هه‌ڵۆی کوردستان

-
هەڵە
  • JFolder::create: Could not create directory

دەهەمین ساڵیادی 11ی سێپتامبر و وتەیەكی بەرپرسیارانە

پۆستی ئەلیکترۆنی چاپکردن

 ali_zirak_11y_septambrبە تێپەڕبوونی دەیەیەك بەسەر خەباتی بەرین و هاوبەشی نێودەوڵەتی لە دژی فەندەمێنتالیزم و تیرۆری رێكخراو و ئامانجداری دەوڵەتانی وەك تالیبان و كۆماری ئیسلامی، كه كوژران و ماڵوێرانییەكی گەورەی لە ناوەندی دەسپێكی شارستانییەتی مرۆڤ – یانی خۆرهەڵاتی ناوین – لێكەوتەوە و هەزاران تەقینەوە و تیرۆر و كوشتاری بە كۆمەڵ لە لایەن تیرۆریستانەوە بۆ چەسپاندنی رێسا نامرۆڤانەكانی خۆیان لەم ماوەیەدا رووی دا،ئێستا بەرەڕووی دۆخێكی لەبارتر بووینەتەوە.

دیارە بە كوژرانی سەرۆكی تیرۆریستانی قاعیدە : ئوسامە بن لادەن، پاشەكشەیەكی گەورەش بە سیمای تۆڕی جیهانیی تیرۆرەوە دیارە. ئەگەرچی هێشتا مارە زەبەلاحەكە (ئێرانی ئیسلامی) سەری نەپەڕیوە و بە هەموو شێوەیەك ژەهری خۆی دەكاتە جەستەی مرۆڤایەتییەوە.

11ی سێپتامبر و دروستبوونی هاوپەیمانییەكی هاوتەریبی ئامانجەكانی كورد

ئێمەی كورد لە پاش یازدەی سێپتامبرەوە هەلێكی مێژووییمان بۆ رەخسا. لە راستیدا بە تەقینەوەكانی نیۆیۆرك چاوی دنیای ئارام، بەڕووی كۆمەڵێك كێشەی جیهانیدا كرایەوە.

هاوپەیمانییەكی تازە لە وڵاتانی كاپیتالیست وەكو هێزێكی رزگاریدەر لە دژی تیرۆریزمی نێودەوڵەتی شكڵی گرت. لە راستیدا بە پەرەئەستاندنی پرسی مافەكانی مرۆڤیش دەروازەیەكی نوێ بۆ خەبات لە دژی دیكتاتۆرە جێی مەترسییەكانیش بەرەو رووی خەڵكی وڵاتانی داخراو كرایەوە. هێزی سەرمایەداریی جیهانی لە جلوبەرگێكی تەواو جیاوازدا خۆی دیار خست و پەیامێكی تازەی بۆ دەوڵەتانی تیرۆریست پەروەر و لە هەمانكاتیشدا نەتەوەكانی قوربانیی تیرۆر پێ‌ بوو.

لە پاش تەقینەوەكانی 11 ی سێپتامبر و هاتنە ئارای دۆخێكی نالەبار بۆ دژایەتیكردنی ژیانی خەڵكی سیڤیل و دەسەڵاتە گەلی و ئازادەكانی وەك حكوومەتی هەرێمی كوردستان و عێراق و ئەفغانستان – هەڵبەت لە پاش رووخانی بەعس و تالیبان - لە لایەن تیرۆریستانەوە، رەوتێكی داكۆكیكار لە ناوەندی بریاری جیهانییەوە بە شێوەیەكی نوێ دروست بوو. دەنگە ناسازەكانی ناو رێكخراوی نەتەوەیەكگرتووەكانیش كه چین و رووسیا بوون، نەیانتوانی پێش بەو یەكگرتوویییە بگرن و بەرەی دژەتیرۆر و بەرەیەك بۆ پاككردنەوەی دیكتاتۆرە جێی مەترسییەكان و چەكە كۆمەڵكوژەكانیشیان شكڵی گرت.

هەر لەو ناوەدا "كورد" و دۆزی مێژوویی و پشتگوێخراوی ئەم نەتەوەیەش لە قەوارەو جلوبەرگێكی تازەتردا هاتنەوە بەر باس و ئیتر فشارەكان بۆسەر ئێمە لە لایەن دوژمنانەوە بۆ وازهێنان لە داواكانمان و فشاری ناوەندە جیهانییەكانیش لەسەر دیكتاتۆرەكان بۆ دەستڕاگرتنی لایەنەكانی بەرگریكار (كورد) و دەستدرێژیكار (دوژمنانی كورد) لە گۆڕەپانەكەدا دۆزی ئێمەی وەك نەتەوەیەكی قوربانیی تیرۆر و رەشەكوژیی بردە قۆناغێكی هەستیارەوە.

11 ی سێپتامبر لەگەڵ ئەوەیدا هەلێكی لەباری بۆ كورد رەخساند كە زیاتر كێشەكانی خۆی لە ناوەند و كۆڕ و كۆمەڵە جیهانییەكاندا پێناسە بكات، هەر لەو كاتەشدا دوژمنانی كوردی وا بە قەناعەت گەیاند بە هیچ شێوەیەك نەهێڵن ئەزموونەكانی هەرێمی كوردستان و خەباتە بوێرانەو مەدەنییەكانی ناوخۆی وڵاتانی توركیا و ئێران و سووریاش گەشە بكەن و پێشگیرییان لێكرد. ئەگەرچی هەموو رۆژێك سەركەوتنی تازەی مەدەنییانەو ئاشتییانە بۆ كورد لە ناوەندی دەسەڵات و بریاری دوژمنیشدا دەبینرێ‌ و سەركەوتن لە هەڵبژاردنەكانی عێراق و توركیا و هاتنە ئارای هەلێكی تازە لە پاش سەدەیەك بۆ كوردانی ژێر ستەمی سوورییەكان و خەباتی دایكانی ئاشتی و خەباتی چالاكوانانی سیڤیل لە دژی شەڕانگێزیی دوژمنانی كورد و دژ بە تۆپبارانی سنوورەكانمان و نەدۆزینەوەی چارەسەرێكی ئاشتییانە بۆ كێشەی كورد لە لایەن دوژمنانیەوە، بەشێك لەو چالاكییانەن كە پێشگرتن بەو شێوە خەباتەی بۆ دوژمن ئەستەم كردووە.

تیرۆر و سنوورەكانی و كورد

كوشتنی مرۆڤ بە هەر شێوەك و لە ژێر هەر ناوێكدا بێت ناپەسەند و بێزلێكراوە و لە زۆربەی كلتوورەكاندا بۆ نموونە كلتووری ئێمەی كورد، هەتا دوژمن زۆری نەهێنابێت و ماڵ و لانەی لێ تێك نەدابین، هیچ چەشنە توندوتیژییەك لە لایەن ئێمەوە نەبینراوە و ئەمەش پێی ئەڵێن رەسەنایەتیی مرۆڤدۆستانە و هۆشیاریى مرۆیی ئێمەی كورد.

ئێمەی كورد وا راهاتووین كە تەنیا بەرگری لە ئازادییەكانمان بكەین. بەرگری لە خاك و مافەكانمان بكەین و لە پێناوی پاراستنی خۆماندا خەباتێكی رەوامان پەرەپێداوە و تا ئێستاش دەستمان لە چەك بەر نەداوە.

لەگەڵ ئەوەیدا ئێمە لە نیشتمانی خۆمان و سنووری خۆمان نەچووینەتە دەرەوە، كەچی دوژمن بۆ پەرەپێدانی هەژموون و دەسەڵاتی نامرۆڤانەی خۆی سنوورەكانی ئێمەی كردووە بە ئامانج و ئێمەی لە هەموو شێوە مافێك بێبەری كردووە.

كورد وەك قوربانیی تیرۆر

كورد یەكێك لەو نەتەوانە بووە كە لە مێژووشدا بەوە بەناوبانگە زۆربەی سەركدەكانیان تیرۆر كردووە، تیرۆری سەرۆكی كوردان سمایل ئاغای شكاك : سمكۆ و ئێعدامی تیرۆر ئاسای پێشەوا و پێشەوایانی كۆمار و ناردنی تیرۆریستی دەست پەروەردە بۆ تێكدانی ریزەكانی شۆڕشی كورد وەك ئەو نموونەیەی بۆ گیانی سەرۆك مستەفا بارزانیی نەمر رێكیان خستبوو، تاكو تیرۆری گەورە پیاوانی ریزەكانی پێشەوەی شۆڕشی كورد لە رۆژهەڵاتی كوردستان بۆ نموونە رێبەران: شەهید دوكتور قاسملوو و شەهید دوكتور شەرەفكەندی و شەهید سەعیدی یەزدانپەنا و شەهید فرانسوا هەریری و شەهید شەوكەتی حاجی موشیر كە زۆرینەیان لەسەر مێزەكانی وتووێژدا تیرۆر كران و دەیان رۆڵەی ناوسەنگەر و پیاوی چالاك و هەڵسووڕ و بەدەست وبرد، كە جێگایان تا ماوەیەكی زۆریش لە ناو جەرگەی خەباتی میللەتی كورددا بە چۆڵی مایەوە و جێگای هێندێكیشیان هەر پڕ نەكرانەوە. با ئەوەش بوەستێ‌ كە نیشتمانەكەمان لبە بەشی باشووریدا كە نیمچە ئازادییەكی پێوەدیار بوو، بووە چقڵی چاوی تیرۆریستان و بە دەیان تەقینەوەی گەورەی رووخێنەری لێكەوتەوە كە ئامانجیان قر كردنی سەركردایەتی كورد لە باشوور و بێسەركردنی كورد و حكوومەتەكەی بوو.

بەسەر ئەم هەموو بەڵگانەیدا كە لە دەستی تەنانەت رێكخراوە جیهانییەكانی مافی مرۆڤ و نەتەوەیەكگرتووەكان و زلهێزەكانی وەك ئامریكادان، بەڵام كەم لوتفییەكیش لە بریارداندا لەسەر كورد كراوە و ئێستاش دەبینرێ‌.

لە زۆر شوێندا كە دەنگی كورد و خەباتەكەی هێندێك لاوازە، ئێمەیان لە كۆماری ئیسلامیی – لانكەی تیرۆریستان و داڵدەدەری ئەلقاعیدە و جوند و توندڕەوەكانی دیكە – بە خراپتر داناوە و ئەمەش جێگای ئیدانەكردن و داخە.

كورد وەك تیرۆریست بۆ؟

لە ناوەندەكانی بریاری جیهانیدا زۆر جار زلهێزی وەك توركیا و ئێران كە بە بەردەوامی خەریكی تیرۆر و كوشت و بڕ و سەركوت و زەبرو زەنگن، بە لایەنی تیرۆریست ناناسرێن، كەچی لایەنی بەرگریكاری وەك كورد بە تیرۆریست ناودەبەن. ئێمە ئەم هەڵوێستەمان بە هیچ شێوازێك قبووڵ نییە و داوای وردبوونەوە لە بریارەكانی ئەوان دەكەین و تەنانەت داواكارین یارمەتیمان بدەن لە دددژی تیرۆری دەوڵەتانی ئێران و تورك بەرهەڵستكارێكی گەورەی ناوچەیی بین.

لە پاش ئەوەی بەڕێز ئۆجالان رادەستی تورك و حكوومەتە تیرۆریستەكەی كرایەوە، كە ساڵانە بە هەزاران كەس لە زیندانەكانیدا گیان دەدەن و هەزاران كەس لە ناو شەقامەكانی توركیا دەدرێنەبەر فیشەك و دار و شەق و دەكوژرێن و لە پاش ئەو هەموو دەستدرێژییانەی حكوومەتی ئێران بۆسەر ماف و ئازادییەكانی گەلانی ئێران و زیندەبەچاڵكردن و تیرۆر و زیندان و دەستدرێژیی سێكسی و تەنانەت گۆڕینی بارودۆخی ناوچەی خۆرهەڵاتی ناوین بۆ ناوچەیەكی شوێنگە و پێگەی تیرۆریستانی جیهادی، هێشتا چەكدارانی كورد لە لیستە رەشەكاندا دادەنێن و ناوێرن ئێران و توركیا كە هەر ئێستا خەریكی تیرۆری كوردن بە تاوانبار بناسێنن.

كە وابوو ئەگەر ئامانجەكانی تیرۆریستان تێكدانی بارودۆخی كۆمەڵگا ئازادەكان و خۆشكردنی ئاگری دڵەڕاوكێ‌ و پەرەپێدانی دواكەوتوویی و گەڕانەوە و دەستبەرداربوونی مرۆڤ لە ئامانجە ئینسانییەكانیەتی و ئەم فكرەیش ئێستا لە ناوەندی سەرچاوە سروشتییەكانی دنیا – رۆژهەڵاتی ناوین – دا هێشتا هێزە و دەسەڵاتی هەیە، كوردی سەرقافڵەی ئازادیخوازانی جیهان كە 27 سەدەیە داواكاری مافو ئازادییەكانیەتی و هیچ نەتەوەیەكیش بە رادەی كورد بێ‌ پشتیوان و مافخوراو نەبووە، بۆی هەیە وەكو ئامریكا و هاوپەیمانانی بەرگری لە كەرامەتی خۆی – بە چەك و بە هەموو شێوە بەربەرەكانییەك كە دژی داگیركاری و دواكەوتوویییە – بكات.

ئێمەش دەتوانین وێڕای ئەوەی هاوخەمیی خۆمان بۆ قوربانییانی كردەوە تیرۆریستییەكانی 11 ی سێپتامبری 2001 و بە گشتی گەلی ئامریكا دەرببڕین، داواكانمان بەمشێوەیەی خوارەوە پێشكەش بكەین:

1ـ تكایە چیدی لەبەرانبەر دەزگای تیرۆری كۆماری ئیسلامی و تورك و سووریادا بێدەنگ مەبن و بە هەموو شێوەیەك بەرگری لە ماف و ئازادییەكانی 200 ملیۆن مرۆڤی بێگوناە و بێتاوانی ئەم وڵاتانەدا بكەن.

2ـ تكایە با هێزەكانی ناتۆ ئامانجەكانیان – لە قەندیلەوە – بگۆڕن بۆ دیمەشق و ئانكارا و تاران و قوم و بۆ پاككردنەوەی تیرۆریزمی جیهانی، ئیمپراتووریای عوسمانیی تازە و سەفەویی عەلەویی خامنەیی و دەستنیشانكراوەكەی هەردوولایان : سووریا و بنەماڵەی ئەسەد بڕووخێنن.

3ـ داواكارین لە لیستی تیرۆری نێودەوڵەتیدا كورد مەنووسن و تێبگەن كە لە خاكی خۆمان بەولاتر لە شوێنێكیتردا چالاكیمان نەكردووە، گەرچی... ئەگەر داواكانمان پشتگوێ‌ بخەن ئێمەش مەجبوورین لە بەرژەوەندییەكانتان لە ناوچەكەدا بدەین.

4ـ تكایە با مافەكانی مرۆڤ نەبنە دەستەواژە و كەرەستەیەك بۆ بازرگانیكردن و هیچ جیاوازییەكیش لە نێوان مرۆڤی كورد و سووری، لەگەڵ مرۆڤی ئامریكاییدا مەكەن، چونكا بۆ ماوەویەكی زۆرە ئێمە بە هەموو شێوەیەك دەكوژرێین و كەس بەرگری لە مافەكانمان ناكات و كەسیش جەسوورانە و نەترسانە لە شكاندنی ئەو بێدەنگییە سامناكەدا هەنگاوی جددی و گەورەی نەناوە. هەمووی دروشم و بەیاننامەی كەمبایەخن و لە ئازارەكانی گەلانی كورد و سووریای كەم نەكردووەتەوە.

5ـ داوا لە ناوەندەكانی بریاربەدەستی جیهانیش دەكەین پێش بە فەرمانی جیهادی ئێران و تورك لە دژی كوردی هاوخەمی قوربانییانی تیرۆری دنیا بگرن. ئەوانەی بیرۆكەی فەندەمێنتال و توندئاژۆیی لە ناخی فەلسەفەی وجوودی دەسەڵاتەكەیاندا شكڵی گرتووە و ئێستاش خەریكن شۆڕشە مێژووییەكەیان هەناردەی ناوچە تازە ئازادكراوەكانی باكووری ئافریقا و شوێنە بێهێز و هەژار و بێدەرەتانەكانی وەك سووریا دەكەن.

لە كۆتاییدا هیواخوازین، دنیا بە پیری ئەم داخوازە ئینسانییەی كوردەوە بێت كە لە دەیەمین ساڵیادی كارەساتەكەی 11 ی سێپتامبردا كراوە.

 

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1411
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy