هه‌ڵۆی کوردستان

-
هەڵە
  • JFolder::create: Could not create directory

دەروازەی پێوەندییەكانتان بە قوڕ دەگرین!؟

پۆستی ئەلیکترۆنی چاپکردن

 ali_zirak_-_irano_turkia(دەتوانین كەمپینی بەقوڕگرتنی دەروازەی باڵیۆزخانەی تورك و ئێران رابگەیەنین و هەر كەسێكی بەشدار بوو بە تەشتێك قوڕەوە بڕواتە خۆپیشاندان)!

(پێكانی مەبەستێك بۆ گەیشتن بە هەموو مەبەستەكان: سەربەخۆیی و جارێ‌ هیچیتر!)

بەڕاشكاوییەوە ماوەیەكە قسەی دڵی زۆر یەك لە كەڵەپیاوانی سەربزێوو ئازای كورد ئەمەیە : ساڵێك ئازادییەكانی خۆتان ببەخشن بە جەنگ و هەزاران ساڵ بەختەوەری بەدەست بێنن!!... ئەمە باس لەو رۆحە نەتەوەیییە كرچ و كاڵەش ئەكات، كە پەرتەوازەیی ماڵی كورد و بەهێزبوونی دوژمنانی لێكەوتووەتەوە.

ناسیۆنالیزمی ئیتاڵیا بۆ دەیان سەدە بەدەستی هێرشی نەتەوەكانی دیكەوە عاجز بوون ئاڵمانییەكانیش وەها بوون.جوولەكان لەدەستی هێرشی ئاشوور و میسر و پارس و رۆم و عەرەب، ژیانیان نەمابوو. كەچی گەیشتن بەو ئاكامەی كە رێگاچارەی سەرەكیی ئەوان، رزگاربوونە لە پەرتەوازەیی و... بۆ ئەو مەبەستەش دەنگی متمانەیان بە بە بارودۆخێكی تازە بەخشی. یانی لە قۆناغێكدا كێشەكانی ناوماڵی خۆیان وەلانا.

ئەو قۆناغەی نەتەوەكانی سەرەوە شەڕی ناوخۆیان فەرامۆشكرد و بۆ پاراستنی بەرژەوەندییە باڵاكان ئیرادەی خۆیان دایە دەستی حكوومەت، بە بێ‌ ئەملاولا هەموویان لە مەترسیدا بوون و كات، كاتی جەنگ و داگیركاری و دابەشكارییەكی جیهانیی دەسەڵات بوو.

بە بارێكی دیكەدا ئەم حاڵەتە - میللەتی ئێمەی لەم مانگەی رابردوودا تێكەوت - راست لەو حاڵەتانە دەچوو، كە نەتەوەكانی سەرەوە تێیكەوتن.

ئاڵمان و ئیتاڵیا كە بە دەروازە بەرەڵڵاكانی ئورووپا و... توركیاش بە نەخۆشی ناو زلهێزەكان ناویان رۆیشتبوو، كەسیش حەسێبی بۆ نەدەكردن، بە پلانی تازەوە بەرەوڕووی دوژمن بوونەوە.

بۆ یەكەمجار لە مێژووی دووهەزار ساڵەی جووی ئاوارەكراوو راونراودا، "ئەنجومەنی جیهانیی یەهوود" بە سەرۆكایەتیی "بن گۆریۆن"ەوە كە "هیستارۆد"ی هەم سوپا و هەم ئەنجومەنی كرێكارانی لەبەردەستدا بوو، بە دژی هەموو دەسەڵاتی ئەوكاتەی رۆژهەڵاتی ناوین راوەستا. بریتانیای زلهێزیان تەنیا بە گرووپێكی پارتیزانیی چەند هەزار كەسی بە ناوی "ئێشتێرن" و بە رابەرایەتیی "موناخیم بێگین" كە ئۆپۆزیسیۆنی گەورەپیاوانی ئەنجومەنی جیهانیش بوو، وەدەرنا .یانی ئەوان ئەگەر "كاك نەوشیروان"ێكیان هەبوو، هەڵوێستەكانی لەدژی داگیركەران توندتر لە بەرەی گەورەپیاوانی ناو ئەنجومەنی جیهانیی یەهوود بە رێبەرایەتیی "بگین" بوو.

"مستەفا كەماڵ" بە دروستكردنی سوپایەك لە ئەفسەرانی لاوی عوسمانی، توركیای زلهێزی ئێستای بنیات نا.

یانی لە پێناوی رزگار كردنی نیشتماندا، ئەوان هاتن و بە ئۆپۆزیسیۆنیشەوە هاوكاریی كەڵەپیاوێكیان لەناو خۆیاندا كرد. گرنگ نەبوو ئەو كەڵە پیاوەش دواتر بۆ ئەستاندنەوەی ئیرادەی نەتەوەكەی، چی بەسەر هات، بەڵام ئەو ئیرادە لەرزۆك و سووكەڵەیەی ناخی تاكەكەكانی توركی پۆڵایین كرد.

ئیتر هیچ جوولەكە و ئاڵمانی و ئیتاڵیایی و توركێكی تازە، بە چاوی سووكەوە لە دنیای تازەدا نەدەبینران.

ئەمانە ببوون بە كاراكتەرێكی تازەی بەربەرەكانی بۆ بەدەستهێنانی بەرژەوەندییەكان.

لێرەدایە كە بە پرسیارێكەوە دەست بە شیكردنەوەی بارودۆخەكە ئەكەم.

ئێمەی بێ‌ ئیرادە و كۆیلەی دراوسێكان و دەروازە ئاوەڵای، بە بەردەوامی میوانی ناو نیشتمان و هێلانەی خۆمان، كە لە بەرانبەر داگیركاراندا ئەگەرچی وەستاوین، بەڵام هیچ چەكێك... سوپا و سەربەخۆیی و تاپۆیەكی حەقیقیی وڵات و ناسنامەیەكی نێونەتەوەییمان نییە، بۆچی دەم لە فەلسەفەی دێمۆكراسی ئەدەین؟... پێتان وانییە، بۆ گەیشتن بە دێمۆكراسی دەبێ‌ بە قۆناغ و قەناعەتی رزگاركردنی خاك و بەخشینی متمانە بە پاڵێوراوو رابەر ( كەسی شیاو)ی خۆمان و دروستكردنی سوپا و پارلمانێكی یەك بریاردا تێپەڕێین؟ نەك پارلمانێك كە باس لە كوشتنی رۆڵەكانی پاش مانگێك لە دوای میدیای داگیركەرانەوە بكات؟ئەو پارلمانەی كە ئەگەر بۆ جارێكیش هەڵوێستێكی لەم شێوەیە دەگرێت پێی سەرسام ئەبین و نازانین، ئەوان ئەركیان پاراستنی كەسایەتی و كەرامەتی ئێمەیە نەك ترس لە بێگانە!

من بە باسی دروست بوونی ئیرادەی نەتەوەیی یەوە دەست پێدەكەم تا دەگەین بە ئیرادەی دێمۆكراتیك.

دنیای ئەوڕۆ بە هەرەس پێهێنان بە دیكتاتۆرەكان، دەرفەتێكی دیكەی بۆ كورد بۆ راستكردنەوەی باڵای خۆی لەژێر باری كۆیلایەتی و زنجیری بێگانەدا رەخساندووە. كوردێك كە تاكو ئێستا دۆڕاوی ناوەندی ململانێ و دانووستانەكان بووە. هەر بۆیەش نابێ چاو لە كێشەكان بنووقێنین، چونكا لە قازانجی كەسدا نییە و گەلیش پێی سەربەرز نابێت.

ئیرادەی گەل، سەرۆك و دەوڵەت و سوپای بەهێز دروست دەكات.

لە راستیدا ئەو ئیرادەیە نابێ‌ بوەستێ و خۆی سەرقاڵی كۆمەڵە بابەتێكی لاوەكی بكات و دەبێ‌ لە پێناوی ئاوەدانكردنەوەی خۆی و گەڕان بە دوای بەرژەوەندییە باڵاكانی گەلدا لە وەستان نەكەوێ.

ئێمە نەتەوەیەكی كۆیلە بووین، بەڵام دوێنێ‌ بە رای گشتیمان سەلماند نامانەوێ‌ چیدی پێمان بڵێن : بێ‌ ئیرادەن و ... دەمانەوێ‌ بۆ گەڕاندنەوەی كەرامەتی خۆمان، بایكۆتی جەستەو مێشك و گوێ و چاوو و هەموو حەز و خولیاكانمان بكەین، كە لە لایەن دوژمنان و داگیركارانی كوردستانەوە تێر ئەبن.كەمپینەكانی دژ بە كەلوپەلی ئێرانی و توركی نموونەیەكن و دەبێ‌ نموونەشیان زۆر بن.

نان و خواردەمەنی و نەستەلە و دەرمان و ئاوو كارەبا و تەنانەت فیلم و كۆمپانیا و هەموو ئەو كەرەستانەی بەشێك لە ئێمەی سەرسامی خۆی و سەرقاڵی خۆی و تەنانەت بەخۆیەوە مەشغووڵ كردووە، ناتوانن ببنە مایەی داگیركردنمان. بەڵام خۆ دەستهەڵگرتنیش لە خۆشییەكانی ژیان لەم سەردەمەدا كە پارەیەكی زۆر لە دەستی خەڵكی مەدەنیدایە، كارێكی ئاسان نییە... بەڵام بۆ كورد مومكینە.كورد توانیویەتی و دەیكات، بەڵام دەبێ‌ سەرۆكایەتییەكانیش بتوانن ئەو خۆشییانەی بە پارەو دەسەڵاتی چەند ساڵەوە بۆخۆیان بنیات ناوە، فەرامۆشی بكەن. بۆ ئەوەی بە شادی و بەختەوەری ئەبەدی بگەن. چونكا ئەم سەروەرییانە لە مێژووی میللەتدا دەمێنێ‌ و فەرامۆش ناكرێت.

من پیموایە ئەوەی باسی دەكەین مومكینە. ئەگەر ساڵێك بەڕۆژووی شت و مەكی داگیركەرانی كوردستان بین، بە دڵًنیایییەوە بە زۆر شت دەگەین.

كشت و كاڵی كوردی دەبووژێتەوە. كارگەی خۆماڵی گەشە دەكات. ئیرادەی بەرهەمهێنان دەچێتە سەرەوە و دەتوانین "ژاپۆن"ێكی بچووك بۆ خۆمان دروست بكەین."میتانی"یەكانی پێش زایین لەم كوردستانەدا ئەوەیان كرد. خەباتی مەنفیی كورد لە دژی بێگانە بووە هۆی گەشەی پیشەسازیی خۆماڵی و دەستی لە هەورامان. چین- ییەكان هەتا پێڵاوی خۆیان دروست نەكرد، سەرۆكەكەیشیان پێڵاوی لە پێ‌ نەكرد. ئەمانە بوونە هۆی ئەوەی نەتەوەیەكی وریا و ئاگادار لە بەرژەوەندییەكانی خۆیان لەدایك ببێ. پیاوانی جەنگی ژاپۆن بۆ پاراستنی بەرژەوەندی و كەرامەتی خۆیان – هەموو شێوە چەكێكیان لە دژی دوژمن بەكار هێنا و كاتێك زانییان ناتوانن سەركەون، جوامێرانە بۆ نیشتمانەكەیان خۆیان دا بە كوشت.

كرداری خۆكوژیی فڕۆكەوانانی ژاپۆنی و مێهرەبانیی ئێستای ئەوان دوو نمونەی مۆڕاڵی كەرامەت پارێزی ئەوانە بوون، كە خاوەنی گەورەترین گەشەی زانستی لە دنیادان.ژاپۆنێك كە بۆ پاراستنی خۆی، مرد و دیسانەوە هەستایەوە. بەڵام لە هەستانەوەیدا ئیدی بوو بە دەوڵەت، هێز... داهێنان، پێشكەوتن و هەموو شت.

