هه‌ڵۆی کوردستان

-
هەڵە
  • JFolder::create: Could not create directory

میراتێک بۆ هەموو نەسڵەکان

پۆستی ئەلیکترۆنی چاپکردن

majid_haqqi_-_2017_-_webحەفتا ساڵ بەسەر لەسێدارەدانی پێشەوای کوردان قازی محەمەد یەکەم سەرۆک کۆماری کوردستان تێپەر دەبێت. حەفتا ساڵ لەمەوبەر لەمەوبەر کاتێک داگیرکەرانی کوردستان پێشەوا قازی محەمەد سەرۆک کۆماری کوردستان‌و رێبەری حیزبی دیموکرات، سەدری قازی‌و سەیفی قازیان لە سێدارەدا وایان زانی تازە پرسی کورد‌و شۆرشی کورد بۆ رزگاری هەتا هەتایە لە سێدارە درا‌و تازە کورد ناوێرێ روو لە شۆرش بکات وداوای مافەکانی خۆی بکاتەوە. حەفتا ساڵ لەمەوبەر کاتێک پێشەوا قازی محەمەدیان لە سێدارەدا وایان زانی ناسنامەی کوردی بۆ هەتاهەتایە لە سێدارە دەدرێ، کورد بە تەواوی ئاسیمیلە دەکرێ‌و زنجیری یەخسیری‌و بن دەستی قبووڵ دەکات‌و بیر لە شۆرش، ناکاتەوە. ٧٠ ساڵ لەمەوبەر کاتێک خۆری ئاسمانی کوردستانیان کوژاندەوە داگیرکەرانی کوردستان وایان بیردەکردەوە تازە کوردستان روو لە خۆر ناکات. خۆری کوردستان بۆ هەتاهەتایە ئاوا بوو‌و خەڵکی کوردستان لە تاریکستان دەمێننەوە‌و بیر لە خۆر ناکەنەوە.

حەفتا ساڵ دوای لە سێدارەدانی پێشەوا قازی محەمەد، خۆر ئاسمان گشت کوردستان لە هەڵاتندایە، پەیامی پێشەوا قازی محەمەد بە هەموو کوردستان گەیشتووە‌و پێشەوا بۆتە سەمبۆلی ئەخڵاق، خۆراگری، راستگۆیی، وەفا، تۆلێرانس، یەکسانی، خۆنەویستی‌و ئاشتی کۆمەڵایەتی.

 

peshawa_qazi_-_10_-_2017_-_1


ئەمرۆ یادی حەفتا ساڵەی پێشەوای سەکردە لە کاتێکدا دەکرێتەوە، کە بە هۆی قۆناغی راسانەوە تیشکی هیوای نوێبوونەوە‌و نووژەن بوونەوەی قۆناغی سێهەمی دوای رێنێسانسی بزووتنەوەی رزگاری کورد سەرانسەری رۆژهەڵاتی کوردستانی تەنیوەتەوە‌و ئەم قۆناغە نوێیە وەک کابووسێک دەهۆلێ دەروون بۆشی رژێمی سەرکوتگەر‌و داگیرکەری کۆماری ئیسلامی رووخاندووە.

پێشەوا قازی محەمەد لە ماوەی کەمی ژیانی رێبەری سیاسی خۆیدا بە هۆی تایبەتمەندیە شەخسیەکانی خۆیەوە بوو بە خوڵقێنەری هەندێک لە بنەماکانی ئەخڵاقی ناو بزاڤی کوردا کە تا ئەمرۆش وەک بنەمای نەگۆڕ لە بزاڤی نەتەوایەتی کوردستان‌و حیزبی دیموکراتی کوردستانی ئێراندا رەچاو دەکرێن:

ئەخڵاق‌و مرۆڤ دۆستی: پێشەوا قازی محەمەد لە هەموو هەڵسوکەوتی خۆیدا لە گەڵ دۆست‌و دوژمن بە رەوشت بوون، ئەخڵاقی بەرز‌و رێزگرتن لە کەڕامەتی مرۆڤی رەچاو کردوە. ئەمرۆ رێزگرتن لە کەڕامەتی مرۆڤ لە لایەن حیزبی دیموکراتەوە بنەمای ژیان دەزانرێت. لەو رووەوە رێزگرتن لە بنەماکانی ئازادی، دادپەروەری‌و ئاشتی میراتی پێشەوا قازی محەمەدن کە بۆ ئێمە بەجێ ماون‌و ئێمە رێبوارانی رێگای پێشەوا درێژە بە گەشەکردن‌و قووڵکردنەوەی ئەو بنەما فەلسەفیانە دەدەین لە ناو خەڵکی کوردستاندا.

دەروەست بوون‌و وفاداری بە پەیمان: پێشەوا قازی تا کاتی لە سێدارەدان وەفادار بەو پەیمانە مایەوە کە لە رۆژی دووی رێبەندانی 1325 لە چوارچرای مەهاباد بە خەڵکی کوردستان دابوو. پەیمانی وەفادار بوون‌و خزمەتکردن بە گەل‌و نشتیمان تا دواهەناسەکانی ژیان. کاتێک هێزەکانی داگیرکەری رژێمی ئێران بە کوردستان نزیک دەبوونەوە، پێشەوا قازی محەمەد دەیتوانی لە مەهاباد دەربچێ‌و خۆی رزگار بکات، بەڵام لە پێناو بەرگری کردن لە قەڵاچۆی خەڵکی کوردستان، هەرچۆنێک لە مەیدانی چوارچرادا پەیمانی دابوو، سینگی خۆی کردە قەڵغانی پاراستنی نەتەوەکەی. نەریتێک کە لە ناو بزاڤی رۆژهەڵاتی کوردستاندا هەروا پێرەوی دەکرێت. رێبەرانی حیزبی دێموکراتی کوردستانی ئێران لە دکتۆر قاسملووی رێبەرەوە بگرە تا ئەندامانی دیکەی رێبەری تا دواهەناسەی ژیانیان وەفادار ماون بە رێباز‌و پەیمانێک کە لە گەڵ نەتەوەکەیان داوە.

یەکسانی خوازی‌و دادپەروەری: تەنیا یەک مانگ‌و نیو دوای دامەزراندنی کۆماری کوردستان، رۆژی ٢٤ی رەشەمەی ١٣٢٥ یەکیەتی ژنانی دێموکرات دامەزراو. بەوە کۆماری کوردستان‌و پێشەواقازی محەمەدی رێبەری حیزبی دیموکرات لە سەر پێویستی بەشداری ژنان لە خەبات‌و چالاکیەکانی کۆمەڵایەتی، سیاسی‌و ئابووری پێداگری کرد‌و پەیامی ئەوەی بە ئێمە دا کە بەبێ بەشداری چالاکانەی ژنان لە پرسە سیاسی‌و کۆمەڵایەتی‌و ئابووریەکاندا کۆمەڵگا ناتوانێت رووی ئاشتی، گەشەکردن‌و بەختەوەری بەخۆیەوە ببینێ. پرسی ژن بۆ حیزبی دیموکراتی کوردستانی ئێران لەو روانگەیەوە پرسێکی پرەنسیپی‌و بنەماییە کە بەداخەوە بەهۆی هەلومەرجی داسەپاو بەسەر شۆرشەکەمان نەتوانراوە بەو جۆرەی کە پێویستە بەرەو پێش بروات.

ئاشتی کۆمەڵایەتی‌و رێزگرتن لە فرەچەشنی کۆمەڵایەتی: لە پێناو پاراستنی بەرژەوەندیە نەتەوایەتیەکان، کۆماری کوردستان توانی جۆرێک پێکهاین لە نێوان چینی جووتیار‌و خاوەن زەوی پێک بێنێت کە بەرژەوەندی هەردوولا بەشێوەیەکی دادپەروەرانەی سەردەم بپارێزرێ‌و بەوە ئاشتی کۆمەڵایەتی لە ناو کۆمەڵگادا مسۆگەر بکرێت. هاوکات لە گەڵ ئەوە کۆماری کوردستان لە ژێر رێبەری پێشەوادا رێزی لە هەموو کەمایەتیە نەتەوایەتی‌و زمانیەکانی دانیشتووی کوردستان دەگردت. لەو سەردەمەدا کە جارێ پەروەردەی زمانی زکماکی وەک ئەمرۆ نەببوو چەمکێکی مافی مرۆڤی، لە سایەی کۆماری کوردستاندا خەڵکانی غەیرە کورد بۆیان هەبوو بە زمانی زکماکی خۆیان بخوێنن‌و بنووسن. خەبات لە پێناو ئاشتی کۆمەڵایەتی لە هەموو ئاستەکانی خۆی‌و رێزگرتن لە فرەچەشنی کۆمەڵگا یەکێک لە بنەما نەگۆرەکانی ئەمرۆی بزاڤی نەتەوایەتی گەلی کورد‌و حیزبی دێموکراتن کە وەک میراتی پێشەوا قازی محەمەد بۆ نەوەکانی داهاتووی نەتەوەکەمان بەجێ ماوە. گەشەپیدان‌و قووڵترکردنی ئاشتی کۆمەڵایەتی‌و رێزگرتن لە فرەچەشنی لە لایەک دەبێتە هۆی ئاسایش‌و تەناهی کۆمەڵایەتی‌و لەلایەکی دیکەوە پێشكەوتنی کۆمەڵگای کوردی بەدوای خۆیدا دێنێت.

بزاڤی رزگاری خوازانەی کوردستان ٧٠ ساڵ دوای لەسێدارەدانی پێشەوا قازی محەمەد، رەساڵەت‌و ئەرکێکی قورستر لەو سەردەمەی بە ئەستۆیە. لە کۆمەڵگایەکی فرەچەشن‌و بگۆڕی وەک کۆمەڵگای کوردستاندا لە کاتێکدا کۆماری تیرۆر‌و داگیرکاری وەک شێرپەنجە هەموو شێوازەکانی ژێنۆسایدی نەتەوایەتی دژی گەلی کورد بەکار دەبات، لەکاتێکدا کە تونداژۆیی ئایینی بووەتە هەڕەشەیەک دژی پێکەوە ژیانی مرۆڤەکان، لە کاتێکدا کە رۆژهەڵاتی ناوەراست بەرەورووی داڕشتنەوەیەکی نوێیە، ئەرکی ئێمە رێبوارانی پێشەواقازی محەمەد قورستر‌و پێویستی بەشداریمان لە خەبات‌و درێژەدان بە رێبازی شەهیدان ئەخڵاقیتر‌و مرۆڤانەترە.

٧١ ساڵ لەمەوبەر لە مانیفیستی راگەیاندنی دامەزراندنی حیزبی دیموکرات دا خەبات دژی فاشیزم، تونداژۆیی، خەبات دژی هەڵاواردن خەبات دژی پەراوێزخستنی مرۆڤ‌و خەبات بۆ ئاشتی دیموکراسی‌و دادپەروەری کۆمەڵایەتی بنەمای خەباتی حیزبی دێموکرات ناسران. ئەمرۆ ئەم بنەمایانە‌و بنەماکانی ئەخڵاقی پێشەوا قازی محەمەد هەروا رێنیشاندەری خەباتی ئێمەن‌و پێویستی وەدیهاتنی ئەو ئامانجانە لەو هەلومەرجەدا پێویستیەکی هەمەگرتر‌و ئەمرۆییترن. لەو رووەوە جێی شانازیە بۆ هەموومان کە رێبواری رێبەرانێکی شەهید بن، کە فەلسەفەی ژیانیان، ئەو بەهایانەی ئەوان لە پێناویدا گیانیان لە دەست داوە بوونەتە بەهای گشتی‌و هەمەگری نەتەوایەتی، ناوچەیی‌و تەنانەت جەهانیش.

ئەرکی ئێمەیە ئەم بەهایانە بناسین، قووڵ‌و بەرینیان بکەینەوە‌و بە نەوەکانی داهاتوو بناسین. تا لەلایەک بناغەی نەتەوەیەکی تەندوروست‌و سەرکەوتوو دابنێین‌و لەلایەکی دیکەوە لە بەهاکانی مرۆڤی خۆمان خاوەن دەرکەوین‌و رۆحی شەهیدان‌و رێبەرانی شەهیدمان شاد بکەین. بەوە زییندوویی رۆحی شەهیدان مسۆگەر دەکرێت‌و خەونی نەوەکانی نەوەکانی خەبات‌و شەهیدانمان وەدی دێت.

 

 _________________________________________

ــ بۆ پێوه‌ندی‌ گرتن له‌گه‌ڵ‌ به‌ڕێوه‌به‌ر‌ى ماڵپه‌ڕ له رێگه‌ی‌ فه‌یسبووكه‌وه‌ ئێره‌ كلیك بكه‌ 

ــ تێلێگرامی‌ "هه‌ڵۆی‌ كوردستان"


ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1291
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy