هه‌ڵۆی کوردستان

-
هەڵە
  • JFolder::create: Could not create directory

خیانه‌ت له‌ ژێر سێبه‌ری‌ ئیسلامدا (به‌شی‌ یه‌كه‌م)

پۆستی ئەلیکترۆنی چاپکردن

‌به‌شی‌ یه‌كه‌مmahdi_badri-nosar

"گه‌وره‌ترین ترسم له‌ ژیان دا، ئه‌وه‌یه‌ بۆ جارێكی‌ دیكه‌ نه‌كه‌ومه‌وه‌ زیندانه‌كانی‌ رێژیمی‌ كۆنه‌په‌ره‌ستی‌ كۆماری‌ ئیسلامی‌". ئه‌وه‌ وته‌ی‌ مزه‌فه‌ر كازمی‌ یه‌كێك له‌ هاوڕێ‌یانی‌ ته‌حویلدراو له‌ لایه‌ن بزووتنه‌وه‌ی‌ ئیسلامی‌ به‌ كۆماری‌ ئیسلامی‌ بوو. ناوبراو پێش هاتنه‌ نێو ریزه‌كانی‌ حیزبی‌ دێموكراتی‌ كوردستانی‌ ئێران، جارێك له‌ لایه‌ن ده‌زگا ئیتلاعاتی‌یه‌كانی‌ رێژیم ده‌گیرێ‌‌و ده‌كه‌وێته‌ ژێر ئه‌شكه‌نجه‌‌و ئازارێكی‌ زۆر.

به‌ پێی‌ بیره‌وه‌ری‌یه‌كانی‌ مزه‌فه‌ر بێ‌ڕه‌حمترین، خوێن رێژترین‌و جینایه‌تكارترین ئینسانه‌كان وه‌ك به‌ڕێوه‌به‌رانی‌ زیندانه‌كانی‌ رێژیمی‌ كۆماری‌ ئیسلامی‌ كار ده‌كه‌ن‌و به‌ وه‌حشییانه‌ترین ئه‌شكه‌نجه‌ی‌ رۆحی‌‌و جیسمی‌ زیندانی‌یه‌كان ئازار ده‌ده‌ن تا به‌ مه‌به‌سته‌كانیان بگه‌ن. ئێواره‌ی‌ رۆژی‌ 13ی‌ ڕه‌زبه‌ری‌ 1375ی‌ هه‌تاوی‌ كاتێك هاوڕێیان به‌ره‌‌و شاری‌ پاوه‌ به‌ڕێ‌ ده‌كران زاهیری‌ مزه‌فه‌ر وه‌كوو هاوڕێ‌یه‌كانی‌ دیكه‌ی‌ نه‌بوو. وه‌كوو ئه‌وه‌ی‌ كه‌ له‌ دڵه‌وه‌ خه‌به‌ردار بوو كه‌ ئه‌م چوونه‌وه‌یه‌ گه‌ڕانه‌وه‌ی‌ به‌دواوه‌دا نیه‌.

به‌داخه‌وه‌ ئه‌و هاوڕێ‌یانه‌ كاتی‌ گه‌ڕانه‌وه‌ له‌ ناوچه‌ی‌ پاوه‌دا، له‌ ناوچه‌ی‌ هه‌ڵه‌بجه‌ی‌ كوردستانی‌ عێراق كه‌ ئه‌وكات له‌ ژێر ده‌سه‌ڵاتی‌ بزووتنه‌وه‌ی‌ ئیسلامی‌ دا بوو له‌ لایه‌ن ئه‌و رێكخراوه‌وه‌ ده‌گیرێن‌و ده‌ست‌و لاق‌و چاویان ده‌به‌ستن‌و ته‌حویلی‌ كۆماری‌ ئیسلامی‌ ئێران درانه‌وه‌. له‌و ڕۆژه‌وه‌ تا ئێستا زیاتر له‌ حه‌وت ساڵ‌ تێپه‌ڕیوه‌. له‌سه‌ر ئه‌و خیانه‌ته‌ی‌ بزووتنه‌وه‌ی‌ ئیسلامی‌ له‌ بڵاوكراوه‌كانی‌ حیزبی‌ دێموكراتی‌ كوردستانی‌ ئێران زۆر گوتراوه‌‌و نووسراوه‌، كه‌ هه‌مووی‌ له‌ چوارچێوه‌ی‌ وتاردا بووه‌. به‌ پێویستم زانی‌ له‌سه‌ر ئه‌و كرده‌وه‌ پڕ شووره‌یی‌یه‌ كه‌ وه‌ك خیانه‌تێكی‌ مێژوویی‌ ده‌مێنێته‌وه‌ هه‌رچه‌ند به‌ كوورتیش بێ‌ كتێبێك ئاماده‌ بكه‌م تا هه‌م وه‌كوو هاوڕێ‌یه‌ك ئه‌ركی‌ سه‌رشانی‌ خۆم ده‌رحه‌ق به‌ هاوڕێ‌یانم به‌جێ‌ گه‌یاندبێ‌‌و هه‌م به‌هێنانه‌وه‌ بیری‌ ئه‌و خیانه‌ته‌ی‌ بزووتنه‌وه‌ی‌ ئیسلامی‌ جارێكی‌ دیكه‌ ئه‌و رێكخراوه‌ وه‌ك به‌ڕێوه‌به‌ری‌ ئه‌و كرده‌وه‌یه‌ ریسوا بكرێ‌.

لێره‌دا به‌ پێویستی‌ ده‌زانم رێز‌و سوپاسی‌ خۆم پێشكه‌شی‌ ئه‌و كه‌سانه‌ بكه‌م كه‌ له‌ ده‌ركردنی‌ ئه‌م كتێبه‌ دا هاوكاری‌یان كردووم‌و له‌ ڕێنوێنی‌یه‌كانی‌ خۆیان بێ‌به‌شیان نه‌كردووم به‌تایبه‌تی‌ كاك مسته‌فا هیجری‌، كاك بابا عه‌لی‌ مێهرپه‌روه‌ر‌و كاك مسته‌فا مه‌عرووفی‌، هیوادارم بتوانم وه‌ڵامده‌ری‌ زه‌حمه‌ته‌كانیان بم.

نووسه‌ر

چۆنیه‌تی‌ ته‌حویلدرانه‌وه‌ی‌

ئه‌ندامانی‌ حیزبی‌

سه‌ر له‌ به‌یانی‌ رۆژی‌ 13ی‌ ره‌زبه‌ری‌ 1375ی‌ هه‌تاوی‌ له‌ كۆبوونه‌وه‌یه‌كی‌ كومیته‌ شارستانی‌ پاوه‌دا، بڕیار درا تیمێكی‌ حه‌وت كه‌سی‌ بۆ به‌ڕێوه‌بردنی‌ ئه‌ركێكی‌ حیزبی‌ ره‌وانه‌ی‌ ناوچه‌ی‌ پاوه‌ بكرێ‌. له‌و كۆبوونه‌وه‌یه‌دا، ته‌واوی‌ به‌شداران ره‌زامه‌ندیی‌ خۆیان بۆ جێ‌به‌جێ‌ كردنی‌ ئه‌و ئه‌ركه‌ راگه‌یاند. به‌ڵام له‌ كۆتایی‌دا، له‌سه‌ر حه‌وت كه‌س ساغ بوونه‌وه‌. هه‌ر له‌و رۆژه‌دا كادر‌و پێشمه‌رگه‌ دیاری‌ كراوه‌كان له‌ لایه‌ن كومیته‌ شارستانه‌وه‌ بانگ كران‌و له‌سه‌ر چوونه‌وه‌یان بۆ ناوچه‌ ئاگاداریان بكه‌نه‌وه‌‌و ئێواره‌ی‌ هه‌مان رۆژ بۆ به‌ڕێوه‌بردنی‌ ئه‌ركی‌ پێ‌ سپێردرا‌و به‌رێ‌ كران. دیاره‌ له‌ كومیته‌ی‌ شارستان دا، بڕیار درا ئه‌و تیمه‌ له‌ هه‌ر چه‌شنه‌ هێرش كردنه‌ سه‌ر بنكه‌‌و پێگه‌كانی‌ رێژیم خۆبپارێزن‌و ته‌نیا له‌ كاتی‌ پێویست به‌رگری‌ له‌ خۆیان بكه‌ن.

ئه‌ندامانی‌ حیزبی‌ به‌دوای‌ شه‌و‌و رۆژێك رێپێوان ده‌گه‌نه‌ ناوچه‌ی‌ پاوه‌‌و هه‌ر له‌و كاته‌دا، رێژیم هه‌ست به‌ بوونیان ده‌كا، هه‌ربۆیه‌ به‌كرێگیراوانی‌ رێژیم وه‌شوێنیان ده‌كه‌ون تا به‌ڵكوو زه‌برێكیان لـێ‌بده‌ن‌و پێش به‌ تێكۆشانیان له‌و ناوچه‌یه‌دا بگرن. به‌ڵام به‌ پێی‌ ئه‌و پێوه‌ندی‌یه‌ بێ‌سیمی‌یانه‌ی‌ كه‌ له‌گه‌ڵیان دا هه‌بووه‌، زۆر به‌ وریایی‌یه‌وه‌ هه‌ڵس‌و كوتیان كردوه‌‌و ته‌واوی‌ پیلانه‌كانی‌ رێژیمیان پووچه‌ڵ‌ كردۆته‌وه‌‌و ته‌نانه‌ت ئه‌ركی‌ پێ‌سپێردراویان جێ‌به‌جێ‌ كردوه‌. به‌هۆی‌ ئاڵۆزبوونی‌ ناوچه‌ (كوردستانی‌ عێراق) له‌ چه‌ندین نه‌وبه‌ت له‌ رۆژه‌كانی‌ 23 تا 28ی‌ ره‌زبه‌ر هه‌وڵ‌ دراوه‌ پێوه‌ندیان له‌گه‌ڵ‌ بگیرێ‌ تا ئاگاداری‌ وه‌زعی‌ ناوچه‌كه‌یان بكه‌نه‌وه‌، كه‌ له‌ كاتی‌ گه‌ڕانه‌وه‌دا، تووشی‌ گرفت نه‌بن. به‌داخه‌وه‌ هه‌وڵه‌كانی‌ كومیته‌ی‌ شارستان بێ‌سوود بووه‌، ته‌نانه‌ت په‌یامی‌ رادیۆییش ئه‌وانی‌ له‌و ئاڵۆزی‌یه‌ تێ‌نه‌گه‌یاندبوو. هه‌ر له‌و سه‌روبه‌نده‌دا، كه‌ نیگه‌رانی‌ وه‌زعی‌ ئه‌و كه‌سانه‌ بوون، سه‌رله‌ به‌یانیی‌ رۆژی‌ 30ی‌ ره‌زبه‌ر، له‌ لایه‌ن كه‌سێك له‌ ناو شاری‌ پاوه‌وه‌، هه‌واڵی‌ ته‌حویل دانه‌وه‌یان به‌ كۆماری‌ ئیسلامی‌، گه‌یشت. به‌ پێی‌ ئه‌و هه‌واڵه‌ ئیتلاعاتی‌ رێژیم‌و سپای‌ پاسداران له‌ ناو شاری‌ پاوه‌‌و ناوچه‌دا، وای‌ بڵاوكرده‌وه‌ كه‌ گۆیا یه‌كیه‌تیی‌ نیشتمانیی‌ كوردستانی‌ عێراق ئه‌و كه‌سانه‌ی‌ ته‌حویلی‌ كۆماری‌ ئیسلامیی‌ ئێران داوه‌ته‌وه‌. هه‌ر ئه‌و رۆژه‌ ده‌فته‌ری‌ سیاسی‌ ئاگادار ده‌كرێته‌وه‌ كه‌ هه‌واڵێكی‌ وا هاتوه‌. له‌ لایه‌ن ده‌فته‌ری‌ سیاسی‌یه‌وه‌ بڕیاری‌ لێكۆڵینه‌وه‌ ده‌درێ‌. له‌ پێش دا بۆ دڵنیا بوون له‌ ته‌حویلدانه‌وه‌ی‌ ئه‌ندامانی‌ حیزبی‌ نه‌فه‌رێك بۆ ناوچه‌ی‌ هه‌ڵه‌بجه‌‌و سنووری‌ ئێران به‌ڕێ‌ ده‌كرێ‌. به‌دوای‌ گه‌ڕانه‌وه‌ی‌ ئه‌و كه‌سه‌دا ده‌ركه‌وت كه‌ ئه‌ندامانی‌ حیزب له‌ سنووری‌ عێراق (گوندی‌ هاوار) به‌ جیپێكی‌ شین كه‌ راننده‌كه‌ی‌ كه‌سێكه‌ به‌ ناوی‌ سه‌ید عومه‌ر خه‌ڵكی‌ عه‌بابه‌یلـێ‌ بووه‌، به‌ره‌‌و شاری‌ هه‌ڵه‌بجه‌ وه‌ڕێ‌ ده‌كه‌ون. دیاره‌ ئه‌و كاته‌، هه‌ڵه‌بجه‌‌و ده‌ورووبه‌ری‌ به‌ پشتیوانیی‌ كۆماری‌ ئیسلامی‌ له‌ژێر ده‌سه‌ڵاتی‌ بزووتنه‌وه‌ی‌ ئیسلامیی‌ كوردستان دابوو. له‌ نزیك گوندی‌ عه‌نه‌ب ئه‌و ماشێنه‌ له‌ لایه‌ن چه‌كداره‌كانی‌ بزووتنه‌وه‌ ئیسلامیی‌ سه‌ر به‌ ئه‌نوه‌ر عه‌نه‌بی‌ كه‌ یه‌كێك له‌ به‌رپرسانی‌ نیزامیی‌ بزووتنه‌وه‌یه‌ راده‌گیرێ‌‌و داوای‌ دابه‌زینیان لـێ‌ ده‌كه‌ن، تا به‌ قسه‌ی‌ خۆیان هاوكاری‌یان بكه‌ن‌و بۆ مقه‌ڕه‌كانی‌ حیزب به‌ڕێ‌یان كه‌نه‌وه‌. به‌دوای‌ دابه‌زینی‌ ئه‌ندامانی‌ حیزب هه‌ر ئه‌و شه‌وه‌ سه‌ید عومه‌ری‌ راننده‌ ده‌گه‌ڕێته‌وه‌ بۆ ماڵی‌ خۆی‌. به‌ڵام به‌یانی‌یه‌كه‌ی‌ چه‌كداره‌كانی‌ بزووتنه‌وه‌ كه‌ سه‌ر به‌هێزی‌ ئه‌نوه‌ر عه‌نه‌بی‌ ده‌بن ده‌چنه‌ به‌ر ده‌ركی‌ ماڵی‌ سه‌ید عومه‌ر‌و سه‌باره‌ت به‌ رووداوه‌كه‌ی‌ شه‌وی‌ پێشتر هه‌ڕه‌شه‌ی‌ كوشتنی‌ لـێ‌ ده‌كه‌ن‌و پێی‌ ده‌ڵێن نابێ‌ له‌ هیچ شوێنێك‌و به‌لای‌ هیچ كه‌س باسی‌ ئه‌و مه‌سه‌له‌یه‌ بكا.

به‌دوای‌ ئه‌و هه‌واڵه‌دا له‌ رێگای‌ پێوه‌ندی‌یه‌كانی‌ حیزب له‌ شاری‌ سلێمانی‌ كه‌ ئه‌وكات به‌رپرسی‌ پێوه‌ندی‌یه‌كان سه‌ید مه‌نسوور ناسری‌* بوو، سه‌ردانی‌ پێوه‌ندی‌یه‌كانی‌ بزووتنه‌وه‌ی‌ ئیسلامی‌ له‌ شاری‌ سلێمانی‌ ده‌كرێ‌‌و داوای‌ روونكردنه‌وه‌ی‌ چاره‌نووسی‌ ئه‌ندامانی‌ حیزبی‌ ده‌كرێ‌. به‌ڵام ئه‌وان حاشایان له‌ هه‌موو شتێك كرد‌و وتیان ئاگامان له‌ هیچ شتێك نیه‌. هه‌ربۆیه‌ رۆژی‌ 2ی‌ خه‌زه‌ڵوه‌ری‌ 1375ی‌ هه‌تاوی‌ (23/10/1996) له‌ لایه‌ن كومیته‌ شارستانی‌ پاوه‌وه‌ نامه‌یه‌ك بۆ رێبه‌ری‌ بزووتنه‌وه‌ی‌ ئیسلامی‌ به‌ڕێ‌ كراوه‌، تا له‌ چاره‌نووسی‌ ئه‌و كه‌سانه‌ ئاگاداریان بكه‌نه‌وه‌. به‌داخه‌وه‌ وه‌ڵامێكی‌ ئه‌وتۆ له‌ لایه‌ن رێبه‌ری‌ بزووتنه‌وه‌ی‌ ئیسلامی‌ به‌ كومیته‌ شارستانی‌ پاوه‌ نه‌گه‌یشت‌و حاشایان له‌ هه‌موو شتێك كرد. دیسان بۆ جارێكی‌ دیكه‌ پێوه‌ندی‌ به‌ سه‌ید عومه‌ر كرا‌وه‌‌و ئه‌ویش سوور بوو له‌وه‌ی‌ كه‌ ئه‌و چه‌كدارانه‌ی‌ ئه‌ندامانی‌ حیزبیان له‌ ماشێنه‌كه‌ی‌ ئه‌و دابه‌زاندوه‌ سه‌ر به‌ هێزه‌كانی‌ بزووتنه‌وه‌ن‌و فه‌رمانده‌ نیزامی‌یه‌كه‌شیان ئه‌نوه‌ر عه‌نه‌بی‌یه‌‌و له‌و ناوچه‌یه‌دا زۆر ناسراون. له‌ چه‌ند رێگای‌ دیكه‌وه‌ له‌ شاری‌ هه‌ڵه‌بجه‌‌و چه‌ند دۆستێكی‌ حیزبه‌وه‌ كه‌ چه‌كداری‌ بزووتنه‌وه‌ بوون، ڕوون ده‌بێته‌وه‌ كه‌ بزووتنه‌وه‌ ئه‌و جینایه‌ته‌ی‌ خولقاندوه‌‌و ئه‌ندامانی‌ حیزبی‌ ته‌حویلی‌ كۆماری‌ ئیسلامی‌ داوه‌ته‌وه‌. ته‌نانه‌ت به‌دوای‌ ماوه‌یه‌ك ده‌ركه‌وت كه‌ چه‌ك‌و كه‌ره‌سه‌ی‌ ئه‌ندامانی‌ حیزب له‌ ناو بزووتنه‌وه‌ به‌كێ‌یه‌‌و كێ‌ ده‌ستی‌ به‌سه‌ر دا گرتوون. لای‌ هه‌موو كه‌س روون‌و ئاشكرایه‌ كه‌ ئه‌و كات ده‌سه‌ڵاتی‌ هه‌ڵه‌بجه‌‌و ناوچه‌كانی‌ ده‌ورووبه‌ری‌ ته‌نیا له‌ ئه‌ستۆی‌ بزووتنه‌وه‌ی‌ ئیسلامی‌ بووه‌‌و هیچ حیزب‌و رێكخراوێكی‌ دیكه‌ له‌و ناوچه‌یه‌دا نه‌بووه‌. چه‌ند كه‌سێك له‌ چه‌كداره‌كانی‌ بزووتنه‌وه‌‌و خه‌ڵكی‌ ناوچه‌ ئیعترافیان كردوه‌، ئه‌و كرده‌وه‌یه‌ له‌ لایه‌ن بزووتنه‌وه‌وه‌ به‌ڕێوه‌چووه‌. هه‌روه‌ها قسه‌كانی‌ سه‌ید عومه‌ری‌ راننده‌ كه‌ شاهیدی‌ رووداوه‌كه‌ بووه‌ به‌ته‌واوی‌ ئه‌وه‌ی‌ ده‌سه‌لمێنێ‌. هه‌ربۆیه‌ حیزبی‌ دێموكراتی‌ كوردستانی‌ ئێران به‌دوای‌ دڵنیا بوون له‌و مه‌سه‌له‌یه‌ رۆژی‌ 9ی‌ خه‌زه‌ڵوه‌ری‌ 1375ی‌ هه‌تاوی‌ (30 ئۆكتوبری‌ 1996) له‌ راگه‌یاندراوێك دا كه‌ له‌ لایه‌ن ده‌فته‌ری‌ سیاسی‌یه‌وه‌ به‌ناوی‌ "ته‌حویل‌درانه‌وه‌ی‌ 7 تێكۆشه‌ری‌ دێموكرات به‌ رێژیمی‌ كۆماری‌ ئیسلامی‌"، وێڕای‌ ئاگادار كردنه‌وه‌ی‌ خه‌ڵكی‌ به‌شه‌ڕه‌فی‌ كوردستان، كۆڕ‌و كۆمه‌ڵه‌ ئازادیخواز‌و به‌شه‌ردۆسته‌كان ئه‌و جینایه‌ته‌ی‌ مه‌حكووم كرد‌و هاوكات داوا له‌ بزووتنه‌وه‌ی‌ ئیسلامی‌ ده‌كا له‌ جیاتی‌ لادان له‌ مه‌سه‌له‌كه‌‌و په‌رده‌پۆش كردنی‌ ئه‌و كرده‌وه‌ غه‌یره‌ ئینسانی‌‌و غه‌یره‌ ئیسلامی‌یه‌، بۆ ناساندن‌و به‌ سزاگه‌یاندنی‌ عامیلانی‌ ئه‌و تاوانه‌ پڕشووره‌یی‌یه‌ هه‌نگاوی‌ جیددی‌‌و به‌كرده‌وه‌ هه‌ڵگرێ‌‌و به‌و كاره‌ نیشان بدا كه‌ ئه‌م كرده‌وه‌ خه‌یانه‌تكارانه‌یه‌ له‌ سیاسه‌تی‌ ره‌سمی‌‌و بڕیاری‌ رێبه‌رایه‌تیی‌ ئه‌م رێكخراوه‌ سه‌رچاوه‌ی‌ نه‌گرتوه‌.(1)

سێ‌ رۆژ پاش راگه‌یندراوی‌ ده‌فته‌ری‌ سیاسی‌ حیزبی‌ دێموكراتی‌ كوردستانی‌ ئێران، رادیۆی‌ بزووتنه‌وه‌ی‌ ئیسلامی‌ راگه‌یاندنێكی‌ به‌ناوی‌ راگه‌یاندنی‌ ناوه‌ندیی‌ بزووتنه‌وه‌ی‌ ئیسلامی‌ بڵاو كرده‌وه‌. له‌و راگه‌یاندنه‌دا بزووتنه‌وه‌ی‌ ئیسلامی‌ له‌ جیاتی‌ ئه‌وه‌ی‌ بچێته‌ سه‌ر ئه‌سڵی‌ مه‌سه‌له‌كه‌ له‌ پێش دا باسی‌ نه‌خش‌و كاریگه‌ریی‌ خۆیان له‌ كوردستانی‌ عێراق سه‌باره‌ت به‌ ئاشتی‌‌و ئاسایش‌و هه‌روه‌ها سه‌ربه‌خۆیی‌ سیاسیی‌ خۆیان كرد!‌و پاشان حیزبی‌ دێموكراتی‌ كوردستانی‌ ئێران به‌وه‌ تاوانبار ده‌كا كه‌ دژی‌ ئیسلامه‌، بۆیه‌ بزووتنه‌وه‌ی‌ ئیسلامی‌ به‌و كاره‌ تاوانبار ده‌كا!‌و به‌بێ‌هێنانه‌وه‌ی‌ هیچ چه‌شنه‌ به‌ڵگه‌یه‌ك لایه‌نی‌ دیكه‌ تاوانبار ده‌كا.(2)

هه‌ر له‌و پێوه‌ندی‌یه‌دا، رۆژی‌ 18/8/1375ی‌ هه‌تاوی‌ مه‌لا عه‌بدول‌غه‌نی‌ ته‌ها ئه‌ندامی‌ سه‌ركردایه‌تیی‌ بزووتنه‌وه‌ی‌ ئیسلامی‌‌و نوێنه‌ری‌ ئه‌م رێكخراوه‌ له‌ شاری‌ هه‌ولێر له‌ وتووێژێك دا لهanwar_a‌ رادیۆی‌ پارتی‌ دێموكراتی‌ كوردستانی‌ عێراق سه‌باره‌ت به‌و مه‌سه‌له‌یه‌ دواو دیسان به‌بێ‌ هیچ به‌ڵگه‌یه‌ك ئه‌و تاوانه‌ی‌ خسته‌ پاڵ‌ یه‌كیه‌تیی‌ نیشتمانیی‌ كوردستانی‌ عێراق‌و چۆنیه‌تیی‌ گه‌ڕانه‌وه‌‌و گرتنی‌ ئه‌ندامانی‌ حیزب له‌ لایه‌ن یه‌كیه‌تی‌یه‌وه‌ ده‌گێرێته‌وه‌ وه‌كوو ئه‌وه‌ی‌ كه‌ خۆی‌ یه‌كێك له‌و حه‌وت كه‌سه‌ بوو بێ‌. له‌ كۆتایی‌دا داوا له‌ حیزب ده‌كا له‌و پێوه‌ندی‌یه‌دا لێكۆڵینه‌وه‌ی‌ زیاتر بكا‌و بزانێ‌ كێ‌ له‌ رابردوودا به‌ نیسبه‌ت ئه‌وان هه‌ڵوێستی‌ خراپی‌ بووه‌. ئه‌و كاره‌ش ئه‌وان كردوویانه‌!

دیاره‌ قسه‌كانی‌ مه‌لا عه‌بدول‌غه‌نی‌ زۆرتر ئه‌وه‌ی‌ ده‌گه‌یه‌نێ‌ كه‌ ئاگای‌ له‌ هیچ شتێك نه‌بووه‌‌و ئه‌و وتووێژه‌ی‌ ته‌نیا به‌ دژایه‌تی‌ یه‌كیه‌تیی‌ نیشتمانی‌ بووه‌ هه‌ر بۆیه‌ په‌یتا په‌یتا یه‌كیه‌تیی‌ به‌و كاره‌ تاوانبار ده‌كا‌و رابردووی‌ ئه‌و رێكخراوه‌یه‌ باس ده‌كا. حیزبی‌ دێموكراتی‌ كوردستانی‌ ئێران له‌ وتارێك دا، له‌ژێر ناوی‌ "چه‌ند قسه‌یه‌ك له‌سه‌ر چه‌ند قسه‌یه‌كی‌ بزووتنه‌وه‌ی‌ ئیسلامی‌" له‌ رادیۆ ده‌نگی‌ كوردستان بڵاوكرده‌وه‌ كه‌ ده‌قی‌ وتاره‌كه‌ له‌ ژماره‌ی‌ 240ی‌ كورستان بڵاوبۆته‌وه‌. له‌و وتاره‌دا به‌وردی‌ وه‌ڵامی‌ بزووتنه‌وه‌ی‌ ئیسلامی‌ دراوه‌ته‌وه‌‌و ده‌ڵـێ‌: كاتێك بزووتنه‌وه‌ی‌ ئیسلامی‌ ته‌نیا هێزی‌ ده‌سه‌ڵاتداری‌ ئه‌و ناوچه‌یه‌ بووه‌‌و حیزبیش ده‌یان به‌ڵگه‌‌و سه‌نه‌دی‌ هه‌یه‌ كه‌ ئه‌وان ئه‌و خه‌یانه‌ته‌یان كردوه‌، بۆ ناوی‌ سازمان یا رێكخراوێكی‌ دیكه‌ی‌ به‌رێ‌.(3)

هه‌ر له‌و په‌ێوه‌ندی‌یه‌دا، یه‌كیه‌تیی‌ نیشتمانیی‌ كوردستان كه‌ له‌ لایه‌ن بزووتنه‌وه‌وه‌ ئه‌و تاوانه‌ی‌ خراوه‌ته‌ پاڵ‌ رۆژی‌ 19/8/1375ی‌ هه‌تاوی‌ له‌ رادیۆ ده‌نگی‌ گه‌لی‌ كوردستان له‌ وتارێك دا له‌ژێر ناوی‌ "وه‌ڵامێكی‌ سه‌رپێیی‌ بۆ هه‌له‌ق مه‌له‌قه‌كانی‌ مه‌لا غه‌نی‌"دا رای‌گه‌یاند كه‌ هیچ پێوه‌ندی‌یه‌كی‌ له‌گه‌ڵ‌ ئه‌و مه‌سه‌له‌یه‌ نیه‌‌و.. . هتد.

چه‌ند رۆژ دوای‌ ئه‌و راگه‌یه‌ندراوانه‌، پێوه‌ندی‌یه‌كانی‌ بزووتنه‌وه‌ی‌ ئیسلامی‌ له‌ شاری‌ سلێمانی‌ له‌ رێگای‌ پێوه‌ندی‌یه‌كانی‌ حیزب له‌و شاره‌دا داوا ده‌كا كه‌ ده‌یانهه‌وێ‌ له‌ رێگای‌ وتوێژه‌وه‌ ئه‌و مه‌سه‌له‌یه‌ تاو تۆ بكرێ‌. ئه‌و رۆژ‌و سه‌عاته‌ی‌ كه‌ دیاریان كردبوو نه‌هاتبوون‌و چه‌ند رۆژ دواتر به‌بێ‌ ئاگاداری‌ سه‌ردانی‌ كومیته‌ شارستانی‌ پاوه‌ له‌ تانجه‌ڕۆ ده‌كه‌ن. له‌و دانیشتنه‌دا له‌ كومیته‌ شارستانی‌ پاوه‌ مه‌نسوور فه‌تتاحی‌*، شاهۆ عه‌له‌وی‌، نوشیروان فه‌تتاحی‌‌و مه‌هدی‌ به‌دری‌ به‌شدار ده‌بن‌و نوێنه‌ری‌ بزووتنه‌وه‌ش خۆی‌ به‌ناوی‌ مه‌لا عه‌بدولڕه‌حمان ئه‌ندامی‌ مه‌كته‌بی‌ سیاسیی‌ بزووتنه‌وه‌ ده‌ناسێنێ‌‌و چه‌ند كه‌سی‌ دیكه‌شی‌ له‌گه‌ڵ‌ بووه‌. له‌و كۆبوونه‌وه‌یه‌دا، مه‌نسوور فه‌تتاحی‌ به‌رپرسی‌ كومیته‌ شارستانی‌ پاوه‌ به‌ وردی‌ له‌سه‌ر مه‌سه‌له‌كه‌ ده‌دوێ‌‌و بۆ سه‌لماندنی‌ ئه‌و كرده‌وه‌یه‌ له‌سه‌ر بزووتنه‌وه‌ هێندێك له‌ به‌ڵگه‌كانی‌ باس ده‌كا‌و هێندێكشیان له‌به‌ر ئه‌منییه‌تی‌ گیانی‌ شاهیده‌كان باس نه‌كردوه‌ له‌ كۆتایی‌دا ده‌ڵـێ‌: ئه‌و كرده‌وه‌یه‌ له‌ لایه‌ن بزووتنه‌وه‌ی‌ ئیسلامی‌یه‌وه‌ به‌ڕێوه‌چووه‌‌و به‌ڵگه‌كانیش به‌ ته‌واوی‌ ئه‌وه‌ی‌ ده‌سه‌لمێنن. ئێوه‌ وه‌كوو بزووتنه‌وه‌ی‌ ئیسلامی‌ ئه‌گه‌ر حاشای‌ لـێ‌ده‌كه‌ن‌و ده‌ڵێن ئه‌و كاره‌مان نه‌كردوه‌، به‌مانای‌ ئه‌وه‌یه‌ كه‌ چه‌كداره‌كانتان به‌ سه‌رۆكایه‌تیی‌ ئه‌نوه‌ر عه‌نه‌بی‌ سه‌ربه‌خۆ ئه‌و خیانه‌ته‌یان كردوه‌، كه‌وابوو بۆ سڕینه‌وه‌ی‌ ئه‌و له‌كه‌ نه‌نگینه‌ له‌سه‌ر رێكخراوه‌كه‌تان تاوانباران سزا بده‌ن‌و رای‌ بگه‌یه‌نن كه‌ ئه‌وه‌ سیاسه‌تی‌ بزووتنه‌وه‌ نه‌بووه‌.

