هەڵە
  • JFolder::create: Could not create directory

حیزبی دێموکرات: درێژە بە خەباتی شار‌و شاخ دەدەین

چاپکردن

ناوەندی سیاسیی حیزبی دێموکراتی کوردستانی ئێران لە ٤٠ـەمین ساڵی فەرمانی جیهادی خومەینی بۆ سەر خەڵکی کوردستان لە بەیانییەیەکدا بڵاوی کردووە ئێمە درێژه بە خەباتی شار‌و شاخ لە هەموو بوارەکاندا دەدەین.

دەقی بەیانییەکە بەم چەشنەیە:

 

 

farmandaei_pdki_pm_2


چل ساڵ بە سەر دەرچوونی فەرمانی جیهادی ڕوحوڵڵا خومەینی بۆ سەر خەڵکی کوردستان تێدەپەڕێ.

خەڵکی کوردستان لە شۆڕشی ١٣٥٧ هەتاوی (١٩٧٩ی زایینی) بە مەبەستی ڕووخاندنی ڕێژیمی شا چالاکانە بەشداریی‌و فیداکاریی کرد، بەو هیوایە کە دیکتاتۆری‌و سیاسەتی سەرکوت‌و هەڵاواردن دژ بە گەلی کورد دوایی پێدێ‌و کورد لە سیستمی سیاسیی نوێدا بەو ماف‌و ئازادیانە دەگا کە لە ڕێژیمی پاشایەتیدا لێی پێشێل‌و زەوت کرابوو.

بەداخەوە ئەو ئاواتە نەهاتە دی‌و زۆری پێنەچوو کە سەرکوت‌و دیکتاتۆریی مەزەهەبی باڵی بە سەر وڵاتدا کێشایەوە.

بەپێچەوانەی تاران‌و زۆربەی ناوچەکانی دیکەی ئێران، لە کوردستان شۆڕشێکی گەورەی پێشکەوتنخوازی نەتەوەیی- دێموکراتیک بەڕێوە دەچوو. شۆڕشێک کە لە ئامانج‌و ماهییەتدا بەتەواوی جیاواز بوو لەگەڵ شوڕشی ئیسلامی بە ڕێبەرایەتیی ڕوحوڵڵا خومەینی.

خومەینی‌و دەسەڵاتدارانی تازە لە تاران باش دەیانزانی کە ڕاپەڕین لە کوردستان لە هیچ بارێکەوە، بێجگە لە ڕووخانی ڕێژیم شادا، وێکچوونێکی لەگەڵ شۆڕشە ئیسلامییەکەی ئەوان نیە‌و ڕێگایەکی جیاوازی گرتووەتە بەر.

ئامانجی شۆڕشی کوردستان دابینکردن‌و پاراستنی ئازادی‌و موناسباتی دێموکراتیک‌و ماف‌و کەڕامەتی هەموو چین‌و توێژەکانی کۆمەڵگا بوو، بەبێ لەبەرچاوگرتنی جیاوازیی نەتەوەیی‌و مەزهەبی‌و ڕەگەزی.

لە کوردستان ئازادییە سیاسی‌و دێموکراتیکەکان ڕێزیان لێدەگیرا‌و دەپارێزران، تێکۆشانی حیزب‌و ڕێکخراوە سیاسییەکان، ڕاگەیەنەرە گشتییەکان، دامەزراندنی ڕێکخراوگەلی سێنفی‌و مەدەنی ئازاد بوون، خەڵک بە ئازادی نوێنەرانی خۆیان لە شووڕاکاندا هەڵدەبژارد.

ژنانی کوردستان وەک هاونیشتمانیی دەرەجە دوو سەیر نەدەکران‌و کەس نەیدەتوانی شێوەژیان‌و جلوبەرگ‌و شێوەی هەڵسووکەوتیان بۆ دیاری بکا‌و بەسەریاندا بسەپێنێ.

ئازادی لە کوردستان سنووردار نەبوو‌و ڕێگای بەشدارییکردن لە ژیانی سیاسی‌و کۆمەڵایەتی بۆ ژن‌و پیاو ئاواڵە بوو. کەس بە تاوانی جیاوازیی بیروباوەڕی سیاسی یان مەزهەبی نەدەکەوتە بەر هێرش‌و تیغی سانسۆرەوە.