جا پێویستە ئێمەش خودی كۆنی خۆمان بكوژین. یانی لە پێناوی پاراستنی كەرامەتی نەتەوەییمان، ئامادە بین "خود"ی ترسنۆكانەی خۆمان لەگۆڕ نێین و بەڵێن بدەین:

ئیتر شووتی ئێرانی نەخۆین !

نەستەلەی توركی و مریشك و شتە سەرنجڕاكێشەكانیان نەكڕین و بە ئێكسپایەری بۆیان بنێرینەوە!

بەڵێ شتەكانیان نەخۆین و بە ئێكسپایەری بۆیان بنێرینەوە!

ئێمە دەبێ‌ دەروازەی باڵوێزخانەكانیان بە قوڕ بگرین... بەڵێ‌ بە قوڕ بگرین!

دەڵێم سەرۆكەكان گوێم لێبگرن : چۆنە لە خۆتانەوە دەست پێبكەن؟!

"گاندی" ئەوەی كرد.

بە بێ‌ زیاد و كەم "كۆنفێدراسیۆنی هێزە كوردستانییەكان"دەبێ‌ دروست ببێ‌ و كۆبوونەوەی یەكەمی خۆی لەم وەرزەدا و لەژێر ئاگر و گوللەدا گرێ‌ بدات.هەر لەو كۆنگرە نەتەوەیییەدا دەستووری پەلامار بدەن و پێیان بڵێن: بەرژەوەندییەكانتان لە هیچ كوێیەكی دنیادا ناپارێزێن.

بە ئەفسەرە كوردەكان بڵێن: فڕۆكەی شەڕكەرمان پێویستە!... 50 تەیارەی شەڕكەر دەمانكات بە هێزێكی ترسێنەر!

بڕینی سندووقی دراوەكانی ئەوان دەمانكات بە خاوەن داهات. و ئەوانیش دەنیشێنێتە سەر عەرز.

سەیرانگاكانیان بكەن بە ئامانج و شوێنە ئابوورییەكانیان تێك بدەن.

ئەوانەی پێیانوایە شێواندنی ژیانی خەڵك یەكسانە لەگەڵ ئاوەدانكردنەوەی ماڵی ئەوان، لە هەڵەدان. پێچەوانەكەیشی راستە.

ئەو نەتەوانەی باسمكردن، هەموویان لە هەلومەرجی وەك ئەوڕۆدا دیسانەوە لەدایكبوون.بەڵام لە بەرانبەر دوژمندا هەموو شتێكیان كرد. تەنانەت لە هەموو شێوە خەباتێك خۆیان نەبوارد.

كەوابوو دەكرێ بڵێین: قۆناغی رزگاری پێش قۆناغی دێمۆكراتیكە... ئەمەش نابێ ببێتە هۆی ئەوەی ئێمە لەگەڵ خۆمان نائینسانی بجووڵێینەوە. كەچی دەبێ‌ بۆ گەیشتن بە هەموو مافەكانمان، بەشێك لە مافەكانمان فیدا بكەن.ئەمەش پیشاندەری ئەو راستییەیە كە دێمۆكراسی نابێتە رێگرمان، بەڵام نابێ‌ دێمۆكراسیش كێشەی نەتەوەیی و بەرژەوەندییە باڵاكانمان بۆ دروست بكات.

هێرشی نیوملیۆنی، یانی درۆیەكی زەلام!

لەم ماوەیەدا زۆر سێناریۆی پەلاماردان بۆسەر هەرێمی كوردستان تاوتوێ كراوە.

گرووپی "ئامریكا توركیا و ئێران" بە تەمابوون كێشەی گەورە دروست بكەن.

لە باڵوێزخانەی ئامریكاوە دەستووری ئەوە دەبیسترێ‌ كە بۆ پاراستنی هەرێم و سنوورەكانی، هێزی ئامریكایی و پێشمەرگە رەوانەی سنوور بكرێن.لەوانەشە هێزی تورك لە باكووردا جێگیر بكرێن.

خۆ لەوانەشە ئێران بێتە سەر سنوور و هێزەكانی جوند و قاعیدە جێگیر بكات.ئەمەش زەنگی مەترسیی شەڕێكی تاتبەتە و كوردستان تێیدا نوقمی خوێن دەبێت و ئاوەدانییەكەشی نامێنێ‌ و سەربەخۆیی خۆیشی دەدۆڕێنێ‌. یانی شەڕی سوپای ئێران و ئیسلامییەكان لە بەرانبەر ئامریكا و توركیادا لەسەر عەرزی هەرێمی كوردستان دەبێتە هۆی داگیركرانی بەشێكی دیكەی خاكی هەرێم و... كورد تووشی زیان دەكەن. یانی دەبێ‌ هەوەڵ بدەین یارمەتییەكانی ئامریكا و ناتۆ بۆ پاراستنی هەرێم وەربگرین، نەك تێكدانی رەوشی كورد!

بەسەر 15ملیۆن كورددا (300هەزار سەرباز) باز نادەن!

درۆیەكی مێژوویی لە میدیای تورك و فارسەوە بیسترا بۆ ئەوەی كێشەو ئاڵۆزییە ناوخۆیییەكانیان ون بكةن.

لە قەندیل و شەڕی كوردستان دیسانەوە وەك بلۆف و مەترسییەكی مێژوويی بۆ گیانی بەرژەوەندییە گشتییەكانیان كەڵكیان وەرگرت و پێیانوابوو دەتوانن دیسانەوە"سێ‌ سنوور" ێكی دیكە و خنكاندنێكی دیكە دروست بكەنەوە. ئیتر ئەم سيناريۆیە بە كرچ و كاڵی و بة درۆ بڵاوكردنەوە دەستی پێكردووەتەوە.كەچی من پێموایە : ئێران لەوە عاقڵترە هێزەكانی لە شوێنێكدا كۆ نەكاتەوە! چونكا سەددامیان بەو شێوەیە لە پایتەختدا ئیفلیج كرد.

توركیا ش لاموانییە ئەوە بكات. ئەگەر 220 هەزار سەرباز بهێنێتە سنوورەكان، ئانكارا لە كیس ئەدات.چونكا ئیرادەی كورد لە باكووری كوردستاندا ئیرادەیەكی ئازادە و تازە دەستی بە رەوتێك كردووە، كە گەڕانەوەی بۆ نییە.

لە مێژە لە "یەكیەتی ئورووپا" باسی وەرگرتنی تورك بە ئەندام ناكرێت!

سەرۆك!..."خەڵاتی ناتۆ"بە كەسێك نادرێ‌، ئەگەر بە كەسی نەزانن.ئەمە هێزی پشتیوانی نەتەوەكەتە و وەك شمشێرە سێحرییەكان بەكاری بێنە!

لە مێژووی كورددا بۆ یەكەمجار دانپێدانانی گەورەی سیاسی بەو شێوەیەی ئەمساڵ بینراوە.ناتۆ بە روونی خەڵاتێكی گەورە ئاراستەی كورد دەكات.لێرەدا ئیتر پرسیارێك دێتە ئاراوە: ئایا لە مێژووی ناتۆدا خەڵاتی وا بە تورك و ئێرانی و عەرەب دراوە، كە ئێمە نەتوانین بە هێمایەكی باش و دەسپێكێكی باش بۆ پێوەندییەكانمان لەگەڵ دەرەوە و زلهێزەكان كەڵكی لێوەربگرین؟

كورد و ناتۆ و تورك : بازدانێك بەسەر جەستەی توركیادا بۆ گەیشتن بە ئاوە گەرمەكان

لە كۆنەوە "پێتر"ی مەزن، ئیمپراتوور و كەڵە پیاوی ناو پاشاكانی رووسیا شتێكی وتووە، كە هەموو ئورووپای سەرسامی ئەو وتەیەی خۆی كردووە. وتوویەتی: ئەوەی دەستی بە ئاوەگەرمەكان بگات دەبێ‌ بە پاشای هەموو جیهان، كە لەراستیدا مەبەستی ئەو هەمان خەلیجی (عەرەبی و فارسی)یە. ئەوەی تەنانەت ئێستاش مشتومڕ لەسەر ناوەكەی دەكرێت.

كورد بەشێكە لەو نەتەوانەی كە ئەگەر یارمەتییەكی دەرەكیی باشی بدرێت، ئەوا لەو سووچەوە كە بە ئەهوازدا تێپەڕ دەكات، دەگاتە خەلیج و دەشتوانێ‌ وڵاتێك بێت - لە پاش وەرگرتنی كورد بە ئەندامەتی ئورووپا لە باكووریەوە و یەكگرتنەوەی پارچەكانی - ئورووپا بكات بە خاوەنی ئاوی گەرم. ئەمەش وێڕای ئەوەیە كە ئیتر هەژموونی ئورووپا لە ناوەندی وزەی جیهانیدا زیاتر دەكات و قیمەتی "یۆرۆ" دەگاتە لووتكەی خۆی، كە ئاواتی یەكیەتی ئورووپایە، دۆلاری ئامریكا و هەژموونی ئەم جمكە مڵۆزمەیان كەم بكەنەوە.

كورد لە دوو جەمسەری بێ پشتیواندا دەتەقێتەوە و تەنیا دوژمنانیەتی زەرەر دەكەن.

سەربەخۆیی و دوایین وتە: نۆرەی ئێوەیە دەنگی گەل!

گورووپێك لە زانایان،5مەیموونیان لە قەفەزێك دانا و لە ناوەراستی قەفەزدا پەیژەیەك و لەسەر پەیژەكەش مۆزیان دانا.

هەر كات مەیموونێك دەچووە سەر پەیژەكە، زاناكان ئاوی ساردیان دەكرد بە مەیموونەكاندا.پاش ماوەیەك ئەگەر مەیموونێك بە رێكەوتیش برۆیشتبایەتە سەر پەپژەكە، هەموو مەیموونەكان پەلاماریان بۆ دەبرد و تێیان دەسرەوان.

پاش ماوەیەك هیچ كام لە مەیموونەكان – لەگەڵ ئەوەیدا حەزی لێیبوو كەچی – نەیدەوێرا بڕواتە سەر پەیژەكە.

زاناكان بریاریان دا، كە یەكێك لە مەیموونەكان بگۆڕن یانی جێگۆڕكێی پێبكەن.

مەیموونی تازەهاتوو یەكەم كارێك كە كردی چوونە سەر پەیژە بوو، كە هەموو مەیموونەكان هێرشیان بۆ برد و لێیان دا.

پاش چەندجار خواردنی لێدان، مەیموونە تازەكە بە بێ‌ ئەوەی هۆكارەكەی بزانێ‌، فێر بوو، كە نەڕواتە سەر پەیژەكە.

مەیموونی دووهەمیشیان گۆڕی و ئەو رووداوە دیسان (بۆ مەیموونی تازە) رووی دایەوە.

سێهەم مەیموونیشیان گۆڕی و ئەو رووداوە بۆ جارێكیتر روویدایەوە. مەبەستمان لێدان لە مەیموونە تازەكەیە.

هەر بەو شێوەیەش مەیموونی 4 و 5 یش گۆڕدران.

ئەوەی كە مابووەوە گورووپێكی پێكهاتوو لە 5 مەیموونی تازە بوو، كە بەسەر ئەوەیدا هیچ ئاوێكی ساردیان بەسەریاندا نەكردبوو، ئەو مەیموونەی كە بچووبایەتە سەر پەیژە، بە دەست ئەمانەوە لێدانی دەخوارد.

بەڵام خۆ لەوانەبوو ئەگەر لە مەیموونەكان بپرسن : بۆچی ئەو مەیموونەی كە بڕواتە سەر پەیژە، ئێوە لێیدەدەن؟... لە وەڵامدا بیانگوتبایە :"من نازانم ئەمە رووداوێكە كە لە دەوروبەری ئێمە روو دەدات"

ئەم وەڵامە بە ڕای ئێوە لە كۆمەڵگای ئیمڕۆژیی ئێمەشدا ئاشنا نییە؟

سیاسەتوان و زانا و تەنانەت پسپۆڕانیشمان بۆ وەڵامی پرسیارە تازەكانیش كە رووداوی تازەی نزیك لە خۆیانن، بەو شێوەیە لێكدانەوە دەكەن: هەروا بووە و هەرواش هێناومانە و دەبێ‌ واش بڕۆین... زۆر شتیش بۆ ئێمەی كورد بڤەیە و ناشزانین هۆیەكەی چییە!

هەزار ساڵ ئورووپا لە ژێر باری دەسەڵاتی رەهای پاپا و پاشا دا وەكو مەیموونەكانیان لێهاتبوو، هیچكەس پرسیاری لە كەس نەدەكرد، بۆچی ئەو هەمووە غەدرە لە مرۆڤ دەكرێت، تاكو كابرایەكی قەشە بە كڕینێكی ئاسایی و بە بزۆزییەك دنیای بەسەر ئەواندا رووخاند.ئەو كابرایە جەهەننەمی كڕی و ئیدی كەس نەمایەوە بەهەشتی نەبێت! ئێمەش دڵنیاین دەتوانین ئەم كارە بە بزۆزیكردنێكی بچووك لە ناو پارلمانی خۆماندا بكەین،تەنیا بەو مەرجەی گومانمان لە راستییەكانی دەوروبەرببێ و بە سانایی بڕوا بە چارەنووس نەكەین

پارلمان ئەگەر بریاری سەربەخۆیی بدات، ئەوا بریاری جەنگیشی داوە.ناوچە جێناكۆكەكان و عەرەب و توركی دەمارگرژ، لەوانەیە هێرشێكی توند بكەن. سوپای كورد بۆ سێ‌ قۆڵی (باكوور و باشوور و رۆژهەڵات) دابەش ببێت. لەگەڵ ئەم دابەش بوونە، ئێمە پێویستمان بە راماڵینی هێزی عێراقە، یانی شەڕی بەرەی لاوازی باشوور گرانترە لە بەرەی بەهێزی باكوور و رۆژهەڵات. ئەمەش هۆكاری خۆی هەیە.

هێزەكانی ئێران و توركیا لەوانەیە نەوێرن زۆر بێنە قووڵایی، كەچی عەرەبەكان و توركمانی دیالە و كەركووك لەوانەیە زۆر شت بكەن، چونكا زۆربەیان لە ماڵ و حاڵی خۆیاندا نین و تاپۆی مالەكانیشیان ساختەیە. هەر بۆیە شەڕی ئەوئایدیا دەكەن، كە لەسەر ئەو بنەمایە بۆ ئەو عەرز و موملەكەتە بەڵێندراوە كۆچێندرابوون، شەڕ دەكەن كە بمێننەوە.

هەر بۆیەش دەبێ‌ شەڕی ئەو عادەتە غەڵەتەی خۆمان بكەین و بە چاوو گوێ بەستراوی تەسلیمی لێدانەكانی مرۆڤەكانی دەورووبەرمان نەبین كە نازانن بۆچی لە سەرمان ئەدەن كە : نابێ‌ لە دژی دراوسێ ناحەزەكانمان شەڕ بكەین و كاتنێكیش لێیان دەپرسین، ئەفەرموون نازانین و لە مێژە ئەم نەریتە هەیە لە بەرانبەریاندا مل كەچ بكەین!؟

 

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1735
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy