مێژوو بە پێچەوانەی ویستی شۆڤینییەكان هەنگاو دەنێ
كەریم پەرویزی
ئێستاش كە دوای چەند مانگ لە ناڕەزایەتیدەربڕینی خەڵك،
هەندێك كەسو لایەنی سیاسیی بەناو ئازادیخواز كە لە
بنەما هزرییەكانیاندا
تەنیا شمشێرێكی ژەنگاوییان پێویستە تاكوو سەری هەموو
وشە غەیرە فارسییەكان ببڕنو پێیان وابوو كە بە
پێداهەڵگوتنی دڵخوازی خۆیان دەتوانن بزووتنەوەی
ناڕەزایەتیی خەڵك بە خەیاڵی خاوی ژەنگاربەستووی خۆیان
پێناسە بكەنو بەرگی هاوڕەنگی چەشنی لاپەڕە كۆنو
رزیوەكانی بیری پاوانخوازیو حاشالێكەریو سڕینەوەی
جیاوازییەكانی بەبەردا بكەن، لەو دەمەیدا كە لە ژێر
زەبری گورزی توندی ویلایەتی فەفقیهدا
گاڵتە بە هەموو ئاواتو مێژووەكەیان دەكرێ، ئەوانە لەم
كاتەشدا
كە نەك هیچیان دەست نەكەوتووە، بەڵكوو هیوای دەسكەوتیان
لـێ كاڵتر دەبێتەوە، بەڵام لە ژێر ئەو هەموو گوشارەشدا،
پڕوپاگەندەی ئەندێشەی پاوانخوازیو شۆڤینیی خۆیان
دەكەنو خەڵكی دیكەو نەتەوە مافپێشێلكراوەكان بە
جوداییخوازو خوازیارانی لەتو پەتكردنی ئێران
دەناسێننو لە پەلەقاژەی مەرگی ئەندێشە
پاوانخوازانەكانیشدا
چاو لە نەتەوەكانی ئێران سوور دەكەنەوە!
لەم رۆژانەدا لە ماڵپەڕی "تلاش"، وتووێژێك لەگەڵ داریووش
هومایون بڵاو بۆتەوە كە سیڕەی لە هەموو نەتەوەكان
گرتووەو دەسڕێژی بیرە كۆنەكانیان لـێ دەكاو گوایە
وەكوو دۆن كیشووت بەرەو دێوو درنجان هەڵمەت دەبا.
بەڕێز هومایون لەو وتووێژەدا كە وەڵامی ئەوە دەداتەوە
بۆچی بەناو بزووتنەوەی سەوز تەنیا لە تارانو یەك دوو
شاردا قەتیس مایەوەو بەتایبەت بۆچی نەتەوە
ستەملێكراوەكانی ئێرانی پێوە پەیوەست نەبوو؟ وەڵامی
كەسانێك كە دەڵێن چوونكە ویستو داخوازیی ئەو نەتەوانەی
تێدا
لەبەرچاو نەگیرابوو، بە قسەو لێدوانێكی جوداییخوازانەو
قەومگەرایانە دەناسێنێ كە چوونكە رەخنە لە بزووتنەوەی
سەوز دەگرن، بەردیان بە كەعبەدا داوەو ئەوانە هەر ئەو
كەسانەن كە دەیانەوێ ئێران لەتو پەت بكرێو كەس مافی
ئەوەی نیە كە قسە لەمەڕ هیچ كردەوەیەكی سیاسی،
كۆمەڵایەتی، كولتووری، ئابووری، مێژوویی لە تاران بكا،
چوونكە هەموو نەتەوەكانی ستەملێكراوی ئێران لە ژێر
سێبەری هوومایونیی تارانو ناوەندنشینەكاندایە كە
دەتوانن مۆڵەتی هەناسەدانیان هەبێ. بەڕێز هومایوونی
تارێندراو لە تاران، هێرش دەباتە سەر ئەو چەپانەش كە
هاوكات لەگەڵ وشەی قەوم، وشەی نەتەوەش بەكار دێننو
مێژووی چەپیش بە مێژووی خیانەتو لە خزمەت بیانیدا
پێناسە دەكا.
بەڵام راستییەكان شتێك دەڵێن كە هومایوونو كەسانی
هاوڕای ئەو، خۆشیان بوێ یان ناخۆش، نەتەوەكانی ئێران
وشیاریی سیاسیی نەتەوەیییان هەیەو دەیانەوێ لە
چوارچێوەی ئێرانێكی دێموكراتیكی فێدراڵدا بژین، نە
دەرەتان بۆ بیری پاوانخوازی دەمێنێتەوە نە بۆ هزری
شۆڤینی.
رۆژنامەی كوردستان ـ528