هەر کەسایەتی‌و حیزب‌و ڕێکخراوێک کە لە تاران ئازادیی تێکۆشانی لێ سنووردار دەکرایەوە‌و دەکەوتە بەر هێرشی دیکتاتۆریی نوێ، ڕووی دەکردە کوردستان‌و لە کوردستان، بە دڵفرەوانی‌و باوەشی ئاواڵەوە پێشوازی لێدەکرا‌و بە ئازادی‌و بە بێ ترس کار‌و تێکۆشانی سیاسیی خۆی بەڕێوە دەبرد. کوردستان بەحەق ناوی مەتەرێزی ئازادیی ئێرانی لێنرابوو.

خەڵکی کوردستان ئەوکاتیش هەر خوازیاری ئیستقراری نیزامێکی دێموکراتیک‌و سێکۆلار بوون کە واقعییەتی فرەنەتەوەبوون‌و فرەمەزهەبیبوونی کۆمەڵگای ئێران بسەلمێنێ، ستەمی سیاسی‌و نەتەوایەتی لەسەر گەلانی بندەست هەڵبگیرێ‌و ماف‌و ئازادییەکانیان لە چوارچێوەی ئێرانێکی دێموکراتیکدا بە ڕەسمی بناسرێ.

ئەو دۆخە سیاسییە‌و هەمووی ئەو بەها‌و ئازادیانە ناتەبا بوون لەگەڵ بیری تەسک‌و باوەڕی دواکەوتوانە‌و ئازادیکوژی حکوومەتی ئیدئولوژیکیی تازە. بۆیە کوردستان ببوو بە چقڵی چاوی کۆنەپەرستانی حاکم لە تاران.

ئەوە بوو کە ڕێژیمی ئیسلامی زەرفییەت‌و تەحەمولی گەشەسەندن‌و جێگیربوونی بیری ئازادیخوازیی لە کوردستان نەبوو‌و خومەینی لە ٢٨ی گەلاوێژی ١٣٥٨ی هەتاوی (١٩ی ئوگستی ١٩٧٩ی زایینی) فەرمانی جیهادی بە دژی خەڵکی کوردستان ڕاگەیاند.

 

farmani_jihad_2


هێزە سەرکوتکەرەکانی ڕێژیم هێرشیان هێنایە سەر کوردستان‌و بە ناوی ئیسلام لە هیچ جینایەت‌و تاوانێک دژ بە کورد دەستیان نەپاراست.

ڕێژیمی کۆنەپرست شەڕێکی خوێناوی بەسەر کورددا سەپاند، شەڕێک کە هەتا ئێستاش بەشێوەی جۆراوجۆر هەر درێژەی هەیە‌و بەدەیان هەزار کەس بوونەتە قوربانیی سیاسەتی شەڕخوازانەی حکوومەتی ئیسلامیی ئێران.

کوردستان دوو ڕێگای لەبەر بوون: یان بێدەنگ دەبێ‌و دەست بەردەداتەوە‌و ملکەچی دیکتاتۆریی بێ یان ئەوەی بەرەنگاری دوژمنی خوێنڕێژ‌و سەرەڕۆ بێتەوە‌و ڕێگای خەبات‌و سەرفەرازیی بگڕیتە بەر. کوردستان بژاردەی دووەمی هەڵبژارد‌و درێژەی بە خەبات بۆ ئازادی‌و مافی نەتەوەیی گەلەکەی درێژە پێدا.

بۆیە، گەلاوێژ ١٣٥٨ی تەنیا وەبیرهێنەرەوەی هێرشی بەربڵاوی کۆماری ئیسلامی‌و کاوەلکاریی‌و قەڵاچۆکردن‌و تێرۆر‌و جینایەتەکانی ڕێژیم دژ بە خەڵکی کوردستان نیە. بەڵکوو وەربیرهێنەرەوەی دنیایەک داستان لە فیداکاری‌و ئازایەتیە، وەبیرهێنەرەوەی لەخۆبردوویی‌و خۆڕاگریی خەڵکی کوردستانە بە دژی دوژمنی سەرکوتکەر‌و دیکتاتۆریی تازەپێگەیشتوو.

وەبیرهێنەرەوەی داستانی وەستانەوەی گەڵێکە بە دژی زوڵم زۆر‌و چەوسانەوە‌و سەلمێنەری پێگەیشتوویی‌و هەستی بەرزی نەتەوەیی گەلی کوردستانە.

ڕێژیم پێی وابوو، ئەگەر کوردستانی قەڵای ئازادی داگیر‌و سەرکوت بکا، دەنگی ئازادیخوازی‌و هەرچەشنە جمووجۆڵێکی ئازادیخوازانەی لە هەموو ئێران کپ‌و سەرکوت کردوە‌و دەتوانێ پاڵی لێبداتەوە.

هاونیشتمانیانی بەڕێز!

ئەمڕۆ کۆماری ئیسلامی لەگەڵ گەورەترین قەیرانی سیاسی، ڕەوایی، ئابووریی‌و کۆمەڵایەتیی مێژووی خۆی بەرەوڕوو بووەتەوە. ڕێژیم بەهۆی گەندەڵی‌و سیاسەتی چەوت‌و ئیدئۆلۆژیک، داماوە‌و توانای دۆزینەوەی ڕێگاچارە بۆ هیچکام لەو قەیرانانەی نییە.

بە هۆی ترس لە ڕاپەڕینی خەڵک‌و ڕووخانی نیزامەکەی، ڕێژیم لە نێوخۆدا پەنای بۆ سەرکوتی زیاتر بردووە‌و لە دەرەوەی وڵات پەرەی بە ئاڵۆزینانەوە‌و تێرۆریزم داوە‌و لە ئاستی ناوچە‌و جیهانیدا ڕۆژ بە ڕۆژ زیاتر تەریک دەکەوێتەوە. ڕێژیم کەوتووەتە بۆنبەستەوە.

لەو باروودۆخە دژوارەدا دوور نیە کۆماری ئیسلامی لە داماویدا‌و بۆ ڕزگاربوونی سیستمە دیکتاتۆرییەکەی لە ڕووخان، ئێران بەرەوە شەڕێکی نەخوازراو پاڵ پێوەنێ.

لەو هەلوومەرجە هەستیارەدا، وەک حیزبی دێموکراتی کوردستانی ئێران چوار ئەرکی سەرەکیمان لەپێشە:

یەکەم؛ پێداچوونەوەی بەردەوام بە کار‌و تێکۆشانمان بە مەبەستی چارەسەرکردنی کەمووکوڕییەکانمان.

دووەم؛ دڕیژەدان بە خەباتی نوێمان خەباتی شار‌و شاخ (ڕاسان) بەپێی هەلوومەرج‌و پێداویستیی، لە هەموو بوارەکاندا.

سێیەم؛ پتەوترکردن‌و پەرەپێدان بە هاوکاریی‌و خەباتی یەکگرتوو لەگەڵ حیزب‌و ڕێکخراوەکانی کوردستانی ئێران.

چوارەم؛ هەوڵ‌و تێکۆشان بەمەبەستی پێکهێنانی بەدیلێکی دێموکراتیک‌و گشتگیر بە هاوکاریی کۆنگرەی نەتەوەکانی ئێرانی فێدراڵ‌و ئۆپۆزیسیۆنی ناوەندی. بەدیلێک کە لە ژوورەوە‌و دەرەوی وڵات متمانه‌و پشتیوانیی خەڵک‌و بیروڕای گشتیی جیهانی بۆلای خۆی ڕابکێشێ‌و گەلانی ئێران لە دەست ڕێژیمی دیکتاتۆریی کۆماری ئیسلامی ڕزگار بکات.

دەرسی هەر گرینگی ٢٨ی گەلاوێژ ئەوەیە کە ڕێگای ڕزگاریی ئێمەی کورد‌و پاراستنی کەسایەتی‌و کەڕامەتی تاک‌و نەتەوەییمان، درێژەدان بە خەباتی‌و تێکۆشان بە یەکگرتووییە. کورد دەبێ ئامادەی ڕووبەڕووبوونەوەی هەرچەشنە ڕووداو‌و سناریۆیەک بێت.

 

حیزبی دێموکراتی کوردستانی ئێران

ناوەندی سیاسی

 

 _______________________________________

ــ بۆ پێوه‌ندی‌ گرتن له‌گه‌ڵ‌ به‌ڕێوه‌به‌ر‌ى ماڵپه‌ڕ له رێگه‌ی‌ فه‌یسبووكه‌وه‌ ئێره‌ كلیك بكه‌ 


ناردن بۆ تۆڕه‌ کۆمه‌ڵایه‌تی‌یه‌کان