"خشت اول چون نهد معمار کج..... تا ثریا می رود دیوار کج"

سەبارەت بە وتووێژی كاك ناسری ڕەزازی لەگەڵ بەرنامەی پەنجەمۆری ڕووداوو:

1ـ بە بڕوای من كەس ناتوانێ نەكۆڵی لە كەسایەتی هونەریی كاك ناسری ڕەزازی وەك هونەرمەندێكی گۆرانیبێژ‌و سروودبێژی شۆڕشگێڕانە بكات كە لە كاتی خۆیدا كاریگەریی بێ ئەملاو ئەولای هەبووە لەسەر ڕاكێشانی لاوانی كورد بۆ نێو شۆڕشی ڕەوای گەلەكەمان‌و ئێستاشی لەگەڵدا بێ هەندێ لە سروودەكانی پۆتانسیەلی ڕاكێشانی لاوان‌و گەنجانی هەیە بۆ نێو شۆڕش.

2ـ بە ڕای من هەر كەسەو دەبێ لە كۆمەڵگادا ئیشی خۆی بكات‌و بە پێی شارەزایی‌و پسپۆڕیی خۆی تەداخولی ئەو بوارانە نەكات كە پێوەندی بە هونەر‌و لێزانی ئەو تاكەوە نەبێت. هەر بەم پێیە بە دڵنیاییەوە كاك ناسر دەتوانێ گۆرانیبێژ‌و هونەرمەندێكی سەركەوتوو بێت كە جیای دەكاتەوە لە تاكەكانی دیكەی كۆمەڵگا. بەڵام بەداخەوە وادیارە كاك ناسر هێشتا هەستی بەم بوارە لە ژیانیدا نەكردووە‌و ناوە ناوە‌و بە پێی جەوی جوگرافیایی‌و سیاسیی‌و هەندێ جار حیزبیش خۆی لە هەندێ بوار دەدات كە نە شارەزایی هەیە‌و نە‌و بۆ ئەوەش دەبێ كە بە شێوەی پسپۆڕانە ڕا‌و بۆچوونی خۆی دەرببڕێ. وەك بوارەكانی سیاسەت‌و جوگرافیای سیاسی‌و سیاسەتی جوگرافیایی كە هەر كامەیان بۆ خۆیان لقێكی زانستیین كە لە ئێستادا لە زۆربەی زانكۆكانی دونیادا وەك یەكەیەكی دەرسی بەشێكە لە خوێندنی خوێندكارانی ئەم بوارانە. بەڵام كاك ناسر بە بێ هەست كردن بە پێگەی خۆی‌و زۆر نابەرپرسیارانە خۆی دەدات لەم بوارانە‌و بە بێ هیچ خوێندنەوەیەكی زانستیانە دەبێتە پسپۆڕ‌و شارەزای ئەم بوارانە. بە تایبەت لە بواری مێژووی سیاسی حیزبە سیاسییەكان‌و كار‌و كردەوەیان لە سێ دەیەی ڕابردوودا‌و تەنانەت حەوت دەیەی ڕابردووشدا. چونكوو بەو شێوەی دیارە كاك ناسر هێشتا بە تەواوی شارەزای مێژووی حەوت دەیەی ڕابردووی گەلەكەمان لە ڕۆژهەڵاتی كوردستان نییە‌و پێویست دەكات ناوبراو بە سینگ فراوانییەوە جارێكی دیكە مێژووی هاوچەرخی نەتەوەكەمان لانیكەم بۆ زانیاری خۆی بخوێنێتەوە‌و ئینجا ببێتە خاوەن ڕا لەسەر ڕووداوە مێژووییەكانی سەدەی هاوچەرخی نەتەوەكەمان. بە تایبەت لەمەڕ شۆڕشی جوتیارانی كوردستان بە ڕێبەرایەتی حیزبی دێموكرات لە ساڵەكانی 1332ی هەتاوی‌و شۆڕشی چەكداریی ساڵەكانی 46‌و 47 دیسان بە ڕێبەرایەتی حیزبی دێموكرات كە لاپەڕەیەكی مێژووییە لە مێژووی هاوچەرخی شۆڕشی ڕەوای نەتەوەكەمان بە پێشەنگایەتی حیزبی دێموكرات‌و لە هەمووی گرینگتر نەبوونی بەڵگە بۆ سەلماندنی دامەزراندنی ڕێكخراوی كۆمەڵە لە ساڵی 1348ی هەتاوییدا.

3ـ بەدڵنیاییەوە چەواشە كردنی مێژوو ئیشی ئەو كەسانەیە كە شارەزای مێژوو نین‌و وادیارە كاك ناسریش لەم بازنەیە بەدەر نییە ئەگینا هەروا بە ئاسانی مێژووی بزووتنەوەی ڕزگاریخوازانەی نەتەوەی كوردی لە ڕۆهەڵاتی كوردستان بە پێی ویست‌و ڕای ئەو كەسانەی كە كاك ناسر نان خۆریانە نەدەگۆڕی‌و غەدری لە كەسایەتیەك نەدەكرد كە ئێستاشی لەگەڵ بێت بە وتەی هەموو دۆستان‌و تەنانەت نەیارانی نەتەوەی كورد‌و لە سەرووی هەوویانەوە پان ئێرانیست‌و تەنانەت لاینگرانی كۆماری ئیسلامی‌و خودی كاربەدەستانی كۆماری ئیسلامییش، سامانێكی نەوتەویی بوو بۆ ڕزگاریی‌و ئازادی نەتەوە بەشخوراوەكانی نیشتەجێی ئێران لە چنگی ستەم‌و زۆرداری‌و زۆر نابەرپرسیارانە كەسایەتییەكانی ڕۆژهەڵاتی كوردستانی نەدبردە ژێر پرسیار‌و لە سەرووی هەموویانەوە پاكانەی بۆ تێرۆری شەهید دوكتور قاسملوو بە دەربڕینی ووشەی كۆچكردوو نەدەكرد. كە لە لایەن كاربەدەستانی كۆماری ئیسلامی‌و دەست‌و پێوەندییەكانی وەزارەتی ئیتلاعات لە ڤیەنی پێتەختی ئۆتریش شەهید كرا. پاشان كاك ناسر تەنیا لەسەر كەسایەتی كاك سەلاح موهتەدی یەك ڕەستەی باس كرد كە بە پێی وتەكانی ناوبراو، دەورێكی زۆر خراپی گێڕاوە لە هەڵایسانی شەڕی براكوژی لە نێوان حیزب‌و كۆمەڵەدا‌و ئەم بەشەی دادەنێم كە كاك سەلاح وەڵامی بداتەوە.‌و پێشم خراپ نییە كاك عەبدوڵڵا موهتەدیش لەسەر دوكتورینی سێ كوچكەكەی وەڵامی خۆی بداتەوە بۆ مێژوو، با ئەو كاتە بۆ هەموو لایەك دەركەوێ كێ ئاگری شەڕی براكوژی لە نێوان حیزب‌و كۆمەڵەدا خۆش كرد‌و كێ بە دنەی نەیارانی پێشەنگی خەباتی نەتەوایەتی كورد واتە حیزبی دێموكرات، ئەو شەڕەی گەش كردەوە. بەو شێوە دەردەكەوێت كە كاك ناسر تەنیا لەبەر ڕقێكی نەناسراو ڕەخنەی نابەرپرسیارانە لە كەسایەتی شەهید قاسملوو دەگرێ. كەسایەتییەك كە بە شایەتی مێژوو دۆزی كوردی بە جیهانیی كرد‌و بردیە نێو كۆمەڵە بڕیاردەرەكانی ئۆرووپایی‌و بە بێ هیچ چەشنە دەرمارگرژییەك كاك ناسر لەو ئاستەدا نییە كە ڕەخنە لە وەها كەسایەتییەك بگرێ. هەرچەند لە ڕوانگەی ئێمەوە ڕەخنە گرتن لە هەموو بوارێكدا ئازادە‌و بە دڵنیاییەوە ئەگەر شەخسی كاك دوكتۆر لە ژیاندا بمابایەت هەرگیز گلەیی لە كاك ناسر نەدەگرت چونكوو كەسێك كە ناوی خۆی بە هونەرمەند ناوەزد دەكات‌و زۆر بە ئاسانی خۆی بە مشەخۆری یەكییەتی‌و پارتی دەزانێ هەرگیز ناتوانێ حاڵ‌و ڕۆژی ژیانی ڕۆژانەی خۆی گشتیەت بدات بەسەر هەموو كەسانی نیشتەجێی كوردستانی باشوور‌و هەموو ئازادیخوازانی ئەم نەتەوەییە‌و بە پێی پلانێكی لە پێش داڕێژراو بۆ كاك ناسر‌و ڕێِنوینی سپیكەرمەنەكەی، ئازادیخوازانی ڕۆژهەڵاتی كوردستان بە مووچەخۆری حكوومەتی هەرێمی كوردستان یان وا باشترە بڵێین یەكیەتی‌و پارتی ناوەزد بكات. لە كاتێكدا ئەگەر شۆڕشی یەكیەتی‌و پارتی‌و بە گوتەی كاك ناسر "وردە حیزبەكانی دیكە" نەبوایەت ئێستا كاك ناسر تەنانەت پارووە نانێكیشی دەس نەدەكەوت چ بگات بەوەیكە لە خۆشترین شوێنی ئەم كوردستانەدا ڤیلایەكی تایبەتی بدەنێ.

لە كۆتاییدا تەنیا هێما بۆ قسەیەكی كاك ناسر دەكەم كە لە وتووێژەكەیدا وتی، كاتێ منداڵ بووم لەگەڵ باوكم دەچووین بۆ تاران‌و باوكم لەبەر ئەوەیكە نەكەوێتە بەر ڕقی فارسەكان خۆی بە شێعە‌و كرماشانی ناودێر دەكرد‌و ئەمەش بەدڵنیاییەوە پیشاندەری ئەمەیە كە لە ڕوانگەی كاك ناسرەوە كرماشان‌و كرماشانی نە كوردن‌و نە هەستی نەتەوەییشیان هەیە‌و زیاتر هەستی ئایینیان زاڵە بەسەر داخوازییە نەتەوەییەكانیاندا‌و جگە لەمە ئەم بیرەوەرییەی كاك ناسر سەلمێنەری ئەم بابەتەیە كە یەكەمین خشتی پەروەردەی كاك ناسر لەسەر بناخەیەكی لار دانراوە‌و هەر بەم پێیە نابێ ڕەخنە لە كەسایەتی ناسر بگیردرێ چونكوو لە خشتی یەكەمەوە بناخەی ڕاهێنان‌و پەروەدە نەتەوەییەكەی بە لاری دانراوە. بۆیە ناوە ناوە‌و بە پێی جەو‌و كوردی باشوور گوتەنی بە پێی زرووف ئەملا‌و ئەولای كردووە‌و بەردەوام خەریكی باز بازێن بووە لە نێو هەموو حیزب‌و ریَِكخراوە كوردییەكاندا.

بەشی دووهەمیش با بمێنێ بۆ بڵاو بوونەوەی بەشی دووهەمی وتووێژی كاك ناسر، با لەسەر ئەندازیاریی تلفزیۆنی ڕووداو، پێش لەوەیكە وتووێژەكەی بڵاو ببێتەوە‌و گوێبیستی قسەكانی بین، ئێمەش وەك كاك ناسر نابەرپرسیارانە یاوی ووتوێژ‌و وتار بڵاو كردنەوە نەمانگرێ...

ناردن بۆ تۆڕه‌ کۆمه‌ڵایه‌تی‌یه‌کان

بۆچوونه‌کان (2)

ناو

ئیمه‌یل

بۆچوون

بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

خوێندمه‌وه‌ ‌ و ڕازیم به‌ مه‌رجه‌کانی به‌کارهێنان

بۆچوون زیاد بکه‌ پێشبینین