هه‌ڵۆی کوردستان

-
هەڵە
  • JFolder::create: Could not create directory

چاو خشاندنێکی کورت به‌سه‌ر رووداوه‌کانی تا ئێستای ناو کۆمه‌ڵه (به‌شی‌ دووهه‌م)‌

پۆستی ئەلیکترۆنی چاپکردن

 komala_-_mona_dlbari_2ئایا به‌راستی حیزبی کۆمۆنیستی ئیران کۆسپ و ته‌گه‌ره‌بوو له‌به‌رده‌م گه‌شه‌نه‌كردنی کۆمه‌ڵه‌دا؟


له‌په‌راوێزی وته‌کانی کاک ئه‌بدولڵا له‌مه‌ر جوداییه‌کانی ناو کۆمه‌ڵه ...


کۆمه‌ڵه‌ش که‌ هه‌ر له‌ سه‌ره‌تای درووست بوونیه‌وه ‌له‌سه‌ر بنه‌مای مارکسیستیی پێداگری ده‌كرد‌و خه‌باتی بۆ رزگاری‌و یه‌کێتی‌ کرێکاران ده‌کرد تاراده‌یه‌ک به‌رچاویش له‌ناو گۆڕه‌پانی سیاسی له‌ کوردستان‌و ئێران جێ په‌نجه‌ی دیار بوو ده‌بوو بۆ وه‌ڵام دانه‌وه ‌به‌‌م خاڵه ‌لاوازانه ‌وه‌ک هێزێکی چه‌پ بێته ‌مه‌یدان‌و ئامانجه‌ کرێکاریه‌کانی گه‌ڵاڵه ‌بکات، ئه‌مه‌ له‌لایه‌ک‌و له‌لایه‌کی تریشه‌وه ‌کۆمه‌ڵه ‌ئه‌وکات له‌ژێر بیروبۆچوون‌و خه‌تی مائۆئیستیدا ده‌یناڵاند‌و هێشتاکه‌ش بیرێکی ناسیۆنالیستی سه‌رده‌م به‌سه‌ریدا زاڵبوو، هه‌ربۆیه ‌ده‌بوو خۆی له‌م قه‌یرانه ‌ده‌ربازبکات‌و شۆڕشێکی ئیدئۆلۆژی له‌نێو پێکهاته‌ی خۆیدا سازمان بدات...شک له‌وه‌دا نیه‌ که‌ دروست بوونی حیزبی کۆمۆنیستی ئێران له ‌هاوینی ساڵی 62 ی هه‌تاوی بومه‌له‌رزه‌یه‌کی سیاسی به‌هێز بوو له‌ناو کۆمه‌ڵه‌دا، له ‌چه‌ندلایه‌نه‌وه ‌ده‌کرێ دروست بوونی ئه‌م حیزبه ‌بده‌ینه ‌به‌رباس‌و لێکدانه‌وه‌. گرنگترین مه‌سه‌له‌کان که‌ جێگای ئاماژه ‌پێکردنه‌، سه‌رلێشێواوی به‌ره‌ی چه‌پ له‌ ئێران به‌تایبه‌تی له‌ دوای بێ ئاسۆیی‌و خیانه‌تی حیزبی تووده‌‌و پرژوبڵاوی هیزه‌ چه‌پ‌و پێشکه‌وتنخۆازه‌کان له‌ئێراندا‌و هێرشی دڕندانه‌ی رژیمی تازه‌ به‌ده‌سه‌ڵات گه‌یشتوی کۆماری ئیسلامی بۆ سه‌ر ئه‌م هێزانه‌و گرتن‌و کوشتن‌و راپێچی زیندان کردنیان بوو...

خه‌بات‌و ناره‌زایه‌تیه کرێکاریه‌‌کانیش ڕۆژبه‌ڕۆژ له‌لایه‌ن کۆماری ئیسلامیه‌وه ‌هێرشی ده‌کرایه ‌سه‌ر‌و له‌ ‌ناوه‌رۆکی شۆرشگێرانه‌ی پووچه‌ڵ ده‌کرایه‌وه، ‌بۆیه ‌ئه‌مانه ‌هه‌مووی قورساییان خستبوه‌سه‌ر به‌ره‌ی چه‌پ‌و ئه‌گه‌ری لاوازبوونی زۆر به‌رچاوبوو.

کۆمه‌ڵه ‌زۆر ژیرانه ‌بۆ وه‌ڵام دانه‌وه ‌به‌م بارودۆخه‌ هاته‌ مه‌یدان‌و زۆر دڵسۆزانه ‌بیرۆکه‌ی دروستکردنی حیزبێکی سه‌رتاسه‌ری که‌ بتۆانێ ئه‌م خه‌باته‌ی کرێکاران به‌ ئاقارێکیتردا به‌رێت‌و سه‌ر‌و سامانێک به‌به‌ره‌ی چه‌پ له‌ئێراندا بدات، داڕشت، که‌ بێگومان ئه‌م حه‌ره‌که‌ته‌ی کۆمه‌ڵه ‌خزمه‌تێکی زۆری هه‌م به‌م به‌ره‌یه‌کرد‌و توانی له‌ ماوه‌یه‌کی که‌مدا زۆربه‌ی هه‌ره‌زۆری شۆرشگێرانی چه‌پ‌و مارکسیست له ‌ریزه‌کانی خۆیدا سازمان بدات‌و خۆی بخزێنێته‌ ‌‌ناو ناوه‌نده‌ كرێكارییه‌كان له‌سه‌رتاسه‌ری ئێران‌و له‌لایه‌کیتریشه‌وه ‌خۆی له‌‌ ژێرخه‌تی مائۆئیستی ده‌ربازکات....

به‌داخه‌وه‌ ئه‌م حیزبه ‌ئه‌گه‌ریش پاڵپشتێکی به‌هێزی له‌چه‌شنی کۆمه‌ڵه‌ی له ‌کوردستاندا له‌پشت بوو، به‌ڵام به‌داخه‌وه ‌بۆ هیچ کات ئه‌م حیزبه‌ کۆمه‌ڵایه‌تی نه‌بووه‌‌و نه‌یتوانی لایه‌نگرانێکی زۆر له‌ناوه‌وه‌ی ئێران به‌ره‌ولای خۆی ڕابکێشێت، گرنگترین هۆکاره‌که‌شی ئه‌وه‌بووکه ‌ئه‌م حیزبه ‌له ‌هه‌لومه‌رجێکدا پێکهات که ‌کۆماری ئیسلامی به‌ته‌واوی هێزی سه‌رکوتگه‌ری خۆی خه‌ریکی ئه‌ستاندنه‌وه‌ی ده‌سکه‌وته‌کانی شۆرشی کۆمه‌ڵانی خه‌ڵکی ئێران به‌دژی رژیمی شا بوو. کوردستانیش که‌ وه‌ک زۆربه‌ی ناوچه‌کانی تری ئێران بۆ شۆرشگێران کووره‌ی خه‌بات بوو، میلیتاریزه‌کرابوو وه ‌له ‌ژێر خه‌فه‌قانێکی ره‌شی پۆلیسیدا ده‌یناڵاند‌و رۆژ به‌رۆژ زیاتر هێزی پێشمه‌رگه‌ پاشه‌کشێی پێده‌کراو کوردستان به‌ته‌واوه‌تی ده‌که‌وته ‌ژێرده‌ستی کۆماری ئیسلامی. که‌شوهه‌وای ئێران به‌گشتی‌و کوردستان به‌تایبه‌تی، تۆقێنه‌ر بوو، رۆژ نه‌بوو هێرش نه‌کرێته ‌سه‌ر کۆمه‌ڵانی خه‌ڵک‌و داخۆازیه‌‌کانیان سه‌رکوت نه‌کرێ، ئه‌مه ‌له‌لایه‌ك‌و له ‌لایه‌کیتریشه‌وه ‌له‌به‌یک بۆخۆمێنی‌و نهادینه‌کردنی ناوه‌نده‌کانی ده‌سه‌ڵات له‌لایه‌ن رژیمی ئێرانه‌وه‌و زاڵکردنی دیکتاتۆریه‌تێکی به‌ته‌واومانا نیزامی له‌ئێران، که‌شوهه‌وای سیاسی له‌ئێران به‌ربه‌ست‌و قه‌تیس کردبوو که‌ هه‌ر ده‌نگێکی ناڕازی له‌ ‌گه‌رودا کپ ده‌کرا. خه‌باتی کرێکاران پاشه‌کشه‌ی پێده‌کراو رێبه‌رانی کرێکاری راپێچی زیندانه‌کان ده‌کران. کرێکاران له‌سه‌ر کار ده‌رده‌کران‌و به‌ر به‌ هه‌ر کۆبونه‌وه‌یه‌کی کرێکاری ده‌گیرا. بزووتنه‌وه‌ی کرێکاری هێشتاکه‌ش له‌ژێر په‌س له‌رزه‌کانی شۆرشی ئیسلاحاتی ئه‌رزی له‌ئێران که‌ ئاکامه‌که‌ی به‌ زیانی کرێکاران شکایه‌وه ‌ده‌ربازی نه‌بووبوو... له‌کوردستانیش کرێکاران له‌به‌ر نه‌بوونی ده‌رفه‌تی کارو ناوه‌ندی به‌ر هه‌م هێنان مه‌جبوور بوون بۆ بژێوی‌و ژیانی بنه‌ماڵه‌یان روو بکه‌نه ‌شاره‌کانی ده‌ره‌وه‌ی کوردستان، که‌به‌داخه‌وه ‌ئه‌مه‌ش خزمه‌تێکی زۆری به ‌پرشوبڵاوی کرێکاران به‌تایبه‌تی له‌کوردستاندا ده‌کرد... ژیان‌و به‌ڕێچوونی کرێکاران له ‌ئاستێکی زۆر دژواردا ده‌چوه ‌پێشه‌وه‌و ترس‌و دڵه‌راوکێ‌و تۆقاندنیش زیاترو زیاتر ئه‌م هێزه‌ی ‌له‌ خه‌باتی ره‌واو به‌رحه‌قی خۆی دورده‌خسته‌وه... کۆمه‌ڵه‌ش که‌ئێستا باری قورسی حێزبی کۆمۆنیستی به‌سه‌ر شانه‌وه ‌بوو، له‌کوردستاندا ده‌رگیری شه‌ڕێکی نه‌خۆازراوی ناوخۆییش بوو که‌به‌داخه‌وه ‌هه‌مو ئه‌م کێشانه‌ نه‌یان هێشت ده‌رفه‌ته‌کان زیاتر خزمه‌ت به‌گه‌شه‌ی حیزبی کۆمۆنیستی ئێران بکات...

له‌ لایه‌کی تریشه‌وه ‌له‌ناو ریزه‌کانی کۆمه‌ڵه‌دا، مه‌سه‌له‌ی كۆمۆنیست نه‌بوونی حیزبی كۆمۆنیستی ئێران‌و كۆمه‌ڵه‌ رۆژ به‌ڕۆژ له‌لایه‌ن فراكسیۆنی كۆمۆنیزمی كارگه‌رییه‌وه‌، په‌ره‌ی ئه‌ستاند‌و چاوچنۆکی‌و بیری قیزه‌ونی فراکسیۆنی کۆمۆنیزمی کرێکاری، هه‌ر ده‌هات وکۆمه‌ڵه‌ی لاواز ده‌کرد‌و کۆمه‌ڵه‌و حيزبی کۆمۆنیستی به‌ره‌و ‌قۆناخی دروستکردنی حیزبێکیتر ده‌برد...

به‌داخه‌وه ‌ئه‌و که‌شوهه‌وایه‌ی که‌کۆمه‌ڵه‌ تێیدا پێکهات‌و گه‌شه‌یکرد، قه‌ت بۆ حیزبی کۆمۆنیستی ئێران پێش نه‌هات‌و ئه‌م حیزبه ‌کۆمه‌ڵه‌شی له‌گه‌ڵ خۆی به‌ره‌و هه‌ڵدێر برد، ئه‌گه‌ریش دروستبونی ئه‌م حیزبه‌ کۆمه‌ڵه‌ی له‌باری بیرو بۆچوون‌و ئامانجه‌ کۆمۆنیستیه‌کانی شه‌فافتر کرده‌وه‌‌و گه‌لێک سوننه‌تی باشی له‌ناو کۆمه‌ڵه‌دا جێخست، به‌ڵام گه‌وره‌ترین زه‌ربه‌شی له‌کۆمه‌ڵه‌دا.

کۆمه‌ڵه‌ی لاواز کرد، کۆمه‌ڵه‌ی ته‌ریک کرده‌وه‌و له ‌شۆرشی کۆمه‌ڵانی خه‌ڵکی کوردستان دایبڕی، که ‌به‌داخه‌وه ‌ئێستاش کۆمه‌ڵه ‌لێی ده‌ربازنه‌بووه.

که‌شوهه‌وای لاوازی حیزبی کۆمۆنیستی ئێران، تارماییه‌ک بوو که‌به‌رده‌وام به‌سه‌ر چالاکیه‌‌کانی کۆمه‌ڵه‌دا ده‌خولایه‌وه‌، رێبه‌ری ئه‌م حیزبه ‌نه‌ له‌باری ئیدئۆلۆژییه‌وه‌و نه‌له‌باری سیاسی‌و ته‌شکیلاتیه‌وه‌، توانای ئیداره‌کردنی نه‌بوو، له‌نێۆخۆیدا کێشه‌ی سیاسی‌و ئیدئۆلۆژی هه‌بوو، به‌تایبه‌تی له ‌دوای جوداییه‌کانی فراکسیۆنی کومۆنیزمی کارگه‌ری ئه‌م مه‌سه‌له‌یه ‌زۆر زه‌ق‌و به‌رچاوتر بوو. چه‌ندین بیروبۆچوونی له‌چه‌شنی ناسيۆنالیزم، سۆسیال دیمۆکراسی، چه‌پی توندڕه‌و‌و میانه‌ره‌و تێیدا کایه‌ی ده‌کرد.

مه‌سه‌له‌ی پێکهێنانی شوورای کڕێکاری یان خۆ ئیتحادیه‌‌ی کرێکاری له‌ناو کرێکاراندا، ئێشتاش ناکۆکی له‌سه‌ره‌و ئه‌م باسه ‌له‌ناو ئه‌م حیزبه‌دا هه‌ر نه‌بڕایه‌وه. باسی مه‌سه‌له‌ی نه‌ته‌وایه‌تی نه‌ک هه‌ر مه‌تره‌ح نیه، ‌به‌ڵکو باس لێکردنیشی تاوانێکه‌ که ‌ده‌بێ وه‌ڵام ده‌ره‌وه ‌بێت.

کۆبوونه‌وه ‌شاراوه‌کان:

کاک عه‌بدوڵڵای مۆهته‌دی که‌خۆی یه‌کێک له‌چالاکترین پێکهێنه‌رانی حیزبی کۆمۆنیستی ئێران‌و ساڵانێکیش ده‌بیرئه‌وه‌ڵی ئه‌م حیزبه‌‌بوو، ده‌یان کادری چالاکی ئه‌م ته‌شکیلاته‌ی به‌تاوانی ناسيۆنالیزم له‌ریزه‌کانی کۆمه‌ڵه ‌ده‌رکرد، تا سه‌رده‌مانێک حیزبی کۆمۆنیستی ئێرانی پێ گوڵی سه‌ر تۆپی بزوتنه‌وه‌ی چه‌پ له ‌ئێران‌و کوردستان بوو، که‌چی له‌وه‌رچه‌رخانێکی بیری سه‌یروسه‌مه‌ره‌ی سه‌رده‌مدا، تیشه‌ی له ‌ریشه‌ی حیزبی کۆمۆنیستی ئێران داو کۆمه‌ڵه‌شی له‌گه‌ڵ خۆی به‌ره‌و هه‌ڵدێر برد.

هێشتا مانگێك به‌سه‌ر کاندیدکردنی خۆی بۆ ئه‌ندامی کۆمیته‌ی ناوه‌ندی کۆنگره‌ی 7 ی حیزبی‌کۆمۆنیستدا تێنه‌په‌ڕیبوو،و ‌هێشتاکه‌ش له‌سه‌ر بیری مارکسیستی سوور بوو، له‌ناکاو له‌ده‌یان کۆبوونه‌وه‌ی شاراوه‌دا به‌رۆکی بۆ فێدراڵیزم داده‌دڕی‌و به‌ده‌نگی به‌رز ڕایده‌گه‌یاند که ‌ئێمه‌ده‌بێ بۆ نه‌ته‌وه‌ی کورد خه‌بات بکه‌ین.

له ‌سه‌رجه‌می ئه‌و کۆبوونه‌وانه‌دا بۆ یه‌ک جاریش باسی سیاسی مه‌تره‌ح نه‌کراو بگره ‌کۆبوونه‌وه‌کان ته‌نیا ببوونه ‌ژێر پێ خالیکردنی رێبه‌ران وکادره‌کانی کۆمه‌ڵه‌‌و حیزبی کۆمۆنیست. خاڵی به‌هێزی ناو کۆبونه‌وه‌کان داڕشتنی پیلانێک بۆ رێکخستنی کودێتایه‌کی بێده‌نگانه ‌بوو به‌دژی رێبه‌ری کۆمه‌ڵه‌. کوده‌تایه‌ک که‌ ناوه‌ندی کۆمه‌ڵه‌ به ‌رێبه‌ری ئیبراهیمی عه‌لیزاده ‌چه‌ک کات‌و ئۆردوگاکانی کۆمه‌ڵه‌ به‌ده‌سته‌وه ‌بگرێ.

ئه‌م کۆبوونه‌وانه ‌که‌شوهه‌وایه‌کیان له‌ناو ریزه‌کانی کۆمه‌ڵه‌دا پێکهێنابوو که ‌بۆ هه‌رساتێک ئه‌گه‌ری شه‌ڕی ناوخۆیی لێده‌کرا. به‌داخه‌وه ‌ئه‌م هه‌وڵه‌ش له‌ لایه‌ن یه‌کێک له‌هێزه‌کانی کوردستانی عێراق پشتگیری لێده‌کراو هه‌موو ئیمکاناتێکی مادی‌و مه‌عنه‌وی بۆ ته‌رخان کرابوو. کوده‌تا حه‌تمی بوو، ده‌بوو نه‌یاران پاشه‌کشه‌یان پێ بکرێ، مه‌یدان مه‌یدانی شه‌ڕه‌و ده‌بێ ده‌سه‌ڵات یه‌ک لایی بکرێته‌وه‌.

خۆشبه‌ختانه ‌بیری تیژی رێبه‌ری کۆمه‌ڵه‌ به‌ری به‌م هه‌نگاوه ‌گرت‌و نه‌یهێشت که ‌ئه‌م پیلانه ‌سه‌ربگرێ که ‌ئه‌لحه‌ق کۆمه‌ڵه ‌ژیرانه ‌به‌رخوردی کرد‌و ئاقاری توندوتیژیه‌کانی بۆ قۆناغێکی هێمنانه‌ گۆاسته‌وه.

ریزبه‌ندیه‌کان شکڵیان گرتبوو‌و ‌له‌ دوو به‌ره‌ییه‌ک دا خۆیان ناساندبوو.

له‌ وه‌ها بارودۆخێکدا کۆنگره‌ی 9 ی کۆمه‌ڵه‌ش له‌ چه‌ند هه‌نگاویدا بوو، باڵی کاک عه‌بدوڵڵا هه‌ر که ‌زانی له‌ که‌مینه‌دایه ‌ئه‌م کۆنگه‌ره‌یان ته‌حریم کرد‌و خۆیان ته‌شکیلی کۆنفرانسی ساخکردنه‌وه‌ی کۆمه‌ڵه‌یاندا.

هه‌موو هه‌وڵی دڵسۆزان‌و حیزب‌و لایه‌نه‌سیاسیه‌کان بۆ به‌رگرتن به‌جیابوونه‌وه‌یه‌کی له ‌ناکاو‌و بێ ئاکام مایه‌وه‌و ‌به‌داخه‌وه ‌به‌ڕێبه‌ری کاک عه‌بدوڵڵا ئه‌م جیاییه ‌له ‌25ی مانگی موردادی 79ی هه‌تاوی رویدا.

دیاره ‌بۆ ساخکردنه‌وه‌ی ته‌شکیلات ئیمکانات پێویست بووکه ‌ده‌بوو فکرێکی بۆ کرابایه‌وه‌.

له‌په‌یوه‌ند له‌گه‌ڵ ئیمکاناتی مادی، ئه‌م ماڵه ‌بێ کێشه‌بوو چۆن به‌داخه‌وه ‌له‌ لایه‌ن دۆستانی خۆیان‌و نه‌یارانی چه‌پ له ‌کوردستان ته‌ئمین کرابوون، کێشه‌یه‌ک ئه‌گه‌ر بوایه‌کێشه‌ی ئیمکاناتی ته‌شکیلاتی بۆ خۆناساندن بوو که ‌ده‌بوو له ‌ئۆرگانه‌کانی کۆمه‌ڵه ‌ته‌ئمین کرابان. بۆ ئه‌م مه‌به‌سته‌ش ده‌سکرا به تاڵان کردنی دو ئۆرگانی موهیمی له چه‌شنی رادیۆ کۆمه‌له‌و به‌شی ئه‌سناد ، تا ئه‌و جێگای که به راديۆ په‌یوه‌ندی بوو هه‌رچی یادنامه‌ی شه‌هیدان‌و عه‌کس‌و ئارشیوی راديۆ بوو به تاڵان برا ، له به شی ئه سنادیش دا گه‌لێک شت بران که به‌داخه‌وه دواتر به ده‌ستووری شه‌خسی کاك عه‌بدووڵڵا ئیستیفاده‌ى خراپی لێکراو ...

 

بابه‌تی‌ پێوه‌ندیدار:

چاو خشاندنێکی کورت به‌سه‌ر رووداوه‌کانی تا ئێستای ناو کۆمه‌ڵه (به‌شی‌ یه‌كه‌م )‌

 

_______________________________

تێبینی‌:

ــ ماڵپه‌ڕی‌ "هه‌ڵۆی‌ كوردستان"

له‌ به‌رامبه‌ر نێوه‌ڕۆكی‌ هیچ بابه‌تێك به‌رپرسیار نیه‌‌و نووسه‌ری‌ بابه‌ت به‌رپرسه‌ له‌به‌رامبه‌ر بابه‌تی‌ خۆیدا‌

ــ كه‌ڵك وه‌رگرتن له‌و بابه‌تانه‌ به‌ هێنانی ناوی سه‌رچاوه‌ یان له‌سه‌ر ئیزنی‌ نوسه‌ر ئازاده

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1643
بۆچوونه‌کان (1)Add Comment
...
نووسراوه‌ له‌ لایه‌ن کوری سلیمانی, June 29, 2012
مۆنا خانمی بەڕێز: من نە كۆمەڵەم، نە دیمۆكراتم، نە پژاكم، نە یەكیەتیم، نەپارتیم، نە حیزبی كۆمۆنیستی ئێران. من كوردێكم و تەنها ئەوەش بەلامەوە گرنگە كوردبوون و عەداڵەتی كۆمەڵایەتییە لە كوردستان. بەڵا زۆر باش ئاگاداری حیزبە كوردییەكانی كوردستانی رۆژهەڵات و باشوریش هەم.
خانمی بەڕێز: ئەم نووسینەی ئێوە كە دیفاع و بەرگرییە لە حیزبی كۆمۆنیستی ئێران، من تا ئێستا 2 بەشیم خوێندۆتەوە. بەڵام لە هەمانكاتدا پڕە لە دەمارگرژی و رق دژ بە رەوتی كۆمەڵەی شۆڕشگێڕی زەحمەتكێشانی كوردستانی ئێران و بە تایبەت بەڕێز عەبدوڵڵا موهتەدی. ئەویش ئەوەیە لە روانگەیەكی بەرتەسكی حیزبییەوە شتەكان لێك دەدەنەوە.
من لام وا نییە عەبدوڵڵا موهتەدی هەڵەی نەكردووە. بەڵی سەرەتا لە گەڵ رەوتی كۆمۆنیزمی كرێكاری كەوت و ئەمە رەخنەیە لەو بەڕێزە. بەڵام هەر ئەو دوای رۆشتنی حیزبی كۆمۆنیستی كرێكاری زیاترین رەخنەی لەو رەوتە گرت. هێشتا رەوتی كۆمۆنیزمی كرێكاری نەڕۆشتبوون كە كتێبی "ئەم بڵقە كەی دەتەقێت" بڵاو بۆوە، ل دوو بەشدا بوو. من بە كوردی خوێندوومەتەوەو یەكیان تەرجەمەی بەڕێز ناسر حیسامی و ئەویتریان وەرگێڕانی بەڕێز ئەیووب عەبدوڵڵا پوور. هەر ئەوەی عەبدوڵڵا موهتەدی خۆی زانی هەڵەی كردووەو دواتر رەخنەی لە خۆی و ئەورەوتە گرت ئەمە گەورەیی ئەو كەسە نیشان ئەدات.
دەربارەی چوارچێوەی حیزبی كۆمۆنیست. من لام وایە كۆمەڵە درەنگ لە حیزبی كۆمۆنیست هاتە دەروە. لام وایە دوای رۆشتنی دارودەستەی مەنسوور حیكمەت ئەبوایە حیزبی كۆمۆنیست نەمایەت. باشە تۆ پێم ناڵێیت حیزبی كۆمۆنیست بە درێژایی زیاتر لە 2 دەیە، جگە لە ناو چیتر بووە؟ هەر مناڵانی سنەو سەقز و مەهاباد و بۆكان ومەریوان و... دەهاتن و هەر ئەوان ئەبوون بە ئەندامی حیزبی كۆمۆنیستی ئێران. كە چی ئەوان بۆ پێشمەرگایەتی كۆمەڵە دەهاتن. ئەم حیزبە چەند رێكخراوی كرێكاری هەیە لە تاران و شیراز و ئیسفەهان؟ چەند ئەندامی هەیە كورد نەبێت؟ بەسەری من و تۆ جگە لە كوردەكان 5-6 ئەندامی فارسی نییە. دەی باشە خانمی بەڕێز ئەمە چ حیزبێكە ئەندامی نەبێت. پێكهاتنی حیزبی كۆمۆنیست هەڵەیەكی گەورە بوو بەڕای من. ئێستاش ئەم قەبارەیە هەڵەیە مانەوەی.
با باسی بیركردنەوەش بكەین. بەڕاستی لەم سەردەمەدا، بیرۆكەی كۆمۆنیسم ئەتوانێت وەڵامدەرەوە بێت؟ ئاخر عەبدوڵڵا موهتەدی زۆر باش لەوە تێگەیشتبوو كە دوای رووخانی دیواری بەرلین و دوای یەك جەمسەر بوونەوەی جیهان شانسێك بۆ كۆمۆنیسم نەماوە. ئەم تەیفە چەپەی لە گەڵ حیزبی كۆمۆنیستی ئێران كۆمۆنیسمی كرێكاریدا ماونەتەوە، لە راستییدا زۆر كەم لە بنەما فیكرییەكانی ماركس تێگەیشتوون. من لام وایە زیاتر نزیكن بە كائۆتسكی. لە ئەمڕۆدا كۆمۆنیسم یانی كووبا، چین، ڤینزۆئێلا، كۆریای باكوور. تۆ تەماشا ئەمانە هاوڕێ گیانی بە گیانییەكانی ئێستای كۆماری ئیسلامین. چین گەورەترین زیندانی رۆژنامە نووسانە. ڤێنزۆئێلا خۆت باشتر لە من دەزانیت چۆنە، هۆگۆ چاوێزی هاوڕێی ئەحمەدی نژاد. باشە خۆشە حیزبێك بەم بیركردنەوەوە بناسرێتەوە؟
حیزبی كۆمۆنیستی ئێران پشتی لە پرسی نەتەوەی كورد كردووەو عەبدوڵڵا موهتەدی زۆر باش ئەمەی ناسیووە. هەر لەم رووەشەوە بوو توانی بەشێكی زۆر لە ئەندامانی كۆمەڵە لە گەڵ خۆی بخات، جیابوونەوەی كۆمەڵە لە حیزبی كۆمۆنیست لە ناوخۆو دەروەی كوردستانیشەوە وەڵامی ئەرێی پێدرایەوە. بەڕای من ئەگەر بەڕێوبەرایەتی تەشكیلاتی ئەم حیزبە كێشەی نەبا، جەماعەتی كاك عومەر ئیلخانیزادە نەڕۆشتبان، ئەم حیزبە لە باری سیاسییەوە بەڕۆژترین حیزبی كوردییەوە دەیتوانی زۆر بەهێزتر لەئێستا دەربكەوێت.
دەربارەی كەسایەتی عەبدوڵلا موهتەدیش من لام وایە لەئێستادا تەنها رەهبەرێكی كوردە لە ناو حیزبەكان، كە لە باری تیۆرییەوە قسەیەكی پێیە بۆ وتن و لە ناو كورد و غەیرە كوردەكانیشدا حیسابی بۆ دەكرێت.

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy