هه‌ڵۆی کوردستان

-
هەڵە
  • JFolder::create: Could not create directory

په‌یامه‌كانی‌ كۆنگره‌ی‌ 15ی‌ حیزبی‌ دێموكراتی‌ كوردستانی‌ ئێران

پۆستی ئەلیکترۆنی چاپکردن

کۆنگره‌ی ١٥ی‌ حیزبی دێمۆکراتی کوردستانی ئێران كۆمه‌ڵێك په‌یامی‌ ئارسته‌ی‌ چین‌و توێژه‌ جۆراجۆره‌كان‌ كردووه‌ كه‌ ده‌قی‌ په‌یامه‌كان به‌ شێوه‌ی‌ خواره‌وه‌یه‌:

 

په‌یامی کۆنگره‌ی ١٥ی حیزب، بۆ بنه‌ماڵه‌ی سه‌ربه‌رزی شه‌هیدان

kongra_-_shahidanبنه‌ماڵه‌ی سه‌ربه‌رزی شه‌هیدانی کوردستان!

پشتیوانانی هه‌میشه‌یی رێبازی ئازادی!

له‌خۆ بوردوویی و خۆڕاگریی بێ‌وێنه‌ی ئێوه‌ له‌ پێشکه‌ش کردنی پڕبایه‌خ‌ترین سه‌رمایه‌کانی ژیانی مرۆیی له‌پێناوی به‌رزترین ئامانجه‌کانی خه‌باتی ره‌وای مافخوازانه‌ی گه‌له‌که‌ماندا لاپه‌ڕیه‌کی زێڕین له‌ مێژوی پڕهه‌وراز و نشێوی خه‌باتێکه‌ که‌ ئازادی و رزگار بوون له‌ دۆخی چه‌وسانه‌وه‌ و سته‌می نه‌ته‌وایه‌تیی کردووه‌ته‌ چرای رێگای تێکۆشانی خۆی.

ئێوه‌ یادگاره‌کانی ره‌نج و حه‌ماسه‌ و بوێریی ئه‌و رۆڵه‌ قارامانانه‌ی نه‌ته‌وه‌ی کوردن که‌ رازی نه‌بوون له‌ دۆخی ژێرده‌ستی و کوێره‌وه‌ریدا ملکه‌چ و ده‌سته‌وه‌ستان بن و قه‌ڵای زۆرداریی سته‌مکاران و دوژمنانی کۆنه‌په‌ره‌ست و پاوانخوازی نه‌ته‌وه‌که‌مان چۆکی به‌ ئیراده‌ و شه‌هامه‌تی به‌رزی ئه‌واندا نه‌دا.

ئێمه‌ له‌ کۆنگره‌ی پازده‌هه‌می حیزبی دێمۆکراتی کوردستانی ئێراندا، که‌ به‌ناوی رووناکبیری خه‌باتگێڕ و چیای پڕهه‌یبه‌تی شۆڕشی کوردستان، شه‌هیدی رێبه‌ر، د.سادق شه‌رفکه‌ندی رازێنراوه، سه‌ری رێز و حورمه‌ت له‌ به‌رامبه‌ر فیداکاری و ئه‌مه‌گناسی‌تاندا بۆ رێبازی پڕسه‌روه‌ریی شه‌هیدان داده‌نه‌وێنن. به‌ڵێنیتان پێ‌ ده‌ده‌ین و له‌گه‌ڵ شه‌هیدانی سوورخه‌ڵاتی رێگای رزگاریی نیشتماندا په‌یمان نوێ‌ ده‌که‌ینه‌وه‌ که‌ وه‌ک هه‌میشه‌ یادی ئه‌وان و وره‌ و باوه‌ڕی شۆڕشگێڕانه‌ی ئێوه‌ بکه‌ینه‌ مۆمی رووناکی‌به‌خشی رێگای یه‌کڕیزی له‌پێناوی سه‌رکه‌وتندا و هه‌تا گه‌یشتن به‌ ئامانجه‌ ره‌واکانی رۆڵه‌ شه‌هیده‌کانتان له‌ هیچ کۆسپێکی سه‌ر رێگای خه‌بات سڵ نه‌که‌ینه‌وه.

یادی شه‌هیدان به‌ رێزه‌وه‌ ده‌که‌ینه‌وه، دڵمان مه‌کۆی خه‌می له‌ده‌ست چوونی ئه‌وان و هه‌ستمان له‌گه‌ڵ ژیانی پڕژانی بێ‌ ئازیزانی ئێوه‌یه.

کۆنگره‌ی پازده‌هه‌می حیزبی دێمۆکراتی کوردستانی ئێران


په‌یامی کۆنگره‌ی ١٥ی حیزب، بۆ زیندانیانی سیاسی

kongra_-_zindaniani_siasiخۆڕاگران، سه‌ربه‌رزان!

زیندانیانی تێکۆشه‌ری سیاسی!

وێڕای سڵاوی هاوخه‌باتی و هاوسۆزی

وه‌ک ئاگادارن له‌ رۆژانی رابردوودا پازده‌هه‌مین کۆنگره‌ی حیزبی دێمۆکراتی کوردستانی ئێران کۆتایی به‌ کاره‌کانی خۆی هێنا.

له‌م کۆنگره‌یه‌دا کۆمه‌ڵێک باس و بابه‌تی گرینگی سیاسی و نه‌ته‌وه‌یی هاتنه‌ به‌رباس و نوێنه‌رانی کۆنگره‌ به‌ په‌سند کردنی بابه‌ته‌کان و دانی بڕیاڕی پێویست، ستراتێژی و سیاسه‌تی داهاتووی حیزبیان بۆ خزمه‌ت به‌ خه‌باتی ره‌وای گه‌له‌که‌مان دیاری کرد.

به‌ڕێزان!

کۆنگره‌ به‌ چاوی رێز و پێزانینه‌وه‌ روانییه‌ خۆڕاگری و خه‌باتی ئێوه‌ و له‌خۆبوردوویی و چۆک دانه‌دانی ئێوه‌ی له‌به‌رامبه‌ر زه‌بر و ئه‌شکه‌نجه‌ی جه‌لاده‌کانی کۆماری ئیسلامی له‌ زیندانه‌ ره‌شه‌کانی ئه‌و رێژیمه‌ دژه‌ مرۆییه‌دا به‌رز نرخاند و وه‌ک یه‌کێک له‌ فاکته‌ره‌ سه‌ره‌کییه‌کانی به‌ره‌وپێش چوونی خه‌باتی نه‌ته‌وه‌که‌مان ده‌ست نیشانی کردن.

وه‌ک ده‌زانن ناوچه‌که‌مان به‌ره‌وڕووی ئاڵوگۆڕێکی به‌رفراوان و بنچینه‌یی بووەته‌وه‌ و به‌دوور نابیندرێ‌ که‌ له‌ داهاتوویه‌کی نزیکدا شه‌پۆله‌کانی ئه‌م گۆڕانکارییه‌ وڵاته‌که‌ی ئێمه‌ش بگرێته‌وه. له‌م ساته‌وه‌خته‌ هه‌ستیاره‌دا پێویسته‌ ئێمه‌ی کوردیش خۆمان بۆ قۆستنه‌وه‌ی ئه‌و ده‌رفه‌ته‌ و گه‌یشتن به‌ ئامانجه‌ ره‌واکانمان ئاماده‌ بکه‌ین و هه‌وڵ بده‌ین ریزه‌کانی خۆمان بۆ به‌ره‌وڕوو بوونه‌وه‌ له‌گه‌ڵ ئه‌و هه‌لومه‌رجه‌ نوێیه‌ رێک بخه‌ین.

هه‌ر بۆیه‌ کۆنگره‌ی پازده‌هه‌می حیزبه‌که‌مان واته‌ کۆنگره‌ی رێبه‌ری شه‌هید دوکتور سادقی شه‌ره‌فکه‌ندی له‌ژێر دروشمی "هه‌وڵدان بۆ یه‌کڕیزی له‌پێناو سه‌رکه‌وتندا" بڕیاڕ و راسپارده‌ی پێویستی به‌ کۆمیته‌ی ناوه‌ندیی تازه‌ی حیزبه‌که‌ماندا و هه‌وڵدان بۆ جێبه‌جێ‌ کردنی ئه‌و بابه‌تانه‌ی کرده‌ ئه‌رک له‌سه‌ریان.

هیوادارین به‌ هه‌وڵ و تێکۆشانی هه‌موومان بگه‌ینه‌ رۆژی رزگاریی نه‌ته‌وه‌که‌مان و ئه‌و ئامانجه‌ ره‌وایانه‌ ده‌سته‌به‌ر بکه‌ین که‌ ئێوه‌ له‌ پێناویاندا به‌ند کراون. بێ‌گومان خه‌بات و قوربانی دانی نه‌ته‌وه‌ غه‌در لێ کراوه‌که‌مان و به‌ تایبه‌ت به‌رخۆدانی ئێوه‌ی تێکۆشه‌ر بێ‌ئاکام نابێ‌ و رووخانی کۆشکی سته‌م نزیک بۆته‌وه. به‌ ئاواتی گه‌یشتن به‌و ئامانج و قۆناغه.

سه‌رکه‌وێ‌ خه‌باتی ره‌وای نه‌ته‌وه‌که‌مان به‌ رێبه‌رایه‌تی حیزبی دێمۆکراتی کوردستانی ئێران.

سڵاو له‌ خۆڕاگری و قاره‌مانیه‌تیتان

بژی کورد و بژی کوردستان

کۆنگره‌ی پازده‌هه‌می حیزبی دێموکراتی کوردستانی ئێران

 

په‌یامی کۆنگره‌ی ١٥ی حیزب، بۆ کۆمه‌ڵانی خه‌ڵکی خه‌باتگێڕی کوردستان

kongra_-_xalkکۆنگره‌ی پانزده‌هه‌می حیزبی دێمۆکراتی کوردستانی ئێران، کۆنگره‌ی شه‌هید د. سادق شه‌ره‌فکه‌ندی، که‌ له‌ژێر دروشمی "هه‌وڵدان بۆ یه‌کڕیزی له‌پێناو سه‌رکه‌وتندا" رۆژی شه‌ممه‌ رێکه‌وتی ٨ی ره‌زبه‌ر، ده‌ستی به‌ کاره‌کانی خۆی کرد، گه‌رمترین سڵاوی شۆڕشگێڕانه‌تان ئاراسته‌ ده‌کا و له‌ به‌رانبه‌ر وره‌ی به‌رز ‌و خه‌باتگێڕانه و ئیراده‌ی له‌ شکان نه‌هاتووتان بۆ خه‌بات‌ و به‌رخودان به‌ دژی سه‌رکوت ‌و زه‌بر و زه‌نگی رێژیمی کۆنه‌په‌رستی کۆماری ئیسلامیدا سه‌ری رێز و حورمه‌ت داده‌نوێنێ.

سه‌رتاسه‌ری مێژووی پڕ له‌ حه‌ماسه‌ و قوربانی دانی بزووتنه‌وه‌ی رزگاریخوازیی گه‌له‌که‌مان له‌ کوردستانی ئێران به‌ گشتی‌ و به‌تایبه‌تی له‌و سێ ده‌یه‌ی رابردوودا شاهیدی بۆ ئه‌وه‌ دا که‌ کۆمه‌ڵانی خه‌ڵکی کوردستان له‌ هه‌موو هه‌لومه‌رجێکدا پشتیوان‌ و سه‌رچاوه‌ی وزه‌ و توانا و ئیراده‌ی به‌رز بوون بۆ بردنه‌ پێشی خه‌بات‌ و درێژه‌دان به‌ خۆڕاگری له‌ به‌رانبه‌ر ئه‌و سته‌م‌ و چه‌وسانه‌وه‌ میللی‌ و هه‌ڵاواردنه‌ سیاسی، ئابووری‌ و کۆمه‌ڵایه‌تییانه‌ که‌ رێژیمی کۆماری ئیسلامی به‌سه‌ر گه‌له‌که‌مانیدا سه‌پاندووه. کۆنگره‌ی پانزده‌هه‌می حیزبی دێمۆکراتی کوردستانی ئێران دڵنیایه‌ له‌ داهاتووشدا ئێوه‌ خه‌ڵکی کوردستان له‌سه‌ر ئه‌و هه‌ڵوێسته‌ نه‌ته‌وه‌یی‌ و نیشتمانییه‌تان هه‌ر سوور ده‌بن‌ و سه‌رکوت‌ و خه‌فه‌قان‌ و زیندان، ئه‌شکه‌نجه‌ و کوشت‌ و کوشتاری ده‌زگا داپڵۆسێنه‌ره‌کانی کۆماری ئیسلامی، ئێوه‌ له‌ درێژه‌دانی ئه‌و رێگا پڕشانازییه‌دا ناگێڕێته‌وه.

خه‌بات‌ و به‌ربه‌ره‌کانی ئێوه‌ که‌ رۆژانه‌ به‌ شێوه‌ی جۆراوجۆر له‌ شار و گونده‌کانی کوردستانی ئێراندا خۆی نیشان ده‌دا، ئه‌و هه‌موو ئیعتراز ‌و ناڕه‌زایه‌تییه‌تان که‌ چین‌ و توێژه‌ جۆراوجۆره‌کانی خه‌ڵکی کوردستان رۆژانه‌ لێره‌ و له‌وێ‌ به‌رانبه‌ر به‌ سیاسه‌تی دژی گه‌لیانه‌ی رێژیم به‌ڕێوه‌ی ده‌به‌ن، ئه‌و هه‌ستی به‌رزی نه‌ته‌وایه‌تییه‌ و ئه‌و هه‌موو وشیاری‌ و ئاگاهییه‌ خه‌باتگێڕانه‌یه‌ که‌له‌ نێو رۆڵه‌کانی گه‌له‌که‌ماندا خۆی ده‌نوێنێ، ئه‌و هه‌موو هاوپێوه‌ندی‌ و هاوسۆزی‌ و پشتیوانییه‌ که‌ له‌گه‌ڵ هێزه‌ خه‌باتگێڕه‌کانی مه‌یدانی خه‌بات به‌گشتی‌ و حیزبی دێمۆکراتی کوردستانی ئێران به‌ تایبه‌تی له‌ خۆتانی نیشان ده‌ده‌ن، ئه‌و هه‌موو په‌یام و راسپارده‌ و رێنوێنییه‌ دڵسۆزانه‌یه‌ که‌ رۆژانه‌ بۆ رێبه‌رایه‌تیی حیزبه‌که‌مانی ده‌نێرن، ئه‌وه‌ ده‌رده‌خه‌ن که‌ کوردستان سه‌ره‌ڕای ئه‌و هه‌موو سه‌رکوت‌ و زه‌بر و زه‌نگه‌ که‌ رێژیم سی ساڵه‌ به‌رده‌وام به‌ سه‌ریدا سه‌پاندوون، هێشتا هه‌روا سه‌نگه‌ری له‌گیران نه‌هاتووی ئازادی‌ و دێموکراسی‌ و خه‌بات‌ و به‌ربه‌ره‌کانییه‌ ‌و هه‌موو پیلانه‌کانی کۆنه‌په‌رستی بۆ له‌نێو بردنی بزووتنه‌وه‌ی گه‌له‌که‌مان‌ و به‌چۆک داهێنانی خه‌ڵکی کوردستان، پووچه‌ڵ بوونه‌ته‌وه. ئێستاش سه‌ره‌ڕای ئه‌و هه‌موو سه‌رکوت‌ و زه‌بر و زه‌نگه‌ ده‌سه‌ڵاتی کۆماری ئیسلامی له‌ کوردستادا بێجگه‌ له‌ حزووری پۆلیسی و نیزامی، شتێکی دیکه‌ نییه‌ و ئه‌و رێژیمه‌ نه‌یتوانیوه‌ بچووکترین پێگه‌ی کۆمه‌ڵایه‌تی و سیاسی و فه‌رهه‌نگی له‌ نێو خه‌ڵکی کوردستاندا وه‌ده‌ست بێنێ.

له‌به‌ر رووناکایی راپۆرتی سیاسی کۆمیته‌ی ناوه‌ندیی حیزبدا، به‌ هه‌ڵسه‌نگاندنی وه‌زعی سیاسیی دونیا و ناوچه‌ و هه‌لومه‌رجی خه‌باتی گه‌لانی ئێران و بارودۆخی کورد به‌گشتی، به‌ له‌به‌رچاو گرتنی هه‌موو پارامێتر و فاکتۆره‌ سیاسییه‌کانی مه‌وجوود و هه‌موو ئه‌و ئاڵوگۆڕانه‌ که‌له‌ ناوچه و ئێراندا له‌ حاڵی روودان دان، هه‌روه‌ها به‌ له‌به‌رچاو گرتنی ئه‌و واقعیه‌ته‌ که‌ رێژیمی کۆماری ئیسلامی نه‌ توانای وڵام دانه‌وه‌ به‌ داخوازه‌ سیاسییه‌کانی گه‌لی کورد و گه‌لانی دیکه‌ی ئێرانی هه‌یه و نه‌ ده‌شتوانێ‌ ئاڵوگۆڕ له‌ ماهییه‌تی کۆنه‌په‌رستانه‌ و دواکه‌وتووانه‌ی خۆیدا پێک بینێ، هه‌روه‌ها به‌ له‌به‌رچاو گرتنی ئه‌و ململانێیه‌ که‌ رێژیمی کۆماری ئیسلامی له‌گه‌ڵ کۆمه‌ڵگای نێونه‌ته‌وه‌یی له‌گه‌ڵی ده‌سته‌ویه‌خه‌یه، کۆنگره‌ی پانزده‌هه‌می حیزبی دێمۆکراتی کوردستانی ئێران پێی له‌سه‌ر پێویستیی درێژه‌دان به‌ خه‌بات و به‌ربه‌ره‌کانی هه‌تا وه‌دی هێنانی ئامانجه‌کانی بزووته‌وه‌ی میللی دێمۆکراتیکی گه‌له‌که‌مان داگرته‌وه. کۆنگره‌ جارێکی دیکه‌ هاته‌ سه‌ر ئه‌و بڕوایه‌ که‌ دابین بوونی دێموکراسی و مافه‌ نه‌ته‌وایه‌تییه‌کانی گه‌لی کورد و گه‌لانی دیکه‌ی ئێران، مه‌رجی بنه‌ڕه‌تیی هاتنه‌ ده‌ری ئێران له‌و وه‌زعه‌ سیاسی و هه‌لومه‌رجه‌ دژواره‌یه‌ که‌ گه‌لی کورد و گه‌لانی دیکه‌ی ئێران تێیدا ده‌ژین. ئه‌وه‌ش ته‌نیا کاتێک ئیمکانی هه‌یه‌ که‌ رێژیمی کۆماری ئیسلامی له‌ ته‌وایه‌تی خۆیدا نه‌مێنێ و رێژیمێکی دێمۆکراتیک بێته‌ سه‌ر کار که‌ نوێنگه‌ی ئیراده‌ی سیاسی هه‌موو گه‌لانی دانیشتووی ئێران و به‌رهه‌می موشارکه‌تی سیاسی و چالاکانه‌ی هه‌موو پێکهاته‌ نه‌ته‌وه‌یی و مه‌زهه‌بی و کولتورییه‌کانی وڵاته‌ فره‌گه‌لییه‌که‌مان بێت.

هه‌موومان ده‌زانین که‌ کارێکی له‌و چه‌شنه‌ به‌ بێ‌ خه‌بات و به‌ربه‌ره‌کانییه‌کی توند ‌و یه‌کڕیز و جه‌ماوه‌ری له‌ هه‌موو بواره‌ جۆراوجۆره‌کاندا نایه‌ته‌ دی. هه‌ر بۆیه‌ ئه‌ندامانی کۆنگره‌ی پانزده‌هه‌می حیزب پێیان له‌سه‌ر ئه‌و داگرته‌وه‌ که‌ حیزبه‌که‌مان هه‌موو ئیعتبار و توانای خۆی بۆ پێکهێنانی یه‌کڕیزی و هاوخه‌باتی و هاوکاری و هاوئاهه‌نگیی زۆرتر، له‌ نێوان هێزه‌ نیشتمانپه‌روه‌ره‌کاندا چ له‌ کوردستان و چ له‌ ئێراندا بۆ رووخاندنی دیواره‌کانی نێوان ریزه‌کانی گه‌ل و بۆ دروست کردنی پرد له‌ نێوان لایه‌نه‌ سیاسی و که‌سایه‌تییه‌کاندا بخاته‌ گه‌ڕ هه‌تا بارودۆخی گه‌شه‌ سه‌ندنی خه‌بات و به‌ربه‌ره‌کانێ‌ باشتر بڕه‌خسێ و هه‌موو هێز و تواناکانی بزووتنه‌وه‌ له‌ یه‌ک ئاراسته‌دا و هاوته‌ریب له‌گه‌ڵ یه‌کتر بۆ خزمه‌تی ئامانجه‌کانی بزووتنه‌وه‌ی کوردستان برۆنه‌ پێش.

حیزبی ئێمه، حیزبی دێمۆکراتی کوردستانی ئێران، که‌له‌ کووره‌ی خه‌بات و به‌ربه‌ره‌کانێدا قاڵ بۆته‌وه، له‌مێژووی خه‌باتی خۆیدا، زۆر جار تووشی هه‌وراز و نشێو ‌و که‌ند و کۆسپ بوو، زۆر جار که‌وتووه‌ته به‌ر شاڵاوی پۆلیسی، زۆر جار رێبه‌ندان و تێکۆشه‌رانی خۆی له‌ ده‌ستی داون و به‌ هه‌زاران کادر و تێکۆشه‌ر و پێشمه‌رگه‌ی خۆی کردووه‌ته‌ قوربانی، به‌ سه‌دان ئه‌ندامی فیداکاری له‌ زیندانه‌کاندا له‌ ده‌ست داون، زۆر جار که‌وتووەته‌ به‌ر پیلانی دوژمنانی گه‌له‌که‌مان، به‌ڵام قه‌ت مه‌یدانی خه‌باتی چۆڵ نه‌کردووه و پشتی له‌ ئامانجه‌ به‌رزه‌کانی خه‌ڵکی کوردستان نه‌کردووه.

ئه‌وه‌ی حیزبی ئێمه‌ی له‌و رێگا سه‌خت و دژواره‌دا هێشتووەته‌وه، ئه‌وه‌ی هه‌میشه‌ له‌و مه‌یدانه‌دا وزه‌ و ئیلهام و هێز و گوڕ و تینی به‌ تێکۆشه‌رانی دێمۆکرات به‌خشیوه‌ ئه‌وه‌ بووه‌ که‌ حیزبه‌که‌مان هه‌میشه‌ به‌ پشتیوانی و یارمه‌تی و کۆمه‌کی خه‌ڵکی کوردستان پشت ئه‌ستوور بووه‌. بۆیه‌ کۆنگره‌ی پانزده‌هه‌می حیزبه‌که‌مان چاوه‌ڕوانه‌ له‌ داهاتووشدا هه‌ر وه‌ک رابردوو، به‌تایبه‌ت که‌ قۆناغێکی چاره‌نووس‌ساز له‌ خه‌باتی گه‌له‌که‌مان له‌ ئارادایه‌ حیزبه‌که‌مان لێبڕاوه‌ هه‌موو توانا و لێوه‌شاوه‌یی‌یه‌کانی خۆی بۆ گێڕانی رۆڵی گرینگ له‌و خه‌باته‌دا ته‌رخان بکا، پشتیوانی خۆتان له‌ حیزبه‌که‌مان به‌هێزتر و به‌رین‌تر بکه‌ن.

به‌ پشتیوانی سیاسی له‌ به‌رنامه‌ی حیزبه‌که‌مان، به‌ حزوورتان له‌ مه‌یدانه‌کانی خه‌بات و ئیعتراز و به‌ربه‌ره‌کانیدا، به‌ هاتنتان بۆ ریزه‌کانی حیزب و بزووتنه‌وه، به‌شداریتان له‌ خه‌بات و به‌ربه‌ره‌کانێدا، به‌ دانی یارمه‌تی مادی و مه‌عنه‌وی به‌ حیزب و بزووتنه‌وه، به‌ په‌یدا کرانی دۆست و لایه‌نگر بۆ بزووتنه‌وه‌که‌مان و به‌دانی رێنوێنی و پێشنیار ‌و ره‌خنه و زانیاری و به‌ هه‌ر جۆرێکی دیکه‌ که‌ بۆتان ده‌کرێ‌ حیزبی خۆتان، حیزبی دێمۆکراتی کوردستانی ئێران به‌هێزتر و کاراتر و چالاک‌تر بکه‌ن. ئێمه‌ رۆڵه‌کانی دێمۆکرات، له‌ کۆنگره‌ی پانزده‌هه‌می حیزبه‌که‌ماندا، ئه‌و جاریش سه‌ر له‌ نوێ‌ په‌یمانتان له‌گه‌ڵ نوێ‌ ده‌که‌ێنه‌وه‌ که‌له‌ داهاتوودا، حیزبی دێمۆکراتی کوردستانی ئێران، ئاڵای خه‌بات، به‌ به‌ره‌کانی به‌ دژی سته‌م و چه‌وسانه‌وه‌ی نه‌ته‌وایه‌تی له‌ کوردستانی ئێران هه‌روا به‌رز‌ و شه‌کاوه‌ رابگرێ و جارێکی دیکه‌ دڵنیاتان ده‌که‌ینه‌وه‌ که‌ حیزبه‌که‌تان، حیزبی پێشه‌وا، قاسملوو و شه‌ره‌فکه‌ندی و هه‌زاران شه‌هیدی سه‌ربه‌رزی دیکه ‌و هه‌موو توانا و پرستیژی سیاسی خۆی بۆ به‌هێزتر کردنی بزووتنه‌وه‌که‌مان و رێکخستنی نێو ماڵی کورد‌ و وه‌گه‌ڕخستنی هه‌موو توانا‌ و هێز‌ و لایه‌نه‌کانی گۆڕه‌پانی خه‌باتی نه‌ته‌وه‌که‌مان ده‌خاته‌ کار هه‌تا هه‌رچی زووتر گه‌له‌که‌مان و گه‌لانی دیکه‌ی ئێران له‌و وه‌زعه‌ سه‌خت و دژواره‌ رزگاری بێت. له‌ سێبه‌ری دێموکراسی و له‌ چوارچێوه‌یه‌کی سیاسیی فیدراڵدا، بۆ گه‌یشتن به‌ ئاستی میلله‌تانی به‌خته‌وه‌ری دونیا هه‌نگاو باوێ. با پێکه‌وه، ده‌ست له‌ نێو ده‌ست رێگای پڕ له‌ شانازی ئازادی بپێوین. با هه‌موو تێبکۆشێن له‌ راستایی دروشمی کۆنگره‌ی پازده‌ی حیزبه‌که‌ماندا، بۆ یه‌کرێزی و ته‌بایی و هاوکاری و هاوئاهه‌نگی له‌ نێو ریزه‌کانی بزووتنه‌وه‌ی میللی ــ دێمۆکراتی گه‌له‌که‌مان، هه‌نگاو‌ باوێین به‌و کاره‌ پوخته‌یی و وشیاری سیاسی خۆمان نیشان بده‌ین.

حیزبی دێمۆکراتی کوردستانی ئێران له‌و رێگایه‌ پڕ له‌ شانازیدا ده‌ڕواته‌ پێش و چاوه‌ڕوانیشی له‌ رۆڵه‌کانی گه‌لی کورد له‌ کوردستانی ئێران ئه‌وه‌یه‌ که‌ وه‌ک هه‌میشه‌ پێشوازی لێ بکه‌ن و بۆ سه‌رخستنی ئه‌و ئه‌رکه‌ نیشتمانی و نه‌ته‌وه‌یی‌یه‌ یاوه‌ر و یارمه‌تیده‌ر بن.

کۆنگره‌ی پانزده‌هه‌می حیزب به‌ڕێزه‌وه‌ سه‌یری خه‌بات و خۆراگریتان ده‌کا و سڵاوی هاوخه‌باتیتان بۆ ده‌نێرێ‌.

سڵاو له‌ هێزی له‌ بڕان نه‌هاتووی گه‌ڵ

سڵاو له‌ کۆمه‌ڵانی خه‌باتگێری خه‌ڵکی کوردستان پشتیوانانی هه‌میشه‌یی حیزبی دێمۆکراتی کوردستانی ئێران

کۆنگره‌ی ١٥ی حیزبی دێمۆکراتی کوردستانی ئێران

ره‌زبه‌ی ١٣٩١ی هه‌تاوی

 

په‌یامی کۆنگره‌ی ١٥، بۆ ئه‌ندامان و لایه‌نگرانی حیزب له‌ کوردستانی ئێران

kongra_-_payam_bo_andamanئه‌ندامانی تێکۆشه‌ر، لایه‌نگرانی دڵسۆزی حیزبی دێمۆکراتی کوردستانی ئێران!

کۆنگره‌ی پازده‌هه‌می حیزبه‌که‌مان کۆنگره‌ی شه‌ره‌فکه‌ندی به‌داخه‌ له‌وه‌ی که‌ هه‌ڵومه‌رجی ئه‌منییه‌تی و که‌شوهه‌وای سه‌رکوتی زاڵ به‌سه‌ر تێکۆشانی ئێوه‌ی ئازیزدا رێگای نه‌دا که‌ نوێنه‌رانی ئێوه‌ له‌ کۆنگره‌دا به‌شدار بن، به‌ڵام راسپارده ‌و رێنوێنی و پێشنیاره‌کانی ئێوه‌ که‌ پێشتر بۆ کۆنگره‌تان ره‌وانه‌ کردبوون هه‌تا راده‌یه‌ک ئه‌و بۆشاییه‌ی پڕ کردبووه‌وه ‌و له‌راستیدا بوونی ئێوه‌مان له‌ کۆنگره‌دا هه‌ر هه‌ست پێ ده‌کرد. کۆنگره‌ی پازده‌هه‌م هه‌ستی به‌و راستیه‌ کرد که‌ ئه‌رک و تێکۆشانی به‌رده‌وامی ئێوه‌ له‌ گۆڕه‌پانی ئه‌سلی خه‌بات و خۆراگریدا هه‌تا چ راده‌یه‌ک شوێندار‌ و له‌ هه‌مان کاتدا پڕمه‌ترسییه، بۆیه‌ به‌چاوی رێزه‌وه‌ سه‌یری کار‌ و چالاکی نواندنی ئێوه‌ که‌ چوارچێوه‌ی سیاسه‌ته‌کانی حیزبدا به‌ڕێوه‌ی ده‌بن، ده‌کا‌ و به‌ روونی ده‌بینین که‌ شوێندانه‌ری ئه‌و کار ‌و چالاکییانه‌ چه‌نده‌ بۆ بزووتنه‌وه‌که‌تان به‌نرخ‌ و له‌ هه‌مان کاتدا بۆ رێژیمی کۆماری ئیسلامی جێگای نیگه‌رانیه.

کۆنگره‌ کۆمه‌ڵێک بڕیار ‌و راسپارده‌ی به‌ مه‌به‌ستی به‌رین‌تر کردنه‌وه‌ی بزووتنه‌وه‌که‌مان بۆ رێبه‌رایه‌تی هه‌ڵبژێردراوی ئه‌و کۆنگره‌یه‌ ده‌ست نیشان کردووه‌ چاوه‌ڕوانه‌ که‌ ئه‌و بڕیار ‌و راسپاردانه‌ به‌ کرده‌وه‌ له‌ ریزی تێکۆشه‌رانی حیزبدا ره‌نگ بداته‌وه‌ ‌و ئه‌وه‌ش سه‌ره‌ڕای بوونی که‌شوهه‌وای سه‌رکوت و زه‌بر‌ و زه‌نگ ئه‌رکێکی قورستر له‌ پێشوو ده‌خاته‌ ئه‌ستۆی ئێوه‌ی ئازیز. له‌و باره‌شه‌وه‌ کۆنگره‌ دڵنییایه‌ به‌و چاو نه‌ترسی، له‌ خۆبوردوویی و فیداکارییه‌ی که‌ ئێوه‌ تێکۆشه‌ر له‌ هه‌موو کات ‌و بۆنه‌یه‌کدا به‌ یه‌کگرتوویی له‌ خۆتان نیشان داوه‌‌ و دوژمنتان هه‌راسان کردووه. هه‌روا بوێرانه‌ ‌و به‌مجۆره‌ که‌ شیاوی رۆڵه‌کانی قازی، قاسملوو ‌و شه‌ره‌فکه‌ندییه‌ ده‌توانن یارمه‌تیده‌ری به‌ ئه‌نجام گه‌یاندنی ئه‌و ئه‌رکانه‌ بن که‌ به‌ره‌‌وپێشچوونی بزووتنه‌وه‌ی کورد ‌و سه‌رکه‌وتنی زیاتری حیزبی دێمۆکراتی کوردستانی ئێرانی لێ ده‌که‌وێته‌وه.

کۆنگره‌ی پازده‌هه‌می حیزب شانازی به‌ ئێوه‌ ‌و کار‌ و چالاکییه‌کانتان ده‌کا به‌ڕێزه‌وه‌ ده‌ڕواننێته‌ هه‌وڵ و تێکۆشانی ماندوویی نه‌ناسانه‌تان. له‌ش ساغی و ته‌مه‌ن درێژی بۆ یه‌کیه‌کی ئێوه‌ ئازیزان و سه‌رکه‌وتن بۆ تێکۆشانتان به‌ ئاوات ده‌خوازین.

کۆنگره‌ی پازده‌هه‌می حیزبی دێمۆکراتی کوردستانی ئێران

ره‌زبه‌ری ١٣٩١ی هه‌تاوی

 

په‌یامی کۆنگره‌ی ١٥، بۆ ژنانی کوردستان

kongra_-_payam_bo_jnanژنانی تێکۆشه‌ر و ئازادیخوازی کوردستان!

به‌ ناوی هه‌موو به‌شدارانی کۆنگره‌ی پازده‌هه‌می حیزبی دێمۆکراتی کوردستانی ئێران، "کۆنگره‌ی د.سادق شه‌ره‌فکه‌ندی" و هه‌موو ئه‌ندامان و لایه‌نگرانی حیزبه‌وه‌ گه‌رمترین سڵاوی شۆڕشگێڕانه‌تان پێشکه‌ش ده‌که‌ین و له‌ به‌رامبه‌ر خه‌بات، خۆڕاگری و ده‌وری ئازایانه‌تان له‌ به‌ره‌وپێش بردنی ئامانجه‌کانی حیزب و بزووتنه‌وه‌که‌مان له‌ نێو کۆمه‌ڵانی خه‌ڵکی کوردستاندا سه‌ری ڕێز و حورمه‌ت داده‌نه‌وێنین.

ژنانی کوردستان هه‌میشه‌ له‌ ریزی پێشه‌وه‌ی خه‌بات و به‌ربه‌ره‌کانێ له‌ دژی کۆنه‌په‌رستی و دواکه‌وتووییدا بوون و له‌و رێگایه‌دا قوربانیی زۆریان داوه. هه‌ر له‌ یه‌که‌م رۆژه‌کانی هاتنه‌ سه‌رکاری رێژیمی دژی ژن و چه‌وسێنه‌ری کۆماری ئیسلامییه‌وه، کۆمه‌ڵێک ژنی ئازادیخواز به‌ تێکه‌ڵ بوونیان له‌ نێو ریزی پێشمه‌رگه‌کانی حیزبی دێمۆکرات و باقی هێزه‌ خه‌باتگێڕه‌کانی کوردستاندا، ئیراده‌ی ژنی کوردستانیان بۆ راوه‌ستان له‌ به‌رامبه‌ر چه‌وساندنه‌وه‌دا نیشان دا. له‌و کاته‌وه‌ به‌ هه‌زاران ژنی شۆڕشگێر له‌ مه‌یدانه‌ جۆراجۆره‌کانی خه‌بات له‌ دژی سته‌م و چه‌وسانه‌وه‌دا دلێرانه‌ راوه‌ستاون و به‌ ده‌یان چیرۆکی بوێری و خۆڕاگرییان تۆمار کردووه.

ئه‌و خه‌بات و خۆڕاگرییه‌ی ژنانی کوردستان به‌ شێوه‌یه‌ک بووه‌ به‌ چقڵی چاوی رێژیمی کۆماری ئیسلامی که‌له‌ چوارچێوه‌ی سیاسه‌ته‌ سه‌رکوتکه‌ره‌کانی له‌ دژی بزووتنه‌وه‌ی نه‌ته‌وه‌یی کوردستاندا، به‌ربه‌ره‌کانێ له‌گه‌ڵ خه‌باتی ژنانی کردووه‌ به‌ یه‌کێک له‌ ئامانجه‌ سه‌ره‌کییه‌کانی. بێ مافی و بێبه‌ش کردنی ژنان له‌ زۆر ده‌رفه‌تی کار و خوێندن، به‌ربه‌ست کردنی سنووری ئازادی هه‌ڵسوکه‌وته‌ کۆمه‌ڵایه‌تییه‌کان، که‌له‌ مێژوودا یه‌کێک له‌ شانازییه‌کانی ژنی کورد بووه، گرتن، ده‌ستدرێژی و ئه‌شکه‌نجه‌ی دووقاتی جه‌سته‌یی و ده‌روونی به‌شێک له‌ کرده‌وه‌ دژه‌ مرۆڤانه‌کانی کۆماری ئیسلامی له‌ دژی ژنان به‌ گشتی و ژنانی کوردستان به‌ تایبه‌تین.

یاسا سه‌ده‌ نێوه‌ڕاستییه‌کانی کۆماری ئیسلامی له‌ هه‌موو بواره‌کانی ژیان، سیاسه‌ت، دادوه‌ری، بنه‌ماڵه‌، کار و ئابووریدا به‌ شێوه‌یه‌ک دانراون که‌ نه‌ ته‌نیا ژن به‌ مرۆڤی پله‌ دوو داده‌نێن، به‌ڵکوو له‌ زۆر بواره‌وه‌ ژن ده‌که‌ن به‌ ئامرازێک بۆ رابواردن و خزمه‌ت کردنی به‌شێک له‌ پیاوانی کۆمه‌ڵگا. رێژیم له‌ ماوه‌ی ته‌مه‌نیدا هه‌وڵی داوه‌ که‌ به‌ دوچاوکێ بینین و باقی هه‌ڵاواردنه‌ کۆمه‌ڵایه‌تییه‌کان، ژن بخاته‌ په‌راوێزی کۆمه‌ڵگاوه‌ و بیانکا به‌ دواژۆی سیاسه‌ته‌ کۆنه‌پارێزه‌کانی خۆی. به‌ڵام به‌شداریی ژنان له‌ هه‌موو مه‌یدانه‌کانی خه‌بات و خۆڕاگری له‌ به‌رامبه‌ر کۆماری ئیسلامیدا، ئه‌و خه‌یاڵه‌ی رێژیمی له‌ گۆڕ ناوه.

ژنانی کوردستان، وێڕای به‌ربه‌ره‌کانێ له‌ دژی سیستمی دژی مرۆڤانه‌ی ده‌سه‌ڵاتدار، له‌ نێو بنه‌ماڵه‌ و کۆمه‌ڵگاشدا خه‌باتێکی بێ وێنه‌ بۆ مافی یه‌کسان به‌ڕێوه‌ ده‌به‌ن و له‌و پێناوه‌شدا قوربانیی زۆریان داوه. دیارده‌ی جه‌رگبڕی خۆسووتاندنی ژنان له‌ کوردستان وه‌کوو دژکرده‌وه‌ی هه‌ره‌ تراژیکی ژنان له‌ به‌رامبه‌ر بێ عه‌داڵه‌تیدا نیشانه‌ی هه‌ره‌ روونی ئه‌و خۆڕاگرییه‌یه‌. به‌ربه‌ره‌کانێی ژنان و به‌تایبه‌ت کچانی لاو له‌ دژی ئیراده‌ی ئه‌و به‌شه‌ سوننه‌تییه‌ی کۆمه‌ڵگا که‌ ده‌یه‌وێ ئیراده‌ی خۆی به‌ سه‌ر تاک و بنه‌ماڵه‌دا بسه‌لمێنێ جێگای رێز گرتنه. هه‌ر چه‌ند ده‌ستکه‌وتی ئه‌و تێکۆشانه‌ جارێ نه‌گه‌یشتووەته‌ ئاستی شیاو و نه‌یتوانیوه‌ له‌ قورسایی بێ عه‌داڵه‌تی کۆمه‌ڵایه‌تی به‌ نیسبه‌ت ژنان به‌ راده‌ی پێویست که‌م بکاته‌وه، به‌ڵام هه‌تا راده‌یه‌ک توانیویه‌تی پێش به‌ ره‌وتی گێڕاندنه‌وه‌ی کۆمه‌ڵگا بۆ دواوه‌ بگرێ.

ژنانی تێکۆشه‌ر!

کۆنگره‌ی پازده‌ی حیزبی دێمۆکراتی کوردستانی ئێران، به‌ شێوه‌یه‌کی شیاو ره‌وشی ژیان و تێکۆشانی ئێوه‌ی خسته‌ به‌ر باس و کۆمیته‌ی ناوه‌ندی تازه‌ هه‌ڵبژێردراوی ئه‌رکدار کرد که‌ بۆ به‌ جێگه‌یاندنی ئه‌و به‌ندانه‌ی به‌رنامه‌ی حیزب که‌ پێوه‌ندییان به‌ یه‌کسانی کۆمه‌ڵایه‌تی و ماف و پێگه‌ی ژنانه‌وه‌ هه‌یه‌ به‌ جیددی تێ بکۆشێ. ئه‌و ئه‌رکه‌ ته‌نیا کاتێک ده‌توانێ به‌ جێ بگه‌یه‌ندرێ که‌ ئێوه‌ی تێکۆشه‌ر، به‌ گه‌رمی پێشوازیی لێ بکه‌ن و بۆ به‌ ئه‌نجام گه‌یاندنی قۆڵ هه‌ڵماڵن.

ساڵانی داهاتوو، بۆ بزووتنه‌وه‌ی نه‌ته‌وه‌یی کوردستان و خه‌بات له‌ دژی کۆنه‌په‌رستی و سته‌م قۆناغێکی چاره‌نووس‌ساز ده‌بێ. بۆیه‌ ده‌وری ژنان له‌ درێژه‌ پێ دان و گه‌شاندنه‌وه‌ی ئه‌و خه‌باته‌دا زۆر گرینگه. داوا و هیوای کۆنگره‌ی حیزب وه‌ک له‌ دروشمه‌که‌یدا که‌ "هه‌وڵدان بۆ یه‌کڕیزی له‌پێناو سه‌رکه‌وتندا"یه‌، له‌ ئێوه‌ ئه‌وه‌یه‌ که‌ ریزه‌کانتان یه‌کگرتووتر بکه‌ن، به‌ پێوه‌ست بوون، یان پێوه‌ندی گرتن له‌گه‌ڵ رێکخراوه‌ حیزبییه‌کان، یان به‌ شێوه‌ی سه‌ربه‌خۆ و به‌ پێکهێنانی کۆمه‌ڵه، ناوه‌ند و ئه‌نجومه‌نی جۆراوجۆر، ته‌نانه‌ت زیاتر له‌ جاران ده‌ور و ئیراده‌ی خۆتان له‌ خه‌بات له‌ دژی هه‌ڵاواردن و نابه‌رابه‌ریدا نیشان بده‌ن. له‌ دژی زوڵم و بێ عه‌داڵه‌تی راپه‌ڕن، دیارده‌ ناشرینه‌ کۆمه‌ڵایه‌تییه‌کان قه‌بووڵ مه‌که‌ن، پشتیوانی له‌ هه‌ڵوێست و داخوازه‌ ره‌واکانی هاووڵاتییانتان بکه‌ن چ به‌ شێوه‌ی به‌ کۆمه‌ڵ بێ و چ به‌ شێوه‌ی تاکه‌که‌سی.

با هه‌موومان پێکه‌وه‌ به‌ ده‌نگێکی ئازایانه‌ که‌ شیاوی ده‌نگی هه‌قخوازانه‌ی ژنانی کوردستان بێ بڵێین:

ــ نا بۆ هه‌ڵاواردنی سیاسی، کۆمه‌ڵایه‌تی، کولتووری و ئابووری و نا بۆ هه‌ڵاواردن له‌ کۆمه‌ڵگادا، له‌ نێو بنه‌ماڵه‌دا و هه‌موو شێوازه‌کانی دیکه‌ی هه‌ڵاواردن

ــ نا بۆ کۆماری ئیسلامی و هه‌موو یاسا و رێسا دژه‌ مرۆییە‌کانی

ــ نا بۆ داب و نه‌ریته‌ کۆنه‌په‌رستانه‌کانی دژی ئازادیی ژنان و یه‌کسانیی کۆمه‌ڵایه‌تی

ــ نا بۆ توندوتیژی، نا بۆ خۆسووتاندن

دڵنیا بن که‌ حیزبی دێمۆکرات حیزبی ئێوه‌ و پشتیوانی هه‌موو داخوازه‌کانتانه.

سه‌رکه‌وێ خه‌باتی یه‌کسانیخوازانه‌ی ژنانی کوردستان

نه‌مان بۆ کۆنه‌په‌رستی و هه‌ڵاواردن

بڕووخێ رێژیمی دژی ژنی کۆماری ئیسلامی

حیزبی دێمۆکراتی کوردستانی ئێران

کۆنگره‌ی پازده‌هه‌م

 

په‌یامی کۆنگره‌ی ١٥، بۆ خوێندکاران و لاوانی کوردستان

kongra_-_lawan_xwendkaran_payamلاوان و خوێندکارانی ئازادیخواز و تێکۆشه‌ری کورد!

له‌ تریبۆنی پازده‌هه‌مین کۆنگره‌ی حیزبه‌ تێکۆشه‌ره‌که‌مانه‌وه‌ (کۆنگره‌ی شه‌ره‌فکه‌ندی) گه‌رمترین سڵاوتان پێشکه‌ش ده‌که‌ین و ئاواته‌خوازین که‌ له‌ راسته‌رێگای خه‌بات و زانست و له‌ هه‌مبه‌ر به‌ دی هێنانی ژیانێکی پڕ له‌ دادپه‌روه‌ری و شیاوی مرۆڤدا سه‌رکه‌وتوو بن.

رۆڵه‌ چاوکراوه‌کانی کوردستان!

کۆنگره‌که‌مان به‌وپه‌ڕی رێز و شانازییه‌وه‌ له‌ خه‌باتی لاوان و خوێندکاران و قوربانییه‌کانی ئه‌وان له‌ هه‌مبه‌ر به‌ دیهێنانی ژیانی ئازادانه‌ ده‌ڕوانێت و لێره‌وه‌ به‌ گه‌رمی ده‌ستی خه‌باتکارانه‌تان ده‌گووشێ.

توێژه‌ی ئێوه‌ له‌ ئاڵوگۆره‌کانی دنیای ئه‌مڕۆدا گرینگترین هێزی بزوێنه‌ر و رۆڵگێڕی سه‌ره‌کیی گۆڕه‌پانی خه‌بات بۆ پێشکه‌وتنی مرۆڤ به‌ره‌و گه‌شه‌ی هزری و کرانه‌وه‌ی سیاسیی کۆمه‌ڵگاکان و ده‌رباز بوونی له‌ ته‌نگانه‌ی نه‌ریته‌ چه‌قبه‌ستووه‌کان و سه‌ره‌ڕۆیی سیستمه‌ پاوانخوازه‌کانه. خه‌بات بۆ گه‌یشتن به‌ دادپه‌روه‌ری، دێمۆکراسی، رزگاریی نه‌ته‌وه‌یی و یه‌کسانیی تاک و کۆمه‌ڵگاکان هونه‌ری مرۆڤگه‌لێکی وریا، بوێر و تێگه‌یشتووه‌ که‌ گرێدراوی به‌رژه‌وه‌ندییه‌کانی ده‌سه‌ڵاته‌ دیکتاتۆره‌کان و یاسا و نه‌ریته‌ دژه‌ مرۆییه‌کانیان نین. ئه‌م راستیه‌یه‌ که‌ هه‌نووکه‌ و له‌ گۆڕانکارییه‌کانی رۆژهه‌ڵاتی ناوه‌ڕاست و باکووری ئافریقادا بۆته‌ هۆی رووخان و وه‌له‌رزه‌ که‌وتنی کۆشکی ده‌سه‌ڵاتی دیکتاتۆره‌کان و له‌نێوخۆی وڵاته‌که‌ی ئێمه‌شدا خورپه‌ی رووخانی خستۆته‌ نێو دڵی دیکتاتۆر، به‌ جۆرێک که‌ له‌ترسی ته‌قینه‌وه‌ی ناڕه‌زایه‌تییه‌ جه‌ماوه‌رییه‌کان، په‌نای بردۆته‌ به‌ر هێزی سه‌رکوتی زیاتر و چه‌واشه‌کاری و داپڵۆساندن.

له‌وه‌ها هه‌لومه‌رجێکدا هێزی په‌نگخواردووی شۆڕش و گۆڕان که‌ له‌ ناخی توێژی لاو و خوێندکاردایه‌ و ده‌توانێ‌ ببێته‌ پێشه‌نگ و کاتالیزۆری هه‌ڵگیرسانی شۆڕشێکی رزگاری‎به‌خش له‌ پێناوی ماف و ئازادییه‌ دێموکراتیکه‌کانی گه‌لانی ئێران و خه‌ڵکی کوردستاندا.

له‌ روانگه‌ی ئێمه‌وه‌ لاوان و خوێندکاران به‌ هزری ره‌خنه‌گرانه‌ و ئاوه‌زی کونجکۆڵانه‌ و وزه‌ی گۆڕانخوازانه‌ ده‌توانن ببنه‌ دینامیزمی گۆڕان به‌ره‌و داهاتوویه‌کی گه‌ش و پڕ له‌ هیوا. کۆنگره‌ی پازده‌هه‌می حیزبی دێموکراتی کوردستانی ئێران پشتیوانیی خۆی له‌ خه‌باتی لێبڕاوانه‌ی ئێوه‌ له‌ پێناوی داهاتوویه‌کی گه‌ش و کۆمه‌ڵگایه‌کی دێموکراتیکدا بۆ وڵاته‌که‌مان دووپات ده‌کاته‌وه‌ و سه‌رکه‌وتنتان له‌و خه‌باته‌ ره‌وایه‌دا به‌ ئاوات ده‌خوازێ.

کۆنگره‌ی ١٥ی حیزبی دێموکراتی کوردستانی ئێران

 

په‌یامی کۆنگره‌ی ١٥، بۆ رووناکبیران، ئه‌دیبان و هونه‌رمه‌ندانی کوردستان

kongra_-_adibano_ronakbiranرووناکبیران، ئه‌دیبان و هونه‌رمه‌ندانی کوردستانی ئێران!

کۆنگره‌ی ١٥ی حیزبی دێمۆکراتی کوردستانی ئێران کۆنگره‌ی "شه‌ره‌فکه‌ندی" وه‌ک هه‌میشه‌ له‌سه‌ر پشتیوانیی لێبڕاوانه‌ی حیزبه‌که‌مان له‌ ئێوه‌ دڵسۆزانی خاوه‌ن قه‌ڵه‌م، خاوه‌ن هه‌ستی ئه‌ده‌بی و خاوه‌ن هه‌ستی هونه‌ری پێداگری ده‌کاته‌وه. کۆنگره‌که‌مان که‌ ده‌کرێ‌ بگوترێ‌ به‌ جۆرێک کۆنگره‌ی هه‌موو رووناکبیر و ئه‌دیب و هونه‌رمه‌نده‌ نیشتمانپه‌روه‌ره‌کانی کوردستانی ئێرانیش بووه‌ که‌له‌ پێناو گه‌له‌که‌یان له‌ هیچ فیداکارییه‌ک درێخی‌یان نه‌کردووه‌ و هه‌میشه‌ له‌ نێو ریزی پێشه‌وه‌ی خه‌باتگێڕانی ئازادیخواز و دێمۆکراسیخوازی نه‌ته‌وه‌که‌ماندا بوون، به‌ هه‌ست به‌ به‌رپرسیاره‌تیی تایبه‌ته‌وه‌ ئاوڕی له‌ دۆخی توێژه‌ی ئێوه‌ی به‌ڕێز داوه‌ته‌وه. کۆنگره‌ی ١٥ی حیزب، به‌ سه‌رنجدان به‌وه‌ی ئازادیی روون کردنه‌وه‌ی کۆمه‌ڵانی خه‌ڵک و ئازادیی داهێنانی ئه‌ده‌بی و هونه‌ری له‌ ئێراندا رۆژ به‌ رۆژ به‌رته‌سکتر ده‌بێته‌وه‌ و رۆژ نییه‌ رووناکبیرێک، ئه‌دیبێک، یان هونه‌رمه‌ندێکی گه‌له‌که‌مان به‌ تاوانی جیابیری و ئازادیخوازی نه‌که‌وێته‌ چاڵه‌ ره‌شه‌کانی رێژیمی ده‌سه‌ڵاتدار به‌سه‌ر ئێراندا، هیواداره‌ به‌ خه‌باتی بێوچان له‌پێناو نه‌مانی شه‌وه‌زه‌نگی جه‌هل و نه‌زانیدا، تیشکی هه‌تاوی ئازادی ده‌رکه‌وێ‌ و وزه‌ و هێزێکی نوێ‌ به‌ ئه‌ندێشه‌ داهێنه‌ره‌ نه‌ته‌وه‌ییه‌کانی ئێوه‌ی نه‌ته‌وه‌خۆشه‌ویست ببه‌خشرێ‌.

خۆشه‌ویستان!

وه‌ک چۆن سه‌ده‌ تاریکه‌کانی ئورووپا له‌ سه‌ره‌تادا و له‌ کاتێکدا هێشتا ده‌سه‌ڵاتی کلیسا هه‌ر په‌ره‌ی به‌ جه‌هڵ ده‌دا و پێشی به‌ ئه‌ندێشه‌ی ئازاد ده‌گرت، به‌ داهێنانی هزری و ئه‌ده‌بی و هونه‌ری به‌ره‌و ئاوا بوون رۆیشت، به‌ هه‌مان شێوه‌ش له‌ ئێراندا له‌ کاتێکدا ئاخونده‌کان سه‌رکوتی ئازایخوازان و هه‌وڵ بۆ بنبڕ کردنی هه‌ر ئه‌ندێشه‌یه‌کی ئازادیان گه‌یاندووه‌ته‌ لووتکه، داهێنانه‌ هزری و ئه‌ده‌بی و هونه‌رییه‌کان له‌ سه‌رانسه‌ری ئێران که‌ زۆر جار ره‌نگدانه‌وه‌ی جیهانیشیان هه‌بووه، دڕی به‌ تاریکی داوه. وه‌ک چۆن له‌ سه‌ره‌ونخوون کردنی ده‌سه‌ڵاتی مه‌زهه‌بی له‌ ئورووپا و واتابه‌خشینی کرده‌کی به‌ مرۆڤ بوونی مرۆڤ و دامه‌زراندنی ده‌وڵه‌تی مۆدێڕندا، رووناکبیران و ئه‌دیبان و هومه‌رندان له‌ ریزی پێشه‌وه‌ی شۆڕشه‌کاندا بوون، هه‌ر به‌ هه‌مان شێوه‌ش چاوه‌ڕوان ده‌کرێ‌ ئێوه‌ش له‌ ریزی پێشه‌وه‌ی خه‌بات له‌ پێناو کۆتایی هێنان به‌ ده‌سه‌ڵاتی کۆماری ئیسلامیدا بن که‌ به‌ که‌ڵک وه‌رگرتنی ئامرازی له‌ مه‌زهه‌ب، ته‌نانه‌ت زه‌بری له‌ مه‌زهه‌بیش وه‌شاندووه.

به‌ڕێزان!

حیزبی دێمۆکراتی کوردستانی ئێران که‌ هه‌ر له‌ سه‌ره‌تای دامه‌زراندنییه‌وه‌ هه‌تا به‌ ئه‌مڕۆ، رۆڵی رووناکبیران، ئه‌دیبان و هومه‌ندانی شۆڕشگێڕ و ئازادیخوازی کورد تێیدا به‌رچاو بووه، هیواداره‌ ئه‌م توێژه‌ شوێندانه‌ره، به‌ خوێندنه‌وه‌یه‌کی دروست له‌ هه‌لومه‌رجی هه‌نووکه‌ی وڵاته‌که‌مان، بتوانێ‌ له‌ خه‌باتی رزگاریخوازانه‌ و ئازادیخوازانه‌ی نه‌ته‌وه‌که‌ماندا ئه‌و رۆڵه‌ بگێڕێ‌ که‌ چین و توێژه‌کانی دیکه‌ی کۆمه‌ڵگای کوردستانی ئێران چاوه‌ڕوانییان لێیان هه‌یه‌. کۆنگره‌ی ١٥ی حیزبی دێمۆکرات که‌ له‌ژێر دروشمی "هه‌وڵدان بۆ یه‌کڕیزی له‌پێناو سه‌رکه‌وتن"دا به‌ڕێوه‌چوو، له‌ هه‌موو ئه‌و رووناکبیر، ئه‌دیب و هونه‌رمه‌ندانه‌ی که‌ له‌پێناو نه‌ته‌وه‌که‌یان له‌ به‌ندیخانه‌کانی رێژیمدا به‌سه‌ر ده‌به‌ن، رێز ده‌گرێ و دڵنیایان ده‌کاته‌وه‌ که‌ هه‌وڵه‌کانی حیزبی دێمۆکرات له‌ پێناو یه‌کڕیزیدا، ئاسۆی سه‌رکه‌وتن و گه‌یشتن به‌ ئامانجه‌ باڵا مرۆیىیه‌کانی نه‌ته‌وه‌ی کورد زیاتر له‌ هه‌ر کات رووناکتر ده‌کاته‌وه.

سڵاو له‌و رووناکبیر و ئه‌دیب و هونه‌رمه‌ندانه‌ی له‌پێناو بیروباوه‌ڕیان له‌ چاڵه‌ڕه‌شه‌کانی کۆماری ئیسلامیدا به‌سه‌ر ده‌بن.

سڵاو له‌ ئازادیی ئه‌ندێشه، ئازادیی قه‌ڵه‌م و ئازادیی داهێنان

کۆنگره‌ی ١٥ی حیزبی دێمۆکراتی کوردستانی ئێران

 

په‌یامی کۆنگره‌ی حیزبی دێمۆکرات بۆ کادر و پێشمه‌رگه‌کانی ئه‌و حیزبه

kongra_-_kadro_peshmargaخه‌باتگێڕانی رێگای دێموکراسی ‌و مافی نه‌ته‌وایه‌تی کورد!

رێبوارانی رێبازی قازی، قاسملوو ‌و شه‌ره‌فکه‌ندی!

کۆنگره‌ی پازده‌هه‌می حیزبه‌ خۆشه‌ویست ‌و تێکۆشه‌ره‌که‌مان کۆنگره‌ی شه‌ره‌فکه‌ندی له‌ ره‌وتی کاری چه‌ند رۆژی رابردووی خۆیدا ئاوڕی له‌ رابردووی پڕسه‌روه‌ری ئێوه‌‌و هه‌وڵ‌ و تێکۆشانی ماندوویی نه‌ناسانه‌ی ئه‌مرۆتان دایه‌وه‌‌ و به‌چاوی رێزه‌وه‌ سه‌یری ئه‌و ئه‌رکه‌ قورس‌ و له‌ هه‌مان کاتدا پڕ بایه‌خانه‌ی کرد که‌ بۆ به‌ ئه‌نجام گه‌یاندنیان کات‌ و ته‌مه‌ن‌ و توانا خۆتان ته‌رخان کردوه‌ ‌و هه‌ر له‌و پێناوه‌شدا ژیانی ئاساییتان وه‌لاناوه، مه‌ترسی بڕینی رێگای خه‌باتتان له‌ خۆتان گرتووه، له‌ خۆشه‌ویستانتان بۆ خۆشه‌ویستی نه‌ته‌وه‌که‌تان دوور که‌وتنه‌وه‌‌و رێگای خه‌باتێکی دژوار ‌و ته‌نانه‌ت پڕمه‌ترسی، به‌ڵام پڕ له‌ شانازیتان گرتووه‌ته‌ به‌ر ‌و له‌ سه‌نگه‌ری پێشه‌وه‌ی ئه‌و خه‌باته‌دا جێگیر بوون که‌ بۆ وه‌دی هاتنی دێموکراسی‌ و دابین بوونی مافی نه‌ته‌وایه‌تی کورد له‌ گۆڕێ دایه‌ ‌و ریزه‌کانی له‌ تێکۆشه‌رانی وه‌ک ئێوه‌ کادر‌ و پێشمه‌رگه‌کانی حیزبی دێمۆکراتی کوردستانی ئێران پێکهاتووه.

ناوی ئێوه‌ ‌و وشه‌ی پیرۆزی پێشمه‌رگه‌ ئه‌مرۆ نه‌ ته‌نیا له‌ نێو کورددا، به‌ڵکوو له‌ جیهاندا ده‌ربڕی ئازادیخوازی‌ و نیشانده‌ری فیداکاری که‌سانێکه‌ که‌ له‌پێناو رزگاریی نه‌ته‌وه‌ ‌و وه‌دستهێنانی ماف‌ و ئازادی‌ و پاراستنی که‌رامه‌تی ئینسانیدا نموونه‌ی له‌ خۆبردوویی‌ و به‌رزترین پله‌ی فیداکارییه.

کۆنگره‌ی پازده‌هه‌می حیزبی دێمۆکراتی کوردستانی ئێران به‌ له‌به‌ر چاوگرتنی هه‌موو ئه‌و تایبه‌تمه‌ندییانه‌ی که‌له‌ ئێوه‌ی تێکۆشه‌رانیدا به‌دی ده‌کا دڵنیایه‌ که‌ له‌ ئێستا‌و له‌ داهاتوو‌ و له‌ هه‌ر هه‌ڵومه‌رج‌ و ئاڵوگۆڕێکدا ده‌توانن شوێندانه‌ر بن‌ و ده‌وری به‌رچاو بگێڕن. کۆنگره‌ی هیواداره‌ به‌ بردنه‌ سه‌ری پله‌ی زانیاری‌ و پاراستنی ئه‌و نه‌زم ‌و دیسیپلینه‌ی که‌ رازێنه‌ری سیمای کادر‌ و پێشمه‌رگه‌ی حیزبی دێمۆکراته‌ رۆژبه‌رۆژ شوێندانه‌رتر ‌و سه‌رکه‌وتووتر بن.

کۆنگره‌ی ١٥ی حیزبی دێمۆکراتی کوردستانی ئێران

ره‌زبه‌ری١٣٩١ی هه‌تاوی

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 991
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy