هەڵە
  • JFolder::create: Could not create directory

بانگەوازی مانگرتنی گشتی لە كوردستان

چاپکردن

بانگەوازی مانگرتنی گشتی لە كوردستان

بە مەبەستی كۆدەنگی لەگەڵ زیندانیانی سیاسيی بەندیخانەی ورمێ

 

mangrtn_-_kurdistan_-_bandixana_-_2

مانگێك بەسەر مانگرتنی 29 بەندكراوی سیاسی كورد لە بەندیخانەی "ناوەندی ورمێ "دا تێدەپەڕیت. سەرەڕای سەرجەم هەرەِشەكانی بەرپرسانی ئاسایش‌و بەرپرسانی بەندیخانەكە، ورەی ئەم ڕۆلە نەبەزانەی كوردستان هیشتاش بەچۆكدا نەهاتووە‌و لەسەر مانگرتن بۆ وەدیهاتنی داوا رەواكانیان بەردەوامن. داواكاریگەلێك كە تەنانەت بەپێی یاسای بنەڕەتی كۆماری ئیسلامیش بە مافی ڕەوای ئەو بەندیانە دەزانرێت‌و بەرپرسانی بەندیخانە لیبڕاون لە پەیڕەوكردنیان. سەرجەم داواكاری ئەو بەندییانە بریتیە لە جیاكرانەوەیان لەو بەندیانەی تر كە بە تاوانی تری وەك مادەی هۆشبەر‌و مرۆڤ كوژیەوە گیراون. داواكارییەكی ڕەوا كە بەپێی مادەكانی 7‌و 8 ی ئایینامەی چۆنیەتی جیاكردنەوەوە‌و هەڵاواردن‌و پۆڵین كردنی بەندیەكان بە ژومارە نامەی 16523/85/1 ـ9/9/1385 هەڵگری 17 مادە‌و 9 تەبسەرە، كە ڕیكەوتی 9/9/1385 لە لایەن هیزی دادوەری كۆماری ئیسلامییەوە چەسپێندراوەو داواكارییەكی یاساییە‌و لە چوارچێوەی یاسا‌و ڕیسا‌و شێوەنامەكانی بەندیخانەكانی كۆماری ئیسڵامی ئێراندایە، بەڵام بەرپرسانی بەندیخانە بۆ خستنە ژێر گوشاری زیاتری بەندیە سیاسیەكان، ئامادە نییە ئەو مافەیان پێبدات. دڕەندەیی‌و ئەشكەنجە دژەمرۆیی‌و سەدە ناوەڕاستییەكانی ناو بەندیخانەكانی كۆماری ئیسڵامی ئێران، ئێستا زیاتر لە پێشوو بۆ هەموو لایەك ئاشكرایە‌و بەرپرسانی ئاسایشی بەندیخانەكان‌و دەست‌و پێوەندەكانی دادوەری بە شێوەیەكی لەڕادەبەدەر‌و هەمەچەشن، بەندیەكان دەخەنە بەر ئازار‌و ئەشكەنجە كە ڕاپۆرتە فەرمییەكانی خودی بەرپرسان‌و بیرەوەری بەندیە سیاسییەكان دەرخەری ئەو ڕاستیە حاشاهەڵنەگرەیە. 29 ڕۆڵەی ماندوونەناسی نەتەوەی كورد، ماوەی مانگێكە بە هۆی داواكارییەكی سەرەتایی دەستیان داوەتە مانگرتن لە خواردن، مانگرتنێكی كە بێ گومان دوا بژاردەیە بۆ دەستەبەربوونی لانیكەمی مافە پیشێل‌و زەوتكراوەكانیان. هەندێك لەو مانگرتووانە بە هۆی گوشاری لەڕادەبەدەری دەماری (ئەعساب) ڕەوانەی نەخۆشخانە‌و بنكە دەرمانیەكان كراون، بەڵام تا هەنووكەش‌و سەرەڕای ئەو دۆخە نالەبارە، شێلگیرانە بەردەوامن لە پێداگری لەسەر داواكارییەكانیان. ئەو بەندیانە كەسانێكن كە بۆ ماف‌و كەرامەتی مرۆیی‌و نەتەوەیی خۆیان حازر بە دانی هەر نرخێك بوون‌و لە هیچ چەشنە فیداكاریەك خۆیان نەبواردووە، هەر بۆیەش ئیمڕۆ ئەركی ئێمەیە كە پشتگیری لەو قارەمانە نەتەوەییەیانەمان بكەین. هەر بۆیەش، ئیمە وەك كۆمەڵێك لە چالاكانی مافی مرۆڤ، خوێندكاری، مەدەنی‌و ...تاد، كوردستانی ئێران، داوا لەسەرجەم خەڵكی كوردستان، بنكە‌و ڕیكخراوەكانی مافی مرۆڤ، چالاكانی مەدەنی‌و سیاسی‌و حیزبە سیاسیەكانی كوردستان دەكەین كە پشتگیری لەو بەندییە سیاسیە مانگرتووانە بكەن. هاودەنگی‌و یەكگرتوویی هەمەلایەنەی ئێمە لە ڕۆژی دووشەممۆ، ڕێكەوتی ١ی به‌فرانبار‌و دەست نیشانكردنی ئەو ڕۆژە وەك ڕۆژی مانگرتنی سەرانسەری بۆ پشتگیری‌و كۆدەنگی لەگەڵ بەندیە سیاسیەكانی بەندیخانەی ورمێ، دەتوانێت دەرخەری ورەی نەتەوەیی‌و یەكگرتوویی ئێمەی كورد بێت بۆ دەسەڵاتدارانی سەرەڕۆی كۆماری ئیسڵامی ئیران.

كۆمەڵیك لە چالاكانی مەدەنی‌و سیاسی‌و مافی مرۆڤی كوردستان


ناردن بۆ تۆڕه‌ کۆمه‌ڵایه‌تی‌یه‌کان