مه‌لا عه‌بدولره‌حمان له‌ وه‌ڵام دا، سه‌ره‌تا باس له‌ بزووتنه‌وه‌ی‌ ئیسلامی‌‌و مێژووی‌ ئه‌م رێكخراوه‌یه‌ ده‌كا‌و، له‌ قه‌سه‌كانیشی‌ دا وا ده‌رده‌كه‌وێ‌ هیچ وه‌ڵامێكی‌ پێ‌نیه‌‌و ته‌نیا حیكایه‌تێكی‌ سه‌رده‌می‌ پێغه‌مبه‌ری‌ ئیسلامی‌ گێراوه‌ته‌وه‌، كه‌ گۆیا له‌و سه‌رده‌مانه‌دا كابرایه‌كی‌ موسوڵمان ریشێكی‌ زۆری‌ هێشتۆته‌وه‌‌و هه‌موو رۆژێك له‌ ته‌نیشت موسوڵمانه‌كانی‌ دیكه‌ له‌ مزگه‌وت دا نوێژی‌ كردوه‌، ئه‌و كابرایه‌ له‌ ژێره‌وه‌ خه‌یانه‌تی‌ به‌ ئیسلام كردوه‌ كه‌ له‌و سه‌رده‌مه‌دا به‌و كه‌سانه‌یان وتوه‌ مونافیق. مه‌لا عه‌بدولره‌حمان وتوویه‌تی‌ ئێمه‌ ناڵێین كه‌ بزووتنه‌وه‌كه‌مان هه‌موو پاك‌و بێ‌عه‌یبن له‌وانه‌یه‌ كه‌سانێكی‌ مونافیق بۆ له‌كه‌دار كردنی‌ بزووتنه‌وه‌كه‌مان ئه‌و كاره‌یان كردبێ‌. مه‌نسوور فه‌تتاحی‌ له‌وه‌ڵامی‌ ئه‌و قسه‌یه‌ی‌ ناوبراودا ده‌ڵـێ‌: قسه‌ی‌ ئێمه‌ش ئه‌وه‌یه‌ كه‌ ئه‌و مونافیقه‌ ئه‌و خه‌یانه‌ته‌ی‌ خستۆته‌ پاڵ‌ بزووتنه‌وه‌ سزای‌ بده‌ن‌و رای‌ بگه‌یه‌نن تا ئه‌و له‌كه‌ نه‌نگینه‌ له‌سه‌ر ئێوه‌ لابچێ‌ به‌ڵام ئه‌گه‌ر بێ‌ده‌نگیی‌ لـێ‌بكه‌ن به‌ نیشانه‌ی‌ ئه‌وه‌یه‌ كه‌ ئه‌نوه‌ر عه‌نه‌بی‌ به‌ ده‌ستووری‌ رێبه‌ری‌ بزووتنه‌وه‌ی‌ ئیسلامی‌ ئه‌و كاره‌ی‌ كردوه‌. ئه‌و دانیشتنه‌ دوای‌ سه‌عات‌ونیوێك كۆتایی‌ دێ‌‌و نوێنه‌ری‌ بزووتنه‌وه‌ داوای‌ دانیشتنی‌ دیكه‌ی‌ ده‌كا‌و له‌ لایه‌ن كومیته‌ی‌ شارستانی‌ پاوه‌وه‌ مه‌وافیقه‌تی‌ له‌سه‌ر ده‌كرێ‌ به‌ڵام له‌سه‌ر داواكه‌ی‌ خۆیان نه‌مانه‌وه‌‌و ئه‌وه‌ یه‌كه‌م جار‌و دواجار ده‌بێ‌ كه‌ دانیشتنێك له‌ نێوان بزووتنه‌وه‌ی‌ ئیسلامی‌‌و كومیته‌ی‌ شارستانی‌ پاوه‌ پێك دێ‌.

ده‌ربازبوونی‌ داریووش‌و سه‌رشۆڕی‌ بۆ كۆماری‌ ئیسلامی‌

چه‌ند رۆژ به‌دوای‌ ته‌حویل درانه‌وه‌ی‌ ئه‌ندامانی‌ حیزب، كه‌سێك به‌ ناوی‌ عه‌دنان كه‌ خوشكه‌زای‌ داریووش (یه‌كێك له‌ ئه‌ندامانی‌ ته‌حویل دراو) سه‌ردانی‌ كومیته‌ شارستانی‌ پاوه‌ی‌ ده‌كا‌و ده‌ڵـێ‌ بیستوومه‌ خاڵم ته‌حویلی‌ ئێران دراوه‌ته‌وه‌. به‌دوای‌ بیستنی‌ جه‌ریانه‌كه‌ ناوبراو ده‌ڵـێ‌ من چه‌كداری‌ بزووتنه‌وه‌م‌و له‌و بڕوایه‌دانیم كه‌ بزووتنه‌وه‌ ئه‌و كاره‌ی‌ كردبێ‌. هێندێك به‌ڵگه‌ی‌ بۆ دێننه‌وه‌، له‌ دوایی‌ دا ده‌ڵـێ‌ ئه‌گه‌ر بزووتنه‌وه‌ ئه‌و كاره‌ی‌ كردبێ‌ چه‌ك داده‌نێم‌و تۆڵه‌ی‌ خاڵم ده‌ستێنم. عه‌دنان ده‌چێ‌ بۆ هه‌ڵه‌بجه‌ تا لێكۆڵینه‌وه‌ بكا‌و دڵنیا بێ‌ كه‌ بزووتنه‌وه‌ ئه‌و كاره‌ی‌ كردوه‌. رۆژی‌ دواتر ده‌گه‌ڕێته‌وه‌‌و ده‌ڵـێ‌ به‌ڵـێ‌ دڵنیا بووم كه‌ بزووتنه‌وه‌ی‌ ئیسلامیی‌ عێراق ئه‌و خه‌یانه‌ته‌ی‌ كردوه‌.

عه‌دنان دانیشتووی‌ كوردستانی‌ عێراق بوو، ماوه‌یه‌ك داوی‌ ئه‌و جه‌ریانه‌، پێوه‌ندیی‌ به‌ یه‌كێك له‌ بنكه‌كانی‌ ئیتلاعاتی‌ كۆماری‌ ئیسلامی‌ ئێران له‌ كوردستانی‌ عێراق ده‌گرێ‌‌و له‌ وه‌زعی‌ خاڵی‌ داریووش ده‌پرسێ‌‌و ده‌ڵـێ‌ ئاماده‌یه‌ هاوكاری‌یان بكا، به‌مه‌رجێك خاڵی‌ ئازاد كه‌ن. دیاره‌ دواتر كومیته‌ شارستانی‌ پاوه‌ی‌ له‌و پێوه‌ندی‌یه‌ ئاگادار ده‌كاته‌وه‌‌و ده‌ڵـێ‌ من نامه‌وێ‌ خه‌یانه‌ت بكه‌م ته‌نیا ده‌مه‌وێ‌ كڵاویان له‌سه‌ر نێم‌و خاڵم ئازاد كه‌م. له‌ كومیته‌ شارستان دا، قسه‌ی‌ زۆری‌ له‌گه‌ڵ‌ ده‌كرێ‌ به‌نیسبه‌ت زۆر شت ئاگادار‌و وشیار كراوه‌ته‌وه‌ تا له‌ داهاتوو دا تووشی‌ هه‌ڵه‌ نه‌بێ‌. دواتر له‌ یه‌كێك له‌ پێوه‌ندی‌یه‌كانی‌ له‌گه‌ڵ‌ ئیتلاعات دا له‌سه‌ر سنووری‌ نه‌وسوود، داریووشی‌ پێ‌نیشان ده‌ده‌ن‌و كورته‌ ملاقاتێكی‌ ده‌كا‌و له‌ وه‌زع‌و حاڵی‌ ده‌پرسێ‌. له‌و ملاقاته‌دا، كه‌سێك به‌ ناوی‌ "محمدی‌" به‌ عه‌دنان ده‌ڵـێ‌ ئه‌گه‌ر بتوانی‌ هاوكاریمان بكه‌ی‌ خاڵت به‌رده‌ده‌ین. عه‌دنان له‌ چۆنیه‌تیی‌ هاوكاری‌ كردنه‌كه‌ پرسیار ده‌كا‌و له‌ وه‌ڵام دا "محمدی‌" ده‌ڵـێ‌ تیرۆری‌ یه‌كێك له‌ ئه‌ندامانی‌ كومیته‌ شارستانی‌ پاوه‌ یا كادرێكی‌ ئه‌و كومیته‌یه‌ یه‌كه‌م هاوكاریی‌ تۆیه‌. عه‌دنان رازی‌ ده‌بێ‌‌و دیاره‌ "محمدی‌" به‌ عه‌دنان ده‌ڵـێ‌، ئێمه‌ كڵاومان ناچێته‌ سه‌ر، ئه‌گه‌ر تۆ كارێكی‌ وا بكه‌ی‌ ده‌بێ‌ رادیۆی‌ حیزب هه‌واڵـی‌ ئه‌و تیرۆره‌ بڵاوبكاته‌وه‌، تا راست‌و درووستی‌یه‌كه‌ی‌ ده‌ربكه‌وێ‌.

له‌ گه‌رانه‌وه‌دا، عه‌دنان سه‌ردانی‌ كومیته‌ی‌ پاوه‌ ده‌كا‌و ئاگاداری‌ ئه‌و دانیشتنه‌ی‌‌و چۆنیه‌تیی‌ باسه‌كانی‌ كردوه‌ داوای‌ له‌ كومیته‌ شارستانی‌ پاوه‌ ده‌كا له‌و پێوه‌ندی‌یه‌دا، هاوكاریی‌ بكه‌ن تابتوانێ‌ خاڵی‌ ئازاد بكا. چوارچێوه‌ی‌ داواكه‌ی‌ عه‌دنان له‌ كومیته‌ی‌ پاوه‌ ئه‌وبوو، كه‌ له‌ رادیۆ ده‌نگی‌ كوردستان به‌ درۆ هه‌واڵی‌ تیرۆری‌ یه‌كێك له‌ ئه‌ندامانی‌ كومیته‌ بڵاو بكرێته‌وه‌ تا عه‌دنان ئه‌و تیرۆره‌ وه‌ئه‌ستۆ بگرێ‌‌و داریووش ئازاد بكا. مه‌نسوور فه‌تتاحی‌ له‌ وه‌ڵام دا ده‌ڵـێ‌: كاری‌ وا هه‌رگیز جێ‌به‌جێ‌ نابێ‌، له‌به‌ر ئه‌وه‌ی‌ رادیۆ ده‌نگی‌ كوردستان له‌ ماوه‌ی‌ تێكۆشانی‌ خۆی‌ دا، تا ئێستا هه‌واڵی‌ به‌درۆی‌ بڵاونه‌كردۆته‌وه‌‌و ئیعتیبارێكی‌ زۆری‌ وه‌ده‌ست هێناوه‌ ته‌نانه‌ت رێژیم زۆر جار بۆ وه‌ده‌ست هێنانی‌ هه‌واڵی‌ راست‌و دروست په‌نای‌ بۆ رادیۆ ده‌نگی‌ كوردستان بردوه‌. جیا له‌وه‌ هه‌واڵێكی‌ ئاوا ره‌نگه‌ بنه‌ماڵه‌یك تووشی‌ ناراحه‌تی‌‌و دانانی‌ پرسه‌‌و سه‌ره‌خۆشی‌ بكا‌و ئه‌گه‌ر له‌ داهاتوودا، بۆیان ده‌ربكه‌وێ‌ كه‌ ئه‌و هه‌واڵه‌ درۆ بووه‌، شوێنه‌واری‌ خراپ له‌سه‌ر رادیۆ ده‌نگی‌ كوردستان داده‌نێ‌‌و ئیعتیباری‌ خۆی‌ له‌ده‌س ده‌دا.

چه‌ند رۆژ دواتر سه‌ر له‌ به‌یانیی‌ واته‌ 18ی‌ خه‌زه‌ڵوه‌ری‌ 1375ی‌ هه‌تاوی‌ یه‌كێك له‌ ئه‌ندامانی‌. . .سه‌ردانی‌ كومیته‌ شارستانی‌ پاوه‌ ده‌كا‌و دوای‌ ئه‌حواڵپرسی‌ ده‌ڵـێ‌ من وه‌كوو دۆستێكی‌ حیزب هاتووم كه‌ ئاگادارتان بكه‌مه‌وه‌ كۆماری‌ ئیسلامی‌ ده‌یهه‌وێ‌ به‌ كه‌ڵك وه‌رگرتن له‌ ئاڵۆزی‌یه‌كانی‌ كوردستانی‌ عێراق هێرش بكاته‌ سه‌رتان‌و زه‌برێكی‌ قورستان لـێ‌ بدا. هه‌ر بۆیه‌ ئاگاتان له‌ خۆتان بێ‌‌و ئێمه‌ له‌و پێوه‌ندی‌یه‌ دا هیچ چه‌شنه‌ ده‌سه‌ڵاتێكمان نیه‌. هه‌ر ئه‌و رۆژه‌ له‌ كومیته‌دا وا ساغ ده‌بنه‌وه‌ ده‌فته‌ری‌ سیاسی‌ له‌و پێوه‌ندی‌یه‌دا ئاگادار بكه‌نه‌وه‌. هه‌ر بۆیه‌ مه‌نسوور فه‌تتاحی‌‌و مه‌هدی‌ به‌دری‌ سه‌ردانی‌ ده‌فته‌ر ده‌كه‌ن له‌و كاته‌دا مامۆستا عه‌بدولڵاحه‌سه‌ن‌زاده‌ له‌ سه‌فه‌ری‌ ده‌ره‌وه‌ی‌ وڵات ده‌بێ‌ هه‌ر بۆیه‌ سه‌ردانی‌ كاك مسته‌فا هیجری‌ ده‌كه‌ن‌و له‌ مه‌سه‌له‌كه‌ی‌ ئاگادار ده‌كه‌ن. ئه‌ویش ده‌ڵـێ‌ ته‌نیا كارێك كه‌ له‌ ده‌سمان دێ‌ ئه‌وه‌یه‌ ئاگامان له‌ خۆمان بێ‌‌و پیلانه‌كانی‌ رێژیم پووچه‌ڵ‌ بكه‌ینه‌وه‌. هه‌ر ئه‌و رۆژه‌ به‌ره‌‌و تانجه‌ڕۆ ده‌گه‌ڕێنه‌وه‌‌و له‌گه‌ڵ‌ كومیته‌ شارستانی‌ بانه‌(*) هێزه‌كانیان سازمان ده‌ده‌ن، چه‌ندین كه‌مین‌و گه‌شتی‌ شه‌وانه‌‌و پایگای‌ نوێ‌ داده‌نێن، سه‌عات 10ی‌ شه‌و ته‌قه‌ له‌ یه‌كێك له‌ پایه‌گاكان ده‌كرێ‌، ده‌ست به‌جێ‌ له‌ هه‌موو لایه‌ك وه‌ڵامی‌ ئه‌و ته‌قه‌یه‌ درایه‌وه‌ به‌ڵام به‌داخه‌وه‌ له‌و ده‌رگیری‌یه‌دا پێشمه‌رگه‌یه‌ك به‌ ناوی‌ حامید سه‌لیمی‌ شه‌هید بوو.

چه‌ند رۆژ دوای‌ ئه‌و جه‌ریانه‌ عه‌دنان سه‌ردانی‌ كومیته‌ شارستانی‌ پاوه‌ی‌ كرد‌و دوای‌ ئه‌حواڵپرسی‌ سوپاسی‌ كاك مه‌نسووری‌ ده‌كاو ده‌ڵـێ‌ پێم وانه‌بوو كه‌ ئێوه‌ هاوكاریم بكه‌ن‌و داواكه‌م جێ‌به‌جێ‌ كه‌ن. پرسیاری‌ لـێ‌ده‌كه‌ن جه‌ریان چیه‌‌و له‌سه‌رچی‌ قسه‌ ده‌كه‌ی‌، ده‌ڵـێ‌ ئه‌وه‌ نیه‌ ئێوه‌ داواكه‌ی‌ منتان جێ‌به‌جی‌ كردوه‌‌و له‌ رادیۆ بڵاوتان كردۆته‌وه‌ پێشمه‌رگه‌یه‌ك تیرۆر كراوه‌. عه‌دنان پێی‌ وابوو كه‌ بڵاوبوونه‌وه‌ی‌ هه‌واڵی‌ شه‌هید بوونی‌ حامید سه‌لیمی‌ له‌ رادیۆ ده‌نگی‌ كوردستان له‌به‌ر داواكه‌ی‌ ئه‌و بووه‌. دیاره‌ ئاگاداری‌ ئه‌و مه‌سه‌له‌یه‌ ده‌كرێته‌وه‌‌و پێی‌ ده‌وترێ‌ كه‌ به‌داخه‌وه‌ ناوبراو له‌ كرده‌وه‌یه‌كی‌ تیرۆریستی‌ دا شه‌هید بووه‌. به‌ڵام تازه‌ ئه‌و شته‌ رووی‌ داوه‌ تۆ ده‌توانی‌ بڕۆی‌ به‌ "محمدی‌" بڵێی‌ كه‌ تۆ ئه‌و كاره‌ت كردوه‌. به‌دوای‌ ماوه‌یه‌ك عه‌دنان ده‌بێته‌ جێگای‌ متمانه‌ی‌ ئیتلاعات‌و له‌و فكره‌دان كه‌ كاری‌ گه‌وره‌تری‌ پێ‌بكه‌ن، هه‌ر بۆیه‌ پێی‌ راده‌گه‌ینن به‌مه‌رجێك داریووش ئازاد ده‌كه‌ین له‌ داهاتوودا، هاوكاریمان بكا. هه‌ر بۆیه‌ كه‌س‌و كاری‌ داریووش له‌ ئێران دا بانگ ده‌كه‌ن‌و داوای‌ گه‌ڕانه‌وه‌ی‌ ژن‌و منداڵه‌كه‌ی‌ ده‌كه‌ن تا ئازادی‌ كه‌ن. چه‌ند رۆژ دواتر خوشكی‌ داریووش سه‌ردانی‌ تانجه‌ڕۆ ده‌كا‌و داوا له‌ ژن‌و منداڵه‌كه‌ی‌ داریووش ده‌كا بگه‌ڕێنه‌وه‌ بۆ ئێران، تا داریووش ئازاد بكرێ‌، به‌ڵام ئه‌وان له‌ چۆنییه‌تیی‌ ئازاد بوون‌و به‌رنامه‌كانی‌ئیتلاعات ئاگادار نابن. هه‌ر بۆیه‌ خێزانی‌ داریووش له‌گه‌ڵ‌ خوشكی‌ داریووش ده‌گه‌ڕێنه‌وه‌ بۆ ئێران. دیاره‌ كومیته‌ شارستان ئاگاداری‌ نه‌خشه‌‌و پیلانه‌كانی‌ ئیتلاعاتی‌ رێژیم ده‌بن.

به‌دوای‌ چوونه‌وه‌ی‌ خێزانی‌ داریووش بۆ ئێران دا عه‌دنان چه‌ند جارێكی‌ دیكه‌ له‌گه‌ڵ‌ ئیتلاعاتی‌ شاری‌ پاوه‌ ملاقات ده‌كا‌و به‌و شێوه‌یه‌ كه‌ دواتر عه‌دنان بۆ كومیته‌ شارستانی‌ پاوه‌ ده‌گێڕێته‌وه‌، ئیتلاعات له‌ فكری‌ به‌رێوه‌بردنی‌ كرده‌وه‌یه‌كی‌ تیرۆریستی‌ به‌هۆی‌ داریووش‌و عه‌دنان ده‌بێ‌. غافڵ‌ له‌وه‌ی‌ كه‌ حیزب ئاگاداری‌ هه‌موو شتێكه‌. دیاره‌ له‌و ماوه‌یه‌دا هه‌ڕه‌شه‌ له‌ عه‌دنان ده‌كه‌ن‌و پێی‌ ده‌ڵێن تۆ ناتوانی‌ كڵاومان له‌سه‌ر نێی‌‌و درۆمان له‌گه‌ڵ‌ بكه‌ی‌، له‌هه‌ر شوێنێك بی‌ ده‌تكوژین. هه‌ر له‌و رۆژانه‌دا شه‌وێك عه‌دنان نامه‌یه‌كی‌ داریووش بۆ كاك مه‌نسوور ده‌نێرێ‌ كه‌ به‌و شێوه‌یه‌ له‌و نامه‌یه‌دا نووسرا بوو. داریووشیان ته‌حویلی‌ عه‌دنان دابوو‌و داوای‌ له‌ كاك مه‌نسوور كردبوو تا به‌هه‌ر شێوه‌یه‌ك بووه‌ سه‌ردانی‌ كومیته‌ بكا. كاك مه‌نسوور له‌ وه‌ڵام‌دا بۆی‌ ده‌نووسێ‌ جارێ‌ په‌له‌ مه‌كه‌ تا رۆژ ده‌بێته‌وه‌. له‌گه‌ڵ‌ رووناك بوونی‌ هه‌وا عه‌دنان داریووش دێنێ‌ بۆ كومیته‌‌و هه‌ر ئه‌و كاته‌ش له‌سه‌ر ئه‌ركه‌كانی‌ كه‌ ئیتلاعات پێی‌ سپاردبوون تا له‌گه‌ڵ‌ داریووش به‌ڕێوه‌ی‌ به‌رن كومیته‌ ئاگادار ده‌كاته‌وه‌. به‌ پێی‌ قسه‌كانی‌ عه‌دنان، ئیتلاعات داریووش دێنێته‌ سلێمانی‌ بۆ ماڵی‌ عه‌دنان‌و ته‌حویلی‌ ئه‌وی‌ ده‌دا‌و ته‌نانه‌ت مه‌ئموورییه‌ته‌كه‌ی‌ به‌ عه‌دنان ده‌ده‌ن‌و ده‌ڵێن مه‌سئوولییه‌تی‌ داریووش به‌ تۆیه‌‌و ئێمه‌ بڕوای‌ پێ‌ناكه‌ین. یه‌كه‌م كاریشیان تیرۆری‌ به‌رپرسی‌ كومیته‌ی‌ شارستانی‌ پاوه‌ یا یه‌كێك له‌ ئه‌ندامانی‌ كومیته‌ی‌ شارستانه‌، ئه‌گه‌ر ئه‌وه‌یان پێ‌نه‌كرا برازیلی‌یه‌كی‌ بۆمب رێژكراو ته‌حویلی‌ عه‌دنان ده‌ده‌ن‌و تا له‌ به‌رده‌م مقه‌ڕی‌ كومیته‌ی‌ شارستان دا، بته‌قێنێته‌وه‌‌و زیانێكی‌ گیانی‌‌و ماڵیی‌ قورس وه‌ كومیته‌ی‌ شارستانی‌ پاوه‌ بكه‌وێ‌. له‌ كومیته‌ی‌ شارستانی‌ پاوه‌ به‌ عه‌دنان ده‌ڵێن كه‌ بڕوا‌و برازیلی‌یه‌كه‌ وه‌رگرێ‌‌و بیهێنێ‌ تا بۆمبه‌كه‌ی‌ خونسا بكه‌نه‌وه‌. به‌ڵام عه‌دنان به‌جێی‌ ئه‌وه‌ی‌ برازیلی‌یه‌كه‌ وه‌رگرێ‌ له‌ ترسی‌ هه‌ڕه‌شه‌كانی‌ ئیتلاعات راست ده‌ڕوا بۆ كۆیه‌‌و خۆی‌ به‌ حیزب ده‌ناسێنێ‌. دیاره‌ هه‌ر ئه‌و رۆژه‌ به‌ هاوكاری‌‌و هه‌ماهه‌نگیی‌ كومیته‌ی‌ شارستانی‌ بانه‌‌و كومیته‌كانی‌ بازیان داریووش بۆ كۆیه‌ به‌ڕێ‌ ده‌كه‌ن‌و ئیتلاعاتی‌ ئێرانیش له‌و رێگایه‌دا تووشی‌ شكستێكی‌ گه‌وره‌ ده‌بێ‌. كه‌ له‌و پێوه‌ندی‌یه‌دا زه‌حمه‌ته‌كانی‌ عه‌دنان له‌به‌رچاو بووه‌.

گێڕانه‌وه‌ی‌ راستی‌یه‌كان به‌هۆی‌

"داریوش اسلامدوست"

به‌دوای‌ ده‌ربازبوونی‌ داریووش‌و گه‌ڕانه‌وه‌ی‌ بۆ نێو ریزه‌كانی‌ حیزب، له‌سه‌ر چۆنییه‌تی‌ ته‌حویل درانه‌وه‌یان به‌ كۆماری‌ ئیسلامیی‌‌و ده‌ربازبوونی‌ له‌ زیندانه‌كانی‌ رێژیم، به‌ وردی‌ ئاگادار بووین له‌م به‌شه‌دا قسه‌كانی‌ داریووش له‌و پێوه‌ندی‌یه‌دا، بڵاو ده‌كه‌ینه‌وه‌. دیاره‌ به‌شێك له‌و قسانه‌ وه‌ك وتووێژ له‌ ژماره‌كانی‌ 276ی‌ كوردستان ئۆرگانی‌ كومیته‌ی‌ ناوه‌ندی‌ حیزبی‌ دێموكراتی‌ كوردستانی‌ ئێران بڵاوبووه‌ته‌وه‌‌و به‌شێكی‌ دیكه‌ش وتووێژێك بوو، كه‌ له‌ ئاڕشیوی‌ حیزب وه‌رگیراوه‌.

به‌شی‌ یه‌كه‌می‌ وتوێژی‌ داریووش ئیسلام‌دوست كه‌ له‌ ژماره‌ی‌ 279ی‌ كوردستان ره‌زبه‌ری‌ 1378 دا بڵاوكراوه‌ته‌.

پرسیار: به‌رێز كاك داریووش! سێ‌ساڵ‌ له‌مه‌وبه‌ر جه‌نابت‌و 6هاورێی‌ دیكه‌ت، له‌ هه‌ڵه‌بجه‌ گیران‌و ته‌حویلی‌ كۆماری‌ ئیسلامی‌ درانه‌وه‌. تكایه‌ روونی‌ بكه‌نه‌وه‌ ئێوه‌ چۆن گیران‌و ته‌حویل درانه‌وه‌؟

وه‌ڵام: زۆر سوپاسی‌ "كوردستان" ئۆرگانی‌ كومیته‌ی‌ ناوه‌ندیی‌ حیزبه‌كه‌مان ده‌كه‌م كه‌ له‌ سێهه‌مین ساڵرۆژی‌ ئه‌و تاوانه‌ گه‌وره‌یه‌ كه‌ ده‌رحه‌ق به‌ من‌و چه‌ند هاورێی‌ دیكه‌م ئه‌نجام درا، به‌سه‌ریان كردمه‌وه‌ تا له‌ چه‌ند‌و چوونی‌ ئه‌و تاوانه‌ وه‌حشه‌تناكه‌ چه‌ند قسه‌یه‌ك بۆ خوێنه‌رانی‌ "كوردستان"ی‌ خۆشه‌ویست بكه‌م.

ئێمه‌ تیمێكی‌ 7 كه‌سی‌ له‌ تێكۆشه‌رانی‌ حیزبیی‌، كومیته‌ شارستانی‌ پاوه‌ بووین. شه‌وی‌ 27/7/1375ی‌ هه‌تاوی‌ له‌ كاتی‌ گه‌ڕانه‌وه‌مان له‌ ناوچه‌ی‌ هه‌ورامانی‌ كوردستانی‌ ئێران له‌ گوندی‌ "هاوار"ه‌وه‌ به‌ ماشێنێكی‌ شه‌خسی‌ به‌ره‌و هه‌ڵه‌بجه‌ به‌ڕێ‌ كه‌وتین، نزیكه‌ی‌ سه‌عاتی‌ 8ی‌ شه‌و بوو له‌ نزیك گوندی‌ "عه‌نه‌ب" جه‌ماعه‌تێكی‌ چه‌كدار پێشی‌ ئێمه‌یان گرت‌و داوای‌ كارتی‌ شناسایی‌یان له‌ ئێمه‌ كرد. ئێمه‌ش ده‌سبه‌جێ‌ داوامان له‌وان كرد كه‌ خۆیان بناسێنن. هه‌م شۆفیری‌ ماشێنه‌كه‌ ئه‌وانی‌ ده‌ناسی‌‌و گوتی‌ ئه‌فرادی‌ بزووتنه‌وه‌ی‌ ئیسلامین، هه‌م خۆشیان گوتیان جه‌ماعه‌تی‌ بزووتنه‌وه‌ی‌ ئیسلامین. ئێمه‌ش داوای‌ هاوكاریمان له‌وان كرد كه‌ یارمه‌تیمان بده‌ن بۆ گه‌ڕانه‌وه‌مان بۆ بنكه‌كانی‌ خۆمان. ئه‌وانیش قه‌ولی‌ هاوكاری‌یان پێ‌داین‌و ئینجا به‌ شۆفیری‌ ماشێنه‌كه‌یان گوت كه‌ ئه‌مانه‌ میوانی‌ ئێمه‌ن‌و پێویست ناكا تۆ له‌ سه‌ریان راوه‌ستی‌‌و ده‌توانی‌ بڕۆی‌. سه‌عاتی‌ 1ی‌ شه‌و بوو كه‌ نه‌فه‌رێكیان هاته‌ لامان‌و خۆی‌ به‌ "عه‌لی‌ گوڵپی‌" پێشمه‌رگه‌ی‌ ینك به‌ ئێمه‌ ناساند‌و گوتی‌ به‌یانی‌ ئێمه‌ هاوكاریتان ده‌كه‌ین‌و به‌ره‌‌و بنكه‌كانی‌ خۆتان به‌ڕێ‌تان ده‌كه‌ین. به‌ڵام ئێمه‌ له‌و كرده‌وه‌یان نیگه‌ران بووین، چونكه‌ تا ئه‌و كات نه‌یان ده‌شارده‌وه‌ كه‌ جه‌ماعه‌تی‌ بزووتنه‌وه‌ن. سه‌عاتی‌ 4ی‌ به‌یانی‌ بوو كه‌ ده‌ست‌و لاق‌و چاویان به‌ستین‌و فڕێیان داینه‌ نێو ماشێن‌و ئاگامان له‌ خۆمان نه‌بوو كه‌ به‌ره‌‌و كوێ‌ ده‌مانبه‌ن تاكوو له‌ پاوه‌ له‌به‌ر ده‌ستی‌ سپای‌ پاسداران خۆمان بینییه‌وه‌.

پرسیار: رێبه‌ران‌و به‌رپرسانی‌ بزووتنه‌وه‌ی‌ ئیسلامی‌ به‌دوای‌ ئه‌نجامدانی‌ ئه‌م تاوانه‌ پڕ شووره‌یی‌یه‌دا هه‌وڵیان دا تاوانه‌كه‌ له‌سه‌ر خۆیان لابه‌رن‌و گوتیان یه‌كیه‌تیی‌ نیشتمانی‌ ئێوه‌ی‌ ته‌حویل داوه‌ته‌وه‌. چ وه‌ڵامێكت هه‌یه‌ بۆ ئه‌م ئیدیعایه‌ی‌ رێكخراوی‌ ناوبراو؟

وه‌ڵام: ئه‌من بۆخۆم یه‌كێك له‌و 7 كه‌سه‌ بووم كه‌ ته‌حویلی‌ كۆماری‌ ئیسلامیی‌ ئێران دراینه‌وه‌. به‌راشكاوی‌ به‌ هه‌موو رێكخراوه‌ سیاسی‌یه‌كانی‌ جیهان‌و كوردستان‌و كۆمه‌ڵانی‌ خه‌ڵكی‌ كوردستان راده‌گه‌یه‌نم كه‌ ئه‌و خه‌یانه‌ته‌ گه‌وره‌یه‌ له‌ لایه‌ن بزووتنه‌وه‌ی‌ ئیسلامیی‌ كوردستانی‌ عێراقه‌وه‌ ده‌رحه‌ق به‌ جووڵانه‌وه‌ی‌ گه‌لی‌ كورد له‌ كوردستانی‌ ئێران كراوه‌‌و هیچ رێكخراوێكی‌ دیكه‌ی‌ كوردی‌ له‌و مه‌سه‌له‌یه‌دا ده‌ستیان نه‌بووه‌. چونكه‌ جگه‌ له‌وه‌ی‌ شۆفیری‌ ماشێنه‌كه‌، ئه‌وانی‌ ده‌ناسی‌‌و ئه‌وانیش شۆفیره‌كه‌یان ده‌ناسی‌، پێشتریش هه‌واڵمان هه‌بوو كه‌ هه‌ڵه‌بجه‌ جگه‌ له‌ چه‌كداری‌ ئه‌و رێكخراوه‌، چه‌كداری‌ هیچ رێكخراوێكی‌ دیكه‌ی‌ لـێ‌ نیه‌. پاشان به‌هه‌موو نیشانه‌‌و هه‌ڵس‌و كه‌وتیان ڕا دیار بوو كه‌ ئه‌وان سه‌ر به‌ بزووتنه‌وه‌ی‌ ئیسلامین. پێشمه‌رگه‌ی‌ یه‌كیه‌تی‌ نیشتمانیی‌ به‌هۆی‌ وه‌زعی‌ تایبه‌تیی‌ ئه‌و كاتی‌ ناوچه‌كه‌، هه‌ر له‌وێ‌ نه‌بوون.

پرسیار: ئایا كاتێ‌ ئێوه‌ به‌ره‌‌و هه‌ڵه‌بجه‌ ده‌گه‌ڕانه‌وه‌، هیچ به‌ خه‌یاڵتان دا هات، رێكخراوێكی‌ سیاسی‌ كه‌ ئیدیعای‌ كوردایه‌تی‌‌و ئیسلامه‌تی‌ ده‌كا، كۆمه‌ڵێك میوان قۆڵبه‌ست بكا‌و بۆ هێندێك پووڵ‌‌و پاره‌، ته‌حویلی‌ رێژیمێكی‌ دژ به‌ كورد‌و خوێنڕژی‌ وه‌ك كۆماری‌ ئیسلامی‌تان بداته‌وه‌؟

وه‌ڵام: ئێمه‌ ته‌نیا شتێك كه‌ به‌خه‌یاڵمان دا نه‌هاتبوو ئه‌وه‌ بوو كه‌ شتێكی‌ ئاوا بكرێ‌، چاوه‌ڕوانیمان له‌ هیچ حیزبێكی‌ سیاسی‌ نه‌بوو كه‌ بۆ هێندێك پووڵ‌‌و پاره‌‌و بۆ هێندێك قه‌ولی‌ كۆماری‌ ئیسلامی‌ حازربێ‌ كه‌سانێك له‌ نه‌ته‌وه‌كه‌ی‌ خۆی‌ كه‌ سه‌ر به‌ حیزبێكی‌ سیاسی‌‌و شۆڕشگێڕن ته‌حویلی‌ ئه‌و رێژیمه‌ بداته‌وه‌.

پرسیار: له‌و ماوه‌یه‌دا كه‌ وێڕای‌ 6 هاورێ‌یه‌كه‌ت له‌ زیندانه‌كانی‌ كۆماری‌ ئیسلامی‌ دابووی‌، چۆن له‌گه‌ڵ‌ خۆت‌و ئه‌وان ره‌فتار كرا؟ ئازار‌و ئه‌شكه‌نجه‌دران؟

وه‌ڵام: سه‌باره‌ت به‌ ئه‌شكه‌نجه‌ كردن ده‌بێ‌ بڵێم هه‌ر له‌ یه‌كه‌م رۆژه‌كانه‌وه‌ له‌ژێر دڕندانه‌ترین شێوه‌ی‌ ئه‌شكه‌نجه‌‌و ئازاردا بووین‌و به‌شێوه‌ی‌ جۆراوجۆر ئه‌شكه‌نجه‌ كراوین كه‌ من بۆ خۆم شه‌رم له‌ گێڕانه‌وه‌یان ده‌كه‌م.

پرسیار: جه‌نابت شاهیدێكی‌ ئازاد‌و زیندووی‌ تاوان‌و پیلانێكی‌ ئینسانفرۆشانی‌ چه‌كداره‌كانی‌ بزووتنه‌وه‌ی‌ ئیسلامی‌ له‌ دژی‌ خۆت‌و هاورێیانتی‌. سه‌باره‌ت به‌و تاوانه‌ پڕشووره‌یی‌یه‌‌و سه‌باره‌ت به‌ چاره‌نووسی‌ هاورێیانت، چ په‌یامێكت بۆ خه‌ڵكی‌ كوردستان، بۆ كۆڕ‌و كۆمه‌ڵ‌‌و رێكخراوه‌ مرۆڤدۆسته‌كان‌و بیروڕای‌ گشتی‌ دنیا هه‌یه‌؟

وه‌ڵام: ئه‌و تاوانه‌ی‌ كه‌ ده‌رحه‌ق به‌ من‌و ئه‌و 6 هاورێ‌یه‌ كرا تاوانێكی‌ زۆر سامناك‌و له‌ عه‌ینی‌ حاڵیش دا بێ‌به‌زه‌یی‌یانه‌ بوو، چونكه‌ ئێمه‌ به‌ كۆمه‌ڵێ‌ ئاوات‌و ئاره‌زوووه‌ له‌ هه‌ورامان گه‌ڕابووینه‌وه‌‌و ده‌مانویست بڕۆینه‌وه‌ بۆ نێو كۆڕی‌ هاوڕێیان‌و ماڵ‌‌و منداڵمان. به‌داخه‌وه‌ كه‌وتینه‌ ناو بۆسه‌ی‌ ناجوانمێرانه‌‌و پیلانێكی‌ شه‌رم هێنه‌ری‌ دوو قۆڵیی‌ نێوان بزووتنه‌وی‌ ئیسلامی‌‌و رێژیمی‌ دژی‌ گه‌لیی‌ كۆماری‌ ئیسلامیی‌ ئێران، كه‌ بۆ ئێمه‌ ته‌نیا شتێك بوو كه‌ به‌ میشكمان دا نه‌هاتبوو‌و قه‌ت چاوه‌ڕێی‌ كرده‌وه‌یه‌كی‌ ئاوا له‌ شوێنێكی‌ وه‌ك ئه‌وێ‌ نه‌بووین. كرده‌وه‌یه‌ك كه‌ دژی‌ هه‌ر چه‌شنه‌ یاسا‌و ره‌وشتێكی‌ ئینسانی‌‌و مافی‌ مۆرڤ‌و ئه‌خلاقی‌ سیاسی‌‌و هه‌روه‌ها دژی‌ هه‌موو چه‌شنه‌ یاسایه‌كی‌ شه‌رعی‌ بوو. بۆیه‌ داوام له‌ كۆمه‌ڵانی‌ خه‌ڵكی‌ كوردستان به‌گشتی‌‌و كوردستانی‌ ئێران به‌تایبه‌تی‌ ئه‌وه‌یه‌ كه‌ جارێكی‌تر ئه‌و پیلانه‌‌و كرده‌وه‌ دژی‌ ئینسانی‌یه‌ مه‌حكووم بكه‌ن‌و هه‌وڵ‌‌و تواناكانیان به‌هه‌ر شێوه‌یه‌ك ئیمكانی‌ هه‌بێ‌ بخه‌نه‌ گه‌ڕ‌و فشار بۆ جمهوری‌ ئیسلامی‌ بێنن تا لانی‌كه‌م شوێنی‌ ئه‌م 6 هاورێ‌یه‌ی‌ دیكه‌م بۆ خزم‌و كه‌س‌و كاریان ئاشكرا بكا‌و مه‌جالی‌ ملاقاتیان بۆ فه‌راهه‌م بكا.

هه‌روه‌ها داوام له‌ كۆڕ‌و كۆمه‌ڵه‌ به‌شه‌ردۆسته‌كان‌و حیزبه‌ سیاسی‌‌و ئێرانی‌‌و كوردستانی‌یه‌كان ئه‌وه‌یه‌ كه‌ بۆ جارێكی‌تر ئه‌و كرده‌وه‌یه‌ مه‌حكووم بكه‌ن‌و ده‌نگیان بخه‌نه‌ پاڵ‌ ده‌نگی‌ حیزبی‌ دێموكراتی‌ كوردستانی‌ ئێران‌و پێكه‌وه‌ فشار بۆ كۆماری‌ ئیسلامیی‌ ئێران بێنن تا به‌ڵكوو ئه‌و 6 هاورێ‌یه‌ی‌ دیكه‌م له‌ مه‌رگ نه‌جاتیان بێ‌‌و ئیزنی‌ كه‌س‌و كاریان بده‌ن كه‌ چاویان پێ‌یان بكه‌وێ‌.

پرسیار: به‌بڕوای‌ جه‌نابت، بزووتنه‌وه‌ی‌ ئیسلامی‌ بۆچی‌ ئاماده‌ نه‌بوو عامیلانی‌ گرتن‌و ته‌حویلدانه‌وه‌ی‌ ئێوه‌، سزا بدا‌و به‌مجۆره‌ به‌رپرسایه‌تیی‌ تاوانه‌كه‌ له‌سه‌ر خۆی‌ لاببا؟ ئه‌وانه‌ی‌ ئێوه‌یان گرت‌و ته‌حویلیان دانه‌وه‌، ئێستا چ كاره‌ن، ئه‌گه‌ر بیان بینی‌ ده‌یان ناسی‌یه‌وه‌؟

وه‌ڵام: به‌ نه‌زه‌ری‌ من له‌به‌ر دوو هۆی‌ سه‌ره‌كی‌ بزووتنه‌وه‌ عامیلانی‌ ئه‌و كرده‌وه‌ دزێوه‌ی‌ سزا نه‌دا:

یه‌كه‌م، ئه‌وه‌ كه‌ عامیلی‌ ئه‌ساسیی‌ پیلانه‌كه‌ رێبه‌رایه‌تیی‌ بزووتنه‌وه‌ی‌ ئیسلامی‌ بۆ خۆی‌ بوو، بۆیه‌ ئه‌گه‌ر هاتبان‌و عامیله‌كانیان سزا دابان ده‌بوو له‌ سه‌ره‌وه‌ی‌ هه‌موویان رێبه‌ری‌ بزووتنه‌وه‌یان سزا دابا.

دووهه‌م، چونكه‌ بزووتنه‌وه‌ی‌ ئیسلامی‌ له‌ لایه‌ك بۆخۆی‌ له‌ ناوچه‌كه‌دا له‌ خزمه‌ت به‌رژه‌وه‌ندی‌یه‌كانی‌ كۆماری‌ ئیسلامیی‌ ئێران دابوو، ئێران هه‌موو كرده‌وه‌یه‌كی‌ دژی‌ نه‌ته‌وایه‌تیی‌ پێ‌ده‌كردن‌و له‌ لایه‌كی‌ دیكه‌شه‌وه‌ وه‌زعی‌ ئه‌و ده‌می‌ كوردستانی‌ عێراق گه‌لێك ئاڵۆز بوو‌و كۆماری‌ ئیسلامی‌ به‌هۆی‌ نه‌چوونه‌ ژێرباری‌ بزووتنه‌وه‌ی‌ ئیسلامی‌‌و تاوانبار كردنی‌ ینك به‌و تاوانه‌، ده‌یانهه‌ویست له‌ نێوان حیزبی‌ دێموكراتی‌ كوردستانی‌ ئێران‌و یه‌كیه‌تی‌ نیشتمانیی‌ كوردستان، شه‌ڕ‌و دووبه‌ره‌كی‌ درووست بكه‌ن كه‌ ئه‌ویش ته‌نیا به‌ قازانجی‌ كۆماری‌ ئیسلامیی‌ ئێران بوو‌و به‌س.

به‌نیسبه‌ت ئه‌وانه‌ی‌ ئێمه‌یان ئه‌وده‌م ده‌سگیر كرد‌و ته‌حویلیان داینه‌وه‌ ده‌بێ‌ بڵێم نازانم ئێستا له‌ نێو بزووتنه‌وه‌دا چ كاره‌ن، به‌ڵام ئه‌گه‌ر بیان بینم زۆر چاك ده‌توانم بیان‌ناسمه‌وه‌.

له‌به‌شی‌ دووهه‌می‌ قسه‌كانی‌ داریووش كه‌ له‌ ئاڕشیوی‌ حیزب وه‌رگیراوه‌، ناوبراو چۆنیه‌تی‌ ده‌رباز بوونی‌ ده‌گێرێته‌وه‌. ".. . به‌دوای‌ ئه‌وه‌ی‌ كه‌ به‌ بێ‌حوورمه‌تی‌یه‌كی‌ زۆره‌وه‌ له‌ لایه‌ن بزووتنه‌وه‌ی‌ ئیسلامی‌یه‌وه‌، ته‌حویلی‌ كۆماری‌ ئیسلامی‌ ئێران دراینه‌وه‌، ئه‌شكه‌نجه‌‌و ئازارێكی‌ زۆریان كردین، كه‌ به‌شێك له‌و ئازارانه‌ شوێنه‌واریان له‌سه‌ر له‌شم هه‌رماوه‌. هه‌موو رۆژێك ده‌هاتن‌و له‌ من‌یان ده‌پرسی‌‌و داوای‌ زانیاری‌یان ده‌كرد. وه‌ڵامی‌ هه‌ر پرسیارێك ئه‌گه‌ر هه‌ڵه‌ بوایه‌ لـێ‌یان ده‌دام. من كه‌ ته‌حه‌موولی‌ ئه‌و ئه‌شكه‌نجه‌‌و ئازارانه‌م نه‌مابوو ته‌نیا له‌به‌ر ئه‌وه‌ی‌ به‌شێوه‌یه‌ك خۆم ده‌رباز كه‌م، وتم ئاماده‌م هاوكاری‌تان بكه‌م. ئه‌وانیش دیاره‌ من چاوم به‌سترابوو، ته‌نیا ده‌زانم كه‌ هه‌موویان به‌ ناوی‌ حاجی‌ یه‌كتریان بانگ ده‌كرد. وتیان زۆر باشه‌ تۆ ده‌بێ‌ یه‌كێك‌مان پێ‌بناسێنی‌ (له‌ كوردستانی‌ عێراق) تا له‌ رێگه‌ی‌ ئه‌وه‌وه‌ هاوكاریمان بكه‌ی‌. منیش خوشكه‌زایه‌كه‌م كه‌ دانیشتووی‌ عێراق بوو، به‌ناوی‌ عه‌دنان پێم ناساندن. دوای‌ پێنج رۆژ خوشكمیان بانگ كرد‌و وتیان عه‌دنانمان بۆ ئاگادار بكه‌وه‌. ته‌نانه‌ت ئه‌ویش‌یان وت ئه‌گه‌ر عه‌دنان هاوكاریمان نه‌كا داریووش ده‌كوژین. دیاره‌ من نازانم چ كارێكیان بۆ دیاری‌ كردبوو.

دوای‌ حه‌وت رۆژ وتیان خۆت ئاماده‌كه‌ بۆ شوێنێكت ده‌به‌ین. ده‌ستێك لیباسیان پێ‌دام، له‌به‌رم كرد. چاویان به‌ستم‌و هێنامیان بۆ نه‌وسوود. له‌وێ‌ كه‌سێك به‌ ناوی‌ "محمدی‌" كه‌ مۆره‌ی‌ ئیتلاعات بوو وتی‌ قه‌راره‌ چه‌ند كه‌سێك تۆ ببینن حه‌قی‌ قسه‌ كردنت نیه‌، ئه‌گه‌ر هات‌و قسه‌یان له‌گه‌ڵ‌ كردی‌ ده‌بێ‌ به‌ فارسی‌ قسه‌ بكه‌ی‌، دوای‌ ماوه‌یه‌ك خوشكم هات‌و ئاگاداریان كرد كه‌ ده‌بێ‌ بڕۆی‌ بۆ سلێمانی‌‌و عه‌دنان بێنی‌. رۆژی‌ دواتر سه‌عات 8ی‌ به‌یانی‌ منیان هێناوه‌‌و وتیان عه‌دنان دێته‌ ئێره‌‌و ده‌بێ‌ به‌ فارسی‌ قسه‌ی‌ له‌گه‌ڵ‌ كه‌ی‌‌و پێی‌ بڵێی‌ كه‌ ئه‌گه‌ر هاوكاری‌ نه‌كه‌ی‌ من له‌ به‌ین ده‌چم. وتم فارسی‌ نازانێ‌، وتیان تێ‌ده‌گا تۆ كارت نه‌بێ‌. دواتر "محمدی‌" عه‌دنانی‌ هێنا‌و منیش ئه‌و شتانه‌ی‌ قه‌رار بوو بیڵێم پێم وت. عه‌دنان حاجی‌ بانگ كرد‌و نازانم چی‌یان به‌ یه‌ك وت، به‌ڵام عه‌دنان گه‌ڕایه‌وه‌‌و وتی‌ خاڵۆ له‌ لایه‌ن منه‌وه‌ ئاسووده‌به‌‌و بزانه‌ ئازاد كراوی‌. به‌دوای‌ ئه‌و چاوپێكه‌وتنه‌ منیان هێنایه‌وه‌ بۆ ئیتلاعاتی‌ پاوه‌‌و هه‌ر وه‌كوو پێشوو ئه‌شكه‌نجه‌‌و ئازار‌و پرسینه‌وه‌ كه‌ هه‌موو رۆژێك به‌رده‌وام بوو. رۆژێك‌یان ناوی‌ نه‌فه‌رێكی‌ ته‌شكیلاتی‌یان لـێ‌پرسیم وتم نایناسم، لـێ‌یان دام‌و ده‌فته‌رێك كه‌ كاتی‌ دابه‌زین له‌ سه‌یاره‌كه‌ی‌ سه‌ید عومه‌ر پێم دابوو رای‌ گرێ‌‌و به‌ هه‌رشێوه‌یه‌ك كه‌ بووه‌ بۆ هاوڕێیانم به‌ڕێ‌ بكا خستیانه‌ به‌رده‌مم‌و وتیان ئه‌مه‌ چیه‌.*

دوای‌ دوو مانگ، دیاره‌ له‌و ماوه‌یه‌دا، چه‌ندجار خوشكم هاتوه‌ بۆلام‌و یه‌كترمان دیوه‌. منیان برده‌ شاری‌ سه‌رپێڵی‌ زه‌ها‌و، له‌وێ‌ كه‌سێك به‌ناوی‌ جه‌لال (پێشتر له‌ ئیتلاعاتی‌ پاوه‌ كاری‌ كردوه‌) هاته‌ لام‌و وتی‌ دایكت دێت بۆ لات ده‌بێ‌ به‌دایكت بڵێی‌ ئه‌گه‌ر منداڵه‌كانم نه‌گه‌ڕێنه‌وه‌ بۆ ئێران ده‌مكوژن. دواتر دایكم‌و خوشكم هاتن‌و منیش وتم ئازاد بوونی‌ من به‌ستراوه‌ته‌وه‌ به‌ هاتنه‌وه‌ی‌ منداڵه‌كان، دایكم وتی‌ ئه‌گه‌ر حاجی‌ جه‌لال به‌ڵێنیم پێ‌ده‌دا ئازادت بكا، به‌هه‌ر شێوه‌یه‌ك كه‌ بووه‌ منداڵه‌كان دێنمه‌وه‌. چه‌ند رۆژ دواتر دیاره‌ ده‌زانم رۆژی‌ شه‌ممه‌ بوو، ده‌ستێك لیباسیان بۆ هێنام‌و وتیان له‌به‌ری‌ كه‌. بردمیانه‌ دیوێك‌و چاویان كردمه‌وه‌، منداڵه‌كانم له‌وێ‌ بوون. نه‌یانهێشت قسه‌یان له‌گه‌ڵ‌ بكه‌م، هه‌ر له‌وێ‌ هێندێك پرسیاریان له‌ خێزانم كرد كه‌ سه‌باره‌ت به‌ ته‌قه‌ له‌ تانجه‌ڕۆ‌و شه‌هید بوونی‌ حامید سه‌لیمی‌ بوو له‌گه‌ڵ‌ هێندێك پرسیاری‌ دیكه‌. دوای‌ چاره‌كه‌ سه‌عاتێك ئێمه‌یان له‌یه‌ك جیاكرده‌وه‌‌و رۆژی‌ یه‌ك‌شه‌ممه‌ سه‌ر له‌ به‌یانی‌ ته‌نیا ده‌ستیان به‌ستم‌و چاویان كردمه‌وه‌‌و خستمیانه‌ نێو ماشێنێك دوای‌ ماوه‌یه‌ك گه‌یشتینه‌ شارێك وتیان ده‌زانی‌ كوێیه‌؟ وتم نازانم، وتیان قه‌سری‌ شیرینه‌، دوای‌ نان خواردن دیسان چاویان به‌ستم‌و نه‌مده‌زانی‌ بۆ كوێ‌ ده‌ڕۆین تا دوای‌ ماوه‌یه‌كی‌ دیكه‌ ده‌ست‌و چاویان كردمه‌وه‌، چاوم له‌ ده‌ورووبه‌ر كرد بۆم ده‌ركه‌وت كوردستانی‌ عێراقه‌، زۆر ترسام، له‌و كاته‌دا پێم‌وابوو ده‌مبه‌نه‌لای‌ مقه‌ره‌كانی‌ حیزب له‌ تانجه‌ڕۆ‌و ته‌قه‌یه‌ك دروست ده‌كه‌ن‌و من ده‌كوژن‌و فڕێم ده‌ده‌ن. هه‌ر بۆیه‌ كه‌وتمه‌ فكری‌ خۆده‌ربازكردن. زۆری‌ پێ‌نه‌چوو گه‌یشتینه‌ شاری‌ سلێمانی‌‌و چووینه‌ گه‌ڕه‌كی‌ ڕزگاری‌ له‌وێ‌ چووینه‌ ماڵێك‌و ماشێنه‌كه‌یان گۆڕی‌ به‌ له‌یلا عه‌له‌وی‌ هه‌ر له‌وێ‌ ناوی‌ منیان گۆڕی‌‌و وتیان ناوت عوسمان هاشمی‌ خه‌ڵكی‌ بانه‌ی‌‌و هه‌ڕه‌شه‌یان لـێ‌كردم كه‌ به‌ هیچ شێوه‌یه‌ك نابێ‌ به‌ هیچ كه‌س بڵێی‌ داریووشی‌. دواتر منیان برده‌ دیوێك دیتم عه‌دنان له‌وێ‌یه‌، به‌ عه‌دنانیان وت داریووشمان هێناوه‌ به‌ڵام بڕوامان پێی‌ نیه‌‌و ته‌حویلی‌ تۆی‌ ده‌ده‌ین‌و ده‌بێ‌ له‌ پێش دا، له‌ ماوه‌ی‌ 24 سه‌عات مه‌نسوور فه‌تتاحی‌ به‌رپرسی‌ كومیته‌ شارستانی‌ پاوه‌ بكوژن. عه‌دنان وتی‌ 24 سه‌عات زۆر كه‌مه‌، هه‌ر بۆیه‌ كردیانه‌ 48 سه‌عات. باسی‌ ئه‌وه‌یش كرا كه‌ برازیلی‌یه‌كی‌ سپی‌ رۆژی‌ دواتر له‌ ژێر پردی‌ سلێمانی‌ ته‌حویلتان ده‌ده‌ین. سواری‌ لانكرۆزێرێكی‌ سپی‌یان كردین‌و له‌ ده‌ركی‌ ماڵی‌ عه‌دنان دایان به‌زاندین‌و رۆیشتن. له‌و كاته‌دا، له‌و بڕوایه‌دابووم به‌هه‌ر شێوه‌یه‌ك بووه‌، عه‌دنان بگرم‌و ته‌حویلی‌ حیزبی‌ بده‌م. له‌ ماڵی‌ عه‌دنان كه‌ دانیشتین وتی‌ خاڵۆ به‌ هیچ شێوه‌یه‌ك نابێ‌ بیری‌ خراپ له‌ سه‌رت دابێت‌و كاری‌ خراپ بكه‌ی‌، من تا ئێستا هه‌ر كارێكم كردوه‌ كاك مه‌نسوورم ئاگادار كردۆته‌وه‌‌و حامیدیش من شه‌هیدم نه‌كردوه‌. دوای‌ ئه‌وه‌ كه‌ له‌ عه‌دنان دڵنیا بووم، هه‌ستام‌و ده‌ستم كرده‌ ملی‌‌و ماچم كرد. هه‌ر ئه‌و شه‌وه‌ نامه‌یه‌كم بۆ كاك مه‌نسوور نووسی‌‌و بۆم به‌ڕێ‌ كرد كه‌ من له‌ ماڵی‌ عه‌دنانم‌و ده‌مه‌وێ‌ بێم بۆ لاتان‌و به‌یانی‌ سه‌عاتی‌ 5/6 به‌ هه‌ماهه‌نگی‌ یه‌كتری‌ هاتمه‌ لای‌ هاورێیانم.

ئه‌هدافی‌ كۆماری‌ ئیسلامی‌

ئه‌هدافی‌ كۆماری‌ ئیسلامی‌ ئێران له‌و كرده‌وه‌یه‌دا، له‌ سیاسه‌ته‌كانی‌ ئه‌و رێژیمه‌ ده‌رحه‌ق به‌ گه‌لی‌ كورد سه‌رچاوه‌ ده‌گرێ‌، هه‌ر بۆیه‌ ده‌بێ‌ ئاوڕێك له‌ ڕابردوو بده‌ینه‌وه‌‌و سیاسه‌ته‌كانی‌ ئه‌م رێژیمه‌ له‌ به‌رامبه‌ر مه‌سه‌له‌ی‌ كورد‌و حیزبی‌ دێموكراتی‌ كوردستانی‌ ئێران بخه‌ینه‌ به‌ر باس. هه‌روه‌ك ده‌زانن كوردستان له‌ نێوان چوار وڵاتی‌ ئێران‌و عێراق‌و توركیه‌‌و سوریه‌ دابه‌ش كراوه‌. ئه‌گه‌ر ئاوڕێك له‌ مێژووی‌ گه‌لی‌ كورد بده‌ینه‌وه‌ بۆمان ده‌رده‌كه‌وێ‌، حكوومه‌تی‌ ئه‌و وڵاتانه‌ قه‌د دۆستی‌ كورد نه‌بوون‌و دژی‌ قازانج‌و به‌رژه‌وه‌ندیی‌یه‌كانی‌ ئه‌م گه‌له‌ هه‌نگاویان هه‌ڵ‌گرتوه‌. ته‌نانه‌ت ئه‌گه‌ریش به‌ زاهیر پشتیوانی‌یان له‌ كوردی‌ پارچه‌یه‌كی‌ دیكه‌ كردوه‌. قازانج‌و به‌رژه‌وه‌ندی‌یه‌كانی‌ خۆیان بووه‌. شۆڕشی‌ كوردستانی‌ عێراق له‌ ساڵه‌كانی‌ 1975 بوو به‌ قوربانی‌ سات‌و سه‌وداكانی‌ رێژیمی‌ پاشایه‌تی‌‌و رێژیمی‌ عێراق‌و به‌ به‌ستنی‌ په‌یماننامه‌ی‌ ئه‌لجه‌زایر تووشی‌ ئه‌و شكسته‌ گه‌وره‌یه‌ بوو. ته‌نانه‌ت به‌دوای‌ ئاڵووگۆڕ به‌سه‌ر حكوومه‌ته‌كانیش ئه‌و سیاسه‌ته‌ دواكه‌وتوانه‌ی‌ وڵاتانی‌ حاكم به‌سه‌ر كورد، نه‌گۆڕدراوه‌‌و دژی‌ هه‌ر چه‌شنه‌ داخوازێكی‌ ئه‌م نه‌ته‌وه‌یه‌ له‌ هه‌ر پارچه‌یه‌كی‌ كوردستان راوه‌ستاون‌و به‌ توندترین شێوه‌ وه‌ڵامی‌ داخوازه‌كانیان داوه‌ته‌وه‌.

كۆماری‌ ئیسلامی‌ ساڵی‌ 1357ی‌ هه‌تاوی‌ به‌دوای‌ سه‌ركه‌وتنی‌ شۆڕشی‌ گه‌لانی‌ ئێران به‌دژی‌ رێژیمی‌ پاشایه‌تی‌ هاته‌ سه‌ركار‌و ئیستا كه‌ 25 ساڵ‌ به‌سه‌ر ده‌سه‌ڵاتی‌ ئه‌م حكوومه‌ته‌ تێپه‌ڕ بووه‌، هیچ چه‌شنه‌ هه‌نگاوێكی‌ بۆ چاره‌سه‌ركردنی‌ مه‌سه‌له‌ی‌ كورد له‌ كوردستانی‌ ئێران هه‌ڵنه‌گرتوه‌. ئه‌وه‌ له‌ حالێك دایه‌ كه‌ مه‌به‌ست له‌ پێك هێنانی‌ شۆڕش، پێك هێنانی‌ ئاڵوگۆر له‌ نیزامێكی‌ كۆن‌و دواكه‌وتوو بۆ نیزامێكی‌ نوێ‌‌و پێشكه‌وتووتره‌، تا پێشگیری‌ له‌ زوڵم‌و زۆر‌و جیاوازی‌ بگیرێ‌. به‌ڵام ئه‌گه‌ر ئاوڕێك له‌ مێژووی‌ 25 ساڵه‌ی‌ كۆماری‌ ئیسلامی‌ بده‌ینه‌وه‌ بۆمان ده‌رده‌كه‌وێ‌ ئه‌م رێژیمه‌ سه‌باره‌ت به‌ كیشه‌ی‌ كورد سیاسه‌تی‌ هه‌روه‌ك ریژیمی‌ پێشوو بووه‌‌و ته‌نانه‌ت له‌ هێندێك بواریش‌دا بگره‌ توند‌وتیژتریش بووه‌. قه‌ڵاچۆكردنی‌ گونده‌كان، بۆمبارانی‌ شاره‌كان، ئیعدام، زیندان‌و ته‌بعید‌و.. .هتد وه‌ڵامه‌كانی‌ كۆماری‌ ئیسلامی‌ له‌ به‌رامبه‌ر داخوازه‌ ره‌واكانی‌ گه‌لی‌ كورد بۆ گه‌یشتن به‌ مافه‌كانی‌ نه‌ته‌وه‌یی‌ بووه‌.

حیزبی‌ دێموكراتی‌ كوردستانی‌ ئێران ساڵی‌ 1324ی‌ هه‌تاوی‌ دامه‌زراوه‌، ئه‌م حیزبه‌ هه‌م له‌ سه‌رده‌می‌ حكوومه‌تی‌ پاشایه‌تی‌دا‌و هه‌م له‌سه‌رده‌می‌ كۆماری‌ ئیسلامی‌دا، وه‌ك حیزبێك كه‌ له‌ نێو دڵی‌ خه‌ڵكی‌ كوردستانی‌ ئێران دا جێی‌ خۆی‌ كردوه‌ته‌وه‌، به‌ پشتیوانی‌ ئه‌م خه‌ڵكه‌ توانیویه‌تی‌ بۆ وه‌ده‌ست هێنانی‌ سه‌ره‌تایی‌ترین مافی‌ نه‌ته‌وایه‌تی‌ هه‌نگاو هه‌ڵگرێ‌، له‌و رێگایه‌دا هه‌زاران رۆڵه‌ی‌ ئه‌م گه‌له‌ له‌ نێو ریزه‌كانی‌ حیزبی‌ دێموكراتی‌ كوردستانی‌ ئێران گیانی‌ خۆیان به‌ختی‌ ئامانجه‌كانیان كردوه‌ كه‌ سه‌ر قافڵه‌ی‌ هه‌موو شه‌هیده‌كان پێشه‌وا قازی‌ محه‌ممه‌د، دوكتور عه‌بدولڕه‌حمان قاسملوو‌و دوكتور سادق شه‌ڕه‌فكه‌ندی‌ بوون كه‌ دوو كه‌سی‌ دوایی‌ به‌ شێوه‌یه‌كی‌ زۆر ناجوانمێرانه‌له‌ لایه‌ن تیرۆریستانی‌ ئه‌و رێژیمه‌ شه‌هید كراون. ئه‌م رێژیمه‌ بۆ لاوازكردنی‌ جووڵانه‌وه‌ی‌ گه‌لی‌ كورد ده‌ستی‌ داوه‌ته‌ هه‌موو جۆره‌ كرده‌وه‌یه‌ك، له‌ ئێعدام‌و تیرۆری‌ خه‌باتخوازان بگره‌ تا ده‌گاته‌ قه‌ڵاچۆكۆدن‌و هێرشی‌ فه‌رهه‌نگیی‌‌و بڵاوكردنه‌وه‌ی‌ مه‌وادی‌ موخه‌دیر‌و ئالووده‌ كردنی‌ گه‌لی‌ كورد به‌و به‌ڵا ماڵوێران كه‌ره‌. سیاسه‌ته‌كانی‌ كۆماری‌ ئیسلامی‌ ته‌نانه‌ت سنووره‌كانیشی‌ بڕیوه‌‌و به‌ ناوی‌ دۆستایه‌تی‌‌و هاوكاری‌ كردنی‌ كورده‌كانی‌ پارچه‌كانی‌ دیكه‌ی‌ كوردستان، شوێنه‌واری‌ خراپی‌ له‌ سه‌ر ئه‌و به‌شه‌ی‌ له‌ كوردستان داناوه‌؛ كه‌ له‌و پێوه‌ندی‌یه‌دا كوردستانی‌ عێراق زیندووترین‌و حاشا هه‌ڵنه‌گرترین به‌ڵگه‌ی‌ سیاسه‌ته‌ چه‌په‌ڵه‌كانی‌ ئه‌م رێژیمه‌ دژی‌ گه‌لی‌ كورد بووه‌.

ساڵی‌ 1991 به‌دوای‌ شه‌ڕی‌ دووهه‌می‌ كه‌نداو‌و به‌ده‌سه‌ڵات گه‌یشتنی‌ كورده‌كانی‌ عێراق‌و پێك‌هێنانی‌ حكوومه‌تی‌ هه‌رێم‌و پارلمان یه‌كێك له‌ گه‌وره‌ترین ده‌سكه‌وته‌ مێژوویی‌یه‌كانی‌ گه‌لی‌ كوردیان وه‌ده‌ست هێنا. به‌داخه‌وه‌ دوژمنانی‌ گه‌لی‌ كورد ئه‌م جاره‌شیان وه‌خوده‌كه‌ون‌و بۆ تێك‌دان‌و شكست‌هێنان به‌ ئه‌زموونی‌ ئه‌م جاره‌ش، بۆ تێكدانی‌ ئه‌منییه‌ت‌و ئاسایشی‌ كوردستانی‌ عێراق‌و حكوومه‌تی‌ هه‌رێم به‌ هه‌ر شێوه‌یه‌ك‌و رێگایه‌ك بۆیان كرا هه‌نگاویان هه‌ڵگرت. میژووی‌ ئه‌م چه‌ند ساڵه‌ی‌ كوردستانی‌ عێراق ئه‌و راستی‌یانه‌مان زۆرتر بۆ ده‌رده‌خا كۆماری‌ ئیسلامی‌ له‌و ماوه‌یه‌دا، به‌ به‌ڕێ‌كردنی‌ عه‌واملین‌و به‌كرێگیراوانی‌ جۆراوجۆری‌ خۆی‌ (دیاره‌ زۆرتر ئه‌ندامی‌ ئیتلاعات‌و سپای‌ پاسداران بووه‌) بۆ كووردستانی‌ عێراق، دوو هه‌ده‌فی‌ سه‌ره‌كی‌ له‌ پێش گرتوه‌: یه‌كه‌م، تێك‌دان‌و به‌شكست‌هێنانی‌ ئه‌زموونی‌ ئه‌م جاره‌ی‌ كوردستانی‌ عێراق‌و دووهه‌م: زه‌ربه‌ وه‌شاندن له‌ ئوپوزیسیۆنی‌ خۆی‌ له‌ كوردستانی‌ عێراق به‌تایبه‌تی‌ حیزبی‌ دێموكراتی‌ كوردستانی‌ ئێران. كۆماری‌ ئیسلامی‌ له‌ یه‌كه‌م سیاسه‌تی‌ خۆی‌دا، به‌هه‌ر شێوه‌یه‌ك بۆی‌ كراوه‌ ویستوویه‌تی‌ حكوومه‌تی‌ هه‌رێمی‌ كوردستان لاواز بكا، له‌و پێوه‌ندی‌یه‌دا به‌سیاسه‌ته‌ دواكه‌وتوه‌كانی‌ خۆی‌ وه‌ك نه‌خشی‌ مه‌نفی‌ له‌شه‌ڕی‌ براكوژی‌، پشتیوانی‌ له‌ هێندێك سازمان وه‌ك بزووتنه‌وه‌ی‌ ئیسلامی‌ كه‌ هه‌میشه‌ نه‌خشی‌ تێكده‌ری‌ هه‌بووه‌. ویستوویه‌تی‌ ئه‌منییه‌تی‌ ناوچه‌‌و ده‌سه‌ڵاتی‌ ناوچه‌یی‌ كورده‌كان تێك‌بدا تا ئه‌زموونی‌ ئه‌م جاره‌ی‌ گه‌لی‌ كورد تووشی‌ شكست بێ‌. به‌خۆشییه‌وه‌ له‌م دوایی‌یانه‌دا، به‌هۆی‌ وشیاری‌‌و هه‌ست به‌ به‌رپرسایه‌تی‌ سازمانه‌كان‌و كه‌سایه‌تی‌یه‌كان، كۆماری‌ ئیسلامی‌ به‌و ئاكامه‌ نه‌گه‌یشت.

له‌ سیاسه‌تی‌ دووهه‌م دا، ویستوویه‌تی‌ له‌ رێگای‌ تیرۆر‌و ره‌شه‌كوژی‌، رفاندن، مین دانانه‌وه‌‌و بۆمب دانانه‌وه‌، هێرشی‌ زه‌مینی‌‌و هه‌وایی‌‌و هاندانی‌ خه‌ڵكی‌ كوردستانی‌ عێراق دژی‌ ئوپوزسیۆنی‌ خۆی‌ به‌تایبه‌تی‌ حیزبی‌ دێموكراتی‌ كوردستانی‌ ئێران، جووڵانه‌وه‌ی‌ گه‌لی‌ كورد له‌ كوردستانی‌ ئێران لاواز بكا، به‌داخه‌وه‌ له‌ ماوه‌ی‌ ئه‌و دوازده‌ ساڵه‌ی‌ دا نزیك به‌ 150 كه‌س له‌ ئه‌ندامانی‌ حیزبی‌ دێموكرات‌و لایه‌نه‌كانی‌ دیكه‌ بوونه‌ته‌ قووربانی‌ سیاسه‌ته‌ نائینسانی‌یه‌كانی‌ كۆماری‌ ئیسلامی‌. له‌ پێوه‌ندی‌ له‌گه‌ڵ‌ ته‌حویل‌دانه‌وه‌ی‌ تێكۆشه‌رانی‌ حیزب به‌هۆی‌ بزووتنه‌وه‌ی‌ ئیسلامی‌، كۆماری‌ ئیسلامی‌ ئێران هه‌ر دوو سیاسه‌تی‌ خۆی‌ به‌ڕێوه‌ بردوه‌. واته‌ هه‌م زه‌بری‌ له‌ حیزبی‌ دێموكرات وه‌شاندوه‌ هه‌م له‌و رێگایه‌دا ویستوویه‌تی‌ به‌ ئاواتی‌ دێرینه‌ی‌ خۆی‌ كه‌ ده‌رگیركردنی‌ حیزبی‌ دێموكرات له‌گه‌ڵ‌ یه‌كێك له‌ سازمانه‌كانی‌ كوردی‌ عێراقی‌یه‌ بكا. له‌به‌ر ئه‌وه‌ی‌ كۆماری‌ ئیسلامی‌‌و بزووتنه‌وه‌ی‌ ئیسلامی‌ له‌سه‌ر رێكه‌وتنی‌ پێشتری‌ خۆیان به‌دوای‌ ته‌حویل‌دانه‌وه‌ی‌ هاورێ‌یانی‌ حیزبی‌ له‌ لایه‌ن بزووتنه‌وه‌ی‌ ئیسلامی‌ به‌ كۆماری‌ ئیسلامی‌. پڕوپاگه‌نده‌یه‌كی‌ زۆر له‌ لایه‌ن هه‌ر دوو لا دژی‌ یه‌كیه‌تی‌ نیشتمانیی‌ هه‌م له‌ ئێران‌و هه‌م له‌ عێراق دا بڵاو بۆوه‌ تا حیزبی‌ دێموكرات له‌گه‌ڵ‌ یه‌كیه‌تی‌ نیشتمانیی‌ تووشی‌ شه‌ڕێكی‌ براكوژی‌ بكا‌و كۆماری‌ ئیسلامی‌ ئێرانیش به‌ ئاواتی‌ خۆی‌ بگا، كه‌ به‌خۆشی‌یه‌وه‌ به‌ ته‌حه‌مول‌و وشیاری‌ ئه‌و پیلانه‌ی‌ رێژیم پووچه‌ڵ‌ بووه‌‌و سه‌رشۆڕی‌ بۆ بزووتنه‌وه‌ی‌ ئیسلامی‌‌و رێبه‌ری‌ ئه‌و رێكخراوه‌یه‌كه‌ له‌گه‌ڵ‌ كۆماری‌ ئیسلامی‌ ئێران، دارێژه‌ری‌ ئه‌و پیلانه‌ بوون مایه‌وه‌‌و ئه‌و خه‌یانه‌ته‌یان له‌ مێژووی‌ گه‌له‌كه‌مان دا تۆمار كراوه‌.

چاره‌نووسی‌ ته‌حویلدراوه‌كان

تا ئێستا حه‌وت ساڵ‌ به‌سه‌ر ته‌حویلدانه‌وه‌ی‌ ئه‌ندامانی‌ حیزبی‌ به‌هۆی‌ بزووتنه‌وه‌ی‌ ئیسلامی‌ به‌ كۆماری‌ ئیسلامی‌ ئێران، تێپه‌ڕیوه‌. له‌و كه‌سانه‌ داریووش ئیسلامدوست هه‌روه‌ك پێشتریش باس كرا، توانیی‌ خۆی‌ له‌ به‌ندیخانه‌كانی‌ رێژیم ڕزگار بكا. به‌ڵام 6 كه‌سی‌ دیكه‌ له‌و ده‌مه‌وه‌ تا ئیستا له‌ لایه‌ن رێژیمه‌وه‌ هیچ چه‌شنه‌ هه‌واڵێكیان لـێ‌بڵاو نه‌كراوه‌ته‌وه‌‌و ته‌نانه‌ت به‌ هیچ شێوه‌یه‌ك ئیعترافی‌ به‌ گیرانی‌ ئه‌وان نه‌كردوه‌‌و روون نیه‌ كه‌ ئه‌و كه‌سانه‌ له‌ كوێ‌ زیندانی‌ كراون‌و ئه‌ندامانی‌ بنه‌ماڵه‌كانیشیان به‌ هیچ شێوه‌یه‌ك ئاگاداری‌ چاره‌نووسی‌ كه‌س‌و كاره‌كانیان نین. ته‌نانه‌ت داریووش به‌داوی‌ ده‌ربازبوونی‌ له‌ زیندانه‌كانی‌ رێژیم وتوویه‌تی‌ هیچ ئاگاداری‌یه‌كم له‌سه‌ر هاورێیانی‌ دیكه‌وه‌ نیه‌ له‌به‌ر ئه‌وه‌ی‌ به‌دوای‌ ته‌حویلدانه‌وه‌مان به‌ ئێران له‌ یه‌ك جیاكراوینه‌ته‌وه‌‌و ئاگامان له‌یه‌ك نه‌بووه‌.

هه‌ر له‌ یه‌كه‌م رۆژه‌كانی‌ ته‌حویلدرانه‌وه‌ی‌ ئه‌ندامانی‌ حیزب، حیزبی‌ دێموكراتی‌ كوردستانی‌ ئێران تێكۆشاوه‌ له‌ هه‌ر رێگایه‌كه‌وه‌، كه‌ بۆی‌ بكرێ‌، هه‌م له‌ چاره‌نووسی‌ هاوڕێیانی‌ ئاگادار بێ‌‌و هه‌م گوشار بۆ رێژیم بێنێ‌ تا لانی‌ كه‌م ئه‌منییه‌تی‌ گیانی‌ ئه‌وان بپارێزێ‌. هه‌ر بۆیه‌ له‌ رێكه‌وتی‌ 26/10/1996 به‌رێز عه‌بدولڵا حه‌سه‌ن‌زاده‌ سكرتێری‌ گشتی‌ حیزبی‌ دێموكراتی‌ كوردستانی‌ ئێران له‌ نامه‌یه‌ك دا، داوا له‌ "پتروس پتروس غالی‌" سكرتێری‌ گشتی‌ رێكخراوه‌ی‌ نه‌ته‌وه‌یه‌كگرتوه‌كانی‌ ئه‌و كات‌و "موریس كاپیتورن" نوێنه‌ری‌ تایبه‌تی‌ كومیسیۆنی‌ مافی‌ مرۆڤ بۆ لێكۆڵینه‌وه‌ له‌ وه‌زعی‌ مافی‌ مرۆڤ له‌ ئێران دا‌و هه‌روه‌ها "پی‌یرمۆروا" سه‌رۆكی‌ ئه‌نتێرناسیۆناڵی‌ سوسیالیست نارد‌و سه‌باره‌ت به‌گیران‌و ته‌حویلدرانه‌وه‌ی‌ هاوڕێیانی‌ حیزبی‌ ئاگاداری‌ كردنه‌وه‌‌و داوای‌ كرد بۆ پارێزگاری‌ له‌ گیانی‌ ئه‌و كه‌سانه‌ هه‌نگاو هه‌ڵگرن.(4)

هه‌ر له‌و پێوه‌ندی‌یه‌دا، رۆژی‌ 6ی‌ نوامبری‌ 1996 ئاغای‌ "بێرنارد گرانژرۆن" سه‌رۆكی‌ ئیفتخاری‌ رێكخراوی‌ پزیشكانی‌ جیهان نامه‌یه‌كی‌ بۆ سه‌فیری‌ كۆماری‌ ئیسلامی‌ له‌ پاریس نارد‌و داوای‌ له‌ سه‌فیری‌ ئێران كرد كه‌ چاره‌نووسی‌ ئه‌و گیراوانه‌ كه‌ به‌هۆی‌ بزووتنه‌وه‌ی‌ ئیسلامی‌یه‌وه‌ ته‌حویلی‌ كۆماری‌ ئیسلامی‌ ئێران دراونه‌ته‌وه‌ روون بكاته‌وه‌‌و به‌ گوێره‌ی‌ ڕێ‌‌و شوێنه‌كانی‌ مافی‌ مرۆڤ ره‌فتاریان له‌گه‌ڵ‌ بكه‌ن.(5) هه‌روه‌ها خانمی‌ "دوریس پولت ـ كامه‌رلاندر" وته‌بیژی‌ سیاسیی‌ سه‌وزه‌كان له‌ پارلمانی‌ ئوتریش رۆژی‌ 18/2/1997 له‌ پێوه‌ندی‌ له‌گه‌ڵ‌ چاره‌نووسی‌ ته‌حویلدراوده‌كان، نامه‌یه‌كی‌ بۆ وه‌زیری‌ ده‌ره‌وه‌ی‌ ئۆتریش دوكتور "ڤۆلف گانگ شه‌لوسه‌ل" نووسی‌. له‌و نامه‌یه‌ سه‌ره‌ڕای‌ باس له‌سه‌ر مه‌سه‌له‌ی‌ كورد‌و پێشێل كرانی‌ مافی‌ مرۆڤ له‌ ئێران دا، داوا له‌ وه‌زیری‌ ده‌ره‌وه‌ی‌ ئۆتریش ده‌كا، سه‌باره‌ت به‌ چارونووسی‌ ئه‌و كه‌سانه‌ هه‌وڵ‌ بدا‌و له‌و پێوه‌ندی‌یه‌دا چه‌ند پرسیارێكی‌ ئاراسته‌ی‌ وه‌زیر كردوه‌ تا له‌به‌رامبه‌ردا وه‌ڵامده‌ر بێ‌.(6)

به‌داخه‌وه‌ به‌دوای‌ ئه‌و هه‌موو گوشار‌و كۆششه‌ی‌ حیزب‌و رێكخراوه‌ به‌شه‌ردۆسته‌كان بۆ سه‌ر كۆماری‌ ئیسلامی‌ تا ئیستا چاره‌نووسی‌ ئه‌و كه‌سانه‌ به‌ هیچ شێوه‌یه‌ك روون نه‌بۆته‌وه‌‌و كۆماری‌ ئیسلامی‌ ئاماده‌ نه‌بووه‌ به‌ هیچ شێوه‌یه‌ك زانیاریه‌ك له‌و پێوه‌ندی‌یه‌دا بدا. له‌ حه‌وته‌مین ساڵی‌ ته‌حویلدرانه‌وه‌یان به‌ كۆماری‌ ئیسلامی‌، دیسان سكرتێری‌ حیزب نامه‌یه‌كی‌ بۆ "كوفی‌ عه‌نان" سه‌رۆكی‌ رێكخراوه‌ نه‌ته‌وه‌یه‌كگرتوه‌كان نووسی‌‌و داوای‌ لـێ‌ كرد به‌ گوشار هێنان بۆسه‌ر كۆماری‌ ئیسلامی‌ چاره‌نووسی‌ ئه‌و ته‌حویلدراوانه‌ روون بكه‌نه‌وه‌ تا بنه‌ماڵه‌‌و كه‌س‌و كاریان له‌ نائۆمێدی‌‌و نیگه‌رانی‌ بێنه‌ده‌ر.(7) هه‌روه‌ها له‌و پێوه‌ندی‌یه‌دا كوردستان ئۆرگانی‌ كومیته‌ی‌ ناوه‌ندی‌ حیزبی‌ دێموكراتی‌ كوردستانی‌ ئێران به‌ ده‌ركردنی‌ بانگه‌وازێك بۆ حیزب‌و رێكخراوه‌ دێموكراته‌كان‌و كۆڕ‌وكۆمه‌ڵ‌‌و مرۆڤه‌ ئازادیخواز‌و ئینساندۆسته‌كان داوای‌ لـێ‌ كردنی‌ پشتیوانی‌ له‌ نامه‌ی‌ سكرتێری‌ حیزبی‌ دێموكرات بۆ به‌رێز "كوفی‌ عه‌نان"‌و هه‌روه‌ها به‌ مانای‌ مه‌حكووم كردن‌و وه‌بیرهێنانه‌وه‌ی‌ ئه‌و كرده‌وه‌ ئینسانفرۆشانه‌یه‌ له‌ رێكخراوی‌ بزووتنه‌وه‌ی‌ ئیسلامی‌ كوردستان كه‌ لێی‌ به‌رپرسیاره‌‌و ده‌بێ‌ له‌ به‌رامبه‌ری‌دا، وه‌ڵامده‌ر بێ‌.(8)

له‌ كۆتایی‌ ئه‌م به‌شه‌دا، بۆ زۆرتر ئاگادار بوونه‌وه‌ به‌ نیسبه‌ت بنه‌ماڵه‌كانی‌ ئه‌و كه‌سانه‌‌و راده‌ی‌ نیگه‌رانی‌ ئه‌وان سه‌رنجتان بۆ وتووێژێك راده‌كێشین كه‌ له‌ ژماره‌ی‌ 375ی‌ كوردستان ئۆرگانی‌ كومیته‌ی‌ ناوه‌ندی‌ حیزب دا بڵاوبۆته‌وه‌.

چوار ساڵ‌ له‌مه‌وبه‌ر "كوردستان" له‌ سێهه‌مین ساڵی‌ ته‌حویلدانه‌وه‌ی‌ 6تێكۆشه‌ری‌ حیزبی‌ دێموكرات به‌ كۆماری‌ ئیسلامی‌ له‌ لایه‌ن چه‌كداره‌كانی‌ بزووتنه‌وه‌ی‌ی‌ ئیسلامی‌ كوردستانه‌وه‌، وتووێژێكی‌ له‌گه‌ڵ‌ ئه‌ندامانی‌ بنه‌ماڵه‌ی‌ دوو كه‌س له‌وان پێك‌هێنا. له‌ حه‌وت ساڵه‌ی‌ ئه‌و كرده‌وه‌ پڕشووره‌یی‌یه‌ی‌ رێكخراوی‌ ناوبراو‌و هاوكات له‌گه‌ڵ‌ داوای‌ یارمه‌تیی‌ سكرتێری‌ گشتی‌ حیزب له‌ به‌رێز كوفی‌ عه‌نان به‌ مه‌به‌ستی‌ روونكردنه‌وه‌ی‌ چاره‌نووسی‌ ژماره‌یه‌ك تێكۆشه‌رانی‌ حیزبی‌ دێموكرات‌و گه‌لی‌ كورد، چه‌ند به‌شێكی‌ وتوێژه‌ كه‌ جارێكی‌ دیكه‌ بڵاو ده‌كه‌ینه‌وه‌‌و داوا له‌ هه‌موو ویژدانه‌ به‌خه‌به‌ره‌كان ده‌كه‌ین به‌ راگه‌یاندنی‌ پشتیوانیی‌ خۆیان له‌و داوایه‌، فریای‌ كه‌سووكاری‌ هه‌روا نیگه‌ران‌و چاوه‌ڕوانی‌ ئه‌و مرۆڤه‌ خه‌باتگێڕانه‌ بكه‌ون.

كوردستان‌و ئه‌رده‌شیر (منداڵه‌كانی‌ ئه‌رشه‌د ره‌زایی‌)

ئێوه‌ چ بیره‌وه‌ریه‌كتان له‌ باوكتان هه‌یه‌؟

سه‌ره‌تاكانی‌ كرانه‌وه‌ی‌ مه‌دره‌سه‌ بوو كه‌ باوكم لیباس‌و كیفی‌ مه‌رده‌سه‌ی‌ بۆ كریبووین. كه‌ له‌گه‌ڵ‌ باوكم باسی‌ مه‌رده‌سه‌مان ده‌كرد، باوكم پێی‌ ده‌گوتین ئه‌گه‌ر من له‌ ماڵێ‌ نه‌بم، ئێوه‌ ده‌بێ‌ ده‌رسه‌كانتان به‌ باشی‌ بخوێنن‌و زیره‌ك بن. چه‌ند رۆژێك بوو كه‌ له‌و قسانه‌ی‌ بۆ ده‌كردین تا رۆژێك دیتمان خۆی‌ ئاماده‌ ده‌كرد‌و كۆڵه‌پشتی‌یه‌كه‌ی‌ هێنابوو‌و شتی‌ تێ‌ده‌كرد. ئێمه‌ له‌ ده‌ڵی‌ خۆماندا وامان هه‌ست ده‌كرد كه‌ بۆ ماوه‌یه‌ك به‌جێمان دێڵـێ‌. كه‌ به‌یانی‌ هه‌ستاین چاومان له‌ جێگه‌كه‌ی‌ كرد، نه‌مابوو، ئیتر له‌و رۆژه‌وه‌ هه‌ر چاوه‌ڕوانین. كه‌چی‌ هێشتاش هه‌ر نه‌گه‌راوه‌ته‌وه‌. من‌و ئه‌ده‌شیری‌ برام چاوه‌ڕوانین‌و زۆر به‌ ئاواتین كه‌ جارێكی‌تر باوكمان بگه‌ڕێته‌وه‌.

براژن! منداڵه‌كان چ كاتێك زیاتر یادی‌ كاك ئه‌ڕشه‌د ده‌كه‌ن‌و هه‌ست به‌ خاڵی‌ بوونی‌ جێگاكه‌ی‌ له‌ كۆڕی‌ بنه‌ماڵه‌دا ده‌كه‌ن؟ ئه‌ی‌ خۆت چ كاتێك یادی‌ ده‌كه‌ی‌؟

سه‌حراخان (هاوسه‌ری‌ كاك ئه‌ڕشه‌د): منداڵه‌كانم به‌زۆری‌ له‌كاتی‌ جێژنه‌كانی‌ حیزب‌و له‌كاتی‌ جێژنی‌ نه‌ورۆزدا زۆر بیری‌ ده‌كه‌ن‌و هه‌موومان هه‌ست ده‌كه‌ین كه‌ جیگای‌ خاڵی‌یه‌، كاتێك له‌ جێژنی‌ نه‌ورۆزدا منداڵه‌كان له‌گه‌ڵ‌ باوكیان ده‌چن بۆ سه‌یران، كوردستان‌و ئه‌رده‌شیر له‌ سووچی‌ ماڵه‌ تاریكه‌كه‌ داده‌نیشن‌و چاویان پڕده‌بێ‌ له‌ فرمێسك‌و هه‌رچه‌ند ده‌كه‌م دڵیان خۆش نابێ‌‌و زۆرجار به‌ منداڵه‌كانم ده‌ڵێم بۆ ناچن بۆ سه‌یران، ئه‌رده‌شیر له‌ وه‌ڵامدا ده‌ڵـێ‌: منداڵان له‌گه‌ڵ‌ دایك‌و باوكیاندا ده‌ڕۆن بۆ سه‌یران كه‌چی‌ ئێمه‌ باوكمان گیراوه‌‌و ئه‌تۆش نایه‌ی‌ له‌گه‌ڵمان‌و ئێمه‌ش به‌ته‌نیا ناچین.

كوردستان! ئه‌گه‌ر رۆژێك چاوت به‌ به‌ڕێوه‌به‌ران‌و ئه‌نجامده‌رانی‌ ئه‌و تاوانه‌ بكه‌وێ‌، له‌ باره‌ی‌ ئه‌و كرده‌وه‌ بێزهه‌ستێنه‌ چیان پێ‌ده‌ڵێن؟

بیروباوه‌ڕی‌ ئێمه‌ قه‌ت ئه‌وه‌ هه‌ڵ‌ ناگرێ‌ كه‌ دژ به‌و كرده‌وه‌ی‌ ئه‌وان هه‌ڵویستێكی‌ نامرۆڤانه‌ بگرین یان به‌قسه‌ی‌ ناحه‌ز جوابیان بده‌ینه‌وه‌. ته‌نیا ئه‌وه‌یان پێ‌ده‌ڵێم كه‌ هه‌ر وه‌ك ڕووتان له‌ لای‌ خه‌ڵكی‌ شۆڕشگێڕی‌ كوردستان‌و هه‌موو مرۆڤدۆستێكی‌ دنیا ڕه‌ش بوو، به‌ هیوام كه‌ له‌ دنیای‌ دیكه‌ش لای‌ خودا ڕووتان ڕه‌ش بێ‌.

خوشكه‌ سه‌حرا! گوڵستان چووكترین منداڵی‌ كاك ئه‌رشه‌ده‌. ئه‌وكات باوكی‌ ته‌حویل درایه‌وه‌، چه‌ند مانگی‌ بوو؟ ئایا قه‌ت باسی‌ باوكی‌ ده‌كا؟ هه‌ست به‌ له‌ماڵ‌ نه‌بوونی‌ ده‌كا؟

گوڵستان 13 مانگه‌ بوو. كه‌ ته‌قه‌ی‌ ده‌رگا دێ‌، گوڵستان هه‌ڵ‌دێ‌ بۆ لای‌ ده‌رگاكه‌‌و وا ده‌زانێ‌ باوكیه‌تی‌. زۆرجار كه‌ ده‌ڕۆین بۆ فروشگا، پێم ده‌ڵێ‌ باشتێك بۆ باه‌كم بكڕین. منیش ده‌ڵێم گیانه‌! بابت نایه‌ته‌وه‌. كه‌چی‌ له‌ وه‌ڵام دا ده‌ڵـێ‌ باوكم ئه‌وه‌ له‌ ماڵه‌.

سێ‌ساڵه‌ باوكتان له‌ ئێوه‌ دووره‌. له‌و ماوه‌یه‌دا چه‌ند جار خه‌ونت به‌ ئازادیی‌ باوكته‌وه‌ دیوه‌؟ زۆرتر چ خه‌ونێكی‌ پێوه‌ ده‌بینی‌؟

سه‌میرا (كچی‌ هاوڕێ‌ حه‌مه‌ عه‌زیز یه‌كێك له‌ 6 ته‌حویلدراوه‌كه‌): ئه‌گه‌ر بمهه‌وێ‌ ئه‌و خه‌ونانه‌ی‌ به‌ باوكی‌ ئازیزمه‌وه‌ دیومن ـ له‌و كاته‌وه‌ به‌هۆی‌ جینایه‌تكاره‌كانی‌ بزووتنه‌وه‌ی‌ ئیسلامی‌یه‌وه‌ گیراوه‌‌و دراوه‌ته‌ به‌ كۆماری‌ ئیسلامی‌ ـ بگێڕمه‌وه‌ له‌ ده‌فته‌رێك دا جێیان نابێته‌وه‌. له‌ ماوه‌ی‌ سێ‌ساڵ‌ دووری‌ له‌ باوك‌و له‌ غه‌ریبایه‌تی‌‌و دووره‌ وڵاتی‌دا ئازارێكی‌ زۆرمان چێشتوه‌. ئه‌گه‌ر له‌ نێو كۆڕی‌ هاورێكانم دا داده‌نیشم بۆ یه‌ك سات باوكم به‌ پێش چاوم دا دێ‌‌و ده‌ڕوا. بیر له‌و رۆژانه‌ ده‌كه‌مه‌وه‌ كه‌ له‌ مه‌دره‌سه‌ ده‌چوومه‌وه‌ باوكم له‌ ماڵ‌ بوو. له‌ باوه‌شی‌ ده‌گرتم‌و چاوه‌كانی‌ ماچ ده‌كردم. كاتێك شه‌و دادێ‌ بیری‌ شه‌وانێك ده‌كه‌مه‌وه‌ كه‌ باوكم به‌ قسه‌ خۆشه‌كانی‌ ماڵه‌كه‌مانی‌ ره‌نگین ده‌كرد. كه‌ خه‌وم لـێ‌ ده‌كه‌وێ‌ خه‌وی‌ پێوه‌ ده‌بینم كه‌ ئازاد بووه‌‌و گه‌ڕاوه‌ته‌وه‌ لامان. جاری‌وایه‌ له‌ خه‌ونه‌كه‌دا ده‌ڵێم تۆ بڵێی‌ ئه‌وه‌ خه‌ون بێ‌ یا راستی‌ بێ‌ كه‌ به‌ دیداری‌ باوكم شاد ده‌بمه‌وه‌؟ زۆرتر ئه‌و خه‌ونانه‌ی‌ پێوه‌ ده‌بینم: دێته‌وه‌ لامان‌و به‌دیاری‌یه‌ خۆشه‌كانی‌ شادمان ده‌كاته‌وه‌. بابه‌گیان! ئاواتخوازم هه‌ر نه‌بێ‌ له‌ خه‌ونه‌كانما به‌ دیدارت شاد ببمه‌وه‌. ئاره‌زوومه‌ رۆژێك بێ‌ به‌راستی‌ بێ‌یه‌وه‌‌و تا خۆم له‌ باوه‌شی‌ گه‌رمت باوێم‌و بۆ هه‌تا هه‌تایه‌ پێت شاد بینه‌وه‌.

له‌ چ كاتێك دا پتر بیری‌ باوكت ده‌كه‌ی‌‌و هه‌ست به‌ خاڵی‌ بوونی‌ جێگایه‌كه‌ی‌ له‌ نێو بنه‌ماڵه‌كه‌تان دا ده‌كه‌ی‌؟

هه‌موو كاتێك بیری‌ باوكم ده‌كه‌مه‌وه‌‌و هه‌ستیش به‌ خاڵی‌ بوونی‌ جێگاكه‌ی‌ ده‌كه‌م. به‌تایبه‌ت له‌ جێژنه‌ حیزبی‌‌و ئایینی‌یه‌كان دا زۆرتر بیری‌ ده‌كه‌مه‌وه‌. ئه‌و شه‌وه‌ كه‌ به‌یانی‌یه‌كه‌ی‌ جێژنه‌ دڵم زۆر زۆر ناراحه‌ته‌. به‌یانی‌یه‌كه‌ی‌ جێژنه‌‌و له‌گه‌ڵ‌ دایكم‌و ژاڵه‌، هه‌رسێكمان داده‌نیشین. دایكم له‌ جاران زیاتر دڵی‌ ناراحه‌ته‌، كه‌ سه‌یرمان ده‌كا كه‌ باوكمان له‌ ماڵه‌وه‌ نیه‌ چاوه‌كانی‌ پڕده‌بن له‌ فرمێسك. هه‌وڵیش ده‌دا كه‌ ئێمه‌ ناراحه‌ت نه‌بین. له‌ جێژنی‌ نه‌ورۆز دا بیر له‌و رۆژانه‌ ده‌كه‌مه‌وه‌ له‌ گه‌ڵ‌ باوكم پێكه‌وه‌ ده‌چووین بۆ سه‌یران. له‌وێ‌ بۆخۆمان له‌گه‌ڵ‌ ژاڵه‌ كایه‌ی‌ خۆشمان ده‌كرد. به‌ڵام بابه‌ گیان! سێ‌ ساڵه‌ نه‌تۆ ده‌زانی‌ چۆن جێژن دێ‌‌و ده‌ڕوا نه‌ ئێمه‌ش ده‌زانین. بابه‌گیان! داخۆ خوای‌ ئێمه‌ ئه‌وانه‌ی‌ كه‌ تۆیان به‌ درندانه‌ترین شێوه‌ گرت‌و له‌ ئێمه‌یان كرد، چیان به‌سه‌ر بێنێ‌. دیسان بابه‌گیان! هیوادارم له‌ داهاتوویه‌كی‌ زۆر نزیك دا به‌ یه‌كتر شاد بینه‌وه‌.

هه‌ستت به‌رامبه‌ر به‌و كه‌سانه‌ی‌ باوكی‌ پێشمه‌رگه‌تیان ته‌حویلی‌ كۆماری‌ ئیسلامی‌ دایه‌وه‌، چیه‌؟

ئه‌وانه‌ی‌ كه‌ ئه‌و جه‌نایه‌ته‌یان كرد‌و بۆ ماوه‌یه‌كی‌ نادیار باوكمیان له‌ ئێمه‌ ئه‌ستاند، له‌ خوای‌ گه‌وره‌ ده‌پاڕێینه‌وه‌ كه‌ ئه‌وانیش به‌و ده‌رده‌وه‌ بناڵێنن‌و له‌ خۆشیی‌ ژیان هه‌روه‌ك ئێمه‌یان بێ‌به‌ش كرد، ئه‌وانیش بێ‌به‌ش بن. هه‌روه‌ها نیسبه‌ت به‌و دڕندانه‌ به‌چاوی‌ ڕق سه‌یریان ده‌كه‌م، پێم خۆشه‌ كه‌ ته‌نیا بۆ یه‌ك جاریش بێ‌ نه‌یان بینم.

چ داوایه‌كت له‌ رێكخراو‌و كۆڕ‌و كۆمه‌ڵه‌ مرۆڤدوسته‌كان هه‌یه‌؟

داوامان ئه‌وه‌یه‌ ئه‌وه‌ی‌ له‌ ده‌ستیان دێ‌ بۆ پاراستنی‌ گیانی‌ باوكم‌و هاوڕێكانی‌ ده‌ریغی‌ نه‌كه‌ن. داواكارم به‌ هه‌وڵ‌‌و كۆششی‌ خۆیان بتوانن رێگا چاره‌یه‌كیان بۆ بدۆزنه‌وه‌، كارێكی‌ وا بكه‌ن كه‌ حوكمیان بدرێ‌‌و ملاقاتیان ئازاد بێ‌‌و گیانیان بپارێزرێ‌.

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 2189
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy