراوە‌و لەساڵەكانی 1979‌و 1980ـدا زۆر هەیئەت‌و دانیشتن‌و دیالۆگ لەگەڵ رژێمی تازە بەدەسەڵات گەیشتوو بەڕێوەچوون، بەڵام هەر وەك گوتمان كۆماری ئیسلامی هیچ جیاوازییەكی پێ قەبووڵ نەدەكرا‌و هاتبوو بۆ سڕینەوە‌و وەلانانی هەموو دەنگ‌و رەنگە جیاوازەكان، بۆیەش قەت بڕوای بەوە نەبوو، كە نەتەوەی جیاواز لەئێران هەیە‌و دەبێ مافیان بداتێ، لەچوارچێوەی ئوممەی واحیدەی ئیسلامیدا باوەڕی بەوە هەبوو، كە قەوم‌و قەبیلە‌و تایفەی جیا هەیە، كە پێویست بەوە ناكا، هیچ مافێكی سیاسییان هەبێ‌و لەراستیدا كۆماری ئیسلامی پڕۆژەی تۆتالیتاریزمی ستالینی، بەڵام لەسەر بنەمایەكی ئایینی بوو، بۆیەشە كە لەبەرپرسانی رژێم دەپرسی، دەڵێن كورد‌و فارس‌و تورك و.. جیاوازییان نییە، قسەكەشیان راستە، ئەوان لەسەركوتكردن‌و كوشتن‌و بڕیندا جیاوازی ناكەن‌و پڕۆژەی ویلایەتی فەقیهیان هەیە، كە هەموو خەڵك بە مەڕ‌و ماڵات دەبینن".

بەبڕوای پەروێزی دەبێت كار‌و چالاكی كورد لەگەڵ ئەو نەتەوانە بێت، كە خۆیان لەچوارچێوەی كۆنگرەی نەتەوەكانی ئێران كۆكردۆتەوە، كەریم پەرویزی گوتی "بەڵام لەراستیدا ئێران لە 6 نەتەوەی سەرەكی پێكهاتووە‌و هەركام لەنەتەوە مافخوراوەكان خوازیاری مافەكانی خۆیانن‌و تا ئەو مافانەیان نەدرێ‌و جێبەجێ نەكرێ، لەئێراندا سیستمی سەقامگرتوو نایەتە سەركار‌و بەردەوام لەژێر هەڕەشەی داڕزاندا دەبێ، كورد بەتەنیا ناتوانێ گۆڕانی قووڵ لەئێران دروست بكا، بەڵام ئەو پوتانسیلە نەتەوایەتییە هەیە، كە شانبەشانی نەتەوەكانی دیكە خەباتی دیموكراتیك‌و رزگاریخوازانە بەڕێوە ببا‌و سیستمی دادپەروەرانە بێنێتە ئاراوە، هەر وەك ئێستا رێكخراوێك بەناوی كۆنگرەی نەتەوەكانی ئێرانی فیدراڵ هەیە، كە هێز‌و لایەنە سیاسییەكانی سەر بەنەتەوەكانی كورد‌و تورك‌و عەرەب‌و بەلووچ‌و توركمان لەوێدا هاوپەیمان‌و هاوئاهەنگن".