بەرێزو خۆشەویست جەنابی مامۆستا حەسەنزادە، هیوامان وایە کە ساغ‌‌و سڵامەت بیت. وەکوو هەمیشە هیوامان بە توانای بەرێزتان هەیەو دەزانیین کە هەموو شتێک بۆ یەکیەتیی‌و وەسەریەک کەوتنەوەی تواناکانی حیزبی دێموکڕات پێوەندی بە ئێوەوە هەیەو هەر بە ئیرادەی ئێوە جێبەجێ دەبێ.
مەبەست لە نووسینی ئەم نامەیە ئەوەیە کە چەند راستی حاشا هەڵنەگرتان لەگەڵ باس بکەین. بە هیواین کە باس کردنی ئەم ڕاستییانە هاندەرێک بێ بۆ ئەوەی کە لەوە زیاتر نەکەوینە بەر نفرەتی خەڵک‌و هەر هیچ نەبێ کەمێک بە خۆماندا بچینەوە با لەوە پتر بە ناوی ئێمەوە زیان بە یەکیەتیی ریزەکانی بزوتنەوەی کورد لە رۆژهەڵاتی کوردستان نەگەیەنن.
ڕەنگە لە سەرەتا‌دا ئەو پرسیارە بێتە گۆڕێ کە بۆ ئەم مەسەلەمان لە نێو خۆدا باس نەکردوە، یان راستەوخۆ پێوەندیمان بە ئێوەوە نەگرتوە تاکو لەم بەستێنەدا بۆتان بدوێین. دەمێکەیە کە کەسانی بە هەڵوێست‌و رووناکبیری وەکوو ڕەوتی کاک ڕامبود لوتفپووری ئەمانەیان بە بیر هێناوەتەوەو باسیان کردوە، کەچی ئێمە بەردەوام هەوڵمان داوە لە پەراوێزیان بخەین‌و پاڵیان پێوە بنێین.
هیواخوازیین بڵاوبوونەوەی ئەم نامەیە کە تەنیا لەبەر دڵسۆزی‌و خەم خۆرییە؛ بۆ نەجات بوون لەو هەموو قەیران‌و نەهامەتییەی کە بەرۆکی گرتویین یارمەتیدەر بێت. بەردەوام لە خۆمان دەپرسین کە خودای نەخواستە ئەگەر جەنابی مامۆستا شتێکت لێبەسەر بێ چارەنووسی ئێمە بەرەو کوێ دەڕوات‌و چمان بەسەر دێت؟
بە دوای پاوانخوازی زۆرینەی کۆمیتەی ناوەندی کۆنگرەی ١٣دا، حیزبە خۆشەویستەکەمان تووشی لەت بوون هات‌و بەم جۆرە دڵی دوژمنانی کوردو کوردستان خۆش بوو هەوڵی ئەو هەموو دڵسۆزە بۆ بەرگرتن بەو کارەساتە بێ کەڵک مایەوە، زۆر ناچینەوە سەر ئەو مەسەلەیە‌و پێمان وایە کە باش یان خراپ کۆتایی هاتوە. چوونکە هەمیشە قسەی ئەو هاوڕێیانە لە بەرانبەر ئەوانەدا کە لەو حیزبە هاتوونەتەدەر یەک بوەو بە داخەوە ڕوانیین‌و هەڵوێستی مونشەعەبینیش تا رادەیەک چوون یەک بوە کە ئەو بوارە مەش دەگرێتەوە. لە کەس شاراوە نیە کە خەڵک لێمان توڕەیەو ناتوانیین رێگا بدەین کە ئەم وەزعە هەروا درێژەی هەبێت.
جوان لە بیرمانە کە لە سەرەتای ئەو لەت بوونەدا، بە هەوڵ‌و هیمەتی ئێوە بارە ڕەوانییەکانی ڕەوینەوەو توانیمان قەیرانە یەک لە دوای یەکەکان لە هەڵنەبژێرانی دوورو دڕێژی سکرتێرو نەبوونی ئیمکاناتی ماڵی‌و بێسەرەوبەرەیی تەشکیلاتی‌و زۆر جار دوور کەوتنەوە لە سیاسەتە رەسمیی‌‌و باوەکانی حیزب تێپەڕ بکەین کە هەموو ئەمانەش بە سیاسەتی حەکیمانەو ژیرانەی جەنابت کراوەو بێ گومان کۆڵەکەی پتەوی ڕاگرتنی ئەو حیزبە دوای لەت بوونن. سەد بریا هەر خۆشت پلەی سکرتێریت وەرگرتباوە، چوونکە بە کردەوە لە ماوەی ئەو چەند ساڵەدا هەموو بڕیارێکی بنەرەتی‌و سەرەکی بە دەست خۆت بوەو هەر دەبێ واش بێ!
مامۆستا گیان!
ئیزن دەخوازیین کە دەردە دڵێکتان لەگەڵ بکەین‌و هیواداریین کە گوێمان بدەنێ‌‌و نەهێڵن وەزعەکە لەوەی هەیە خراپتر بێ.
ئەگەر لە بیرتان بێ زۆرایەتی کۆنگرەی ١٣ی حیزب لە سەر بڕیاری هەڵەی ئێمە پێی گرت‌‌و ئەوەش لەوەوە دەستی پێکرد کە ئێوە لە دەفتەری سیاسیی حیزب بریارتان دابوو وێنەی رێبەران دوکتۆر قاسملوو دوکتۆر شەرەفکەندی لە شوێنە گشتییەکان‌و بنکەکان هەڵگیرێ‌و تەنیا وێنەی پێشەوای نەمر دابندرێ، بەداخەوە هەر وەکوو پێشتریش باسمان کردوە پەسەند کردنی ئەو بڕیارە لە دەفتەری سیاسیی کە ئێمە تێیدا زۆرینە بووین، دواتر هێنانی بۆ کۆبوونەوەی پلینۆمی کۆمیتەی ناوەندی لە رێکەوتی ٢٥/٤/١٣٨٢دا هەڵەیەکی زۆر زەق بوو هەر ئەو کات کە ئێمە لەگەڵ جەنابت بووین‌و تاکو مردنیش هەر دەبین بەو بڕیارە رازی نەبووین، بەڵام لەسەرمان کەوت‌و باجەکەشمان داوە.
لە پلینۆم‌دا کە باسی هەڵگرتنی وێنەی ئەو شەهیدانە هاتە گۆڕێ، کاک حەمە ساڵەی قادری باسەکەی کردەوەو وتی بەوە رازی نابین کە کاری وا بکرێ، پاشان بەرێز تەیموور مستەفایی وتی چۆن شتی وادەکەن لە حاڵێکدا خەڵک رۆژانە دەڵێن "قاسملوو قاسملوو رێگات درێژەی هەیە"، دواتر هێژا حەمە نەزیف قادری ئاماژەی بەوە کرد کە مامۆستا مەگەر پێکەوە نەچووینە باڵوێزخانەی زۆر وڵاتان لە بەغداو وێنەی هەموو سەرۆککۆمارەکانیان دانابو؟. ئەوجار بەرێزان حوسێن قادرزادەو حەمە تۆپچی وتیان ئەم بڕیارە تەنها ئاژاوەی لێدەکەوێتەوەو بەدەنە شتی ئاوا قبووڵ ناکات، تەنانەت کاک عومەر شاداب وتی کە قاسملوو لە پێشەوا بە گەورەتر دەزانێ...
کاک مەلا حەسەن رەستگار پاساوی ئەوە بوو کە هەر نەتەوەیەک یەک سیمبولی هەیەو سیمبولی کوردیش پێشەوایەو تەنیا هەڵواسینی وێنەی ئەو بەسە. بەداخەوە جەنابتان وەکوو سکرتێری ئەو کاتی حیزب‌و یاری غاری دوکتۆر قاسملوو لە وڵامی ئێمەدا فەرمووت خۆ "جامخانەم" دانەناوە.
قۆڵی کاک مستەفا زۆرترین کەڵکیان لەو بڕیارە هەڵەو نابەجێیەی ئێمە وەرگرت‌و پشتیوانی کاک مەلا حەسەن‌و برادەرانی کۆنگرەی هەشت بۆ جێبەجێ بوونی ئەو بڕیارەو هەوڵدانی ئاشکرایان بۆ پەسەند کردنی لە پلینۆم‌دا، گەورەترین زیانی بە باڵی ئێمە گەیاند.
هەروەها پشتیوانی ئێوەش لە کاک بابا عەلی‌و ئامادە کردنی بۆ پۆستی سکرتێری یەکێکی دیکە لەو هەڵانەیە کە نەدەبا کردبامان‌و ناوبراو نیشانی‌دا کە پیاوی ئەو پۆستە نیەو لە رۆژی تەنگانەدا خاوەن ئیرادەو بڕیار نیەو ئەوەتا بۆ خۆی نیمچە حیزبێکی پێکهێناوەو لە رێگای تەلەویزیۆنی کۆمەڵەوە دەیهەوێ حیزب یەک بخاتەوە!
خاڵێکی دیکە کە پێویستە ئیشارەی پێبکەین چاپ بوونی کتێبی پەنجا ساڵ خەباتی کاک جەلیل گادانی بوو کە بە پێی بڕیارەکانی پێشوو لە نێوان هەر دوو لایەن‌دا، نەدەبا چاپ کرایە. وەشانی ئەو کتێبە کە ئێستا بیری لێدەکەینەوەو ئەو کات بە هۆی جەناحبازی زۆر دیقەتمان لەسەر نەکرد کارەسات بوەو بۆ هەمیشە ماڵە بە سەرمانەوە. چونکە کاک جەلیل هەموو ئەو جنێوو تۆمەتانەی کە کاتی خۆی وەکوو "ڕێبەرایەتی شۆڕشگێر" وەپاڵ حیزب‌و کاک دوکتۆر قاسملوویان دابوو لە نێو حیزبی قاسملوودا بە ناوی مێژووی حیزب چاپ‌و بڵاوی کردەوە!، هەر ئەو قسەو هەڵوێستانەی کە ئێستا وەکوو بەڵگەی بە ناو تاوانباری‌و جەنایەتی ئەو رێبەرانەو حیزبی ئێمە لە سایتەکانی رێژیم‌دا بڵاو دەکرێتەوەو جەماعەتی کۆنگرەی هەشت کەم‌و زۆر لە نێو خۆماندا لە هەر کوێ دەرفەتیان بۆ پێکبێت ئەم شتانە دووپات دەکەنەوە!
بەراستی پشتیوانی ئێمە‌و بەربەرەکانێ لەگەڵ جەناحی کاک موستەفا سەبارەت بە سەزادانی کاک جەلیل لەم بارەوە گەورەترین هەڵەی مێژوویی بوەو ئێستا کە بیری لێدەکەینەوە هەر بۆ ئەوە باشە لەم بارەوە بە تێکڕا قوڕ بپێوین.
دوای لەت بوونی حیزبیش سەرەڕای هەموو حەولەکانی ئێوە بۆ دەرنەکەوتنی برادەرانی کۆنگرەی هەشت بە هۆی بەد ناویانەوە لە نێو خەڵکی‌دا، کەچی وتووێژی رۆژ تی ڤی لەگەڵ کاک مەلا حەسەن‌و حاجی ئەحمەدی بەو شێوە نەشیاوە، نەک هەر بە قازانجمان نەبوو بەڵکو زۆریش بە زەرەرمان تەواو بوو.
ئەوەتا دوکتۆر خەلێقی لە لاپەڕەی ٣١ی بەرگی چوارەمی بیرەوەرییەکانی‌دا نامەیەکی ئێوەی بۆ کاک حەمەی حەسەنپوور چاپ کردوە کە بە داخەوە بۆتە خوێنی سیاوش‌و هەر نابڕێتەوە. نازانیین‌و بۆمان حەل نابێ کە ئەمە چۆن بەسەر زارو قەڵەمی ئێوەدا هاتوە شتی ئاوا بنووسن‌و جنێو بە دوکتۆر قاسملوو تەنانەت بابی ئەو رێبەرەش بدەن. ئیدی بەراستی چۆن دەکرێ چاوەڕوان بین کە خەڵکی وەکوو "لادەر" ناومان نەبەن؟.
کاک سمایل دەڵێ مامۆستا جاران هەر دەیووت هەموومان پێکەوە جێگای قاسملوو پڕ دەکەینەوە کەچی ئێستا هەر دەفەرمێ قاسملوو بوون نە کوفرە نە مەحاڵ، جا کەوایە بۆ ڕاست ناڵێ "ئاسۆ"ی کوڕم جێگای قاسملوو دەگرێتەوە؟
مامۆستای خۆشەویست!
ئێوە لە بیرتانە کە کاک فەتاح کاویان لە کۆنگرەی ١٣دا بۆ ماوەی نزیک بە یەک کاتژمێر زەمی جەنابت‌و تاریفی لە کاک موستەفا کرد. دوایین دەستە گوڵ کە بە ئاودا دراوە بەرپرسی کۆمیتەو نوێنەری ئامریکا بۆ کۆنگرەی ١٥ی حیزبە کە بەراستی جارێکی دیکە ئەو راستییەی دەرخستەوە کە بە داخەوە برادەرانی "رێبەرایەتی شۆرشگێر" سەرەڕای هەموو چاکەو نیازپاکی ئێمە هەڵوێست‌و بۆچونیان بە نیسبەت حیزب‌و شەخسی دوکتۆری شەهید نەگۆڕاوەو هەر قەوانە کۆنەکە لێدەدەنەوە. ئەگینا ئەو هەموو تەوهین‌و سوکایەتییەو بردنە ژێر پرسیاری بەشێکی زۆر لە مێژووی حیزب کە بۆ خۆشیان تێیدا بەشدار بوون چ مانایەک دەدات، جیا لە دژایەتی رێبازی دوکتۆر قاسملوو؟، ئەم ئاگرە دەمانسووتێنێ ئەگەر زوو فریای خۆمان نەکەوین‌و چارەیەک بۆ ئەم ئاشوفتە بازارە نەکەین...
هەر ئەو کابرایە کە جێژنی دووی ڕێبەندانی ئەمساڵی گرتوە لە ئامریکاو وێنەی ئەو شەهیدانەی دانەنا ئەگەر لە کاتی خۆیدا بەرخوردی جیددی پێبکرایە ڕەنگە قەت ئەو قسانەی نەکردایە کە تاکو ئەو ڕادەیە بە زیانمان تەواو بێ‌و دارو بەرد بە "لادەر" ناومان ببەن‌و دژی ئێمە تاکوو ئەو ئاستە بەکار بهێندرێت کە گۆیا لە رێبازی قاسملوو لامانداوە. خۆمان دەزانیین کە ساڵانە خەڵک بۆ یادی ئەو گەورە رێبەرە چیدەکەن!
پێویست ناکات زۆر خەڵکی تاوانبار بکەین بەداخەوە ئەم بیروڕایە بە ئاشکرا دەبیندرێ‌و لە هەموو جێگایەکی تەشکیلات‌دا هەستی پێدەکرێ. هەر ئێمە بووین کە کاتی خۆی لەسەر بڕیاری حیزب‌و شەهید قاسملوو شەرەفکەندی پێشمان بەوان دەگرت، کەچی ئەوان پاش هەتنەوەشیان بۆ نێو حیزب سەیرە کە بە جاشمان ناو دەبەن‌و ئێمەش مێشێک میوانمان نیە. بەراستی هاوسەنگەر بوون لەگەڵ کەس یان کەسانی ئاوا شانازییەکەی چییە؟
تەنانەت دۆستێکی خۆشەویست بۆی باس کردووین کە کاتی خۆی هەر ئەوانە بۆ سوکایەتی کردن بە جەنابت کە بەشداری فستیواڵی بەدرخان بوویت لە واشنگتۆن، کەسانێکیان داناوە کە لەگەڵ ئێوە بێن‌و بچن کە پێشتر لە سپای پاسداران‌دا بوون‌و تەنانەت خەڵکی مەهاباد زۆر باشیان دەناسن کە مەبەستمان بنەماڵەی "بوراقی"یە، بەرپرسی پێشووی کۆمیتە لە ئامریکا وەکوو نارەزایەتی لەم بارەوە، دەستی لە کار کێشاوەتەوە. تەنانەت سەبارەت بە دانەنانی وێنەی شەهیدان فایلی دەنگی هەیە کە ئەندامی حیزبی ئێمە وتوویەتی بۆیە ئەو جێژنەمان گرتوەو بەشداریمان تێدا کردوە لەبەر ئەوەی وێنەی قاسملوو شەرەفکەندی تێدا نەبوە!. لە لایەکی دیکەشەوە ئەوەتا برادەرانی کۆنگرەی هەشت کەم‌و زۆر بۆ ئەو لێدوانە نابەرپرسانەیە کەوتوونەتە سەما کردن‌و پشتیوانی لێدەکەن!
کاتی خۆی ئێمە باسمان لەوە دەکرد کە ئەوانە دەتوێنیینەوەو بەوە رەخنەگرانی خۆمان رازی دەکردو لە بیرمانە کە ئێوە لە کۆنگرەی ١١دا پێشتان بە کاک مەلا حەسەن گرت کە دەیویست لەسەر کاک دوکتۆر قاسملوو قسە بکات؛ کەچی ئێستا بە ئاشکرا جنێوو قسەی ناشیرن بەو رێبەرە دەوترێ لە بن گوێ خۆمان، جا بۆیە دەپرسین بەراستی ئەوە ئێمە نیین کە تواوینەتەوە؟
هەروەها کاک حوسێن مەدەنی ساڵی ٢٠٠٤ لە وڵاتی سوئێد لە نێو چەند کەس لە جەماعەتی کۆنگرەی هەشت‌و بە حزوری دوکتۆر خەلیقی کە لە لاپەڕە ٢٧٠ی بەرگی پێنجەمی بیرەوەرییەکانی‌دا نووسراوە، وتویەتی کە ئێمە مامۆستا وەپێش خۆمان دەدەین‌و دەبێ ئەو وەزعە کە بەرهەمی بێ ئیرادەیی ئەوەو بۆمان خولقاوەو لە کۆنگرەدا دۆراوین بسرێتەوە! باس لەوەش دەکرێ کە ئەو قسانە لە نوروێژ بە جەنابت وتراوەو زۆر توڕە بووی، هەڵبەت ئەم قسەی کاک حوسێن پێش ئەو جیابوونەوەیە بوو کە بەسەریان‌دا سەپاندین.
ئێمە لەسەر ئەو باوەرەیین کە درێژەی ئەم رەوتە زۆر بە زیانی ئێمەیەو ئەو قسەو باسانەی کە ئەم رۆژانە پەرەی پێدەدرێ کە گۆیا ئێمە زەمینەی شەڕی برا کوژیمان خۆش کردوە زۆر قورس‌و گران لەسەرمان دەکەوێت‌و پێویستە فکرێک بە حاڵی خۆمان بکەین بە تایبەتی کە جەنابت پشتر لە نیو سەدە تێکۆشان‌داو لە لاپەرەکانی ١٧٤و ١٧٥دا بە دروستی باست لەوە کردوە کە جیابووەکانی کۆنگرەی هەشت بە دانانی ناوی حیزب لەسەر خۆیان‌و لەوەش گرینگتر دیاری کردنی ناوی ئۆرگانەکانی حیزب لەسەر ئۆرگانەکانی خۆیان زەمینەی شەڕیان خولقاندو بەمەش زیانێکی زۆریان بە جوڵانەوەی کورد گەیاند. ئاشکرایە لە ماوەی تەمەنی رێژیم‌دا دوو جار لەسەر ناوی حیزب شەڕ شاز بوەو خەڵک زیانی زۆریان پێگەیشتوەو ناکرێ چیدی لەم بارەوە پاساوی بێ ناوەرۆک بێنیینەوە.
با لە حەق دەرنەچین ئەدی ئێمە چیمان کردوە، ئایا هەر هەمان رێگا نەچووین‌و هەر ئەو هەڵەمان دووبارە نەکردۆتەوە؟. تاکوو کەنگێ درێژە بەم وەزعە دەدەین‌و بەمەش شەرمی مێژوو نفرەتی خەڵک بۆ خۆمان تۆمار دەکەین؟.
پێمان وایە باشترە جەنابت هەنگاو بنێیت یان لێگەرێیت‌و ئیزن بدەیت کە کاک خالید کێشەکە چارەسەر بکات‌و بەشکم لە پێشنیاری کاک موستەفا بۆ گرتنی کۆنگرەی هاوبەش کەڵک وەرگریین‌و خۆمان لەو وەزعە کە هەر خۆمان دەزانیین چۆن‌و بۆ خولقا نەجات بدەین‌و لەو زلکاوە بێینە دەرێ بەر لەوەی کە بە تەواوی نوقم ببیین!
ئەوەتا رۆژێک بەشداری هەڵبژاردن لە ئێران دەکەین‌و رۆژێکی دیکە نایکەین، رۆژێ سەبارەت بە وتووێژ لەگەڵ رێژیمی پەت‌و سێدارە ئامادەین لەسەر مادەکانی ١٥و ١٩ی یاسای بنەڕەتی کۆماری ئیسلامی دانیشیین‌و ئەگەر پێویست بوو بۆ ئەو مەبەستە ناوی خۆمان بگۆڕین. دوای ئەو هەموو ماڵ وێرانی‌و نرخە کە بۆ رزگاری‌و ئازادی کورد داومانە ڕەوا نیە ئاوا بەسەر خۆمان بێنیین.
رۆژێک پێشمەرگە دەنێرینەوە نێوخۆی وڵات‌و ئەو هەموو لاوە خوێن گەرم‌و کادرە شیاوانە شەهید دەبن‌و بەردەوام باس لەوە دەکەین کە ئێمە خەباتی مەدەنی دەکەین‌و پێشمەرگەمان بۆ شەڕ نەناردۆتەوە. رۆژێک دەبینە پاشکۆی جوڵانەوەی سەوزی موسەوی‌و کەروبی. لە مێدیایی کوردی‌دا لە هەموو کەس کوردتریین‌و کە چووینە کۆڕو کۆمەڵی فارسەکان، یان لە بەرنامەکانی بی‌بی‌سی‌و دەنگی ئامریکادا بەشدار بوویین ئەوە لە هەموو کەس ئێرانی تریین. بەڕاستی ئەم وەزعە کەنگێ بۆ شانازی پێوە کردن دەبێت؟. جەنابت دەفەرمووی کە شەهید ئەحمەد تۆفیق لە حیزب دەرکراوەو راست دەفەرمووی کە وایە، کەچی بەشێک لە کۆمیتەکانی مە لە رێورەسمەکانی حیزبی‌دا لە دەرەوە وێنەی ناوبراو لە تەنیشت رێبەرانی شەهیدی حیزب دادەنێن.
بە ناوی ئازادی بەیانەوە پاشاگەردانی ساز بوەو کەس بە کەسە، کاک جەعفەر حامیدی تەلەویزیۆن دادەنێ‌و هەرچی پێی خۆشە باسی دەکات‌‌و هەرچی نهێنی ئەو حیزبەیە بە زیادەوە لە قاوی دەدات. رۆژێک کاک جەلیل لەسەر تەلەویزیۆنی کۆمەڵە باس لەوە دەکات کە با خەڵک بەشداری هەڵبژاردن نەکەن‌و بڕیاری کۆمیتەی ناوەندی حیزب لە بارەی بەشداری کردنی خەڵک لە هەڵبژاردنی رێژیم‌دا نابەجێیەو بە قازانجی رژیمە، یان بەشداری کردن لە کۆڕو کۆمەڵی پێکاکادا کە تاکوو ئێستاش بە تەواوی ڕوون نیە لەم بارەوە چ دەکەین‌و سیاسەتمان چییە...
رۆژێک تەلەویزیۆنی ئێمە لە لای تاقمی مەنسور حیکمەت بڵاودەبێتەوە کە سەری زمان‌و بنی زمانیان جنێودان بە رێبەرانی کوردو سوکایەتی بە کوردایەتییەو کاتی خۆی ئێمە ئامادەش نەبووین ناویان بێنین چونکە بۆ خۆت دەتفەرموو خۆ شێت نیین وڵامی ئەوانە بدەینەوەو بە خەڵکیان بناسێنن چونکە ڕادیۆ کوردستان گوێگری هەیە. یان ئەوەتا پەنامان بردە بەر باڵێکی چەند کەسی کۆمەڵەو ئەوەمان بە خۆمان کرد کە کردمان. خۆ ئێستاش وەزعی ئەو بوارە لە جاران باشتر نیەو تەنانەت لە تەلەویزیۆنی ئێمەدا ئاڕمی لایەنی بەرانبەر کە بە هەزاران شەهیدی بۆ دراوە لەگەڵ وێنەی ئەحمەدی نیژاد تێکەڵ کراو داهێنەری ئەو کارە دوایە شاکاری سەیروسەمەرەتری لە سلێمانی کردو بوە نوێنەرو هیچ خێرێکی ئەوتۆشی نەدایەوەو تەنانەت قسەی زۆریشی لەسەرە.
ئایا بەراستی ئێمە بۆ ئەوە لەت کردنی حیزبمان قبووڵ کرد تاکوو بەم شێوەیە خۆشمان بکەین بە پەندی زەمانەو ئەمە ناو دەنێین نوێ بوونەوەی حیزب‌و چاکسازی‌و رێفورم؟. نابێ ئەو ڕاستییە لە بیر بکەین کە هاوڕێیانی پێشوومان بە کەڵک وەرگرتن لە وتە بەنرخەکانی دوکتۆر قاسملوو بە تایبەتی ئەوەی کە لە میتینگەکانی سەرەتای شۆڕشی گەلانی ئێران‌داو لە بەرانبەر جیابوونەوەی تاقمی خەیانەتکاری حەوت کەسی‌دا بەردەوام ئەو وتەیە دووپات دەکاتەوە کە حیزبی دێموکرات یەکەو نابێ بە دوو، دیارە کە ئەمە زۆر لەسەر بیروڕای گشتیی شوێنی دانەوەو بە قازانجی ئەوان تەواو بوە.
لەوەها دۆخێک‌دا، ئەوەتا بەرپرسی کۆمیتەی ئامریکامان هەرچی جنێوو سووکایەتییە بە کاک دوکتۆری دەدات‌و کەچی لە هیچ ماڵپەرو ئۆرگانێکی فەرمیی‌دا باسی سەزادانەکەی ناکرێ‌و لە ماڵپەرێ "رۆژهەڵات تایمز"دا ئێمە ئەو باس‌و خواستە دەخوێنیینەوە‌و لێی ئاگادار دەبین، ئەدی ئۆرگانەکانی خۆمان چ کارەن‌و دەبێ چ بکەن؟. کێن ئەوانەی لە پشت ئەو سایتە ڕاوەستاون‌و ئیمکاناتیان بۆ دابین دەکەن کە بە تەواوەتی بە زیانی خۆمان تەواو بوەو بۆتە سەرچاوەی هەواڵی سایت‌و بوڵتونەکانی رژیم؟ لەبەر چی بەرپرس‌و بەرێوەبەرەکانی ئاشکرا ناکرێن؟. ئەمە لە داهاتوودا زۆر زیاتر لە ئێستا بە زیانمان دەشکێتەوەو پێویستە پێش بەم مێتۆدە مافیایانە بگیردرێ.
بەراستی چیدی پێمان خۆش نیە کە بە درێژەدانی ئەم بارودۆخە، بەوە تاونبار بکرێین کە مۆری پەسەندمان لە جیابوونەوەی کۆنگرەی هەشت داوەو ئامادە نیین ئیدی ئەم وەزعە لەسەر حیسابی کارو کوێرەوەری ئێمە ئیدامەی هەبێت.
خالێکی دیکە کە زۆر بە جیددی هەڵوێستەی لەسەر دەکەین‌و پێمان خۆشە باسی بکەین ئەوەیە ئایا باشتر نەبوو کە بە جێگای کاک خالید عەزیزی کە هیچ ڕابردویەکی حیزبی نەبوەو ئاشنا بە خەت‌و فەرهەنگی حیزبەکەمان نیەو تەنانەت بڕیارو ڕاسپاردەکانی حیزبی جێبەجێ ناکات‌و زۆرتر خەتی شەخسی‌و رێفورمیستی دەباتە پێش‌و بە سەلیقەی شەخسی کار دەکات، لە نێوان خۆمان‌دا‌و لەو هەموو هاورێ بە توانایانە کە هەمانە کەسێکی وەکوو بەرێزان، قادر وریا، هێمن سەیدی‌و مستەفا مەولوودی، یان جەنابی کاک سمایل بازیار رۆڵەی بە تواناو خەباتگێری رووناکبیرو مامۆستای زانکۆ کە هەمیشە کۆڵەکەیەکی قایم‌و خۆڕاگری ئەو حیزبە بوە بە سکرتێری حیزب هەڵبژێردرێت کە هەموو تەمەنی لەو حیزبەدا بوەو لە شیماڵ ڕا تاکوو جنووب خزمەتی کردوەو کەس لە تواناو لێهاتوویی بەرێزیان گومانی نییە...
ئەگەر ئاشتییمان دەوێت ئەوە باشتریین دەرفەتە کە پێشنیارەکەی کاک موستەفا هیجری بقۆزینەوەو بگەڕینەوە سەر بنچینەی خۆمان‌و ئەو هەموو خەبات‌و ماندوویی‌و خوێنە نەکەینە فیدای خۆ بە زل زانی‌و عەقڵی خۆمان بە منداڵ‌و مەزن نەسپێریین‌‌و لەوە زیاتر ئاگر بە ڕابردووی خۆمانەوە نەنێین. چیدی ناکرێ لە ڕاگەیاندنەکان‌دا باسی ئاشتی بکەین‌و لە کردەوەدا هەنگاو بۆ ئەو مەسەلەیە نەنێین.
لەگەڵ رێزدا
کۆمەڵێک لە ئەندامان، کادرو پێشمەرگەکانی حیزبی دێموکراتی کوردستان لە نێوخۆو دەرەوە.
٢٦ی رێبەندانی ١٣٩٠ی هەتاوی
١٥ی فیوریەی ٢٠١٢
_________________________________________
تێبینی:
ــ ماڵپه‌ڕی "هه‌ڵۆی كوردستان"
له به‌رامبه‌ر نێوه‌ڕۆكی ئه‌م بابه‌ته به‌رپرسیار نیه‌‌و نووسه‌ری بابه‌ت به‌رپرسه له‌به‌رامبه‌ر بابه‌تی خۆیدا
ـ كه‌ڵك وه‌رگرتن له‌و بابه‌ته ته‌نیا به هێنانی ناوی سه‌رچاوه ئازاده
بۆ پێوه‌ندی گرتن له‌گه‌ڵ به‌ڕێوه‌به‌ر‌ى ماڵپه‌ڕ له رێگه‌ی فه‌یسبووكه‌وه ئێره كلیك بكه
نووسراوه له لایه‌ن خالید خورینجی., November 18, 2016
نووسراوه له لایه‌ن kurd, November 17, 2016
تێبینیی هه‌ڵۆی كوردستان: بۆچوونه‌كه‌تمان بڵاو كرده‌وه به‌ڵام 1- ئه‌وه روانگه‌ی نووسه‌ره نه‌ك ماڵپه‌ڕه‌ی هه‌ڵۆی كوردستان، 2- باشتر وایه به جێگه‌ی سووكایه‌تی كردن به بابه‌تێك وه‌ڵامی ئه‌و نامه بده‌یته‌وه به شێوه‌یه‌كی مه‌نتێقی‌‌و ئێمه ناچار بووین سووكایه‌تی كردن به شێوه‌ی ... دابنێین. چونكی ئێره جێگای سووكایه‌تی‌‌و بێرێزی كردن به كه‌س نیه.
نووسراوه له لایه‌ن farhad, February 23, 2012
ــ تێبینی "هه‌ڵۆی كوردستان": هاوڕێی به‌ڕێز، له‌گه‌ڵ سپاس بۆ جه‌نابت، تكایه به‌پێی ئیمكان بۆچوونه‌كه‌ت ئه‌مجاره به پیتی لاتین مه‌نووسه
نووسراوه له لایه‌ن HIDAYET, February 22, 2012
نووسراوه له لایه‌ن xuncha xas, February 22, 2012
ــ تێبینی "هه‌ڵۆی كوردستان": به‌ڕێز تكایه به‌پێی ئیمكان بۆچوونه‌كه‌ت ئه‌مجاره به پیتی لاتین مه‌نووسه
نووسراوه له لایه‌ن عه لی سابلاغی, February 22, 2012
واللهی من نازانم چی بلیم. من خوم ئه ندامی حدک م به لام حدکام خوش ده ویً. نه عله ت له هه رچی خائینی کورده. به لام بوم ده رکه وت لاده رانی قه دیمی هه ر ئه و فیکره یان هه یه. دوژمن و به کریًگیراون. ئیًستا ده زانم چه نده ره قیان له کاک دوکتوره.چاویان کویًر بیً. ئه گه ر دوکتور نه با خوو ئه وان کویً و کوردایه تی له کویًی.
نه عله ت له دوژمنانی کاک دوکتور
من خوم ئیًدی به لاده ر نازانم هه ر به یانی ده چمه کومیته ی حدکا و ده بمه ئه ندامی حیزب و قه ت باوه ر به لا ده ر و هیچ لا ده ریًک ناکه م
