هه‌ڵۆی کوردستان

-
هەڵە
  • JFolder::create: Could not create directory

شەرەفکەندی، چراوگی خەباتی ئەنگوستەچاو

پۆستی ئەلیکترۆنی چاپکردن

Erfan_R_-_pjak_kodar_2خەباتکاری ناسراوی گەلی کورد، دوکتور سادقی شەرەفکەندی لە ٢١ی بەفرانباری ١٣١٦ی هەتاوی، بەرامبەر بە ١١ی ژانوییەی ١٩٣٨ ی زایینی لە گوندە خنجیلانەکەی " ته‌ره‌غه " ی سەر بە باژێڕی بۆکان لە رۆژهەڵاتی کوردستان، لە دایک بوو . بەداخەوە لەکاتێکدا کە هێشتا زاڕۆکە‌و گەرم‌و ساردیی ژیانی نەچەشتوە‌و نوقمی نهێنییەکانی دونیای منداڵییە، باوکی کۆچی دوایی دەکات‌و ئەرکی پێڕاگەیشتن‌و سەرپەرشتییەکەی، دەکەوێتە سەر نووسەری ناوداری کورد مامۆستا هەژار شەرەفکەندی کە ئەودەم، لاوێکی خوێنگەرم‌و نیشتیمانپەروەری دەڤەری موکریان بوو‌و لەقوتابخانەی کۆمەڵەی ژیانەوەی کورد دا، خەریکی خوێندنی وانەکانی نیشتیمانپەروەری‌و مافویستی‌و گەلدۆستی بوو .

گرنگترین رووداوی مێژووی هاوچەرخی کورد، واتە دامەزرانی کۆماری کوردستان، گرنگترین رووداوی سەردەمی منداڵیی دوکتور سادقی شەرەفکەندی بوو . چونکە لەو سەردەمەدا بوو کە بۆ یەکەمجار لە مێژووی هاوچەرخی کورددا، نەتەوەکەمان چارەنووسی سیاسیی خۆی لە چوارچێوەی کۆمارێکی دیموکراتیکی نیشتیمانی دا، دیاری کرد‌و منداڵانی چاوگەشی کوردی ئەو سەردەمە‌و یەک لەوان دوکتور شەرەفکەندی، چاوی بە پیت‌و وشە‌و رستەی کوردی رووناک بوویەوە .

بەوهۆیەوە کە خۆی لەسەردەمی کۆماری کوردستاندا، چۆتە قوتابخانە‌و مامۆستا هەژاری براگەورەی، شاعیری نەتەوەیی کۆماری کوردستان بوو، یەکەمین وێنە روونەکانی سەردەمی منداڵی، وێنەی گەش‌و یادەوەریی رزگاریی بوو. بەداخەوەش پاش تێپەڕێنی یازدە مانگ لە شکۆی کۆمار‌و لەسێدارەدرانی پێشەوای مەزن " قازی موحەمەد "‌و هەرەسهێنانی کۆماری کوردستان، وێنە گەش‌و روونەکان، تەمی رەشی شکستیان بەسەردا کێشرا‌و نەتەنیا پیت‌و شەو‌و رستەی کوردی لە دوکتور شەرەفکەندی سەندرایەوە، بەڵکو مامۆستا هەژاری برایشی ناچار بوو رۆژهەڵاتی کوردستان بەجێبهێڵێ‌و پەڕیوەی باشووری کوردستان ببێ‌و بەو شێوە، خەونی شیرینی منداڵێکی کورد وەک هەزاران زارۆکی دیکەی ئەم نیشتیمانە، زڕا‌و تراژیدی‌و دابڕان‌و دڵەڕاوکە، جێگای بە شادی‌و خۆشی لێژ کرد .

 

sh_sharafkandi_-_erfan_-_1


بێگومان تاڵی‌و شیرینیی رووداوەکانی سەردەمی منداڵیی دوکتور شەرەفکەندی، کاریگەرییان لەسەر رووداوەکانی دیکەی ژیانی داناوە‌و رەنگیشە، هێڵەگشتییەکانی ژیانیشی، رەنگڕێژ کردبێ .

ساڵی یەکەم‌و دووهەمی سەرەتایی لەشاری بۆکان دەخوێنێ‌و بەهۆی کۆچی بنەماڵەکەیان بۆ شاری مەهاباد، قۆناخەکانی سەرەتایی‌و ناوەندی وبەشێ لە دواناوەندی لەشاری مەهاباد تەواو دەکات‌و بۆ تەواوکردنی دواهەمین ساڵی قۆناخی دواناوەندی، دەڕواتە شاری تەورێز‌و بەسەرکەوتنەوە بە ڵگەنامەی دیپلۆم وەردەگرێ . شایانی باسە وەک لەبیرەوەریی هاوڕێیانی سەردەمی منداڵی‌و لاوێتیی دوکتور شەرەفکەندی دا باس کراوە، وێڕای ئەوەی کە منداڵێکی بزێو‌و لاوێکی پڕوزە بوە، کەمترکاتەکانی بۆ وانەکانی خوێندن تەرخان کردوە، بەڵام بەهۆی بیرتیژیی کەموێنەوە، لەگشت قۆناخەکانی خوێندن دا یان یەکەمی پۆلەکەی بوە یان یەکێ لە زیرەکترین قوتابییەکانی قوتابخانەکەی بوە .

پاشان بۆ درێژەدانی خوێندن لە تاقیکردنەوەی زانکۆدا بەشداری دەکات‌و لە بەشی زانستی " شیمی " لە پەیمانگای بەرزی تاران، وەردەگیرێ‌و لەسالی ١٣٣٨ی هەتاویدا، بەڵگەنامەی لیسانسی شیمی وەردەگرێ .

پاش تەواوکردنی خوێندنی زانکۆ، وەک مامۆستای قوتابخانەی دواناوەندی دەگەڕێتەوە کوردستان ولەشارەکانی مەهاباد‌و ورمێ دا، بەو پەڕی لێهاتوویی‌و دڵسۆزییەوە، خزمەت بە قوتابیانی کورد دەکات .

لەو ساڵانەدا، هەرچەند کە بەفەرمی ئەندامی هیچ پارت‌و رێکخراوێکی سیاسی نەبوو، بەڵام وێڕای چەند مامۆستایەکی دیکەی کورد، بەدانانی بەرنامەیەکی زانستی لە قوتابخانەکاندا، ئاستی زانستی‌و وشیاریی نیشتیمانیی قوتابیانی کورد بەچەشنێ دەبەنەسەر کە دەرهەستە وهەربۆیە دەکەوێتە ژێر چاوەدێریی دەزگای هەواڵگری‌و سیخوڕیی رژێمی پاشایەتی‌و بۆ بێبەش کردنی قوتابیانی کورد لەو مۆمە رووناکیدەرە، دووری دەخەنەوە بۆشارەکانی " ئەراک‌و کەرەج " .

ساڵی ١٣٤٩ی هەتاوی لەبەشی تکنیکیی تاقیگەی شیمیی زانکۆی تاران دا کاری پێسپێردراو‌و بەهۆی توانایی ولێهاتوویی زانستییەوە، بۆرسی وەزارەتی زانستی ئێرانی بۆ درێژەدان بەخوێندن لە وڵاتی فەرانسە پێدراو‌و ساڵی ١٣٥١ی هەتاوی لەزانکۆی ژمارە ٦ی پاریس درێژەی بەخوێندن دا .

کاتێ دوکتور شەرەفکەندی دەگاتە پاریس، ئاڵوگۆڕی قووڵ‌و بنەڕەتییی لەنێو پێکهاتەو پرۆگرامی حیزبی دیموکراتی کوردستاندا پێکهاتوە وساڵێکە، پرۆفیسۆر عەبدولرەحمانی قاسملوو جڵەوی خەباتی نەتەوایەتیی رۆژهەڵاتی کوردستانی بەدەستەوە گرتوە‌و نیشتیمان لەبەردەم ئاڵوگۆڕی گرنگ‌و چارەنوسسساز دایە . رێبەری بیرمەندی گەلی کورد شەهید قاسملوو هاوکات لەگەل ئەوەدا کە لەپاریس، وانەی رۆژهەڵاتناسی دەگوتەوە، لەنێوان ئەوروپا‌و باشووری کوردستاندا لەهاتوچۆدا بوو بە ئامانجی کۆکردنەوە‌و رێکخستنی خەباتکارانی کورد بۆ درێژەدان بەڕیبازی پێشەوای مەزن قازی موحەمەد‌و رێکخستنەوەی نێوماڵی پەرتی حیزبی دیموکرات .

هەربۆیە کاتێ قاسملووی رێبەر ئاگادار دەبێ کە برای مامۆستا هەژاری شەرەفکەندی بۆ درێژەدان بە خوێندن هاتۆتە پاریس، لەساڵی ١٣٥٢ دا، پەیوەندی بە کاک سادق شەرەفکەندییەوە دەکات‌و لەیەکەم دانیشتن دا، هەردووکیان ئامانجێکی گەورە دەپێکن . کاک سادقی شەرەفکەندی لە سیما‌و بیری دوکتور قاسملوودا، رێبەر‌و تیئۆریسیەن‌و ئیدئۆلۆگێکی مەزنی نیشتیمانی دەبینێتەوە‌و قاسملووی رێبەریش، لە سیمای کاک سادقی شەرەفکەندی دا، خەباتکارێکی بەورە‌و نیشتمانپەروەرێکی راستگۆ‌و بەبڕشت بەدی دەکات .پاش ئەوەی کە قاسملووی رێبەر داوا لە کاک سادق دەکات، ببێتە ئەندامی حیزبی دیموکرات ،ئەو لاوە وشیارە، بێدوودڵی قەبووڵی دەکا‌و بەوشێوە شانازی ئەندامەتی لە حیزبی پێشەوا‌و کۆماری کوردستانی پێ دەبڕێ‌و لێرەوەیە کە ئەم هاوڕێیەتی‌و هاوخەباتییەی نێوان ئەم دوو شۆڕشگێڕە مەزنەی گەلەکەمان، کاریگەریی دەرهەست لەسەر مێژووی هاوچەرخی کورد، جێ دێڵێ‌و هەر ئەم دوانەش بوون کە حیزبی شەهیدانیان گەیاندە لوتکەی شانازی‌و شەرەف‌و کردیانە حیزبی خۆشەویستی کۆمەڵانی خەڵکی کوردستان .

پاش ئەوە کە لە بەشی شیمیی ئانالیزدا، خوێندنی دوکتورا تەواو دەکات، دوکتور سادقی شەرەفکەندی لە ساڵی ١٣٥٥ دا، دەگەڕێتەوە تاران‌و لە زنستگای " تەربیەت موعەلیم " ی تاراندا‌و لە کۆلیژی شیمی دەبێتە مامۆستا .

پێش گەڕانەوەی دوکتور شەرەفکەندی بۆ ئێران لەلایەن دوکتور قاسملوەوە، یەکەمین ئەرکی حیزبی‌و شۆڕشگێڕانەی پێ دەسپێردرێت کە بریتی بوو لە بازنەی پەیوەندیی نێوان قاسملووی رێبەر‌و رێکخستن‌و تێکۆشەرانی دێرینی حیزب لە ناوخۆی رۆژهەڵاتی کوردستان دا . ئەو ئەرکە پڕ لەمەترسییە لە کاتێکدا بە دوکتور سادقی شەرەفکەندی سپێردارا کە دەزگای سیخوڕیی ساواکی ئێران لە ئەوپەڕی هێز‌و دڕندەیی خۆیدا بوو، بەڵام دیسپلین‌و نەزمی شۆڕشگێڕانەی دوکتور سادقی شەرەفکەندی بەچەشنێ بەرز‌و پتەو بوو کە دەزگا سیخوڕی‌و هەواڵگرییەکانی رژێمی دژە کوردی پاشایەتی نەیانتوانی رەخنە بکەنە ناو رێکخستنە نهێنییەکانی حیزب‌و ئەو بەشەی کە لەژێر سەرپەرەستیی ئەو رێبەرە خەباتکارەدا بوو، تا سەرهەڵدانی شۆڕشی گەلانی ئێران‌و راگەیەندنی چالاکیی ئاشکرای حیزبی دیموکرات بە نهێنی‌و پارێزراوی مایەوەو بەم شێوەیە، دوکتور سادق لەیەکەمین تاقیکرنەوەی حیزبی‌و شۆڕشگێڕانە دا سەرکەوتنی بەدەست هێناو، زیاتر لە جاران کەوتە بەر نەزەر‌و بیری تیژی قاسملووی رێبەر .

لە ساڵی ١٣٥٨ دا لەلایەن دوکتور قاسملوەوە، بە کۆمیتەی ناوەندی پێشنیارکرا کە دوکتور سادق، ببێتە راوێژکاری کۆمیتەی ناوەندی‌و ئەو داوایە لەلایەن کۆمیتەی ناوەندییەوە پەسەند کراو‌و بەم شێوەیە، دوکتور شەرەفکەندی بووە ئەندامی رێبەریی حیزبی دیموکراتی کوردستان‌و گشت وزە‌و توانای خۆی خستە خزمەتی جووڵانەوەی رزگاریخوازانەی کوردستانەوە .

لە کۆنگرەی چوارەمی حیزبی دیموکراتی کوردستانی ئێران کە لە ڕەشەمەی ١٣٥٨ دا بەڕێوەچوو، بە کۆی دەنگ بە ئەندامی کۆمیتەی ناوەندی هەلبژێرا‌و بەرپرسایەتیی کۆمیتەی حیزبی دیموکرات لە شاری" تاران "ی پایتەختی ئێرانی کەوتە ئەستۆ . لە کۆنگرەی چواردا کە توودەییەکان بە هاوئاهەنگیی جەماران‌و مۆسکۆ‌و بەناوی خەباتی دژە ئیمپریالیستییەوە، بە پێی بەرنامەیەکی لەپێشدا داڕێژراو، هەوڵیاندا، بزاڤی رزگاریخوازانە‌و نەتەوەیی حیزبی دیموکرات لە گێژەنە بێننە دەرێ‌و پاش بەلارێدابردنی، گیانی لێ بستینن، دوکتور سادقی شەرەفکەندی بە داکۆکی لە هێڵی نەتەوەیی- دیموکراتیکی قاسملووی رێبەر، رۆڵێکی گرنگ‌و شوێندانەری گێڕا لە پاراستنی پێکهاتەی تەشکیلاتی‌و پەیامی رزگاریدەر‌و رووناکیدەری حیزبی پێشەوای شەهید قازی موحەمەدی مەزن دا .

پاش شکستی وتوێژەکانی دەستەی نوێنەرایەتیی گەلی کورد لەگەڵ رژیمی تازە بەدەسەڵاتگەیشتووی کۆماری ئاخوندی دا، دۆخەکە بەرەوئەوە دەڕۆشت کە ژیانی دوکتور شەرەفکەندی لە تاران بکەوێتە مەترسییەوە، هەر بۆیە لەلایەن رێبەری جووڵانەوەوە، بانگهێشتی کوردستان کرایەوە‌و بەجێهێشتنی زانکۆ‌و ژیانی ئاسوودەی شار، ناویشی گۆڕا بۆ دوکتور سەعید‌و ئیدی دوکتور سەعید، ببوە پێشمەرگەیەکی خاکی پۆشی، چیا هەنگاوی دڵ پڕ لەسۆڕش .

لێرە بەدواوە ئیدی

جیاوازی لەنێوان ئەو‌و هاژەی رووباردا نەمابوو...

لێرە بەدواوە ئیدی قژی ئەو‌و لاسکی گژوگیا هەر یەک بوون

لە ئێرە بەدواوە...ئیدی ئەو هەڵۆیەکی چیانشینی چاوپڕ لە هیوا بوو

لێرە بەدواوە ... هەر ئەو بوو هێزی بە ڕەوەز دەبەخشی و

هیوش بە دارستان

لێرە بەدواوە دوکتور سەعید... خودی شۆڕش بوو

لەهاوینی ساڵی ١٣٥٩ دا، لەلایەن کۆمیتەی ناوەدییەوە بە ئەندامی دەفتەری سیاسی هەڵبژیراو لەهەموو کۆنگرەکانی پێنج‌و شەش‌و حەوت وهەشت‌و نۆدا، سەرەتا لە لایەن کۆنگرەوە بەئەندامی کۆمیتەی ناوەندی‌و پاشان لەلایەن کۆمیتەی ناوەندییەوە بەئەندامی دەفتەری سیاسی هەڵبژێردرا.

کاک دوکتور سەعید لە نێو حیزب دا زۆرتر لە بەشی چاپەمەنی‌و راگەیاندن دا ئەرکی پێسپێردراوە‌و لە ساڵ ١٣٦٥ وە تا کاتی تیرۆرکرانی رێبەری مەزن دوکتور قاسملوو، ئەرکی جێگری سکرتێری لەسەرشان بوو‌و پاش شەهیدکرانی قاسملووی رێبەر، هەتا ٢٦ی خەرمانانی ١٣٧١ کە لەلایەن تیرۆریستەکانی تارانەوە، شەهید کرا، بەوپەڕی لێهاتووییەوە رێبەرایەتیی جووڵانەوەی نیشتیمانیی رۆژهەلاتی کوردستانی لەئەستۆ بوو‌و مێژووش دەڵێ :

شەرەفکەندی ... جەنگاوەرێ بوو لە رەگەزی ئاگر‌و شۆڕشگێڕێک بوو لە رەگەزی چیا . خاکەڕا بوو ... وەک گوڵە کێویلەی بن بنار‌و بەتەوژم بوو وەک سیروان . خەباتکارێکی بەورە‌و رووناکبیرێکی دەروەست‌و رێبەرێکی هەڵقوڵاو لە باوەڕی پێشمەرگە بوو . ئەو... سوسیالیستێکی بەبیرو باوەڕ‌و نیشتیمانپەروەرێکی راستگۆ بوو.

رێبەری بەبڕشت کاک دوکتور سەعیدی شەرەفکەندی، کەسایەتییەکی فرەرەهەند بوو‌و دیاریکردنی تایبەتمەندییە بەرجەستەکانی کەسایەتییەکی وا فرە رەهەند‌و تێکچڕژاو کە تایبەتمەندییەکانی، یەکیەتییەکی پتەویان پێک هێنابوو، ئاسان نیە‌و رووبارێکی وا پڕتەوژم، تەنیا بەستێن‌و کەنارەکانی دەتوانن، وێنای بکەن .

هەرکەس لە نزیکەوە دوکتور سەعیدی دیبێ یان گوێی لە پەیڤە کەسکەکان بووبێ، یاخود رستەکانی خوێندبێتەوە، لە سیما‌و کەسایەتی ئەودا، شۆڕشگێڕێکی پڕ بەنامای وشە دەبینێ .

دوکتور سەعید، شۆڕشگێڕێ بوو کاتێ هاتە نێو کۆڕی خەبات، ئیدی ماڵئاوایی لە ژیانی ئاسایی کرد‌و خۆی دابینی شۆڕش کرد . شۆڕش بۆ ئەو بازاڕێ نەبوو بۆ سەودا، شۆڕش بۆ ئەو هەڵوەشانەوەی کۆی گرێچنی نەزمی سەپێنراوی ئارایی‌و بونیاتنانی سیستمیکی نوێ بوو کە بتوانێ جڤاکێ ئاڤا بکا، کە ماتۆڕی بزوێنەرەکەی، لەباتی" زێڕ وزۆر‌و ساختەچێتی "، ئیرادەی ئازاد‌و مافی بەرامبەر‌و هەلی وەک یەک بێت .

کرداری شۆڕشگێڕی، لە روانگەی شەهید شەرەفکەندییەوە، کردەیەکی مرۆڤانیی سەرچاوەگرتوو لە خۆشەویستی‌و ئەڤینی ئازادی بوو کە لە پرۆسەیەکی زەمانیدا دەبوە "باوەڕ"‌و سەرجەم ئاکاری مرۆڤی شۆڕشگێر دەخاتە ژێر کاریگەریی خۆیەوە.

لە دیدی شەرەفکەندی دا، شۆڕشی نیشتیمانیی کوردستان سەرەتا شۆڕشێکی دەروونییە، بەڵام تەنیا لەم قۆناغەدا قەتیس نامێنێتەوە. لە دید‌و تێڕوانینی ئەو دا، مرۆڤ‌و مافەکانی بابەتی شۆڕشن‌و هەربۆیە پێی وا بوو کە کردەی شۆڕشگێڕی، کردەیەکی مرۆڤ تەوارانەیە‌و ئامانجی کردەی شۆڕشگێڕی بەرزنرخاندنی مرۆڤ‌و مافەکانییەتی‌و هەوڵێکە بۆ گۆڕینی دۆخی هەنووکەیی مرۆڤ کە پێکناکۆکە لەگەڵ نرخ‌و بەهاکان‌و مافەکانیدا .

لە روانگەی دوکتور سەعیدەوە، ئامانجی مرۆڤی شۆڕشگێڕ، تەنیا تێکەوەپێچانی دۆخی ئارایی نیە، واتە تەنیا تێکدەر‌و ڕووخێنەر‌و هەڵوەشێنەر نیە، بەڵکوو ئامانج لە هەڵوەشانەوە، بنیاتنان‌و ڕۆنانێکی سەرلەنوێیە کە تەبا بێت لەگەڵ نرخ‌و بەهاکانی مرۆڤدا

هەر بۆیەکاک دوکتور سەعید وەک نموونەیەک بەرزی مرۆڤی شۆڕشگێڕ ئەوەندەی کە سەرقاڵی ڕاگەیاندن‌و لەقاودان‌و خەبات‌و بەربەرەکانێ بوو، لەوەش زێدەتر، وەک مامۆستایەکی بیرتیژ‌و خاکەڕا، سەرنجی دەدایە ڕۆنان‌و بنیاتنان‌و ئاڤا کردن.

کرداری دوکتور سەعید، کردارێکی ئارمانجخوازانە بوو. هەر بۆیە لە روانگەی ئەوەوە، مرۆڤی شۆڕشگێڕ بوونەوەرێکی ئارمانجخوازە‌و چاوی بڕیوەتە ئاسۆی ڕزگاری‌و لەم ڕێگەیەشدا، سنگفراوان‌و یەکیەتیخوازە‌و خاوەن ئاکارێکی پلۆرالیستییە‌و فرەیی قەبووڵ دەکات، بێئەوەی رێگا بدات بێ دیسپلینی، تانۆپۆی رێکخراو بکرۆژێ . لە روانگەی ئەوەوە، مرۆڤی شۆڕشگێڕ دژی هەرچەشنە تاکڕەوییەکە کە مەیلی بەلای پاوانکردن‌و ئەوپەڕگیریدا هەبێ‌و بیهەوێ رێکخراو بکاتە " کاڵت "‌و خۆیشی وەکو " بوت " بپەرسترێ .

یەکێکی دیکە لە تایبەتمەندییە دیار‌و بەرجەستەکانی، خەباتکاری ناسراوی گەلەکەمان، دوکتور سەعیدی شەرەفکەندی " دادپەروەر بوون " ببو .

هەر بۆیە لە روانگەی ئەوەوە، تەنیا دەتوانین بە کردەیەک بێژین شۆڕشگێڕانە کە ئامانجی "داد پەروەری" بێت‌و خودی کردەکەش‌و ئامرازی گەیشتن پێیشی، دادپەروەرانە بێت .

ئەو پێی وا بوو کە مرۆڤی شۆڕشگێڕ پێش ئەوەی دادخوازبێت، دەبێ "دادپەروەر" بێت. چوونکە تەنیا مرۆڤی "دادپەروەر"ە کە دەتوانێ "داد خواز" بێ .

کردەی شۆڕشگێڕانە لە روانگەی دوکتور سەعیدەوە، کردەیەکی ئاوەزخوازانە بوو . واتە ئەوە "ئاوەز"ە کە دەبێتە چرای ڕێنیشاندەری مرۆڤی شۆڕشگێڕ بۆ گەیشتن بە ئامانجە مرۆڤانییەکان. بەو هۆیەوە کە ئامانجی شۆڕش " دادپەروەری "یە، کردەی شۆڕشگێڕانە دەبێ لەژێر ڕۆشنایی "ئاوەز"دا ڕێ بکا تا بتوانێ "دادپەروەری" ئاڤا بکات. کردەی کوێر‌و هەستەکیی‌و هەڵنەسەنگێنراو، چوونکە "نائاوەزمەندانە"یە، ناتوانێ دینامۆی گەیشتن بە "دادپەروەری" بێت کە خۆی چەمکێکی سەرچاوەگرتوو لە ئاوەزە .

لە روانگەی دوکتور سەعیدی شەرەفکەندیەیوە، شۆڕشی کوردستان پێویستە، شۆڕشی سەرجەم چین‌و توێژەکانی خەڵکی کوردستان بێت. چوونکە پێکناکۆکیی سەرەکی لە ڕۆژهەڵاتی کوردستاندا، پێکناکۆکیی نێوان گەلی بندەست‌و گەلی سەردەستە‌و هەر ئەو پێکناکۆکی‌و کەلێنە سەرەکییەشە کە پێماندەڵێت، قۆناغی ئێستای خەباتی کورد لە ڕۆژهەڵاتدا، قۆناغی "ڕزگاریی نیشتیمانی"یە. لە روانگەی ئەوەوە، ڕزگاریی نیشتیمانی، چەمکێکی گشتی‌و گشتگیرە‌و سەرجەم چین‌و توێژەکانی کۆمەڵگای کوردستان دەگرێتەوە‌و تا کاتێ سەرجەم چین‌و توێژەکان لە شۆڕشی نیشتیمانیی کوردستاندا، خۆیان نەبیننەوە‌و ڕێکنەخرێن‌و ئاراستە نەکرێن، ئاسۆی ڕزگاری ناڕوون‌و لێڵ دەمێنێتەوە.

دوکتور شەرەفکەندی لەسەر ئەو باوەڕە بوو لە قۆناغی ڕزگاریی نیشتیمانی‌دا، پێوستە بزاڤی کورد پێ لەسەر خاڵە هاوبەشەکان دابگرێ‌و لە هێنانەگۆڕی هەر پرسێک کە ببێتە هۆی ناکۆکی‌و پەرتەوازەیی خۆی ببوێرێ‌و یەکڕیزیی نیشتیمانی ببێتە بنەمای گشت کردە‌و هەڵوێستە سیاسییەکان.

دوکتور شەرەفکەندی، ئەو تێکۆشەرە بوو کە رێگای نەدا، پاش کۆستی لەدەستدانی قاسملووی مەزن، شۆڕش تووشی هەرەس‌و هەڵوەرین بێ . هەرچەند سێبەری قاسملوو، سێبەرێکی چڕ‌و بەهەیبەت بوو، بەڵام هەتاوی شەرەفکەندی هەر تیشکی دەپرژاند‌و پاش قاسملووش، سەلماندی کە ئەو خۆیەتی‌و رەوەزی ئیرادەیە‌و رۆحی رووبارێکی خرۆشان .

مرۆڤی مەزن، مردنیشی مەزنە‌و چەند ساڵ پاش تیرۆرکرانی ئەو رێبەرە بەبڕشتە، دادگای مێژوویی میکۆنووس پێک هات. دادگایەک کە تێیدا بۆ یەکەمجار لە مێژووی کورددا، پلاندارێژەران‌و بەڕێوەبەرانی تیرۆری رێبەری بەبڕشتی نەتەوەیی کاک دوکتور " سەعید شەرەفکەندی " دادگایی کران‌و بۆ یەکەمجار لە مێژوودا، رژیمی فاشیستی ئیسلامیی ئێران، لە دادگایەکی سەربەخۆ‌و دادپەروەرانەدا، مەحکووم کرا‌و پەرەدە لەسەر ماهییەتی دژە مرۆیی ئەو رژیمە هەڵدارایەوە

لەمێژووی نەتەوەی کورد لە رۆژهەڵات دا، سمکۆ‌و پێشەوا‌و کاک فوئاد‌و دوکتور قاسملو‌و دوکتور شەرەفکەندی، لەلایەن فاشیزمی نەتەوەپەرەست‌و مەزهەبیی فارسەوە، تیرۆر‌و لەسێدارە دراون، کە جگە لە پەروەندەی دوکتور شەرەفکەندی، ئەوانی دیکە بەداخراوی ماونەتەوە‌و هیوادارین لە داهاتوودا، کەیسی ئەو خەباتکارانەی دیکەش بکەوێتە گەڕ‌و پەردە لەسەر کوردکوژیی فاشیزمی فارس هەڵبدرێتەوە.

رۆحت شاد خەباتکاری هەتاسەری ماف‌و ئازادییەکانی خەڵکی کوردستان !

رۆحت شاد، مامۆستا‌و چراوگی خەباتی ئەنگوستەچاو!

 

  ___________________________________ 

 ــ بۆ پێوه‌ندی‌ گرتن له‌گه‌ڵ‌ به‌ڕێوه‌به‌ر‌ى ماڵپه‌ڕ له رێگه‌ی‌ فه‌یسبووكه‌وه‌ ئێره‌ كلیك بكه‌ 


ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 808
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy