هه‌ڵۆی کوردستان

-
هەڵە
  • JFolder::create: Could not create directory

خه‌باتی‌ چه‌كداری‌ وه‌ك پشتیوانێك بۆ خه‌باتی‌ مه‌ده‌نی‌

پۆستی ئەلیکترۆنی چاپکردن

پpeshmarga_-_kak_nadr2اش سی‌ ‌و سێ ساڵ تێپه‌ر بوون به‌سه‌ر ده‌سه‌ڵاتی‌ رێژیمی‌ كۆماری‌ ئیسلامی‌ و ئه‌و زه‌بر و زه‌نگانه‌ی‌ كه‌ روبه‌ڕووی‌ خه‌ڵكی‌ كوردستان و ئێرانی‌ كردۆته‌وه‌، به‌رده‌وام باسی‌ چۆنیه‌تیی‌ به‌ره‌نگار بونه‌وه‌ی‌ ئه‌م رێژیمه‌ ده‌كرێ. له‌م ساڵانه‌ی‌ دواییدا و پاش ئه‌و شۆڕشانه‌ی‌ كه ‌له‌ وڵاتانی‌ عه‌ره‌بیدا سه‌ریهه‌ڵدا، خه‌باتی‌ مه‌ده‌نی‌ كه‌وته‌ رۆژه‌ڤه‌وه‌. به‌ شێوه‌یه‌ك كه‌ به‌رده‌وام باس له‌وه‌ ده‌كرێ كه‌ تاكه‌ رێگا بۆ له‌ناو بردنی‌ كۆماری‌ ئیسلامی‌ خه‌باتی‌ مه‌ده‌نییه‌. جیاواز له‌وانه‌ی‌ كه‌له‌ "میسر و تونس"دا رویان دا، پێده‌چێ نێوه‌رۆكی‌ ئه‌م رێژیمه‌ زۆر له‌ نێوه‌رۆكی‌ رێژیمه‌كه‌ی‌ ئه‌سه‌ده‌وه‌ نزیك بێ، مه‌به‌ستم ئه‌و ماهیه‌ته‌یه‌ كه‌ چۆن روبه‌ڕووی‌ هه‌ر چه‌شنه‌ ناڕه‌زایه‌تییه‌ك ده‌بیـَته‌وه‌، بۆیه‌ ده‌توانین چۆنیه‌تیی‌ مامه‌ڵه‌ كردنی‌ رێژیمی‌ سووریه‌ به‌ نموونه‌ بێنینه‌وه‌ كه‌ ئایا خه‌باتی‌ مه‌ده‌نی‌ له‌و وڵاته‌ گه‌یشتوته‌ ئامانج؟ هه‌ر بۆیه‌ هه‌مان پرسیاریش ده‌توانێ به‌رانبه‌ر به‌ كۆماری‌ ئیسلامی‌ بكرێ.

ئایا خه‌باتی‌ مه‌ده‌نی‌ تاكه‌ رێگای‌ رووخانی‌ كۆماری‌ ئیسلامیه‌ و ئه‌و شێوه‌ خه‌باته‌ توانیویه‌تی‌ تا ئێستا وه‌ڵامده‌ر بێت؟ ئایا ده‌كرێ ته‌نیا شێوه‌یه‌ك له‌ شێوه‌كانی‌ خه‌بات بۆ گۆڕانكاری‌ له‌ ئێراندا په‌سندی‌ بكه‌ین؟ ئایا كاتی‌ ئه‌وه‌ هاتووه‌ هاوكات له‌گه‌ڵ خه‌باتی‌ مه‌ده‌نی‌ له‌ خه‌باتی‌ چه‌كداری‌ وه‌ك پاڵپشت و به‌هێز كردن و سه‌رخستنی‌ ئه‌م شێوه‌ خه‌باته‌ كه‌ڵك وه‌رگرین؟ زیاتر له‌ سی و سێ ساڵه‌ كۆماری‌ ئیسلامیی‌ ئێران، ده‌سه‌ڵاتی‌ نگریسی‌ خۆی‌ به‌سه‌ر گه‌لانی‌ ئێراندا سه‌پاندووه‌ و نایهه‌وێ به‌ هیچ شێوه‌یه‌ك سێبه‌ری‌ دیكتاتۆریی‌ خۆی‌ له‌سه‌ر خه‌ڵكی‌ ئێران لابه‌رێ. بۆ درێژه‌دان به‌ ده‌سه‌ڵاتی‌ دواكه‌وتووی خۆی‌ كۆمه‌ڵێ‌ ئاخوندی‌ دواكه‌وتووی‌ له‌ بواره‌ جۆراوجۆره‌كاندا راهێناوه‌ كه‌ بۆ مانه‌وه‌ی‌ ئه‌م سیستمه‌ له‌ هه‌ر جۆره‌ میكانیزمێكی‌ دژی‌ مرۆیی‌ كه‌ڵك وه‌رده‌گرن.

به‌ هاتنه‌ سه‌ركاری‌ كۆماری‌ ئیسلامی‌ تا ئێستا زیاتر له‌ ده‌یان ئۆرگانی‌ جۆراوجۆری‌ سه‌ركوت و زه‌بر و زه‌نگی‌ بۆ سه‌ر كۆمه‌ڵانی‌ خه‌ڵكی‌ ئێران پێكهێناوه‌، له‌گه‌ڵ ئه‌وه‌شدا له‌و نیزامه‌دا جگه‌له‌ وه‌لی‌ فه‌قیه كه‌ بریارده‌ری‌ سه‌ره‌كیی‌ ئه‌م رێژیمه‌یه‌ هیچ كامه‌ له‌ ئۆرگانه‌ فه‌رمی‌ و نافه‌رمییه‌كان له‌ گۆڕانكاریی‌ و چاره‌نووسی‌ ئه‌م خه‌ڵكه‌ چه‌وساوه‌یه‌ بچووكترین ده‌سه‌ڵاتیان نیه‌.

پێكهێنانی‌ سپای‌ پاسداران، به‌سیج، ئیتلاعات سه‌ره‌تایه‌ك بوون بۆ لاواز كردنی‌ ئۆرگانه‌ فه‌رمییه‌كانی‌ نیزامی‌ و ئینتزامی‌ وه‌ك ئه‌رته‌ش و ژاندارمری‌ و شاره‌وانی‌ و پێكهێنانی‌ چه‌ند ئۆرگانی‌ سه‌ركوتكه‌ر بۆ پاراستنی‌ ده‌سه‌ڵاتی‌ نگریسی‌ ئاخوندی‌. له‌ ماوه‌ی‌ ئه‌م 33 ساڵه‌دا چین و توێژه‌كانی‌ گه‌لانی‌ ئێران له‌ شێوه‌كانی‌ جۆراوجۆری‌ خه‌بات بۆ گۆڕانكاری‌ و گه‌یشتن به‌ ئامانجه‌كانیان كه‌ڵكیان وه‌رگرتووه‌. به‌گشتی‌ ئه‌و كه‌س و لایه‌نانه‌ی‌ كه‌ توانای‌ نووسین و گه‌یاندن و روونكردنه‌وه‌یان له‌سه‌ر كرده‌وه‌ نامرۆڤانه‌كانی‌ كۆماری‌ ئیسلامی‌ هه‌بووه‌ له‌ رۆژنامه‌ و گۆڤاردا ئاماژه‌یان پێكردوه‌، ده‌ستبه‌سه‌ر یان ئیعدام كراون. هه‌رچه‌شنه‌ رێكخستنێكی‌ ئیسلامی‌ یا غه‌یره‌ ئیسلامی‌ ئه‌گه‌ر له‌ راستای‌ سیاسه‌ت و بۆچوونی‌ ئه‌م رێژیمه‌دا خۆی‌ رێك نه‌خستبێ، په‌راوێز خراوه‌، ته‌نانه‌ت ئه‌گه‌ر له‌ راستای‌ ئیدیۆلۆژیی‌ ئیسلامیدا خۆشی‌ رێك خستبێ و بۆ تاقه‌ جارێك ره‌خنه‌ی‌ له‌ كرده‌وه‌یه‌كی‌ ئه‌م رێژیمه‌ گرتبێت جێگای‌ له‌و سیسته‌مه‌دا نه‌ماوه‌.

هیچ حیزبێكی‌ سیاسی‌ و كۆمه‌ڵگای‌ مه‌ده‌نی‌ تا ئێستا له‌ناو رێژیمی‌ كۆمای‌ ئیسلامیدا نه‌یتوانیه‌وه‌ چووكه‌ترین كاردانه‌وه‌ی‌ سیاسی‌ له‌خۆی‌ نیشان بدات و ئازادانه‌ له‌ ئێراندا تێ بكۆشێت، چونكه‌ هه‌ر له‌بنه‌ڕه‌تدا كۆماری‌ ئیسلامی‌ هه‌رچه‌شنه‌ ئازادی‌ راده‌ربڕینێكی‌ له‌ كۆمه‌ڵگا زه‌وت كردووه‌.

كۆماری‌ ئیسلامیی‌ ئێران ته‌نانه‌ت به‌زه‌یی‌ به‌و كه‌سانه‌شدا نه‌هاته‌وه‌ كه‌ ماوه‌ی‌ 30 ساڵ بوو بۆ پاراستن و مانه‌وه‌ی‌ ئه‌م رێژیمه‌ خه‌باتیان كردووه‌ و له‌ژێر فه‌رمانی‌ ئه‌م رێژیمه‌دا به‌ هه‌موو شێوه‌یه‌ك خه‌ڵكی‌ ئازادی‌ خوازیان سه‌ركوت ده‌كرد و له‌گه‌ڵ ده‌ربڕینی‌ كه‌مترین ناڕه‌زایه‌تی‌ ئه‌ویش به‌ شێوه‌ی‌ هێمنانه‌ بۆ ئیعتراز به‌ هه‌ڵبژاردنی‌ سه‌ركۆماری‌ و به‌رژه‌وه‌ندیی‌ خۆیان ئێستا له‌و چاڵه‌ڕه‌شانه‌ دان، كه‌ پێشتر بۆ ئازادیخوازان ئاماده‌یان كردبوو. كۆماری‌ ئیسلامی‌ له‌ ماوه‌ی‌ ده‌سه‌ڵاتی‌ پڕ له‌ تاوان و جینایه‌تی‌ خۆیدا به‌ سه‌دان هه‌زار كه‌سی‌ بێ‌دیفاعی‌ وڵاته‌كه‌مانی‌ ئیعدام و ماڵوێران كردوه‌ و كه‌ش و هه‌وایه‌كی‌ پۆلیسی‌ و ئه‌منیه‌تیی‌ به‌سه‌ر وڵاته‌كه‌ماندا زاڵ‌ كردووه‌.

به‌ ئاوڕدانه‌وه‌ له‌و راستییانه‌ی‌ كه‌ هه‌تا ئێستا له‌ شێوه‌كانی‌ خه‌بات بۆ به‌ره‌نگاربونه‌وه‌ی‌ كۆماری‌ ئیسلامی‌ ئه‌زموون كراون، كاتی‌ ئه‌وه‌ هاتووه‌ كه‌ خۆمان روبه‌ڕووی‌ ئه‌و پرسیاره‌ بكه‌ینه‌وه‌ كه‌ ئایا پێویست ناكات بۆ سه‌رخستن و پشتگیری‌ كردن له‌ خه‌باتی‌ مه‌ده‌نی‌ بیر له‌ میكانیزمێكی‌ گونجاو و وه‌ڵامده‌ر بكه‌ینه‌وه‌؟! لێره‌وه‌یه‌ كه‌ به‌ ئاوردانه‌وه‌ به‌ هه‌لومه‌رجی‌ ناوخۆیی‌ و ده‌ره‌كیی‌ وڵاته‌كه‌مان ده‌توانین ئه‌م مژاره‌ بخه‌ینه‌ به‌رباس.

هه‌لومه‌رجی‌ ناوخۆیی‌ و پێویستیی‌ پاڵپشتی‌ خه‌باتی‌ چه‌كداری‌:

هیچ رێگایه‌ك له‌لایه‌ن خه‌ڵكه‌وه‌ بۆ ئاڵوگۆڕی‌ ئه‌م سیسته‌مه‌ دیكتاتۆره‌ نه‌ماوه‌ كه‌ ئه‌زموون نه‌كرابێت، هیچ كامه‌ له‌ شێوه‌كانی‌ خه‌باتی‌ مه‌ده‌نی‌ له‌ سیستمی‌ داخراوی‌ كۆماری‌ ئیسلامیدا رێگایان پێ نادرێ و ئه‌گه‌ریش باس له‌ هه‌ڵبژاردن ده‌كرێ ئه‌وا به‌رهه‌می‌ هه‌ڵبژاردن له‌ ساڵی‌ 88 به‌ هه‌ڵبژێرانه‌وه‌ی‌ ئه‌حمه‌دی‌ نژاد به‌ ئاشكرا وه‌ڵامی‌ كۆمه‌ڵانی‌ خه‌ڵكی‌ ئێرانی‌ دایه‌وه‌.

خه‌باتی‌ مه‌ده‌نی‌ بۆ به‌ده‌ست خستنی‌ داواكارییه‌كانی‌ خه‌ڵك مافی‌ هه‌موو كۆمه‌ڵگایه‌كی‌ ئازاد و پێشكه‌وتنخوازه‌، به‌ڵام له‌ ئێراندا به‌ سه‌ركوت و گولله‌ وه‌ڵامی‌ ئه‌م شێوه‌ خه‌باته‌ ده‌درێته‌وه‌.

بۆ ئه‌وه‌ی‌ بتوانین له‌ تێكه‌ڵاوێك له‌ خه‌باتی‌ مه‌ده‌نی‌ و باقی‌ خه‌باته‌كانی‌ دیكه‌ كه‌ڵك وه‌رگرین، پێویسته‌ گه‌لانی‌ ئێران له‌ خه‌باتی‌ چه‌كداری‌ وه‌ك پاڵپشت و میكانیزمێكی‌ دیكه‌ی‌ خه‌بات هاوته‌ریب له‌گه‌ڵ‌ خه‌باتی‌ مه‌ده‌نی‌ كه‌ڵك وه‌ربگرن، رێژیمی‌ كۆماری‌ ئیسلامی‌ ئه‌وه‌ی‌ سه‌لماندووه‌ كه‌ هیچ كامه‌ له‌ شێوه‌كانی‌ خه‌باتی‌ مه‌ده‌نی‌ قبووڵ‌ ناكات و ته‌نانه‌ت ئه‌گه‌ر له‌لایه‌ن خه‌ڵكی‌ مافخواز و ئازادیخوازه‌وه‌ خۆپێشاندانی‌ هێمنانه‌ و بێده‌نگ وه‌ڕێ ده‌خرێ، ده‌كه‌ونه‌ به‌ر په‌لاماری‌ چۆماقدارانی‌ هێزه‌ نیزامی‌ و ئینتزامییه‌كانی‌ كۆماری‌ ئیسلامی‌.

هه‌ر وڵاتێك ئه‌رته‌شی‌ به‌ مه‌به‌ستی‌ پارێزگاری‌ له‌ سنووره‌كانی‌ وڵاته‌كه‌ی‌ رێك خستووه‌ و له‌و په‌یوه‌ندییه‌دا په‌روه‌رده‌ی‌ كردووه‌، به‌ڵام كۆماری‌ ئیسلامیی‌ ئێران ده‌یان ئۆرگانی‌ سه‌ركوتكه‌ری‌ وه‌ك "سپای‌ پاسداران، به‌سیج، حیزبوڵڵا، هێزه‌كانی‌ ئینتزامی‌، لیباس شه‌خسی، كۆماندۆ، ئیتلاعات و ته‌نانه‌ت ئه‌رته‌شیش به‌ هه‌موو لق و پۆپه‌كانیه‌وه‌ و ....هتد ته‌نیاو ته‌نیا بۆ پارێزگاری‌ له‌ قه‌وام و ده‌وامی‌ سیسته‌مه‌ توتالیتێر و دژی‌ گه‌لیی‌ خۆی و سه‌ركوتی‌ خه‌ڵكه‌كه‌ی‌ رێك خستووه‌، رێگا ناده‌ن هیچ چه‌شنه‌ ره‌خنه‌ و ناڕه‌زایه‌تییه‌ك له‌ به‌رانبه‌ر كرده‌وه‌ نامرۆڤانه‌كانی‌ رێژیمی‌ ویلایه‌تی‌ فه‌قیه ده‌ر ببڕن.

ئه‌زموونی‌ ئه‌م چه‌ند مانگه‌ی‌ وڵاتانی‌ عه‌ره‌بی‌ ئه‌وه‌ی‌ سه‌لماند كه‌ ئه‌م رێژیمه‌ سه‌ركوتكه‌رانه‌ به‌ هیچ شێوه‌یه‌ك ئاماده‌ نین واز له‌ ده‌سه‌ڵات بهێنن، به‌تایبه‌ت رێژیمی‌ ئاخوندی‌ به‌ هه‌ڵسوكه‌وت و كرده‌وه‌كانی‌ خۆی‌ به‌رانبه‌ر به‌ گه‌لانی‌ ئێران له‌خۆی‌ تێگه‌یشتووه‌ ئه‌گه‌ر ئه‌م ده‌سه‌ڵاته‌ له‌ده‌ست بدات، بۆ هه‌تا هه‌تایه‌ ده‌چێته‌ زبڵدانی‌ مێژووه‌وه‌.

ئێستا كه‌ هه‌م له‌ ئاستی‌ نێوخۆی‌ وڵات و هه‌م له‌ بیروڕای‌ گشتیی‌ جیهانیدا گڵۆڵه‌ی‌ كه‌وتۆته‌ لێژی‌، هیچكام له‌ پێوه‌ره‌كانی‌ سه‌قامگیری‌ له‌و حكوومه‌ته‌دا به‌رچاو ناكه‌وین، واته‌ له‌ بواری‌" ئابووری‌، نێونه‌ته‌وه‌یی‌ و ناوخۆیی‌" رۆژ به‌ رۆژ به‌ره‌و لاوازی‌ ده‌ڕوات. له‌لایه‌كی‌ دیكه‌وه‌ مێژوو نیشانی‌ داوه‌ ئه‌و حكوومه‌ته‌ دیكتاتۆرانه‌ هه‌رچی‌ درێژایی‌ ته‌مه‌نی‌ نگریسیان به‌ره‌و كۆتایی‌ ده‌ڕوات، زیاتر زه‌بر و زه‌نگ ده‌خه‌نه‌ سه‌ر خه‌ڵكی‌ وڵاتی‌ خۆیان و په‌ره‌ به‌ ره‌وتی‌ سه‌ركوت و كوشتن و گرتن و تۆقاندنی‌ گه‌له‌كه‌یان ده‌ده‌ن.

ئه‌گه‌ر باس له‌ پاڵپشتی‌ خه‌باتی‌ چه‌كداری‌ ده‌كه‌ین له‌به‌ر ئه‌وه‌یه‌ كه‌ ئه‌گه‌ر گه‌لانی‌ ئێران پێش به‌ سه‌ره‌ڕۆیی‌ ده‌سه‌ڵاتی‌ كۆماری‌ ئیسلامی‌ ئێران نه‌گرن، ده‌بێته‌ هۆی‌ ئه‌وه‌ی‌ كه‌ هێزه‌ ده‌ره‌كییه‌كان بیر له‌ چاره‌نووسی ئێران بكه‌نه‌وه‌. هه‌ر بۆیه‌ پێویسته‌ گه‌لانی‌ ئێران خۆیان سه‌نگه‌ره‌كانی‌ به‌ربه‌ره‌كانێ‌ له‌ ناوخۆدا به‌هێز بكه‌ن بۆ ئه‌وه‌ی‌ كه‌ كۆماری‌ ئیسلامی‌ هه‌ر به‌ده‌ستی‌ خه‌ڵكی‌ ئێران بڕووخێت، له‌م سۆنگه‌وه‌ بۆمان ده‌رده‌كه‌وێ كه‌ خه‌باتی‌ چه‌كداری‌ له‌م بواره‌شدا ده‌توانێ یارمه‌تیده‌ر بێت.

ئه‌وه‌ی‌ كه‌ ئێستا كۆماری‌ ئیسلامی‌ ئێران له‌و شێوه‌ سه‌ركوته‌ كه‌ڵكی‌ وه‌رگرتووه‌، زیندانه‌كانی‌ سه‌رتاسه‌ری‌ ئێران و قه‌برستانه‌كان شاهیدی‌ ئه‌و سه‌ركوته‌ن، له‌ راستیدا ئه‌و شێوه‌ سه‌ركوته‌ به‌ربڵاوه‌ی‌ رێژیم خه‌ڵكیان چاوترسێن كردووه‌ و ئه‌م شگرده‌ی‌ رێژیم تا راده‌یه‌ك پاشه‌كشه‌ی‌ به‌ به‌شێك له‌ گه‌لانی‌ ئێران كردووه‌، جگه‌له‌ كوردستان و تا راده‌یه‌ك به‌لووچستان له‌ خه‌باتی‌ چه‌كداری‌ و رێبه‌ریی‌ حیزبی‌ كه‌ بتوانێ له‌ هه‌لومه‌رج و بۆنه‌ تایبه‌تییه‌كان خه‌ڵك كۆده‌نگ بكات، له‌ باقی‌ شار و پارێزگاكانی‌ دیكه‌ی‌ ئێران كه‌ڵك وه‌رنه‌گیراوه‌، ئیعدام و زیندانه‌كانیش به‌رده‌وام كۆسپی‌ سه‌ر رێگای‌ ئازادیخوازان و شۆرشگێڕان و رووناكبیران بووه‌.

ئه‌گه‌ر ئاوڕێكی‌ كورت له‌ چۆنیه‌تیی‌ هه‌ڵسوكه‌وتی‌ رێژیم له‌ پێوه‌ندی‌ له‌گه‌ڵ سڕینه‌وه‌ی‌ فیزیكی‌ خه‌ڵك بده‌ینه‌وه‌ بۆمان ده‌رده‌كه‌وێ كه‌ پێویسته‌ گه‌لانی‌ ئازادیخوازی‌ وڵاته‌كه‌مان له‌ شێوه‌ی‌ خه‌بات و تێكۆشانی‌ مافخوازانه‌ی‌ خۆیاندا، ئاڵوگه‌ڕی‌ پێویست پێك بهێنن.

خه‌ڵكی‌ ئێران له‌ قۆناغه‌ جۆراوجۆره‌كانی‌ خه‌باتی‌ ئه‌م 33 ساڵه‌دا شه‌هید و قوربانییه‌كی‌ به‌رچاوی‌ داوه‌، هه‌ر جارێك ناڕه‌زایه‌تی‌ له‌ گۆشه‌یه‌كی‌ ئێران سه‌ریهه‌ڵداوه‌ له‌گه‌ڵ سه‌ركوت و ئیعدام به‌ره‌وڕوو بووه‌ و له‌ كۆتاییدا له‌ژێر كاریگه‌ریی‌ كه‌ش و هه‌وا ئه‌منیه‌تی‌ و نیزامییه‌كانی‌ رێژیمدا وازیان له‌ درێژه‌ی‌ خه‌بات هێناوه‌، له‌ بێ‌ هه‌ڵوێستیی‌ شاره‌كانی‌ دیكه‌ی‌ ئێراندا چاوه‌ڕێی‌ ده‌رفه‌تگه‌لێكی‌ دیكه‌دا بوون.

ئه‌م شێوه‌ بێ لایه‌نییه‌ ده‌گه‌ڕێته‌وه‌ بۆ ئه‌وه‌ی‌ كه‌ رێژیم به‌ ئاور و ئاسن دژی‌ خه‌باتی‌ مه‌ده‌نی‌ كه‌ڵكی‌ وه‌رگرتووه‌ و له‌ هیچ هه‌ڵسوكه‌وتێكی‌ بێبه‌زه‌ییانه‌ خۆی‌ نه‌پاراستووه‌. خۆپێشانده‌ران یا نوسه‌ران، روناكبیران، مامۆستایان، یاسادانه‌ران و پارێزه‌رانی‌ مافی‌ مرۆڤ به‌ چه‌شنێكی‌ هۆڤانه‌ سه‌ركوت كراون، ئه‌وه‌ بووه‌ هۆی‌ ئه‌وه‌ی‌ كه‌ دیكتاتۆرانی‌ كۆماری‌ ئیسلامی‌ رێگا نه‌ده‌ن ئازادیخوازان داوای‌ مافه‌ ره‌واكانی‌ خۆیان بكه‌ن، له‌م بواره‌دا پێویسته‌ خه‌ڵكی‌ ئێران بۆ پارێزگاری‌ له‌ خۆیان به‌رانبه‌ر هێزه‌ چه‌كدار و چۆماغ به‌ده‌سته‌كانی‌ كۆماری‌ ئیسلامی‌ خۆیان چه‌كدار بكه‌ن، له‌ هه‌ر جێگایه‌ك هێرشی‌ چه‌كداری‌ ده‌كرێته‌ سه‌ر خۆپێشانده‌ران، وه‌ڵامیان به‌ چه‌ك بده‌نه‌وه‌. كۆماری‌ ئیسلامی‌ ئێران به‌ ئاسانی‌ واز له‌ ده‌سه‌ڵات ناهێنێ. ئه‌م رێژیمه‌ ده‌بێ به‌ زمانی‌ خۆی له‌گه‌ڵی‌ بدوێین و به‌ربه‌ره‌كانێ‌ له‌گه‌ڵ بكه‌ین.

ئێستا كه‌ مه‌ترسیی‌ نیزامی‌ بۆ سه‌ر كۆماری‌ ئیسلامی‌ له‌ رۆژه‌ڤی‌ سیاسیی‌ جیهان دایه‌، پێویسته‌ خه‌باتگێرانی‌ ئێران بۆ به‌چۆكدا هێنانی‌ ئه‌م رێژیمه‌ خۆیان رێك بخه‌ن، ئه‌گه‌ر له‌ كوردستان خه‌باتی‌ چه‌كداری‌ دژی‌ رێژیم رێك خرابوو، دژكرده‌وه‌ی‌ گه‌لی‌ كورد به‌رانبه‌ر هێرشی‌ رێژیمی‌ دیكتاتۆری‌ كۆماری‌ ئیسلامی‌ بوو كه‌ شه‌ڕی‌ به‌سه‌ر گه‌لی‌ كورددا سه‌پاند، به‌ڵام به‌هۆی‌ وشیاریی‌ رێبه‌رانی‌ جووڵانه‌وه‌ی‌ گه‌لی‌ كورد له‌ كوردستانی‌ ئێراندا، رێژیم له‌م په‌یوه‌ندیه‌دا زه‌مینگیر بوو، ئه‌گه‌ر باقی‌ گه‌لانی‌ ئێران پاڵپشتی‌ ئه‌م شێوه‌ خه‌باته‌یان كردبایه‌، ئێستا له‌مێژ بوو كه‌ ته‌مه‌نی‌ نگریسی‌ ئه‌م رێژیمه‌یان تێكه‌وه‌ پێچابوو.

هه‌نووكه‌ چ بكه‌ین كه‌ بتوانین هاوكات له‌ هه‌موو شێوه‌كانی‌ خه‌بات بۆ گۆڕانكاری‌ له‌م سیسته‌مه‌دا كه‌ڵك وه‌رگرین بۆ ئه‌وه‌ی‌ كه‌ بتوانین له‌ ئامانجه‌كانمان نزیك ببینه‌وه‌؟ كۆماری‌ ئیسلامیی‌ ئێران هه‌ر له‌ سه‌ره‌تای‌ هاتنه‌ سه‌ركارییه‌وه‌، ئه‌وه‌ی‌ سه‌لماند كه‌ دوژمنی‌ ئه‌و هێزانه‌یه‌ كه‌ پارێزگاری‌ له‌ مافی‌ ره‌وای‌ خه‌ڵك ده‌كه‌ن.

خه‌باتی‌ چه‌كداری‌ له‌ راستیدا بۆ ره‌هه‌ندی‌ به‌رگری‌ له‌ به‌رانبه‌ر هێرشی‌ داسه‌پاودا به‌كار هاتووه‌، به‌ڵام ئه‌وه‌ی‌ جێگای‌ سه‌رنج و تێڕامانه‌ كه‌ڵك وه‌رگرتن له‌و شێوه‌ خه‌باته‌ له‌ بارودۆخی ئێستای‌ ناوچه‌كه‌دا كه‌ به‌ له‌به‌رچاو گرتنی‌ ئه‌و هاوكێشه‌ سیاسییانه‌ی‌ پاش به‌هاری‌ عه‌ره‌بی‌ و كاریگه‌ریی‌ گه‌مارۆكان كه‌ له‌ ئێران هاتوونه‌ته‌ ئاراوه‌، له‌ كورت ماوه‌دا ده‌بێته‌ كارتێكی‌ فشار بۆ به‌ربه‌ره‌كانێ له‌گه‌ڵ بیری‌ چه‌قبه‌ستوی‌ سه‌ده‌ ناوه‌ڕاستی‌ كۆماری‌ ئیسلامی‌، له‌ درێژ ماوه‌دا له‌چاو خوێندنه‌وه‌ی‌ واقیعبینانه‌ بۆ رووداوه‌كان ده‌بێته‌ هۆی‌ ئه‌وه‌ی‌ كه‌ ئۆپۆزیسیۆنی‌ ناوخۆی‌ ئێران، هێز و پێگه‌ و قورسایی‌ تایبه‌ت به‌ خۆی‌ ببێت.

له‌ كۆتاییدا ئه‌گه‌ر خۆ رێك خستنێكی‌ به‌هێزی‌ چه‌كداریمان بۆ پاڵپشتی‌ له‌ خه‌باتی‌ مه‌ده‌نی‌ رێك نه‌خه‌ین ناكرێ چاوه‌ڕوانی‌ ئه‌وه‌ بین له‌ ئێراندا گۆڕانكاری‌ روو بدات.

سه‌رچاوه‌: كوردستان میدیا



ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1454
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy