هه‌ڵۆی کوردستان

-
هەڵە
  • JFolder::create: Could not create directory

با پەکەکە بزانێ کە " ئێران " سەری مارەکەیە

پۆستی ئەلیکترۆنی چاپکردن

erfan_rehemo_web_logo_1لە ماوەی ٢٠ ساڵی رابردوو دا، پارتی کرێکارانی کوردستان، سیاسەتێکی چەوتی لە هەمبەر لانیکەم ٣ پارچەی کوردستان دا، گرتۆتە بەر‌و ئەو سیاسەتەش هاوئاهەنگ بوە لە تەک رژیم فاشیستیی ئێراندا. کاتێک کەعەبدوڵا ئۆجەلان لە دیمەشقی پایتەختی سوریا دەژیا، بۆ چرای سەوز هەڵکردن بۆ رژیمی خومەینی‌و هاوپەیمانە بەعسییەکەی، بەدەیان جار لە نووسین‌و هەڤپەیڤینەکانیدا، دەیگووت :" خاکی کوردستان نەکەوتۆتە نێو ولاتی سوریە‌و ئەو کوردانەی لەوێ دەژین، لەلایەن عوسمانییەکانەوە بۆ ئەو ناوچەیە راگوێزراون‌و ئێمە‌و سەرۆک حافز ئەسەد، لە هەوڵی ئەوەداین کە کوردەکانی پەنابەری سوریا، بگەڕێنینەوە بۆ زێدی خۆیان لە باکووری کوردستان"

هەر ئەم بۆچوونەی ئۆجەلان بوو کە دروشمێکی کۆمیکی لێهاتەدەر کە ئەو ساڵانە‌و پیش بەهار بەناو عەرەبی لە لایەن ئەندامانی پەکەکە وە دوپات‌و هەزارپات دەکرایەوە "باکوور-باشوور-رۆژهەلات...ئاپۆ سەرۆکی وڵات ".لایەنی کۆمیکی ئەم دروشمە ئەوە بوو کە کوردستان تەنیا وڵاتێک بوو کە "رۆژئاوا "ی نەبوو.

دوای راپەڕینی باشووری کوردستان، پەکەکە بە سەدان جار رایگەیاند کە "هەرێمی کوردستان "، ساختەی ئمپریالیزمە‌و بۆ دژایەتی پەکەکە دروست کراوە، ئاشکرایە کە ئەم وتەیە ئافەرینی هەرچوار داگیرکەرەکەی کوردستانی بەدواوە بوو‌و زۆر خۆشحاڵ بوون کە وتەیەکی دژە کوردی ئەوتۆ لە زاری پارتێکی کوردیەوە بەردەبۆوە. لە ساڵەکانی شەڕی خۆکوژی لە باشووری کوردستاندا، پەکەکە درێژەی بە سیاسەتی چەوتی خۆی دا، لەگەڵ رژیمی عیراق‌و ئێراندا، هاوئاهەنگ بوو بۆ گەرمکردنی کێشەکانی باشووری کوردستان‌و لەتەک هەردوو هێزی سەرەکیی باشوور دا، کەوتە شەڕی خۆکوژییەوە‌و نەتانیا هەوڵی نەدەدا کە هێمنی باڵ بەسەر باشووردا بکێشێ، بەڵکوو خۆیشی ببوە بەشێکی جیدی لە کارەساتەکانی باشووری کوردستان دا.

 

sari_maraka_-_2


دزێوترین سیاسەتی پەکەکە لەهەمبەر رۆژهەڵاتی کوردستان دا بوە .هەموان لەیادیانە کە بەناڕەوا هێرشیان کردە سەر پۆلێ پێشمەرگەی " یەکیەتیی شۆڕشگێڕانی کوردستان "‌و پاش شەهید کردنیان لە کردەوەیەکی نامرۆڤانەدا، تەرمەکانیان رادەستی رژیم خومەینی کردەوە‌و پاسدارانی خوێنڕێژیش، ئەو تێکۆشەرانەیان بە مردووی، لە پشت ماشینی سپاوە بە شەقامەکانی رۆژهەڵاتدا، رادەکێشا تا رۆڵەکانی رۆژهەلاتی کوردستان چاورترسێن بکات.

لە ٣ی رەشەمەدا، کاتێ کوردەکانی رۆژهەڵات دژی گرتنی " ئۆجەلان" هاتنە سەرشەقامەکان‌و وێڕای پشتیوانی لە ئۆجەلان، دژی سیاسەتی فاشیستیی رژیمی ئێران، دروشمیان دا‌و بە دەیان تێکۆشەری شاری سنە، خەڵتانی خوێن کران، کۆنسەی سەرکردایەتیی پەکەکە، لەباتی دەستخۆشی کردن لە کوردانی رۆژهەڵات، بەیاننامەیەکی دژی خۆپیشاندەرانی سنە دەرکرد‌و ئەوانی بە بەکرێگیراوی ئمپریالیزمی ئامریکا‌و ئیسرائیل ناساند.

سیاسەتە چەوتەکانی پەکەکە دژی تەڤگەڕی رۆژهەڵات گەیشتە لوتکە، کاتێ حیزبی دیموکراتی کوردستانی ئێران، لە کێلەشین جێگیر بوو، خێڵی درۆ‌و قەلەمە کۆیلەکانی رۆژهەڵات کەوتنە خۆبادان‌و ئەو درۆ شاخدارەیان بڵاو دەکردەوە، کە حیزبی دیموکرات بە فەرمانی " ئەردۆگان " چۆتە چیا‌و ئامانجیان ئەوەیە دەنگەکانی "هادەپ " لە کزی بدات. زۆری پێ نەچوو تەپڵی ریسوابوونی درۆکانیان لێدراو‌و بەبردنە ناوشاری شەڕی کوێر‌و بێ ئەنجامیان، سەری "هادەپ "‌و دەمیرتاش 'یشیان خوارد.

کۆمیدی ترین پروپاگەندای پەکەکە دژی بزاڤی نەتەوایەتیی رۆژهەلاتی کوردستان، لە زاری " موراد قەرەیلان" ەوە هاتە دەر کە لە تلویزیۆنی " نەورۆز " دا گوتی :" نابێ خەباتی چەکداری دژی کۆماری ئیسلامی بکرێ، بەڵكو پێویستە خەباتی مەدەنی پێشبخرێ، چونکا ئەگەر تۆ خەباتێکی چەکداری دژی کۆماری ئیسلامیی ئێران بەڕێ بخەی دەکەویتە خزمەتی تورکیا‌و عەرەبستانی سعودی"

پرسیار لە بەڕێز قەرەیەلان ئەوەیە، بەپێی ئەو لۆژیکەی بەڕزیشتان " ئایا خەبات دژی تورکیا ناچێتە خانەی خزمەت بە کۆماری ئیسلامی‌و رژیمی بەشار ئەسەد ؟ "

پێویستە ئەو پرسیارە بەرەوڕووی پەکەکە بکەینەوە، چۆناوچۆنە ئێوە دەیان پارلمانتارتان هەبوو، دەیان شارەداریتان بە دەستەوە بوو، میتینگی ملیۆنیتان رێک دەخست، رۆژنامەنووسەکانتان لە دەرەوە بە ئاشکرا دەڕۆشتنە تورکیە‌و بەرنامەیان بۆ کاناڵەکانی پەکەکە دروست دەکرد، بەڵام وازتان لە خەباتی مەدەنی هێنا‌و شەڕتان بردە شارەکان‌و هەرچی " دەمیرتاش " رستبووی، کردتانەوە بە خوری‌و سەدان گەریلا‌و خەڵکی سڤیلتان بە کوشت دا‌و دەیان شاری باکووری کوردستان بە هۆی سیاسەتی چەوتتان لە لەیەن تورکیای فاشیستەوە کاول کرا، بوونە هۆی ئاوارەیی زیاتر لە یەک ملیۆن کورد‌و چەند ملیارد دۆلار زیانتان گەیاند بە ئابووریی خەڵک لە باکووری کوردستان، بۆ خۆتان شەڕی چەکداری بەرەوا دەبینن، بەڵام بۆ رۆژهەڵاتی کوردستان کە بچوکترین دەلاقە بۆ هەناسەدانی سیاسی‌و مەدەنی بوونی نیە، رەچەتەی خەباتی مەدەنی دەپێچنەوە ؟

کەمتر لە دوو رۆژ پاش پشتیوانی ناراستەوخۆی "موراد قەرەیەڵان" لە کۆماری ئیسلامی، هێزەکانی رژیمی بەعسی سوریا، هێرشیان کردە سەر بەشێک لە شاری "حسەکە' کە بەدەست لقی سوریای پەکەکە وە بوو‌و بە ئاشکرا دەرکەوت کە پشت بەستنی پەکەکە بە ئێران‌و سوریا‌و روسیا، سیاسەتێکی هەڵە‌و چەوت بوە. روون‌و ئاشکرایە کە رژیمی سوریا بە بێ هەماهەنگیی ئێران‌و روسیا ئەو هێرشەی ئەنجام نەداوە‌و بەرپرسانی رۆژئاوای کوردستانیش ئاشکرایان کرد کە پاسداری ئێرانی‌و ملیشیاکانی حیزبوڵاش بەشداری کورد کوژی بوون.

ئەم رووداوانە، پێویستە بەرپرسانی پەکەکە راچڵەکێنێ‌و بۆیان روون بکاتەوە کە سەری مارەکە رژیمی ئێرانە‌و ئەو رژیمە بۆ ئەوە نابێ کە پشتی پێ ببەسترێ. پەکەکە پێویستە واز لە دەستێوەردان‌و کوێخاگەری بۆ پارچەکانی دیکەی کوردستان، بێنێ‌و ئەگەر وا بکات، لە تەنگانەدا، تەنیا دەتوانێ لەسەر پستیوانیی کوردەکانی پارچەکانی دیکەی کوردستان حیساب بکات. پێویستە پەکەکە، سەنگ‌و وەزنی خۆی بزانێ‌و کەڵکی تاکتیکی لە پارچەکانی دیکەی کوردستا ن وەرنەگرێ .چونکا پەتی درۆ‌و ساختەکاری کورتە‌و کورد گوتەنی " خۆر هەمیشە لە پشت هەورەوە نامێنێ". کورد هیچ دۆست‌و هاوکارێکی لە رۆژهەلاتی نێوەڕست دا نیە‌و ئەوە تەنیا کوردەکانن کە دەتوانن قووڵایی ستراتیژیکی یەکدی بن‌و هیوابەستن بە داگیرکەرانی کوردستان ئاکامەکەی تەنیا دەستخەڕۆیی‌و شکەست‌و داڕمانە.

 

---------------------------------------------------------------------------------------------------

بۆ پێوه‌ندی‌ گرتن له‌گه‌ڵ‌ به‌ڕێوه‌به‌ر‌و ماڵپه‌ڕ له رێگه‌ی‌ فه‌یسبووكه‌وه‌ ئێره‌ كلیك بكه‌


ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 2350
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy