لە بیرەوەری تێرۆری ناجوامێرانەی سەرکردەیەکی جوامێردا!

karim_farkhapor_-_logo ڕۆژ 16ی سەرماوەزە،"جەک لەندەن" لە ژێر حەبای ئاخوندەکانی "تاران" دا، بە کەڵبە گڕەکانیەوە، هەڵگری پەیامی مەرگە‌و تینووی خوێنی قارەمانێکی کوردە، ئەو قارەمانەش کەس نیە بێجگە لە مامۆستا "حەسەن شیوەسەڵی" تێکۆشەر‌و خەباتگێڕی سەرسەختی رێگەی کوردایەتی‌و نیشتیمانپەروەری. چ کارەساتێکی سامناک روویدا ، چ هەواڵێکی شوم‌و خەمهێنەر، کارەساتێک کە چەند ساڵێکە بۆتە خەمی ئازادیخوازانی کورد‌و غەیرە کورد.

مامۆستا "حەسەن شیوەسەڵی" لە خانوە قوڕینەیەکی گوندێکی هەژارنشینی کوردستان، لە باوەشی دایکێکی رووسووری کورددا پێگەیشت‌و بە پشتیوانی باوکێکی وەرزێر‌و دەست قەڵشیو رەوانەی حوجرەی مزگەوت کرا، ئەو کات حوجرە مەکۆی شۆڕش‌و قوتابخانەی کوردایەتی بوو، کاک حەسەن شیوەسەڵی هەر لەوێ فیری ئەلفبای سیاسەت‌و نیشتیمانپەروەری بوو‌و دڵ‌و مێشکی بە چرای زانست رووناک بۆوە. دوای حوجرە ڕاپێچی بەندیخانە کرا‌و لەوێ لەژێر ئەشکەنجە‌و زەبر‌و زەنگی "ساواک" دا فێری وانەی خۆڕاگری‌و نەبەزین بوو‌و هەر لەوێوە ڕێگەی چیای گرتەبەر‌و بوو بە پێشمەرگەیەکی ئازا ، بوو بە فەرماندەیەکی لێهاتوو، بوو بە مامۆستا‌و سیاسەتوان، بوو بە پیاوێکی ناودار‌و بە ناوبانگ، بوو بە خۆشەویستی کۆمەڵانی خەڵک‌و جێگەی هیوا‌و ئومێدی هەژارەکان، بوو بە چقڵی چاوی دژمن ، بوو بە ڕەمزی فیداکاری‌و رزگاریدەری نیشتیمانێکی داگیرکراو.

hasan_shewasalli_-_farkhapor_-_2

گەورەیی‌و عەزەمەتی ئەو زاتە شۆڕشگێڕەی کورد تەنیا لای ئەوانەیە کە هاوبەند‌و هاوخەباتی بوون یا لە نزیکەوە ناسیویانە‌و دۆست‌و هاوڕێ‌و هاوبیری بوون. من شانازیی ئەوەم هەیە کە ماوەیەک تا کاتی برینداربوونی وەک پارێزەر‌و پاسەوان‌و باوەڕپێکراو لە پەلی فەرماندەیی‌و شەڕەکانی ناوچەی سەردەشت لە خزمەتی دابم هەر بۆیە هەمیشە لە دڵمدایە‌و لە حاست گەورەیی ئەو مامۆستایەم سەری رێز دادەنوێنم. سەردانواندن لە حاست ڕێبەرێک کە قوتابخانەیەک بوو بۆ فێر بوون، کێوێک لە خۆڕاگری، پیاوێک سەرتاپا ئازایەتی، پێشمەرگەیەک تا سەر ئێسقان بیر‌و باوەڕ، مەلایەک لە نیشتیمانپەروەری،زانایەک لە مەیدانی سیاسەتدا،کتێبێک لە شێعری هەمە جۆر،لە جوان چاکیدا خەونی سەدان کیژی شۆخ وشەنگ، دنیایەک بیرەوەری تاڵ‌و شیرین، سەنگەرێکی لە گیران نەهاتوو، هەمیشە دەم بە خەندە، رەنگێک لە ڕەنگە جوانەکانی "گیاڕەنگ"، هاوڕێ‌و هاوڕێبازی ئاوارە‌و قوتابیەکی بە ئەمەگی قوتابخانەی پێشەوای مەزن‌و یار‌و یاوەرو هیوا‌و ئومێدی دوکتۆر قاسملووی ڕێبەر.

ئای لە دەست ئەم ساتە وەختانەی کە ویژدان دەخەوێ، کورد دەبێتە داردەستی داگیرکەر‌و برای خۆی دەکاتە قوربانیی ماددە‌و خەیاڵ‌و ئارەزوو . ئەو رۆژەی کە دژمنی داخ لە دڵ خەونی پێوە دەدی هاتە دی، "حەسەن شیوەسەڵی" کەوتە نێو تەنووری باڕوت‌و ئاگری ساددەیی‌و دڵپاکی‌و خۆشباوەڕی، هاوسەنگەرانی سەرتاپا بوونە خەم‌و بۆ هەژاران بوو بە فرمیسک‌و داخ‌و حەسرەت.

مامۆستای ئازیز، لە سایەی ڕابردووی پڕ لە شانازیت، ئەمڕۆ پەنجەکانت بوونەتە پێنووسی دەستی مناڵانی هەژاری گوند‌و سەرجەم خوێندکارانی نیشتیمانی داگیرکراو‌و وانەی فیداکاری نەبەزینیان پێ دەنووسنەوە،سۆمای چاوە لە دەست چوەکانت بوونەتە چرای ڕیی تێکۆشانی خەباتکارانی ڕێی ئازادی، بوونە ئەستێرەی هیوا بەخشی ئاسمانی تار‌و خامۆشی نیشتیمان، بیر‌و هزرت بیر‌و هزری هەموومانە‌و ئاواتەکانت خەون‌و ئاواتمانە.

غرووری کوردانە‌و پێشمەرگانەت بە پانتایی پێدەشتەکانی کوردستانە بەڵام لە پەنا دەستت شێرە ژنیک هاوبەشی بەشێکی بەرچاوی شانازیەکانتە،هاوڕازێک کە هاوتا‌و نموونەی دەگمەنە،دایکێک سەرتاپا سۆز‌و فیداکاری،فریشتەیەک تەمەنێک لە هاوکاری‌و خۆشەویستی بۆ تێکۆشەرێکی ناوداری کورد، خاتوو "کلسووم"‌و بیر‌و هزری نیشتیمانپەروەرانەی. چەپکێک گوڵی رەنگاو رەنگ،میداڵێک لە ئیفتیخار‌و شانازی پێشکەشە بەو شاژنەی کورد.

مامۆستا گیان، هەموو ژیانت لە ڕێی کورد‌و دێموکڕات دا سەختی‌و سەرفرازی‌و نەهامەتی بوو، گەلێک شانازیت بۆ کورد تۆمار کرد‌و لە پێناویدا بە شەهیدی زیندوو ناو دەبرێی. ساڵوەگەڕی بریندار بوونی جەنابت هاوکاتە لە گەڵ ساڵوەگەڕی کارەساتی لێکترازانی ریزەکانی حیزب، کتێبی شانازیەکانی حەسەن شیوەسەڵی بۆ کۆتایی لاپەرەکانی ئەم وەرزەی ژیانت پێویستی بە تۆمار کردنی شانازی‌و شاکارێکی دیکە هەیە . هەر وەک جاران تۆ مامۆستا‌و ئێمەش قوتابی، هەر وەک جاران تۆ مامۆستا‌و من" کوڕە چکۆڵە ". چەند ساڵێکە بە دەست مەسەلەیەکی ماتماتیکەوە گیرمان خواردووە، پرسیارم لە زۆر عالم‌و زانا کرد،لە دەرگای زۆر کەسم دا، لە بەر زۆر کەس پاڕامەوە‌و دەستی زۆر کەسم ماچ کرد، کەس نەیتوانی حەلی بکات‌و هەموویان لە حاستی دا داماون. دایکی پێشمەرگەیەکی شەهید لە زمان ئاوارەی شەهیدەوە ئادرەسی تۆی پێدام‌و دەڵێ "تەنیا کەسێک کە بتوانێ ئەم مەسەیە حەل بکات مامۆستا " حەسەن شیوەسەڵی" یە"،هەر بۆیە دەستەو داوێنی جەنابت بووم، کلیلی ئەم گرێ پووچکەیە هەر جەنابتی ، مێژوو‌و ڕابردوو بە خوای ویژدان بسپێرە، دەزانم چەندە دڵ پڕی لە ژیان‌و چارەنووس‌و بە سەرهات‌و رووداوەکان، منیش دڵم پڕە لە زوخاو،گوێچکەکانم لە دەست داون هێندەی گوێم لە وشەی " بە سەرچاو، با بزانم چیم پێدەکرێ،ئەوە خەریکم، خەمت نەبێ، پەلە مەکە، جێبەجی دەبێ، جا من چکارەم ،،زەمانی دەوێ، ئیشاڵڵا خێر دەبێ‌و زۆر شتی تر کە لە بیستنی ئەم وشانە بێزارم. بیکە بە خاتری سەداقەت‌و فیداکاریت، لە بەر خاتری دایکی ئەو هەموو شەهیدانەی کە ڕۆڵەکانیان بە فەرمانی جەنابت بوونەتە گڕکانی قەڵای دژمن، بە خاتری ئەوانەی کە لە سەنگەری بەندیخانە،مەکتەبی فیداکاری جەنابت، چاوڕێی گزینگی خۆری ئازادین، بە خاتری ئەو هەموو گەنج‌و لاوانەی کە لە رێگەی پیرۆزی دێموکرات دا‌و لە سەنگەری پێشمەرگانەی بەڕێزتان دا ئامادەی گیان بەخت کردنن. دوور لە فیزیک‌و شیمیا‌و فەلسەفە، بە پێچەوانەی عیلمی ماتماتیک،بفەرموو (1+1 ) چۆن دەبێتەوە ' یەک '؟ نابێتە دوو، مێشکم پڕە لە دوو، بێزارم لەو هەموو دوو دووە،بێزارم لەبەڵێنی فریودەرانەی ئەو سیاسیانەی کە بە شێت‌و نەزانمان دەزانن. من وڵامی "یەک"م گەرەکە.

لە کۆتایی دا وێڕای رێز‌و خۆشەویستیم، سەد مخابن دەستت نییە تا دەستت ماچ کەم بەڵام تکایە با دەستی کەسیتر ماچ نەکەم، چاوەڕێی هەوڵ‌و هیممەتی جەنابتین. هیوادارم ببیە فریشتەی نەجاتی حیزب‌و ئەهریمەنی دووبەرەکی لە گۆڕ بنێی .

سەرفرازیت ئاواتمە.

قوتابیت" کەریم فەرخەپوور"

16ی سەرماوەزی 2014