هه‌ڵۆی کوردستان

-
هەڵە
  • JFolder::create: Could not create directory

دەزگای ڕاگەیاندنی گشتی: پرێستیژی حیزبی دێموکرات زۆر بەرزتر لە ئاستی پرێستیژی ڕێژیمی ئێرانە

پۆستی ئەلیکترۆنی چاپکردن

ڕوونکردنەوەیەک لەسەر چەواشەکارییەکانی کۆماری ئیسلامی دژ بە حیزبی دێموکرات

لە درێژەی چەواشەکارییەکانی کۆماری ئیسلامیی ئێران دژ بە بزووتنەوەی کورد و حیزبی دێموکرات، ڕۆژی چوارشەممە، ١٥ی خەزەڵوەری ١٣٩٨ی هەتاوی، ماڵپەڕی "بووڵتەن نیووز" سەر بە سپای تێرۆریستی پاسدارانی ڕێژیم بە بڵاوکردنەوەی بەناو ڕاپۆرتێکی تایبەت، هەوڵی داوە بۆ شاردنەوەی دوایین دەرکەوتەکانی دۆڕاوی و بێ ئابڕوویی سیاسیی خۆی لە ناوچەکەدا، بزووتنەوەی کورد و حیزبی دێموکراتی کوردستانی ئێران بکاتە ئامانجی تەبلیغاتێکی بێ بنەما و پرێستیژی حیزبی دێموکرات هەتا ئاستی نزمی خۆیان دابەزێنێت.

 

farmandaei_pdki_pm_2


لە بەناو ڕاپۆرتەکەی ئەو ماڵپەڕەی ڕێژیمدا بانگەشەی ئەوە کراوە کە لە خۆپیشاندانەکانی خەڵکی ڕاپەڕیوی شارەکانی عێراق و بەتایبەتی ڕووداوی هێرش بۆ سەر کۆنسولخانەی ئێران لە کەربەلا، ئەندامانی حیزبی دێموکراتی کوردستانی ئێران و لایەنێکی باشووری کوردستان ڕۆڵێکی کارایان هەیە و هەر ئەو کەسانەن کە لە سووتاندن و دڕاندن و ژێر پێخستنی ئاڵای کۆماری ئیسلامی و وێنەی ڕێبەران و کاربەدەستانی ڕێژیمدا دەستیان هەیە و دروشمی دژ بە داگیرکاری و دەستێوەردانی ئێران لە عێراقدا دەڵێنەوە و لە بەرچاوی ڕاگەیەنەکاندا وا دەنوێنن کە خەڵکی عێراقن.

لێرەدا وێڕای وەدرۆخستنەوەی ئەو هەواڵە بێ بنەمایە، جەخت دەکەینەوە کە ئەو ڕادەیە لە ڕووهەڵماڵراوی و چەواشەکردنی ڕاستییەکان تەنیا لە ڕێژیمی کۆماری ئیسلامیی ئێران و کاربەدەستانی ئەو ڕێژیمە ڕیاکار و ئاژاوەگێڕە دەوەشێتەوە.

لای کەس شاراوە نییە و خودی ڕێبەرانی ڕێژیمیش باش دەزانن کە هێرش بۆ سەر کۆنسولخانە و سووتاندن و دڕاندنی ئاڵا و وێنە و هێماکانی کۆماری ئیسلامی لە عێراق و بە تایبەتی لەنێو شارە شیعەنشینەکانی ئەو وڵاتەدا تەنیا دەرئەنجام و بەرهەمی ڕاستەوخۆی سیاسەتی کاولکارانەی ئەو ڕێژیمەیە. لە ڕاستیدا ئەو ڕق و بێزارییە کە ئەمڕۆ گەلانی ناوچە لە لوبنان و سووریەوە تا شەقامەکانی کەربەلا و نەجەف و بەسرە هێناوەتە سەر شەقام، دەرهاوێشتەی ڕاستەقینە و چاوەڕوانکراوی سیاسەتە کاولکارییەکانی ڕێژیمی ئێران و هەناردەکردنی شۆڕشی ئیسلامیی ئێران لە ناوچەکەدایە.

هەموومان شاهیدی ئەوە بووین کە لە خۆپیشاندانی ناڕەزایی شارەکانی ئێران بەتایبەتی شارەکانی وەک قوم و مەشهەد لە ماوەی ڕابردووشدا خەڵکی وەزاڵەهاتوو وێنەکانی ڕێبەرانی ڕێژیم و هێماکانی ئەو دەسەڵاتە دژی گەلییەیان ئاگر تێبەر دەدا و لە دروشمەکانیاندا ڕق و بێزاریی خۆیان لە دیکتاتۆری و گەندەڵی و ئاژاوەگێڕییەکانی ڕێژیم دەربڕی. پرسیار ئەوەیە کە گەلۆ هاندەر و ڕێکخەری ناڕەزایەتییانەکانی خەڵکی قوم و مەشهەدیش هەر حیزبی دێموکراتی کوردستانی ئێران و کوردەکانی هەرێمی کوردستان بوون؟

کۆماری ئیسلامی باش دەزانێت کە ئەگەرچی خەڵکی کوردستان و حیزبی دێموکرات یەکەم لایەن بوون کە سیمای ڕاستەقینەی ئەو ڕێژیمەیان بۆ دەرکەوت و لە بەرامبەریدا قارەمانانە ڕاوەستان، بەڵام ڕقی قووڵ و بێزاریی بەربڵاوی ئێستای گەلانی ناوچەکە لەو ڕێژیمە ئاکامی ئەزموونی هاوبەشی گەلانی ناوچە و تاقیکردنەوەی دروشم و ئیدئۆلۆژییەکانی ڕێژیم بە بەهای خوێنی ڕۆڵەکانیان و خاپووربوونی وڵاتەکانیانە.

لەوانەیە کۆماری ئیسلامی لە ڕابردوودا توانیبێتی بە کەڵک وەرگرتن لە هەست و سۆزی ئایینیی گەلانی ناوچە و لەژێر دەمامکی ئایین و دڵسۆزیی درۆیین بۆ گەلانی دراوسێدا پێگەیەک بۆ خۆی لە هێندێک شوێن دەستەبەر بکات، بەڵام ئێستا سەردەمی ڕاچڵەکانی خەڵکی ئەو وڵاتانە لە بەرانبەر داگیرکارییەکانی ئێراندایە و خەڵکی عێراق و هەموو ناوچەکە و جیهان لەوە تێگەیشتوون کە بوونی کۆماری ئیسلامی ناکۆکییەکی قووڵی لەگەڵ بەختەوەری و پێکەوەژیانی هێمنانە و ئازادیی ئەوان هەیە. هەر بۆیە ڕێژیم دەبێ ڕووخانی پێگەکانی خۆی لەنێو خەڵکی ناوچەدا وەکوو ڕاستییەک قبووڵ بکات و بە سیاسەت و بەرنامە هەڵەکانی خۆی لە دەرەوە و نێوخۆی ئێراندا بچێتەوە، نەک ئەوەی کە بە هێنانەوەی پاساو و بیانووی سەیر و سەمەرەی وەک هەمیشە خۆڵ لە چاوی خەڵک بکات.

بزووتنەوەی ڕەوای خەڵکی کوردستان و بەتایبەتی حیزبی دێموکرات هەمیشە و لە هەموو سەردەمێکدا لە هەموو شێوازەکانی خەباتی ڕەوا و سەردەمیانە بۆ بەرگری لە ماف و کەرامەتی خۆی کەڵکی وەرگرتووە، نە ئەو بزووتنەوەیە پێویستی بەوەیە کە خۆپیشاندانەکانی خەڵکی عێراق بکاتە هەلێک بۆ خۆدەرخستن و نە خەڵکی عێراقیش پێویستیان بەوەیە کە خەڵکی دیکە ئاراستەی خۆپیشاندانیان بۆ دیاری بکەن.

لە کۆتاییدا بۆ جارێکی دیکە وێڕای جەختکردنەوە لەسەر پرەنسیپە سیاسییەکانی حیزبەکەمان، ئەو جۆرە دەنگۆیانەی ڕێژیم ڕەت دەکەینەوە و ڕایدەگەیەنین کە حیزبی ئێمە هیچ پێوەندییەکی بە ڕووداوەکانی ئەم ڕۆژانەی شارەکانی عێراقەوە نییە و ئەوەی کە هەیە، تەنیا لافاوی ڕقی گەلانی ناوچەکەیە کە لە دەستێوەردانەکانی کۆماری ئیسلامیی ئێران وەزاڵە هاتوون و ئامانجیان کۆتاییهێنان بەو بارودۆخە نالەبارەیە کە بەهۆی ئاژاوەگێڕییەکانی ڕێژیمی ئێران باڵی بە سەر وڵاتەکەیاندا کێشاوە.

 

حیزبی دێموکراتی کوردستانی ئێران

دەزگای ڕاگەیاندنی گشتی

١٨ی خەزەڵوەری ١٣٩٨ی هەتاوی

 

 _______________________________________

ــ بۆ پێوه‌ندی‌ گرتن له‌گه‌ڵ‌ به‌ڕێوه‌به‌ر‌ى ماڵپه‌ڕ له رێگه‌ی‌ فه‌یسبووكه‌وه‌ ئێره‌ كلیك بكه‌ 

 


ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 209
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy