هه‌ڵۆی کوردستان

-
هەڵە
  • JFolder::create: Could not create directory

تەورێز و ورمێ‌/ خۆپیشاندان و نائارامییەكان بەردەوامن

پۆستی ئەلیکترۆنی چاپکردن

wrme_tawrez

1ـ خۆپیشاندان و ئیعترازی شاری ورمێ‌ كوژرانی دوو هاووڵاتی

كوردپا: لە كاتژمێر 6ی ئێوارەی شەممە رێكەوتی 12ی خەرمانان، خۆپیشاندانە ئیعترازییەكانی خەڵكی شاری ورمێ‌ بە بۆنەی وشك بوونی گۆلی ورمێ‌ جارێكی تر دەستی پێكردەوە و زۆربەی شوێنەكانی ئەو شارەی گرتۆتەوە و بەهۆی دەستڕێژی هێزە نیزامییەكانی ئێران دوو كەس گیانیان لە دەست داوە.

بەپێی راپۆرتی هەواڵنێری ئاژانسی هەواڵدەریی كوردپا لە ورمێ‌، جارێكی تر شەپۆلی ئیعتراز و خۆپیشاندان لە دوانیوەڕۆی رۆژی شەممە رێكەوتی 12ی خەرمانانەوە شاری ورمێی گرتۆتەوە پێكهاتەكانی خەڵكی ئەو شارە بۆ وێنە، كورد و ئازەری و ئەرمەنی لە زۆربەی شەقامەكان دەستیان داوەتە ئیعتراز و خۆپیشاندان.

كاتژمێر 6ی ئێوارە ئێعترازەكان لە شەقامی عەتاییەوە دەستیان پێكردووە و لە سەرەتای بازاڕی ورمێ‌ و مەیدانیی سەرەكیی شار سەدان كەس دەستیان داوەتە خۆپیشاندان و دروشم دان.

هەزراران هێزی ئەمنیەتی و نیزامی تەیار بە چەك و لیباس شەخسی لەناو شەقامەكانی شار جێگیر بوون و شەڕ و تێكهەڵچوونی قورس لە نێوان خۆپیشاندەران و هێزە ئەمنیەتییەكاندا هاتۆتە ئاراوە و دەستڕێژیان لە خۆپیشاندەران كردووە و دوو كەس كوژراون و چەندین كەسی دیكەش بریندار بوون.

لە درێژەی راپۆرتەكەی هەواڵنێری كوردپادا هاتووە، بەرەبەرە خۆپیشاندانە ئیعترازییەكان شوێنەكانی دیكەی شاریشی گرتۆتەوە و لە شەقامەكانی تاڵەقانی و موتەهری تێكهەڵچوونێكی قورس لە نێوان لاوان و هێزە نیزامییەكانی ئێراندا هاتۆتە ئاراوە و خۆپیشاندەران چەندین تایەی ماشینیان ئاور تێبەر داوە و هێزە نیزامییەكان لەوێش دەستڕێژییان لە خەڵك كردووە.

هێزە نیزامییەكان لە ترسی پەیوەست بوونی خەڵك بە خۆپیشاندەران هەموو ئەو رێگا و كۆڵانانەی كە بە شەقامەكانی ئیمام و عەتایی دەبەسترێنەوە گرتوویانە و هێزێكی زۆری ماتۆڕ سەروار بۆ ترساندن و بڵاوە پێكردنی خۆپیشاندەران بەناو شەقامەكاندا مانۆڕ دەدەن.

لە راپۆرتەكەی هەواڵنێری كوردپا لە ورمێ هاتووە، لە شار و گوندە كوردنشینەكانی دەوروبەری ورمێ‌ كەش و دۆخێكی نیزامی و ئەمنیەتی هاتۆتە ئاراوە و هەموو هێزە نیزامییەكان لە ئامادە باشی دان و ترسی خۆپیشاندانێكی بەرین لە گۆڕێ دایە.

هێڵی مۆبایل و تەلەفۆنی شاری ورمێ‌ پچڕاوە و ئینتێرنێت زۆر بە ئەستەم كار دەكات.

هەتا كاتی گەیشتنی ئەم هەواڵە خۆپیشاندانە ئیعترازییەكان لەنێو شاری ورمێ‌ بەردەوامن.

هەتا ئێستا لەمەڕ ناو و شوناسی كوژراوەكان و رێژەی بریندارەكان و هەروەها وردەكاریی زیاتر لەبەر دەستدا نیە.

لە مانگی رابردوودا تەرحی دوو فەوریەتیی گەیاندنی ئاو بە گۆلی ورمێ‌ بە مەبەستی پێشگیری لە وشك بوونی، لەلایەن مەجلیسی شۆرای ئیسلامییەوە رەت كرایەوە و ئەمەش بووە هۆی بەرینتر بوونەوەی ئیعترازە مەدەنی و خەڵكییەكان و سەرەنجام بەهۆی بەرینتر بوونەوەی زەخت و گوشارە ئەمنییەتییەكان و دەستبەسەر كرانی چالاكانی مەدەنی و ژینگە پارێز ئیعتراز و خۆپیشاندانەكان لە حەفتەی رابرۆدۆوە دەستیان پێكرد و بە توندوتیژی كێشران و زۆرێك لە شارەكانی هەر دووو پارێزگای ئازەربایجانی رۆژئاوا و رۆژهەڵاتی گرتەوە.

 

2ـ تەورێز و ورمێ‌/ خۆپیشاندان و نائارامییەكان بەردەوامن و دۆخی ئەمنیەتی ـ نیزامی شارەكانی هەر دوو پارێزگای ئازەربایجانی داگرتووە

كوردپا ـ راپۆرتی پوخت، لە درێژەی ئیعتراز و خۆپیشاندانی خەڵكی شارەكانی تەورێز و ورمێ‌ و دەوروبەر لە ئیعتراز بە وشك بوونی گۆلی ورمێ‌:

رۆژی‌ شەممە شەپۆلە ئیعترازییەكان لە شاری تەورێز و دەستیان پێكردەوە و لە تێكهەڵچوونەكاندا كۆمەڵێكی دیكە دەستبەسەر كران.

هەواڵنێری ئاژانسی هەواڵی كوردپا لە تەورێز و ورمێ: دوابەدوای چەندین بانگەواز كە لەلایەن هێندێ‌ تەشكیلات و كۆمەڵەی ئازەربایجانی، چالاكانی مەدەنی و ژینگەپارێز بڵاو كرایەوە، كۆمەڵێكی بەرچاو لە خەڵك لە ئیعتراز و خۆپیشاندانی بەرینی ئەمڕۆی شارە جۆراوجۆرەكانی ئازەربایجانی رۆژئاوا و رۆژهەڵات و بەتایبەت تەورێز و ورمێدا بەشدارییان كرد.

لە درێژەی كەش و دۆخی ئەمنیەتیی دوێنێ‌ شەودا هەر لە سەر لە بەیانیی ئەمڕۆوە كەشێكی تۆخی ئەمنیەتی ـ نیزامی شارەكانی ئازەربایجان و بەتایبەت دوو شاری گەورەی ورمێ‌ و تەورێزی داگرتووە، كۆمەڵێكی بەرچاو لە خەڵك لە دەوروبەری مەیدانی ئازەربایجان لە تەورێز كۆبوونەتەوە و دەستیان بە دروشم دان كردووە و بەدەیان كەس دەستبەسەر و بۆ شوێنێكی نادیار راگوێزراون و راپۆرتەكان باس لەوە دەكەن سەركوتی خەڵك و تێكهەڵچوونی توند هاتۆتە ئاراوە و بەتایبەتی لە مەیدانی ئازەربایجان كۆمەڵێكی بەچاو لە ژنان بەر لێدان و گیرانی هێزە ئەمنیەتییەكان كەوتوون.

ماشینی ئاوپژێن و بەكارهێنانی گازی فرمێسك رێژ بۆ بڵاوە پێكردن و ترساندنی خۆپیشاندەران بەكار هێنراوە، خۆپیشاندەران بە دروشمی جۆراوجۆر بە زمانی ئازەری درێژە بە ئیعترازەكانیان دەدەن و هێزەكانی گاردی تایبەت و دژە شۆڕش لە بەشی باكووری مەیدانی ئازەربایجان هێرشێكی بەربڵاویان كردۆتە سەر خەڵك و نزیك بە 20 كەس بریندار بوون كە باری تەندروستیی 4 كەسیان نالەبارە و هێزە ئینتزامییەكان بەبێ‌ لەبەرچاو گرتنی حاڵی بریندارەكان، بۆ شوێنێكی نادیاران راگواستوون.

هەواڵنێری كوردپا لە درێژەدا نووسیویەتی، لەلایەكی دیكەشەوە هێزی بەسیج هێرشیان كردۆتە سەر بنەماڵەكان لەناو پارك و شوێنە گشتییەكان و ترس و وەحشەتیان لەناو خەڵك دروست كردووە و هەر كەس كە جلوبەرگی سووری لەبەردا بێت دەستبەسەر دەكرێ‌.

شاهیدانی عەینی باسیان لەوە كردووە سەرنشینی تەواوی ئەو ماشینانەی كەلە شارەكانی دیكەوە رەوانەی تەورێز بوون لە بازگەكان بە توندی لێپرسینەوەیان لێ‌ دەكرێ‌ و كارتی ماشینەكانیان لێ‌ وەرگیراوە.

لە شاری ورمێش خۆپیشاندان و ئیعترازەكان بە هێندێ‌ درەنگییەوە بە دانی دروشمی میللی دەستیان پێكردۆتەوە و هێرشی هێزی ئەمنیەتی ـ نیزامی و گاردی دژە شۆڕش لەوێ بۆ سەر خۆپیشاندەران زۆر بەربڵاو و توندوتیژ بووە و بۆ بڵاوە پێكردنی خەڵك لە هەموو كەرەسەیەك كەڵكیان وەرگرتووە و هەواڵەكان باس لەوە دەكەن یەكێك لە چالاكانی سیاسی بەناوی" سەعید خزرلوو" كە جلوبەرگی سووری لەبەردا بووە دەستبەسەر كراوە.

شاهیدانی عەینی باس لە دەستبەسەر كرانی 80 كەس لە كۆبوونەوەی ئیعترازیی ئەمڕۆی تەورێز دەكەن و هەتا ئێستا لە كۆی گیراوەكانی ئەمڕۆ و دوێنێ‌ تەورێز و ورمێ‌ تەنیا ناوی ئەم كەسانە ئاشكراوە:

تەورێز: رەسووڵ رەزەوی، داوود شیری، سەمەد كەریمی، حەسەن خوویی،حەبیب پووروەلی، حوسێن عەبدوڵڵاهی، عەلی باباپوور، حامد حوسێنی، جەلیل عەلەمدار میلانی، حوجەت موختارزادە، مەهدی محەممەدپوور، عادڵ خەندان.

بوستان ئاباد: عەلی سەلیمی، كازم واحیدی، سەعید سیامی.

ورمێ‌: سەعید خزرلوو

لە ورمێ‌ پاركی "ائللرباغی" كۆمەڵێكی بەرچاوی خەڵك و چالاكانی سیاسی و مەدەنی كۆبوونەوەیەكی ئیعترازییان پێكهێناوە كە تێكهەڵچوون لە نێوان خەڵك و هێزە ئەمنیەتییەكاندا هاتۆتە ئاراوە.

بە وتەی شاهێدانی عەینی لە شاری تەورێز لە كاتی تێكهەڵچونی نێوان خۆپیشاندەران و هێزە لیباس شەخسییەكان، لاوێكی تەمەن 20 ساڵە لە شەقامی شانازی تەورێز بە دەستڕێژی راستەوخۆی مەئموورێكی لیباس شەخسی كوژراوە و لە رووداوەكانی دوێنێ‌ ئێوارەی "ورمێ"یشدا بە وتەی شاهیدانی عەینی بە دەستڕێژی گوللە دوو كەس گیانیان لە دەست داوە و بە دەیان كەسی دیكەش بریندار كراون كە 13 كەس لە بریندارەكان بۆ نەخۆشخانەی موتەهەریی ورمێ‌ راگوێزراون كە 4 كەسیان لەباری تەندروستیی خراپ دان، بە وتەی شاهیدانی عەینی، توندوتیژی نواندنی هێزە ئەمنیەیتییەكان بەدژی خەڵك لە رادەبەدەر بووە و ئاستی بەشداریی خۆپیشاندەرانیش لە جاری پێشوو بەربڵاوتر بووە.

هەواڵنێری كوردپا لە درێژەی راپۆرتەكەیدا نووسیویە، هێزە بەسیجییەكان كە زۆربەیان لاوانی تەمەن 25 ساڵ بوون بە لوولەی پۆلیكا لە شەقامەكانی ورمێ‌ وەك: ئەرتش، ئەمینی، باكری، خەیام، زانستگە و شەقامەكانی دیكەی شاردا جێگیر بوون.

بە وتەی پەرستارێكی نەخۆشخانەی موتەهەری مەئموورانی لیباس شەخسی سەردانی نەخۆشخانەیان كردووە و هێندێ‌ لە بریندارەكانیان بۆ نەخۆشخانەی عارفیان كە سەر بە سپای پاسدارانە، گواستۆتەوە.

شایەتحاڵەكان باس لەوە دەكەن بینای پارێزگای ئازەربایجانی رۆژئاوا و دەنگ و رەنگ لەلایەن سپای پاسدارانەوە كە چەكی قورس و دۆشكایان پێیە پارێزگاری دەكرێن و كەشێكی توندی ئەمنیەتی شاری داگرتووە و هەر كەسێك بە دووربین و موبایل گرتەی ویدیۆیی و وێنە هەڵبگرێت، كەرەسەكەی دەستی بەسەردا دەگیرێ‌ و بۆ خۆشی دەستبەسەر دەكرێ‌.

لە دوێنێ‌ ئێوارەوە بڵاوبوونەوەی ماهوارەی یۆتێل سات لە شارەكانی دوو پارێزگای ئازەربایجانی رۆژئاوا و رۆژهەڵات و شارەكانی دەوروبەریان بەهۆی ناردنی پارازیت پچڕاون. كێشە لە هێڵی تەلەفۆن و مۆبایلدا هاتۆتە پێش و ئینتێرنێت زۆر بە ئەستەم كار دەكات.

ە مانگی رابردوودا تەرحی دوو فەوریەتیی گەیاندنی ئاو بە گۆلی ورمێ‌ بە مەبەستی پێشگیری لە وشك بوونی، لەلایەن مەجلیسی شۆرای ئیسلامییەوە رەت كرایەوە و ئەمەش بووە هۆی بەرینتر بوونەوەی ئیعترازە مەدەنی و خەڵكییەكان و سەرەنجام بەهۆی بەرینتر بوونەوەی زەخت و گوشارە ئەمنییەتییەكان و دەستبەسەر كرانی چالاكانی مەدەنی و ژینگە پارێز ئیعتراز و خۆپیشاندانەكان لە حەفتەی رابرۆدۆوە دەستیان پێكرد و بە توندوتیژی كێشران و زۆرێك لە شارەكانی هەر دووو پارێزگای ئازەربایجانی رۆژئاوا و رۆژهەڵاتی گرتەوە.

 

 

 

ناردن بۆ تۆڕه‌ کۆمه‌ڵایه‌تی‌یه‌کان
جاری خوێندراوه‌: 1907
بۆچوونه‌کان (0)Add Comment

نووسینی بۆچوون
بچووکردنه‌وه‌ی خانه‌ی بۆچوون | گه‌وره‌کردنی خانه‌ی بۆچوون

busy