هه‌ڵۆی کوردستان

-
هەڵە
  • JFolder::create: Could not create directory

دۆخەکە هاوار دەکات یەکگرتووبین!

پۆستی ئەلیکترۆنی چاپکردن

xalil_web_logo_1ماوەیەکە ڕۆژهەڵاتی ناڤین بە گشتی‌و کوردستان بە تایبەتی بە قۆناغێکی زۆر هەستیار‌و هاڵۆزدا تێپەڕ دەبێت.مەسەلەی تیڕۆریزم‌و جۆرەوانی زلهێزەکانی ناوچەکە‌و جیهان لەم دەوەرە تادێتو وەزعەکە زیاتر دەشێوێنێت‌و ئاگری شەڕو ئالۆزییەکان زێدەتر دەکات کە لەداهاتوویەکی نیزێک دا بە دڵنیاییەوە زۆربەی وڵاتانی ناوچەکە لەخۆ دەگرێت‌و تووشی دابەش بوون‌و لەت لەت بوونیان دەکات بۆ نموونە ئێران ...لێرەدا لایەنەکانی کورد بە گشتی دەبێ بە سیاسەتێکی درووست‌و ژیرانە کەڵک لە دژبەرانی داگیرکارانی کوردستان وەربگرن بۆ نموونە ئیسرائیل دەتوانێت دۆستێکی باش بێت بۆ کورد هەروەها حیزب‌و لایەنە دژبەرەکان وەکوو بەلوچەکان‌و عەڕەبەکان‌و ئازەرێکان‌و ... کە دژی کۆماری ئیسلامی ئێران‌و هەروەها لە تورکیا‌و ئێراق‌و سوریاش بەهەمان شێوە کە کورد بەمجۆرە زیاتر دەتوانێت هیزی خۆی بەرامبەر دوژمن بەکاربێنێت‌و مەڕامەکانی بەکەڵک وەرگرتن لەم فاکتەرانە بەرەوە پێشتر بەرێت‌و زیاتر گوشار بخاتە سەر دوژمنانی‌و سەریان لێ بشێوێنێت تا ئەوەندە سەرقاڵ وسەر لێ شێواویان بکات دوژمن ئیتر توانای بەرەنگار بوونەوەی سەربازی‌و سیاسی لە ناوچە کوردستانییەکان کەم ببێتەوەو نەمێنێت سیاسەتی بەکار هێنانی هێزئازادیخوازەکان‌و فاکتەرە مەجودەکانی تر لە ناوچەکەدا دەتوانێت قازانجێکی باشی بۆ کورد هەبێت بە گشتی ...بە پێی هێندێک لێکدانەوەی سیاسی جیهان بە تێپەڕ بوونی هەر سەدەیەک ئاڵوگۆڕێکی بنەڕەتی بەخۆیەوە دەبینێت کە لەم ئاڵوگۆڕانەدا زۆر دەوڵەتی گەورە بچوک دەبنەوەو هێندێک کیان‌و وڵاتی نوێ لە دایک دەبن.بە هاتنە ئارای ئەم گۆڕانکارییانە هەستی نەتەوایەتی‌و یەکگرتوویی گەلانی ژێر دەست‌و ستەم لێکراو دەتوانێت ببێتە هەوێنی لە دایک بوونی ئاواتەکانیان، لە ڕابردوودا دەخوێنینەوە یاخود بینیومانە هەستیاری گەلانی ناوچەکە توانیوییەتی مافەکانیان دەستەبەر بکات‌و زۆر دەوڵەتی بچوک بچوک دەقەوارەی جیاجیادا لە دایک بوونەو تا ئێستاشی دەگەڵدابێت بەردەوامن.لە دوای کۆتایی جەنگی جیهانی یەکەم‌و دووهەم هەموو جیهان گۆرانگاری سیاسی‌و نیزامی‌و جیۆپۆلیتیکی زۆر قوڵی بەسەرداهات بۆ نموونە شووڕەوی بوو بەچەندین وڵاتی بچووک بچووک‌و ئاڵمانی نازی لەناو چوو‌و چەند ناوچەی ستڕاتیژی لە ئێران جیابوونەوەودەسەڵاتی عوسمانی تێک شکاو هەروەها ئەمەریکا بوو بە جەمسەرێکی بەهێز لەسەر ئاستی جیهان‌و بە گشتی سیاسەتی ئیستیعمار‌و داگیرکاری سیاسی‌و ئابوری وڵاتانێکی وەکوو فەڕانسەو ئەڵمانیا وبەڕیتانیا و... لە ڕۆژهەڵاتی ناوەڕاست‌و وڵاتانی ئەفریقی کۆتایی پێهات‌و زۆربەی گەلانی ناوچەکە دۆخەکەیان هەڵسەنگاند‌و بە یەکدەستی توانیان ئازادی خۆیان مسۆگەربکەن‌و خۆیان لە چنگ پۆتین وچەکمەی داگیرکاران نەجات بدەن‌و ببن بە سەروەری خۆیان‌و خاکەکەیان بەڵام لە هەمووی ئەم ئاڵوگۆرە بنەڕەتی‌و سەرەکییانەی کە لەسەر ئاستی ڕۆژهەڵاتی ناوەڕاست بە تایبەتی هاتەئاراوە گەلی کورد تا ئێستاش نەیتوانیوە خۆی وەکوو نەتەوەیەکی جیاواز‌و کیانێکی سەربەخۆ بسەپێنێت کەواتا هۆکارەکانی دەبێ چی بن کە لێرەدا بە کورتی باسی لێوەدەکەین!

 

yakgrtn_xalil_2


هۆکارەکانی سەرهەڵدانی ڕاپەڕینەکانی گەلی کورد بە گشتی بریتین لە ١.ژێردەست بوون ٢.نەبوونی دەرەتانی گەشەکردن ٣.بەش خوراوی ٤.نەبوونی دەسەڵاتی سیاسی ٥.زەبروزەنگ ٦.ستەمی نەتەوایەتی‌و فەرهەنگی ٧.کاولکاری ٨.ناعەداڵەتی‌و هەڵاواردنی ڕەگەزی ٩.نەبوونی کیانێکی سیاسی دیاری کراو وزۆر هۆکاری تر....

بە پێی ئەم خاڵانەی سەرەوە گەلی کورد دەستی داوەتە راپەڕین‌و بەدەیان جار سەرکەوتن‌و شکستی بەدەست هێناوە بەڵام هۆکاری وەدەست نەخستنی دەسەڵات‌و سەربەخۆیی دەگەڕیتەوە بۆ ١.نەبوونی تەجرووبەی سیاسی‌و حکومەت داری ٢.نەبوونی بەرنامەیەکی ڕێک‌و پێکی سیاسی وئابوری ٣.نەبوونی پشتیوانی دەرەکی ٤.نەبوونی خوێندەواری‌و نزم بونی ئاستی تێگەیشتنی خەڵک بە گشتی ٥.زاڵ بوونی نیزامی عەشیرەیی ٦.دژایەتی‌و ناتەبایی نێوان تایفەو عەشیرەکان ٧.خەیانەت ٨.سازشکاری‌و پێک هاتنی وڵاتانی زلهێز لەسەر کێشەی کورد ٩.ڕێبەری جوڵانەوەکان هەمیشە لەدەست ئاغاو دەرەبەگ دابووە ١٠.نەبوونی ستڕاتیژی سیاسی‌و نیزامی تۆکمە ١١.نەبوونی یەکگرتوویی ١٢.نەبوونی بەرنامەی ئابوری‌و دەیان هۆکاری تر....

هەروەها دەمهەوێ باسی ئەوەی بکەم کە بۆچی شۆڕشەکانی نەتەوەی کورد بۆ دەستەبەرکردنی مافی نەتەوایەتی زۆری خایاندووەو تا ئێستاش هەر درێژبۆتەوە؟

١.دابەش بوونی کوردستان بەسەر ٦وڵات ٢.دابڕدابڕ بوونی هیزەکانی کورد لە سەرتاسەری کوردستان ولاواز بوونیان ٣.پێک هاتنی باری فەرهەنگی جیاواز لەناو بەشەکانی کوردستاندا ٤.چەند بەرابەر بوونی هێزی دوژمنان ٥.نەبوونی هێزی پشتیوانی بۆ کورد ٦.نەبوونی ڕیگا بۆ زەریا ٧.دەست تێوەردانی وڵاتانی دراوسێ‌و بێگانە لەناو کوردستان‌و چەندین نموونەی تر...

کەواتا بەهەمووی ئەم هۆکارانە ئێمە ئێستا خاوەنی دەوڵەتی خۆمان واتا دەوڵەتی کوردستان کە خەونی لەمێژینەی گەلەکەمان بووە نین،باشە دەبێ چی بکەین کە ئێمەش وەکوو گەلانی تر سەربەست‌و ئازادبین‌و ببین بە خاوەنی خۆمان؟

١.وەلانانی بوغز‌و ڕق‌و کینە ٢.پیادەکردنی سیستەمێکی دێموکرات بۆ هەڵپژاردنەکانی ناو حیزب‌و حکومەتی باشوری کوردستان٣.خۆبەدوور گرتن لە دەمارگرژی ٤.وەلانانی ناوچەگەرایی‌و خزم خزمێن ٤.ڕەپێش خستنی بەرژەوەندی گشتی ٥.پەروەردەی باش‌و سەردەمیانە ٦.بەرەپێدان‌و کارکردن لەسەر هەستی نەتەوایەتی‌و بردنەسەری ٧.راستگۆیی‌و کاری هاوبەش ٨.بەستنی کۆنگرەی نەتەوەیی ٩.پێک هێنانی سوپای میللی ١٠.داکۆکی حیزبەکان لەسەر مافی نەتەوایەتی‌و سەربەخۆیی ١١.خۆبەدوورگرتن لە سیاسەت‌و سیستەمی عەشیرەیی،ئیسلامی،کۆمۆنیستی ١٢.هاوکاری سیاسی‌و ئابوری تۆکمە١٣.پەرەپێدان بە سیستەمی خوێندنی باڵا ١٤.کۆک بوون لەسەر هێما نەتەوەییەکان ،...

بە دڵنیاییەوە ڕەنگە زۆر خاڵی دیکەش هەبن کە من دێرەدا تەنیا ئاماژەم بەوەندانە کرد بە کورتی!

گرینگە یەکبین!

حیزبەکانی ڕۆژهەڵات لە تووشی دابڕان‌و لێ جیابوونەوە هاتوون دەبێ خۆیان یەکلایی بکەنەوە یا سیستەم‌و ئەساسنامەو پڕۆگرامی خۆیان لەیەک جیابکەنەوە یان نا دوو حیزب‌و سێ حیزب بەیەک ناو‌و یەک بەرنامە مانای نییەو شەڕە کورسی‌و دەسەڵاتیش هیچ ئاکامێکی نابێت تەنیا ڕێگای بەردەم ئەوەیە کە بە نەرمی‌و برایانە یەکگرتووبن‌و ناوماڵی خۆیان یەک بخەن ئەگینا دەستێک بەتەنیا تەقەی نایەت‌و گەلیش چیتر بەمجۆرە قەبوڵ ناکات کەواتا مەحکومن بە یەکگرتن!

حیزبەکانی باشور دەبێ وشیاری هێژموونی سیاسی‌و سەربازی ئێران‌و تورکیا ببن لە ناوچەکەدا‌و نەکەونە ژێر کاریگەر‌و فێڵ‌و تەڵەکەی فارس‌و تورکەکان‌و تەنانەت عەڕەبەکانیش.باشوورییەکان دەبێ باش بزانن لەم دۆخەدا سازشی برایانە رەمزی سەرکەوتنیانەو بە یەکدەنگی‌و ئاقڵانە دەبەرەی هاوپەیمانەتی ئامریکادا جێگای خۆیان زیاتر بکەنەوەو‌و خۆیان وەکوو هێزێکی کاریگەر باوەڕ پێکراو نیشان بدەن‌و خۆیان بسەلمێنن تا لە دوا ڕۆژی ئاڵوگۆڕەکانی ناوچەکەدا لە بە دڵنیاییەوە بەرەی ڕۆژئاوا براوەی سەرەکییە بە هۆی دۆستایەتی ئێران‌و پاڵوەدان بە بەرەی ڕووسیا دۆڕاوە نەبن.سیستەمی سەرۆکایەتی هەرێم دەبێت بە شێوەیەکی دێمۆکراتی بێت جا چی لەلایەن خەڵک هەڵبژێردرێت چی لەناو پەڕلەمان.بەهۆی گرژی‌و نێوان ناخۆشی دەگەڵ بەغدا دەبێ بڕیاری یەکلایی کەرەوە بدەن چۆن بەغدا ئیتر بۆ کورد نابێتە ماڵ! دەبێ باری گوزەرانی خەڵک‌و داواکارییەکانیان تا جێگای مومکین جێ بە جێ بکەن‌و نابێت بە دەمارگرژی‌و ناکۆکی نێوان حیزبەکان هەرێمەکە بەرەو هەڵدێرببەن!

لە باکوری کوردستان لایەنەکان دەبێ کەڵک لە خەباتی پەڕلەمانی‌و مەدەنی وەرگرن‌و ڕیگە بەیەکتری بدەن خۆیان بناسێنن‌و ڕیکلامی خۆیان بکەن.پکک چیتر نابێت بە هیوای ئێران دەگەڵ تورکیا جۆرەوانی سەربازی بکات دەبێ بزانێت باشترین خەبات لە باکور بە دژی تورکی داگیرکەر تەنیا خەباتی پەرلەمانە!

لە ڕۆژئاوا ی پ گ دەبێ ڕێگە بە هەموو هێزەکانی تر بدات کار‌و چالاکی خۆیان بکەن‌و ئیتیفاقی سیاسی‌و سەربازی لە نێوانیان دا پێک بهێنرێت.پکک ش دەبێ هێژمۆنی خۆی لەسەر ڕۆژئاوا لابدات دەگەڵ هەرێم هاوکاری باشتر بەڕیوەچوونی کاروباری سیاسی‌و سەربازی لایەنەکانی ڕۆژئاواببن‌و خۆیان بە دوور بگرن لە خۆسەپاندنی سیاسی!

بە گشتی حیزبەکانی کوردستان دەبێ لەم دۆخەی ئێستادا کە خەریکە شەڕی دووجەمسەری درووست دەبێتەوە لایەنی براوە هەڵبژێرن‌و بەیەکەوە لەسەر داواکارییەکانی گەلی کورد بە گشتی کۆک‌و تەباو یەکدەنگ بن!لێرەدا کۆنگرەی نەتەوەیی دەتوانێت دەوری سەرەکی بگێڕێت کە بە دڵنیاییەوە بەستنی ئەم کۆنگرەیە پێویستی ئەوەیە کە لایەنەکان لە هێندێک داخوازی خۆیان بکشێنەوەو لە سیاسەتی خۆسەپاندن خۆ ببوێرن!

قسەی کۆتایی من بە حیزبە کوردییەکان ئەوەیە کە بەتەمای هاوپەیمانەتی‌و هاوکاری سەربازی هیچ کام لە وڵاتانی داگیرکەر‌و بەرەکەی ڕووسیا نەبن چۆن داهاتوویان وێرانە هەروەها چیتر لە بەرامبەر ئێرانیش دا ملیان حیزنەکەن ئێران ئەو هێزە نییە بتوانێت لەبەرامبەر ئیڕادەی گۆڕانکاری‌و شەپۆلی دێموکڕاسی کە باڵی بەسەر ناوچەکەدا کێشاوە ڕابوەستێت!هێزی کورد ئەگەر یەک بێت نەک هەر ئێران بگرە هەموو داگیرکارەکانیش بەیەکەوە بن دەرەقەتی نایەن ئەمڕۆ کورد جگە لە خۆی پشتیوانی دەرەکیشی بخۆی مسۆگەر کردووە کە هەنگاوی ئاقڵانەی گەرەکە تا ئەم دەستکەوتە مێژووییە پەرە بستێنێت نەک لەبار ببردرێت بە هۆی گەمژەیی سیاسی‌و نەزانی هێندێک لایەن!

لە وەزعی هەستیاری ئێستای ناوچەکەدا بە گشتی‌و کوردستان بە تایبەتی دەبێ هەموو تاکێکی کوردی ناو کۆمەڵگای کوردستان بەپێی قەوارە ودەسەڵاتی خۆی ئەرکی نشتیمانی ونەتەوایەتی خۆی بەجێی بگەیێنێت‌و پاڵپشتی هێزی پێشمەرگەی کوردستان‌و ئارامی ناوکوردستان بێت.لاوان‌و گەنجەکانی ئێمە وەکوو نەوەی ئێستاو داهاتوو دەبێ زیاتر لەوە وشیاربن لەبەر ئەوەی کە جوودا لەهەموو سیاسەتەکانی ئەم ئالۆزییەو شەڕو پێکدادانەکانی ناوچەکە شەڕ شەڕی فەرهەنگ‌و کلتور‌و خۆسەپاندنە!کەواتا ئەگەر لاوەکانمان هەستی نەتەوایەتی‌و نشتیمان پەروەرییان بەرزنەبێت ڕەنگە بکەوینە بەر لافاوی شوێنیزم‌و ڕاسیسمی تووندی تورک‌و فارس‌و عەڕەبەکان کە بە دڵنیاییەوە ئەمجارەیان زەبرێکی کوشندە بە نەتەوەکەمان‌و خاکەکەمان دەکەوێت!

دەبینین‌و شایەتی ئەوەین کە هێزەکانی پێشمەرگە لەسەرانسەری کوردستان‌و لە مەیدانی جەنگ دژی تیرۆریزم بەتایبەتی بۆ پارێزگاری ئەم نشتیمانە کوردییە بە لەخۆ بردوویی‌و گیان فیدایی ژیان‌و بنەماڵە‌و خۆشەویستەکانی خۆیان جێ هێشتووەو بۆ ئازادی وبەختەوەری گەلەکەیان واتا ئێمە دەجەنگن ئەوان لە بەرامبەر دوژمنانی دڕندە‌و تیڕۆڕێستەکانی داعشی ئیسلامی‌و سەرجەم دوژمنانی گەلی کورد شێرانە ڕاوەستاون‌و بەشانازییەوە ڕۆحی شیرینیان بۆ ئەم نشتیمانە دەبەخشن کەواتا ئەرکی ئێمە وەکوو تاکێکی کورد‌و کوردستانی ئەوەیە کە ئەگەر ناتوانین چەک لەشان بکەین ببین بە هاوڕێ‌و پشت‌و پەنای پێشمەرگەکانمان‌و بە هەر شێوەیەک کە بۆمان دەکرێت پێیان بڵێین کە ئێمەش دەگەڵتانین ئەوە گەورەترین پشتیوانییەو لە هەمان کاتیشدا گەورەترین موژدە‌و دڵخۆشییە بۆ هێزەکانی پێشمەرگە تا دوو ئەوەندە ورەیان بەرزببێتەوەو باشتر ئەم جەنگە بکەن چۆن ئەوانن کە ژیانی گەلی کورد بە گشتی یەک لایی دەکەنەوە لەم مەیدانە نوێیە...!

هەموومان دەزانین کە هەموو کەس ناتوانێت چەک لەشانی بکات‌و ببێت بە پێشمەرگە بەڵام ئەی خۆ دەتوانین لانی کەمی بە شێوەیەک بە پێی دەسەلات‌و توانای خۆمان هەریەکەو بە جۆرێک پاڵپشتی براو خوشکە پێشمەرگەکانمان بین دڵنیام هەموو تاکێکی بچووک‌و گەورەی ئەم کۆمەڵگایە ئەوەی لە دەست دێت.

دەمهەوێ بیرەوەرییەکی خۆم باس بکەم؛دەگەڵ چەند هاوڕیی پێشمەرگەم لە ساڵی ٨٨ واتا ساڵی ٢٠٠٩ لە یەکێک لە گوندەکانی شاری نەغەدە لە ڕۆژهەڵاتی کوردستان بووین لە ماڵیک دانیشتبووین کە دۆستی خۆمان بوو‌و کەسێکی یەکجار نشتیمان پەروەر‌و پێشمەرگە دۆست بوو باسی دۆخی کوردستان‌و حیزبی دێموکرات‌و دواییش باسی وەزعی ژیان‌و گوزەرانی پێشمەرگەکانمان کرد بە گشتی دەو قسانە دابووین کە کوڕە بچکۆلانەکەی کاک س.ا بە ناوی محەمەد دەگەڵ دایکی کە چایی بۆ هێنابووین هاتە لای ئێمەو بەرامبەرمان چۆکی داداو دانیشت! دەستی لە پشتەوە شاردبۆوە یەکێک لە کوڕەکان بە پێکەنینەوە کوتی ها سەگباب ئەوە چیت پێی داوەرە لای مامی خۆت بزانم! دەستی هێنایە پێشوو کوتی مامە ها ئەوە داخڵەکەی منە هەموو ڕۆژێ کە دایکم پارەم پێ دەدات بۆ مەدرەسە من نیوەی دەو داخڵەیە داوێم ها ئەوە هێناومە بۆ پێشمەرگە دەمهەوێ بیدەم بە ئێوە!...........

لەراستی دا من بەم دیمەنە ڕاچڵەکام‌و چوومە دەفکر ئاخۆ ئەگەر نیوەی کۆمەڵگای ئێمە وەکوو ئەم منداڵە بیری کردباوە ئێستا چی دەبوو....؟؟!!

برای من، خوشکی من خۆئەگەر هیچت لەدەست نایە دەتوانی لەسەر تۆرە کۆمەڵایەتیەکان‌و دەیان ڕێگای تر ٢ کەس لە دۆخ‌و خواستەکانی خۆت‌و گەلەکەت تێ بگەیێنیت ویاخود دەتوانی بە دانانی دوو پۆستی ئەلەکترۆنیکی پاڵپشتی پێشمەرگە وپارێزەرانی خاکی خۆت بی‌و پێیان بڵێی ئێمە ئێوەمان هەر لەبیرە!

تۆ تەماشابکە کابرا هەستاوە لە ئوروپا‌و ئامریکا ژیانی خۆی بەجێ هێشتووەو هاتۆتە ناو ڕیزەکانی پێشمەرگە لە ڕۆژئاوا‌و لە باشوری کوردستان بۆ شەڕ دژی تیرۆریستانی داعش‌و بە نیشانەی پشتیوانی گەلی کورد بەداخەوە دەبێ بڵێم کۆمەڵێکی یەکجار زۆر لە لاوەکانی ئێمە هەستی نشتیمان پەروەریان بێ ڕەنگ بووە بە جۆرێک کە لەم وەزعەدا بیر لە هیچ مەترسییەکی سیاسی‌و سەربازی‌و فەرهەنگی‌و کلتوری زاڵ بەسەر گەلەکەیان دا ناکەنەوەو‌و هەست بە مەسئولیەت‌و ئەرک ناکەن کە ئەوە بەڕاستی جێگای داخە!

بۆ دەبێ لە کاتێکدا کە پێشمەرگە جەنگاوەرەکانی وڵاتی ئێمە لە دونیا‌و جیهان ئاوازە وناوبانگ دەربکەن بۆ جوانی‌و بوێری وقارەمانەتی وە گەلانی بێگانە شانازیان پێوەبکەن،تی شێرت‌و جل‌و بەرگی پێشمەرگە وشەڕڤان وگریلای کورد لەبەر بکەن بەڵام کوردەکەی خۆمان بەتایبەتی لاوەکانمان شەرم دەکەن بڵێین ئێمە کوردین!دایکان‌و باوکانی ئێمە دەبێ دەورێکی یەکجار کاریگەریان هەبێت لەسەر پەروەردە کردنی منداڵەکانیان بۆ ئێستاو دوا ڕۆژی کوردستان چۆن منداڵانی ئێمە بناغەو ژێرخانی ئەم نشتیمانەن!زانست‌و وشیاری نەتەوەیی دوو ڕەمزی سەرکەوتنن بەسەر کەندوکۆسپەکان‌و گەیشتن بە ئاسۆی ڕزگاری.

 

---------------------------------------------------------------------------------------------------

 بۆ پێوه‌ندی‌ گرتن له‌ رێگه‌ی‌ فه‌یسبووكه‌وه‌:

 لاپه‌ڕه‌ی‌ به‌ڕێوه‌به‌ری‌ ماڵپه‌ڕ

 لاپه‌ڕه‌ی‌ ماڵپه‌ڕ

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1111
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy