هه‌ڵۆی کوردستان

-
هەڵە
  • JFolder::create: Could not create directory

تێرۆریزم سیاسەتێكی فەرمیی رێژیمی كۆماری ئیسلامییە

پۆستی ئەلیکترۆنی چاپکردن

kakmistefa_-_charanosi_hezb

بەڕێز كاك مستەفا هیجری، سكرتێری گشتیی حیزبی دێموكراتی كوردستانی ئێران لە دیمانەیەكدا لەگەڵ تیشك تی ڤی، را و بۆچوونەكانی خۆی سەبارەت بە هەندێك بابەتی سیاسی ئێران چ لە ئاستی نێوخۆیی وەكوو هەڵبژاردنی داهاتووی مەجلیسی شوورای ئیسلامی كە قەرارە لە 12ی رەشەمەی ئەمساڵدا بەڕێوە بچێ چ وەكوو سیاسەتی دەرەوەی ئێران لە ئاست رووداوەكانی ناوچە و جیهان و هەروەها رۆڵ و كاریگەریی كۆماری ئیسلامی لە تێكدانی ئەمنییەتی جیهان كە لە ئێستادا وەكوو گەورەترین هەڕەشە بۆ سەر ئاسایشی نێونەتەوەیی دەژمێردرێ دەربڕیوە. بە هۆی گرینگی و ‌هەستیاریی ئەو پرسانەوە دەقی وتووێژەكەمان گواستەوە بۆ لاپەڕەكانی رۆژنامەی كوردستان و سەرنجی خوێنەرانی بەڕێزی بۆ رادەكێشین.

 

(بەشی دووهەم‌و كۆتایی‌)

 

پ: كاك موستەفا بەشی دووەمی وتووێژەكەمان تەرخان دەكەین بە مەسەلەیەك كە پێوەندیدارە بە حیزبی دێموكراتی كوردستانی ئێرانەوە. هەر وەك ئاگادارن مێژووی حیزبی دێموكراتی كوردستانی ئێران زۆر جار شاهیدی رووداوی تاڵ و ناخۆش بووە و لە چەند قۆناغ و بڕگەی زەمانیدا جیابوونەوە و ئینشیعابات رووی داوە و دڵی دوژمنان خوش كراوە. 15/9/85 رێكەوتێكە كە كۆمەڵێك لە هاوڕێیانی ئەم حیزبە ریزی خۆیان لە ریزەكانی حیزبی دێموكراتی كوردستانی ئێران جیا كردەوە و ‌جیابوونەوەی خۆیان راگەیاند و هەروەها ناوی حیزبی دێموكراتی كوردستانیان لەسەر خۆیان دانا. بەڵام خاڵی سەرنجراكێش ئەوەیە كە ماوەیەكی زۆرە ئەو لایەنە لە راگەیاندنەكان و لە زمانی بەرپرسانیانەوە تەبلیغات دەكەن كە ئەوان ئاشتیخوازن و دەیانهەوێ لەگەڵ حیزبی دێموكراتی كوردستانی ئێران یەك بگرنەوە، لە بنەڕەتدا هۆكاری جیابوونەوەی ئەوان لە حیزبی دێموكراتی كوردستانی ئێران چی بوو؟ لێكدانەوەی ئەم تەبلیغاتە و راستیی بابەتەكە و هەڵوێستی حیزبی دێموكراتی كوردستانی ئێران لەو پەیوەندییەدا چیە؟

و: بۆچوونەكانی ئێمە سەبارەت بە جیابوونەوەی هاوڕێیانی پێشوومان روونە و ئێستا بۆ خۆشیان روون بۆتەوە. لە سەرەتادا كە جودا بوونەوە باسیان لەوە دەكرد كە ئەوان نوێخوازن، نەتەوەیین و لەگەڵ حیزبی دێموكرات كە سیاسەتێكی ئێرانچیەتی دەباتە پێشێ موافق نین. بڕوایان بەوە هەبوو كە زۆر شێواز و ئیدەی نوێتریان پێیە و دەیانهەوێ بیخەنە گەڕ و كاری پێ بكەن. لەو پێوەندییەدا وەعدە و وەعیدێكی یەكجار زۆریان بە خەڵك دا و بەو نیازەوە یان لەژێر كاریگەریی ئەو دروشمانەدا مەجمووعەیەك لە خەڵك لەگەڵ ئەوان تێكەڵ بوو و لە حیزبی دێموكراتی كوردستانی ئێران جودا بوونەوە. بەڵام كاتێك دەڵێم ئێستا ئەوانیش گەیشتوون بەو قەناعەتە كە ئەو مەسەلەیە راست نیە و جودابوونەوەی ئەوان بنەمایەكی سیاسی نەبووە، لەبەر ئەوەیە كە ئێستا ئەوان لە وتووێژەكانی ئەخیریاندا باس لەوە دەكەن كە مەسەلەی جودابوونەوەكە لە پێوەندی لەگەڵ ئەوەدا بووە كە پێكەوە نەحەواوینەتەوە و میكانیزمی حەوانەوەمان نەماوە. لەسەر ئەو مەسەلانە باس دەكەن. لە راستیدا ئەوانەش پاساوێكن لە ئەوان بۆ تەوجیهی جیابوونەوەی خۆیان دەیهێننەوە. ئەو تەبلیغاتەی كە ئێستا زۆر پەرەیان پێداوە و لەواقێعدا دەیانهەوێ رووی ئاشتیخوازی و یەكگرتوویی و یەكبوون لە نێو ریزەكانی كورددا مەترەح بكەن و خۆیان بە ئاڵاهەڵگری ئەو بابەتە بناسێنن، بە رای من زۆرتر دەگەڕێتەوە سەر ئەوە كە ئەوان دەیانهەوێ بەو تەبلیغاتە پەڵەی ئەو كارەی كە كردیان لە نەزەر خەڵكدا بشارنەوە. گرووپێك كە لە واقێعدا تەنیا بۆ بەرژەوەندیی گرووپیی خۆیان لە كۆنگرەیەكی دێموكراتیكدا كە لە ژێر رێنوێنی زۆرایەتیی ئەوان پێكهاتبوو، نەتیجەی كۆنگرەیان قبووڵ نەكرد و رۆیشتن و حیزبێكی دیكەیان پێك هێنا، تەنیا بۆ ئەوەی كە قازانج و بەرژەوەندیی گرووپەكەی خۆیان بپارێزن. دەلیلەكەشی ئەوەیە كە خوودی كاك خالید لە وتووێژێكدا كە بەمدواییانە بڵاو بۆتەوە باسی كردووە كە ئێمە لە كۆنگرەی 13دا هەموو كارەكانمان بە باشی چووەتە پێشێ. راپۆرتی كۆنگرە پێشكەش كرا و تەئیید كرا. بابەتە سیاسییەكان باس كرا و لەسەریان هەموو هاونەزەر بوون، بەڵام كێشەكە ئەودەمی ساز بوو كە هەڵبژاردن هاتە كایەوە. لێرەدا ئەو پرسیارە بۆ خەڵك زەق دەبێتەوە كە ئەگەر بەرنامە سیاسییەكە پەسند كراوە و هەڵوێستە سیاسییەكان پەسند كراون، بۆچی هەڵبژاردن كێشە دێنێتە پێش؟ مەگەر قەرار نیە خەڵكێك كە لە كۆنگرەدا بەشدارن دەنگ بدەن و ئێمە هەموومان بەو دەنگانە پابەند بین؟! هەر وەكوو هەموو ئەو كۆنگرانەی كە پێشتر گیراون و دەنگیان تێدا دراوە. لە كۆنگرەی 10 را تا دەگاتە كۆنگرەی 13 ئەو رەفیقانەمان لە لایەنی زۆرینە بوون و زۆرتر كار و بڕیارەكان لەژێر هەژموونی و دەسەڵاتی زۆرایەتیی ئەواندا بەرێوەچووە. كەمینە وەكوو كەمینەیەكی مۆنزەبێت و دڵسۆزی حیزبی كاری كردووە، لە عەینی حاڵدا كە رەخنە و ئینتیقادی خۆی گرتووە، بەڵام كاری كردووە بۆ یەكپارچەیی حیزب. چۆنە هەر ئەو كۆنگرەیە، هەر بەو قانوونەوە كاتێك دێت دەنگێك دەدات كە ئەوان ئیدی نابنە زۆرینە بابەتەكە دەشێوێ و هەڵبەزینەوە دێتە پێشێ. ئەوە لە لایەك، لە لایەكی دیكەشەوە ئێمە دەبینین كە لە قسەكانیاندا باس لە پێكەوە گونجان و رەفتار بەرامبەر بە یەكتر دەكەن، مەبەست ئەوەیە كە زۆرینەیەك كە ئێستا لەوان نین، زوڵمیان لەوان دەكرد كە كەمینە بوون و بە باشی لەگەڵیان نەدەگونجان، بەڵام ئەوان رانەوەستان تاكوو بزانن زۆرینە چۆن لەگەڵیان هەڵسوكەوت دەكات. ئەوان هەر پاش روون بوونەوەی نەتیجەی هەڵبژاردن لە كۆنگرەدا كاتێك بینیان بوونەتە كەمینە بەرەی خۆیان جیا كردەوە. یانی وەكوو حیزبێكی جودا لەگەڵ حیزبی دێموكرات هەڵسوكەوتیان دەكرد، بۆخۆیان وەكوو هەیئەت دەچوون چاوپێكەوتنیان دەكرد لەگەڵ لایەنەكان، كۆڕ و كۆبوونەوەیان بۆ خۆیان دەگرت، تەنانەت وای لێهاتبوو كە كاتێك پێشمەرگەكان یان كادرەكان كۆبوونەوەیان دەگرت ئەوان ئیزنیان نەدەدا كە لایەنگرەكانیان بێن و لە كۆبوونەوی حیزبیدا بەشدار بن. واتە بە كردەوە خۆیان جیا كردەوە. بۆ جودایان كردەوە؟ بۆئەوەی كە ئەوان زۆرینە نەبوون. كە وابوو لێرەدا تەنیا مەسەلەكە قاوانج و بەرژەوەندیی گرووپیە، هیچ مەسەلەیەكی عەقیدەیی، سیاسی، قازانج و بەرژەوەندیی خەڵك لەئارادا نیە. پرسیارەكە لێرەدا ئەوەیە چۆنە گرووپێك كە بۆ قازانج و بەرژەوەندیی خۆی دێت و بە قەولی خۆی حیزبێك لەت دەكات، بەڵام بەردی دڵسۆزی و یەكگرتوویی خەڵك و یەكگرتوویی ئەحزابی سیاسی و نەتەوەی كورد بە سینگی خۆیدا دەدات و دەیهەوێ خۆی بە ئاڵاهەڵگری یەكگرتوویی نیشان بدات؟ ئەو دوو سیاسەتە دووفاقیانە و دژبەیەكە چۆن دەتوانێ لە یەك حیزبدا كۆ بێتەوە. ئەوانە هەموو نیشان دەدەن كە ئەو باسانە باسێكی درووست و لە رووی دڵسۆزیەوە نیە، چونكە هەر لە سەرەتای جیابوونەوەدا هەوڵێكی زۆر لە لایەن دۆستان و دڵسۆزانەوە درا بۆ ئەوەی كە ئەوان ئەو عەمەڵە كۆتایی پێبێنن و دووبارە یەك بگرنەوە لەگەڵ حیزب، ئێمە قبووڵمان كردووە بەڵام ئەوان هەر ئامادە نەبوون. چونكە نەزەریان ئەوە بوو كە لە حیزبی دێموكراتی كوردستانی ئێراندا دەبنە كەمینە و كەمینە بوون بۆ ئەوان قابیلی قبووڵ نەبوو. ئەوان پێیان وابوو دەبێ هەر لە زۆرینەدا بن. دەنا ئەو شتانە كە باسی دەكەن ئەگەر لە زۆرینەدا بان هیچ گرفتێكی درووست نەدەكرد. هەر ئیدامەیان دەدا و كارەكەی خۆیان دەكرد و ئینشیعابیشیان نەدەكرد.

پ: كاك مستەفا، كاك خالید لە بەشێك لە ئیستیدلالەكانی خۆیدا دەڵێت كە هیچ لایەك لە لایەكەی دیكە جیا نەبووەتەوە یان هیچ لایەك لایەكەی دیكەی بەجێ نەهێشتووە و تەنانەت دەڵێت كە شوێنی ئیدارەی هەر دوولاش هەر لە جێی خۆیدایە و لە كەمپەكانیشدا هەر بە هاوبەشی دەژین. پێم خۆشە روانگەی ئێوە لەو بارەوە بزانم.

و: لەگەڵ رێزم بۆ ئەو هاوڕێیانە، ئەوە ئیستدلالێكی ناسیاسییانە و ناشیانەیە. ئەوەی كە دوو ماڵ لە تەنیشت یەكتریدا دەژین یان دوو بنكە لە نزیكی یەكترن، ئەوە هیچ دەلیل بۆ ئەوە نیە كە جودا نەبوونەتەوە. ئەوان بە راگەیەندراو حیزبی خۆیان جودا كردووەتەوە، جا ئێستا ماڵێكی ئەوان لە تەنیشتی ماڵی ئێمەیە و یان لە شارێكی دیكەیە، ئەوە هیچ شتێك لە مەسەلەكە ناگۆرێت،.ماڵ لەیەك نزیك بوون دەلیل بەوە نیە كە جودابوونەوەیەك نەبووە.بۆ نموونە، لە شارێكدا خەڵك پێكەوە دەژین، زۆر ماڵ هەیە دیواربەدیواری یەكترن، بەڵام ئەمە نابێتە دەلیلی ئەوە كە ئیختیلافی نەزەریان نیە و یان پێكەوە لە تەزاددا نین و ئەوە نیشانەی یەكبوونە. واتە ئەوە هیچ دەلیلێك نیە بۆ ئەوەی كە پێكەوە ژیانمان یارمەتیدەرە بەو فیكرەی كە لە واقیعدا جودا نەبوونەتەوە، یان باس لەوە دەكات كە مەسەلەی گۆڕینی «نێو» وەكوو مەرجێك لە لایەن ئێمەوە لە ماوەی ئەو چەند ساڵەدا بووەتە هۆی ئەوە كە ئێمە نەتوانین پێكەوە پێوەندی بكەین. دیاریكردنی ئەو ناوە لە لایەن ئەوانەوە بۆتە گرفت و بەربەستێك لەسەر رێگای لەیەك نزیكبوونەوە و ئاساییكردنەوەی پێوەندییەكانمان و تەنانەت پێكەوە هاوكاری كردنمان. ئەوەش سەیرە كە دەڵێ ئەوە دەبێتە هۆی لەیەك نزیكبوونەوە، باشە چۆن ئەوە دەبێتە هۆی نزیكبوونەوە. ئەگەر ئەوە هۆی نزیكبوونەوەیە بۆ ئێمە تا ئێستا لێك نزیك نەبووینەتەوە. بەپێچەوانەوە دیاریكردنی ئەو نێوە لە یەكەم رۆژەوە بووەتە هۆی ئەوە كە ئێمە نەتوانین پێكەوە دانیشین، پێكەوە هاوكاری بكەین. مەنتیقیش ئەوە بووە هەر لە رۆژی ئەوەڵەوە باس لەوە بكەن كە ئاڵوگۆرێك لە نێوەكەیاندا پێك بێنن كە لەگەڵ نێوەكەی ئێمە فەرق و جیاوازییەكی هەبێت تاكوو رێگا خۆش بێ بۆ پێوەندیكردن.

پ: لە شوێنێكدا كاك خالید دەڵێت كە بەرژەوەندیی نەتەوەی كوردە كە ئێمە هان دەدات بۆ لە یەك نزیكبوونەوە و دەبینین ئەوەندە تەئكید لەسەر لەیەك نزیكبوونەوە و یان تەنانەت ئاسایی كردنەوەی پێوەندییەكان دەكات. بەڵام پرسیارەكە لەوەدایە، ئایا 5 ساڵ لەوە پێش بەرژەوەندیی نەتەوەیی كورد ئەوەی ئیجاب نەدەكرد كە ئەوان لەگەڵ حیزبی دێموكراتی كوردستانی ئێران بمێننەوە؟ یان كێشەی كورد بەو زەقیە كە ئێستا هەیە ئەو كات نەبوو؟

و: زۆربەی ئەو ئیستیدلالانە كە دەكرێن سیاسی نین و بۆ چەواشەكردن و شێواندنی زەینی خەڵكن. كەسێك كە بەخەمی یەكگرتوویی خەڵكی كوردەوە بێ، كەس یان گرووپێك كە هەوڵی یەكگرتنەوە و یەكڕیزیی حیزبە سیاسییەكانی كوردی هەبێ، چۆن بۆ خۆی ئامادە نیە لە حیزبێكدا بە پێی یاساكان و ئوسووڵ و پرەنسیپەكانی ئەو حیزبە هەل بكات، مودارا بكات، تەنیا لەبەر ئەوەی كە قازانج و بەرژەوەندییە گرووپیەكەی خۆی كەوتووەتە مەترسییەوە. واتە لێرەدا ئەو جەماعەتە قازانج و بەرژەوەندیی گرووپیی خۆیان تەرجیح داوە بەسەر قازانج و بەرژەوەندیی نەتەوەییدا، بەسەر قازانج و بەرژەوەندیی حیزبی و یەكگرتووییدا. گرووپێكی ئاوا بە نەزەری من تەنانەت ئەگەر لەوە زیاتریش هاواری یەكگرتوویی و قازانج و بەرژەوەندیی خەڵك بكەن كەس گوێیان ناداتێ. چونكە ئەوەی كە ئێستا خەڵك چاوی لێ دەكا، مەسەلەی عەمەل و كردەوەیە، خەڵك ئێستا ئاگاهە، خەڵك تێدەگات، خەڵك سیاسییە، زانیاری رۆژبەرۆژ لەنێو خەڵكدا ئاڵوگۆڕ دەكرێت. ئەمن ـ بیلاتەشبیە بێت، بیلاتەشبیە بێت ـ ئەم ئیستیدلالە وەكوو ئیستیدلالەكانی كۆماری ئیسلامیی ئێران دەبینم كە لە لایەكەوە وەكوو تێروریزمی نێونەتەوەیی ناسراوە و سیاسەتە گشتییەكەی تێروریزمە، بەڵام دەڵێ «ئێمە تێرۆر ناكەین، جارێك نەمانكردووە كە ئەمە دووهەم جارمان بێت». بۆیە ئەم قسانە بەلای خەڵكەوە پێم وا نیە خوازیارێكی هەبێ، دیارە من باس لەوە ناكەم خەڵكی كورد بەگشتی یەكڕیزیی سازمانە سیاسییەكان و یەكریزیی ریزەكانی كوردیان لا مەبەستە، بەڵام بەو شێوە ئیستیدلال كردنە هیچ زەمینەیەك بۆ ئەو مەسەلەیە خۆش نابێت.

پ: واتە ئەوانە تەنیا لە چوارچێوەی دروشمدایە و بە كردەوە هیچ هەنگاوێكیان لە رێگای قازانج و بەرژەوەندیی نەتەوەییدا هەڵنەگرتووە؟

و: بەڵێ تەنیا دروشم بووە، دەڵێ هەر كەسێك ئینكاری نێوی حیزبی دێموكراتی كوردستان بۆ ئەوان بكات، لە واقێعدا نایهەوێ لێك نزیك بینەوە، بەڵام ئێمە بەكردەوە دەبینین كە ئەو چەند ساڵە ئەوە بووە بە كۆسپی سەر رێگای لێك نزیك بوونەوە. مەسەلەیەكی دیكە كە باس لە مەسەلەی یەكگرتنەوە و یان تێكەڵبوونەوە و شتی وا دەكەن، ئەوانە مەسائیلێكن كە هەمووی جێگەی باسە، بەڵام ناكرێت پێش لەوەی كە بتوانی گرفتەكانی بەردەم پێكەوە دانیشتن چارەسەر بكەیت، باس لە یەكگرتنەوە بكەیت. هەرچەند من بۆ ئەوەش قسەم هەیە، ئێمە لەسەر مەسەلەی گەڕانەوەی ئەوان بۆ نێو حیزبی دێموكراتی كوردستانی ئێران، یان مەسەلەی یەكگرتنەوە و یان هەرچی كە ناوی لێدەنێنەوە، ئێمە هیچ شەرت و مەرجێكمان نیە. بە بێ شەرت و مەرج باوەشمان ئاوەڵایە، با بێنەوە. كەوابوو ئیدی هێندە تەبلیغ بۆ یەكگرتنەوە نەكەن. ئەگەر راست دەكەن و گەیشتوون بەو قەناعەتە كە قازانج و بەرژەوەندیی نەتەوەیی باڵاتر لە قازانج و بەرژەوەندیی ئەو گرووپەیە، لە واقێعدا با یەك بگرنەوە و بەبێ هیچ شەرت و مەرجێك. ئێمە ساڵی داهاتوو كۆنگرەمان لە پێشە و ساڵی كۆنگرەیە. لەو كۆنگرەیەش وەكوو كۆنگرەكانی دیكە كار دەكەین، یەكێك لە كارەكانی كۆنگرە هەڵبژاردنە، كۆنگرە هەر دەنگێك بدا هەموومان ملكەچی دەبین. خوای دەكرد زۆربەی زۆری ئەندامانی رێبەرایەتیی حیزب لە ئەندامانی ئەوان هەڵدەبژێردران. ئێمە هیچ لەو بارەیەدا قسەمان نیە. تەنانەت ئامادەین بۆ ئەو مەسەلەیە چاوەدێر لە لایەنەكانی دۆستیشدا بێنین بۆ ئەوەی بەشداری بكەن لە كۆنگرەدا و چاوەدێری بكەن بەسەر بەڕێوەچوونی بڕیارەكان و هەڵبژاردنی كۆنگرەدا. ئێمە لەو بارەیەوە قسەمان نیە. بەڵام مەسەلەیەكی دیكە كە لێرەدا مەترەحە و ئەوان باسی دەكەن كە ئێمەش موافقین، مەسەلەی وتووێژ و لێك نزیكبوونەوەیە، بەڵام وتووێژ لەنێوان دوو حیزبی دێموكراتدا نا، بەڵكوو لە نێوان حیزبی دێموكراتی كوردستانی ئێران و گرووپێك كە جیابوونەتەوە. ئێمە لەو پێوەندییەشدا لەوان زیاتر خۆمان بە بەرپرس دەزانین، لەوان زیاتر پێمان وایە كە ئەوە زەروورییە. چونكە ئێمە لە رۆژی ئەوەڵەوە گوتومانە ئەگەر ئەوان ئامادە نەبوون لە حیزبی دێموكراتدا لەگەڵ ئێمە كە رەفیقەكانی ئەوان بووین و هاوسەنگەریان بووین و ساڵانێكی زۆر پێكەوە كارمان كردووە بمێننەوە، ئێمە دەتوانین وەكوو دوو لایەن پێكەوە كار بكەین، وەكوو دوو حیزبی سیاسی، بەڵام نەك وەكوو دوو حیزبی دێموكرات. بۆ ئەوەش نێوێك دیاری بكەن و ئێمە هیچ شتێكی دیكەمان نیە. تەنانەت باسیان لەوە كردووەتەوە كە ئەوان لە حیزبی دێموكراتدا رابردوویان هەیە و فیداكارییان كردووە و لە شانازییەكانی حیزبی دێموكراتدا بەشدارن، ئەوە هەمووی راستە، هەر بۆیە ئێمەش دەڵێین كە نێوەكەیان وشەی دێموكراتی تێدا بێت بەڵام بە تەركیبێكەوە كە خەڵك لێكمان جیا بكاتەوە. ئێستا ئەو دوو نێوە بووەتە سەرلێشێواوی، وەكوو تازەترین نموونە عەرزتان بكەم، لە پێوەندی لەگەڵ بەیانییەیەكدا كە رێبەرایەتیی ئەوان داویەتی سەبارەت بەوەی كە ئەوان خوازیاری ئەوە بوونە كە هێزە دەرەكییەكان بێن دەخالەت بكەن لە ئێراندا، ژمارەیەكی زۆر لە لایەنەكانی ئێرانی لێرە و لەوێ لەگەڵ ئێمە پێوەندییان گرتووە كە ئەوە چۆنە! خۆ سیاسەتی حیزبی دێموكرات ئەوە نەبوو، چۆن بە یەكجاری ئەو سیاسەتەی گرتووەتە پێش؟ ئێمە بەشێكی زۆر لە كاری هاوڕێیانمان لە دەرەوە و لێرە بوو بەوە كە بڵێین ئەمە هەڵوێستی ئێمە نەبووە. ئێستا باس لە چاك و خراپبوونی ئەو هەڵوێستە ناكەم، مەبەستم ئەوەیە كە ئەو دوو نێوە ئێستا سەری لە خەڵك شێواندووە و لە داهاتوودا و لە هەلومەرجێكدا كە ئاڵوگۆڕ بێتە پێشێ، هەبوونی دوو حیزبی دێموكرات كێشەی زیاتر ساز دەكات، بەڵام ئەگەر نێویان بگۆڕن وەكوو حیزبەكانی دیكە كە پێوەندیمان لەگەڵیان هەیە ئامادەین لەگەڵ ئەوان زۆرتر لە رابردووش كە هاوكار بووینە، پێكەوە كارمان كردووە، لە یەك سەنگردا بووین، بۆ یەك مەرام كارمان كردووە، كار بكەین و ئێستاش ئێمە لەو پێوەندییەدا زۆر خوازیارین كە بە لاچوونی ئەو كۆسپە بتوانین پێكەوە دووبارە پێوەندییەكەمان ئاسایی بكەینەوە و رەنگە لەو ئاساییبوونەوی پێوەندییەكان و هاتوچووەكان و دانیشتنەكاندا دۆخەكەمان بگاتە ئەو رادەیە كە باسی یەكگرتنەوەش بكەین. با ئەوەش بڵێم سەبارەت بە مەسەلەی یەكگرتنەوەش كە باسی دەكەن، ئێمە ئەزموونێكی تاڵمان لێی هەیە. هەر ئەو گرووپە و یان بەشێكی ئەو گرووپە بە دوای كۆنگرەی 8 لە حیزبی دێموكرات جودا بوونەوە، دەلیلەكانیشیان زۆر نزیك بەو دەلیلانە بوون كە ئەوانەی لە پاش كۆنگرەی 13 جودا بوونەوە هێنایانەوە. دواتر لە كۆنگرەی 10 هاتنەوە نێو حیزبی دێموكرات و یەكیان گرتەوە بەڵام نەتیجەكەی ئەوە بوو كە دیسان جودابوونەوە. یانی ناكرێت تۆ چارەنووسی حیزبێك وەكوو كایەی منداڵان چاوی لێ بكەی، رۆژێك كەسێك یان گرووپێك بۆچوونەكانی نەچووتە پێشێ، قازانج و بەرژەوەندییەكانی كەوتە مەترسی، جودا بێتەوە و سبەینێ دیسان بگەڕێتەوە. ئەوە بە رای من خەڵكیش لێمان قبووڵ ناكات و حیزبی دێموكراتیش لە راستیدا ناتوانێ ببێتە تاقیگەی ئەو جۆرە سەلیقانە، بۆیە ئێمە لە پێوەندی لەگەڵ مەسەلەی یەكگرتنەوەدا لەگەڵ ئەوەی كە رەدی ناكەینەوە وەكوو عەرزم كردن، ئامادەین یەك بگرینەوە بە بێ هیچ دانوستان و مەرجێك، بەڵام ئەو نیگەرانیانەشمان هەیە.

پ: كاك خالید لە بەشێكی دیكەی قسەكانی دەڵێت دەبێ بەستێنێك درووست بكەین كە چی دیكە لە ژێر كاریگەریی رەوانی بە قەولی ئەو «لەتبووندا» نەمێنینەوە. ئایا لە راستیدا ئێوە وەكوو حیزبی دێموكراتی كوردستانی ئێران چەندە لەژێر كاریگەریی ئەو رووداوەدان؟

و: ئەمن ئەوە درووست بە پێچەوانەوە دەبینم. بە بۆچوونی من ئەوانن كە ئێستاش لەژێر كاریگەریی ئەو فەزایەدا ماونەتەوە كە لە جەریانی ئینشیعابەكەدا هاتە پێشێ. ئەو تۆڵە كردنەوە، رق هەستانە، هەڵبژاردنی ئەو نێوە كە بۆ خۆی دەگەڕێتەوە سەر مەسەلەی رق هەستان و تۆلەكردنەوە. دەنا ئێمە حیزبی دیكەشمان زۆر دیون لەیەك جودابوونەتەوە، چ لە رابردوودا و چ لە ئێستادا، نێوی خۆیان گۆڕیوە و پێوەندییەكانی خۆشیان پاراستووە. ئەوان باس لە مەسەلەی یەكگرتوویی دەكەن، رۆژانە سەبارەت بە قازانج و بەرژەوەندیی یەكگرتوویی مەوعیزە دەكەن، تەوسیە دەكەن، قازانج و بەرژەوەندییەكانی یەكگرتوویی لێكدەدەنەوە، بەڵام كاتێك دێتە قۆناغی كردەوە بە مەبەستی ئەو یەكگرتنەوەیە ئامادە نین ئاڵوگۆڕ لە نێوەكەیاندا پێك بێنن. جالب ئەوەیە كە كاك خالید لە قسەكانیدا دەفەرمێ كە پێكهێنانی بەرە و كاری هاوبەش بەستراوەتەوە بە لەیەك نزیكبوونەوە بۆ ئەو دوو لایەنە و قازانجەكانی دیكەش باس دەكات، لە لایەكی دیكەشەوە دەڵێ حیزب دەبێ ئامراز بێت، حیزب موقەددەس نیە. باشە، ئەگەر لەیەك نزیكبوونەوە ئەو هەموو قازانجەی هەیە، ئەو هەموو بەرژەوەندییەی نەتەوەی كورد لەوەوە دابین دەبێ و ئەوان لە ژێر كاریگەریی رەوانیی كاتی جیابوونەوەدا نین، ئەو هەڵوێستەی ئەوان وەكوو پێداگری لەسەر ئەو نێوە چ مانایەكی هەیە؟ بۆ ئەو مەسەلەیە تیكرار دەكەنەوە؟. لێرەدا دەمهەوێ ئیشارە بە شتێكی دیكەش بكەم هەر لەو پێوەندییەدا، بیرمانە ساڵی رابردوو لە پرۆسەی دیالۆگێكدا (لە شێوەی دیمانە) كە كەوتە نێوان ئەوان و كۆنسوولی كۆماری ئیسلامی لە هەولێر سەبارەت بە دانوستان لەسەر ماددەی 15 و 19 لە یاسای بنەڕەتیی ئێران، لەوێدا هەواڵنێرەكە لە كاك خالید دەپرسێت كە ئەگەر كۆماری ئیسلامی لە ئێوە داوا بكات كە نێوتان بگۆڕن بۆ ئەوەی دانوستانتان لەگەڵ بكەین نەزەرتان چی دەبێت؟ عیبارەتەكەی كاك خالید ئەو مانایە دەگەینێت كە ئەگەر كار بگاتە ئەو رادەیە ئێمە هیچ كێشەیەكمان نیە لەسەر مەسەلەی گۆڕینی نێو. سەیر ئەوەیە كە ئامادەیە بۆ كۆماری ئیسلامی نێو بگۆڕێ، باس لەوە دەكات كە چارەسەریی كێشەی نێوان حیزبی دێموكراتی كوردستان و ئەوان تەئسیر دادەنێت لەسەر پێكهاتنی بەرە، قازانج و بەرژەوەندیی نەتەوەی كورد لەوەدا دەبینێت، هەمووی ئەوانە باس دەكا بەڵام كاتێك گەیشتە مەرحەلەی كردەیی هەر لەسەر قسەی یەكەمی خۆی سوورە كە ئەوان حیزبی دێموكراتی كوردستانن و بەبێبڕانەوە و ئەملاوئەولا. یانی ئەو قسانە و ئەو كردوانە بە رای من دوو شتی لەیەك جیاوازن و لە دوو جەمسەری تەواو دژ بەیەكدا قەرار دەگرن.

پ: وەكوو دوایین پرسیار، كاك خالید لە بەشێكی دیكەی قسەكانی تەوسیە دەكات كە ئەو ئەندامانەی حیزب كە ئاشتیخوازن با شەهامەتیان هەبێ دەنگی خۆیان هەڵبرن. ئایا لە حیزبی دێموكراتی كوردستانی ئێراندا خەڵكی ئازادیخواز یان ئاشتیخواز بەقەولی ئەو شەهامەت دەنگ هەڵبڕینیان نیە؟

و: لێرەدا دەبێ لەسەر مانای شەهامەت قسە بكەین. لە حیزبی دێموكراتدا ئازادی هەیە، خەڵك دەتوانن لە ئەندامێكی رێبەرایەتییەوە بگرە تا ئەندامێكی سادە وەك پێشمەرگەیەك نەزەری خۆیان لە كۆڕ و كۆبوونەوەی حیزبیدا بەیان بكەن، نامە بنووسن بۆ ئۆرگانی سەرەوەتر، بۆ رێبەرایەتی و تەنانەت بۆ كۆنگرە كە لە ئەساسنامەی حیزبی دێموكراتدا ئەوانە روون كراونەتەوە و هەموو كەسیش ئەو شەهامەتەی هەیە و ئەوە دەكات، بەڵام بۆیە دەڵێم دەبێ مانای شەهامەت لێكبدەینەوە بۆ ئەوەی كە بە نەزەری من ئەو شەهامەتەی كە ئەو برادەرانە مەبەستیانە، نەخێر ئێمە ئەو شەهامەتەمان نیە. ئێمە شەهامەتی ئەوەمان نیە كە لەبەر قازانج و بەرژەوەندیی گرووپیی خۆمان ریزەكانی كورد لەیەك بترازێنین. هەر وەك لە كۆنگرەكانی رابردوودا، پێش لە كۆنگرەی 13 ئێمە كەمینە بووین و ئەو كارەمان نەكردووە. ئێستا ئەگەر كاك خالید دەڵێ شەهامەت، بەڵێ ئێمە ئەو شەهامەتەمان نیە. ئێمە ئەو شەهامەتەمان نیە كە خەڵك چەواشە بكەین. چوونكە ئێمە پێمان وایە كە دەبێ لەگەڵ خەڵكی خۆمان راست بین. ئێمە بەرپرسین كە راستیەكان بە خەڵك بڵێین. ئێمە شەهامەتی ئەوەمان نیە كە لە حزووری خەڵكدا و بە ئاشكرا قسەكانمان لەگەڵ كردەوەكانمان جیاوازی هەبێت. چونكە ئێمە دەزانین كە خەڵك تێدەگات، ئێمە نابێ حیسابی تێنەگەیشتوو لەسەر خەڵك بكەین و پێمان وابێت هەرچی ئێمە گوتمان خەڵك هەر ئەو رۆژە بیر دەكاتەوە. بۆیە من پێم وایە لەسەر مانای وشەی شەهامەت لە نێوان ئێمە و ئەواندا فەرق و جیاوازی هەیە، دەنا لە حیزبی دێموكراتدا بیروبۆچوون دەربڕین ئازادە و بە شێوەیەكی سیستماتیك بەڕێوە دەچێت.

 

بۆ دیتنی‌ به‌شی‌ یه‌كه‌م "ئێره‌" كلیك بكه.

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1929
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy